『各位團友早晨，今日同聽日我哋都會以遊覽布拉格為主，今日我哋會去到布拉格嘅城堡區；睇聖維特教堂；行查理四世大橋；然後我會帶大家食午飯，飯後，我哋會睇天文鐘，每逢搭正，我哋可以見到十二門徒出現，而且會有個骷髏骨敲鐘；之後會有一段自由時間比大家，大家可以自由暢遊布拉格市；集合後，我哋會遊船河睇伏爾塔瓦河兩岸景色，船上已經包埋自助餐，團友可以邊吃邊欣賞兩岸風景；之後我哋就會返酒店。』
﹝2008年9月16日上集﹞
「晨早起床，清新開朗，陽光溫暖，帶來無限美……」晨早起床，就真係清新開朗，溫度依然係13°C左右；但係就唔覺得陽光溫暖，可能太陽伯伯怕醜啦，唔知匿埋咗去邊，唉~~
﹝從酒店窗外可以知道天色如何……﹞
原來今日行程都幾緊密，再加上天氣較涼而且大風，所以今日係比較辛苦d；一朝早，我哋就上咗呢個布拉格城堡區，臨入去之前，有2個兵大哥喺度站崗，好似d台灣兵咁，郁都唔郁，我都唔明點解d遊客咁鐘意走去同個兵大哥影相呢？全世界人排晒隊咁影相，不分國籍，總之係人都走埋去啦！更難明嘅就係連我自己都走埋去影，唉~~真低能。
﹝與布拉格城堡區兵大哥合照﹞
同呀兵大哥影完相之後就入去個城堡區行，原來呢個城堡區都好大，而且仲有好多嘢影，就等我影多幾張相先。臨入去之前，我竟然見到布拉格嘅飛虎隊，好勁呀！不過，睇真dd之後先知，原來佢哋係油漆工人吧~~
﹝布拉格飛虎隊﹞
﹝城堡區一帶﹞
﹝城堡區﹞
行城堡區就去睇聖維特大教堂，唔知咩解究，一早就已經有好多遊客到咗，一路食住風一路等，有相為證啊，真係好多人o架，我身後邊呢班就係德國團呢！
﹝排隊入聖維特大教堂﹞
呢班德國團個導遊企我隔離，佢用d唔咸唔淡嘅英文問我：「扎泵？」，我諗咗一陣先知道佢問我係唔係日本人，Japan也！我話唔係，我答佢Chinese，佢唔明；咁我就話China，佢依然唔明；有無搞錯呀，China都唔識！話晒剛剛先搞完奧運吖！我再講Hong Kong，佢就即時點頭話識，真吹漲~~
入到去聖維特大教堂時，身邊有好多嘢睇，不過我就覺得唔係咁靚，最靚都係d窗門，所以影得多d。
﹝聖維特大教堂的窗門﹞
睇完教堂就行去查理四世大橋。
﹝往查理四世大橋途中﹞
行咗一陣間，終於o黎到查理四世大橋，條橋都幾得意，會有唔同嘅雕像樹立喺橋兩邊，夾埋大約30個左右，有部份維修緊，無維修嗰d我又唔係好想影，黑「mun mun」一舊，都唔知似乜，有一兩個白淨d嘅我就影咗。橋上面都會有街頭藝人同一d地檔賣嘢。
﹝查理四世大橋及周圍﹞
呢個就係其中一個街頭藝人，原來同佢影相係要比錢o架，不過唔係強制性，初初我都唔知，但當我見到個鼓上面d字時，係咁2比d就算，反正無一個固定價錢呢！
我真係去過查理四世大橋o架，跟我讀一次吖，「Karluv Most」！
睇完查理四世大橋就去食飯，飯後行程轉part b，謝！
留言列表
