牧志 Station Hotel > 海洋博水族館 > Fruitsland > 名護菠蘿園 > 萬座毛 > 嘉手納美軍基地展望台 > 北谷美國村 > 國際通

有睇過『戀戰沖繩』嘅都應該知道我哋已經到咗萬座毛嘞!至於點解呢度叫做『萬座毛』,聽領隊話就好似係可以坐一萬人嘅草地嘅意思,而『毛』就即係草喎……其實嚴格嚟講,我哋唔係去咗萬座毛,而係遠觀萬座毛喞,只要沿住舖設好嘅行人路向前行,就可以欣賞到因海浪長年侵蝕而形成嘅象鼻懸崖,唔知會唔會有朝一日個鼻蝕甩咗呢?

萬座毛

 340 萬座毛021.JPG  

睇到啲相,雖然覺得呢度好似幾舒服,但係其實我哋影嘅時候係好辛苦㗎!由於呢度係沖繩主要景點,而且得一條路行,人人行到望到萬座毛嘅角度,都企晒喺度,唔捨得走,我哋等咗好耐先至有機會同象鼻影相,未影到象鼻前,唯有Zoom埋去影吓啲『毛』先啦……不過比我哋發現毛上面有個人喎,喺邊?自己搵吓啦!

萬座毛嘅毛

 340 萬座毛008.JPG  

兜咗個圈就出番去集合,見到未齊人,又熱熱哋,我哋就去咗個汽水機度㩒嘢飲,順便睇吓有冇沖繩限定嘅可口可樂嘛!不過可惜都係冇,於是㩒咗其他嘢飲,就係以下果一款,係咪好特別呢?起碼香港未見過有得賣嘛……不過……如果你好鍾意飲糖水的話,可以不妨一試,否則,都係試另一啲比較好。

復刻『糖』飲料

 340 萬座毛055.JPG  

離開咗萬座毛,旅遊巴行咗大約一個鐘頭左右,忽然見到街上有好幾個姐姐仔喺度不斷同路過嘅車揮手,起初仲以為佢哋喺度示威,不過見佢哋打扮得咁Kawaii,又唔多似喎,於是都係問吓領隊先﹝呢個就係跟團嘅好處,唔明有得即刻問﹞……原來呢兩日撞啱選舉日,呢位當然係拉票小姐啦~~明白晒!

拉票小姐

 350 嘉手納美軍基地展望台009.JPG  

轉個彎就到下一個景點 -- 嘉手納美國空軍基地,唔係……應該係嘉手納美國空軍基地展望台至真,嚟呢度目的係可以喺近距離睇吓美軍飛機升降同巡邏嘅情況,順便望吓個好大嘅美軍基地咁啦……

嘉手納美國空軍基地

 350 嘉手納美軍基地展望台019.JPG  

不過我哋喺個展望台睇咗好耐,都只係見到呢架巡邏機喺度盤旋,仲係超高空盤旋果種;個相機 zoom盡先影到,望都望到頸梗,真係『值得一睇』!

高高高空中嘅美軍巡邏機

 350 嘉手納美軍基地展望台024.JPG  

其實呢個所謂展望台,我哋覺得佢只係一個鄰近美軍基地嘅中途休息站而已,除咗頂層嘅展望台外,三樓仲有個介紹美軍軍機同軍備嘅展覽館,而地下就係手信店同小食亭,仲有樣嘢,就係喺搭電梯上展望台前記得『cup』番個紀念印 bor~~

嘉手納美國空軍基地展望台 = 鄰近美軍基地嘅中途休息站 -- 道の駅﹞

 350 嘉手納美軍基地展望台036.JPG  

最重要嘅係,喺呢度嘅汽水機有沖繩限定可口可樂呀!就係中間果行矮矮地果兩罐……我哋係咁㩒、係咁㩒、係咁㩒,好似㩒咗6-7罐出嚟,哈哈……終於買到嘞!臨走仲喺手信店買咗兩盒海葡葡 tim~~

﹝沖繩限定可口可樂﹞

 350 嘉手納美軍基地展望台040.JPG  

今日嘅行程最後一個景點就係北谷美國村,其實佢就係喺距離美軍基地唔係好遠嘅地方,相信係起嚟比啲美軍放假時嚟消遣嘅,為免佢哋思鄉病發作啩!都未落車就見到個大大嘅摩天輪,寬闊嘅街道,夾雜住啲好有建築特色嘅商店,好有美國 feel,令人一啲都唔似置身日本嘅感覺……

不過我哋喺個村口附近影咗幾張相就行咗出村,點解?因為我哋有更重要嘅嘢想做 lor~~

美國村

 360 北谷美國村024.JPG 360 北谷美國村027.JPG

Hehehe~~ 就係去食壽司喇!

雖然行完美國村我哋就會去食飯,但係都敵唔過壽司嘅威力,再加上之前喺人哋嘅 blog度睇到話呢度間壽司舖幾抵食,仲會有一套特別嘅埋單方法 tim~~多多事幹嘅我哋,就梗係要嚟睇一睇啦!

﹝迴轉壽司市場美浜店﹞

 360 北谷美國村036.JPG  

入到嚟好似冇乜特別咁,不過啲嘢食就好新鮮,又係即叫即整,仲有一啲喺香港唔會食到嘅壽司,例如:海葡葡軍艦同旗魚壽司咁;對於最鍾意食壽司嘅我哋,嚟得日本又點可以唔食餐飽吖!

壽司中

 360 北谷美國村040.JPG  

我哋總共食咗 9碟壽司+1個壽司 set,大約 2,000円,都算抵食!嚟到埋單嘅時候嘞…… 只須要『棟』好啲碟,唔洗分好顏色,個職員只要用個類似 scanner嘅物體一掃就已經知道要收幾多錢嘞,勁!﹝張相係咪影得好清楚呢?梗係啦,我哋嚟之前已經做咗功課,知道有呢樣嘢,所以埋單前已經攞住個相機去捕佢㗎嘛!﹞

埋單 scanner

 360 北谷美國村045.JPG  

比個 scanner掃完後,佢就反轉最上面果集碟表示埋咗單,然後遞咗張類似 access card嘅咭我哋,咁我哋就攞住出去比錢就可以喇,好方便呀!仲有就係,呢度啲人勁有禮貌,不過個厠所嘅清潔程度就好一般,唔緊要啦,啲嘢食乾淨咪得 lor~~

壽司完

 360 北谷美國村047.JPG  

食完壽司出返去,個天都已經開始日落 lu~~ 我哋沿住大路行出沙灘,途經嘅商店、食肆同摩天輪都相繼着燈,加上千變萬化嘅日落景色,感覺真係好得無比,實在好難用言語去形容,甚至依家睇返當時影嘅相,都仲有啲激動……點解會激動?我都唔知,睇完以下呢幾張相試試搵唔搵到答案啦!

﹝日落中嘅美國村﹞

360 北谷美國村056.JPG 360 北谷美國村021.JPG360 北谷美國村063.JPG 360 北谷美國村077.JPG  

行到出沙灘,我哋影咗幾張懶有詩意嘅相之後,發覺對岸民居嘅燈都逐漸開着,忽然驚覺到時候已經唔早 lu~~我哋仲要趕返去行 Jusco,然後再集合,至於做乜要行 Jusco呢?就梗係有原因啦……﹝1﹞:呢度間 Jusco好大,﹝2﹞:朝早見到領隊介紹果隻藥粉,喺呢度有得賣,﹝3﹞:睇吓買唔買到防牙石牙刷,因為我哥哥上次嚟沖繩買過,覺得好好用,所以托我哋買多幾支,﹝4﹞:嚟得日本,除咗食壽司外,就梗係想行藥房啦,不過沖繩又真係唔多覺有藥房喎,所以 Jusco藥房都殺!

基於以上種種原因,我哋不得不『平令彭爛』行返去啦……

美國村沙灘

 360 北谷美國村066.JPG  

一個轉身,原來已經黑晒天,晚上嘅美國村,可能因為着晒燈,感覺同日頭完全唔一樣,好似好熱鬧咁,不過我哋都係係咁意影咗幾張相就算,趕時間嘛!

行到入 Jusco,見到好多團友喺度徘徊;又係嘅,如果我哋唔係去咗食壽司,喺度行咗咁耐,唔想走至奇,再加上佢哋冇食嘢,都係時候肚餓,更加想快啲集合啦!不過我哋呢,就一於好少理,行完藥房再行家品部,結果皇天不負有心人,比我哋買到防牙石牙刷,6 sets 牙刷加6 sets牙刷頭,比我哋掃晒,好爽呀!

晚上嘅美國村

 360 北谷美國村104.JPG  

之後就梗係去食飯啦,呢餐係食日式火鍋自助餐,不過食乜對我哋嚟講都唔係好重要,因為都仲有啲飽……其實好在我哋食咗嘢咋,呢餐啲食物差得很,二人份量嘅火鍋得幾件,出去任攞嘅嘢食種類又少,唔怪得之早前個領隊猛叫啲團友又加和牛,又加鮑魚啦,如果唔係都唔知搵乜餸飯餸烏冬!

﹝松鶴日式火鍋店

 370 回國際通晚餐002.JPG  

講開加餸,我哋對個領隊呢餐嘅分枱方法其實唔係幾滿意……

因為呢間餐廳嘅座位有兩種,有啲係卡位,有啲係長枱;加咗餸果啲團友可以坐卡位,我哋明白;至於我哋呢啲冇加餸嘅,都應該係以先到先得嘅方法安排餘下嘅卡位啩!但結果就唔係,而係:『你係等等先,後面果兩個過嚟坐卡位,再後面果兩個就去坐長枱啦!』到佢用啲唔知乜嘢標準去安排好晒其他團友入坐後,我哋就問佢咁我哋坐邊?佢先至好是旦咁話:『你哋坐埋喺長枱啦!』咁我哋頭先等乜唧!不過算啦,同我哋同枱啲團友都幾好傾,我哋講吓報名時候啲嘮氣嘢,又分享吓大家自由活動嘅行程,好快又食完一餐 lu~~

冇嘢食嘅日式火鍋餐

 370 回國際通晚餐003.JPG  

食完飯啲團友好多都返酒店,我哋就梗係唔會咁早啦,行吓行吓去咗間啲嘢都幾抵買嘅超市,我哋買咗兩條沖繩苦瓜同些少零食做手信,不過返到香港兩條苦瓜都熟咗一半,浪費晒!仲有,呢間超市嘅價錢牌係用電子顯示㗎,都幾先進!

抵買超市

 370 回國際通晚餐006.JPG  

呢間超市其實距離我哋間酒店唔係好遠,所以原本諗住行完就返去,不過諗諗吓又想pre-visit吓國際通先,費事聽日唔夠時間行嘛!唔知係咪日頭行得太趕呢,我哋竟然留意唔到原來國際通兩旁嘅樹,好多都係喺第二度運嚟種嘅,樹幹上面仲有個牌,寫住佢嘅樹名、原產地同埋生長情況咁樣;好似呢棵為例,雖然我哋唔知啲日文講乜,但係就知佢係喺石桓島嚟嘅,咁我哋即使去唔到,都可以同番棵樹合照,當係去咗嘛……哈哈!

﹝石桓島樹﹞

 370 回國際通晚餐010.JPG  

講番我哋點解覺得聽日會唔夠時間,要嚟國際通pre-visit咗先吖……咪就係因為我哋喺國際通有好多地方要行 lor~~ 例如要去搵藥房,幫朋友買沖繩褐藻素啦;又要去食海塩雪糕喎;仲要經過平和通り去搵壺屋通同埋去第一牧志公設市場睇月光貝……唔睇定啲地方點樣去,點可能半日內行晒呀!

國際通 pre-visit

 370 回國際通晚餐022.JPG  

不過,結果係點……睇埋 Day4就知道!

arrow
arrow

    CK Lam 發表在 痞客邦 留言(0) 人氣()