﹝2011年09月14日﹞
三宮 > 神戶
好快就到咗三宮lu~~ 其實三宮都可以算係神戶嘅中心地帶，因為無論係搭阪神 / 阪急、又或者坐JR / 地鐵，只要係嚟神戶，都應該會經過三宮，而且各種電車站都喺正市中心，想搵唔到都幾難！
可惜今次行程帶我哋嚟三宮，目的並唔係要去試搭電車，而係去商店街shopping~~ 不過對於我哋呢啲冇乜shopping癮嘅人嚟講，shopping咪就等於自由活動囉……正！
旅遊巴喺三宮商店街前面放低我哋之後，我哋喺藥房係咁意行咗個圈，就開始起程去尋找我哋嘅『$0自費』之旅，第一站：花花時計公園，個公園其實冇乜特別，而且好細，裡面只係有兩支圖騰、幾張凳同一大個鐘，不過鐘上面嘅花就好似會因應唔同季節而改變嘅，至於呢度點解會出名呢？我諗就只係因為附近有個地鐵站，而呢度周圍都係商業大廈，所以要嚟方便認路而已……
﹝花花時計﹞
話口未完，我哋就真係行錯咗路……雖然一早做咗功課，又帶咗平板電腦download咗地圖，但係都竟然行多咗個街口先轉彎，再加上呢度啲街唔係四四方方，過咗個路口轉彎就要行多好多路lu；不過錯有錯著，竟然比我哋路過呢個紀念碑，先知道原來神戶係馬拉松嘅發源地，真係唔係路過都唔知！
﹝馬拉松發源地﹞
第二個景點原本係生田神社前面個鳥居，傳聞呢間生田神社好似就係藤原紀香舉行婚禮嘅地方，不過都未搵到又見有啲攰，咁啱路過間好大間嘅Family Mart，咁我哋就入去掃咗幾包零食兼買咗支嘢飲坐低飲，冇錯！係『坐低飲』，可能知道我哋攰，安排間有位坐嘅Family Mart比我哋，感謝主！
坐飽就再次出發去搵鳥居，呀！仲未講點解我哋要搵呢個鳥居噃……因為根據旅遊書所講，呢個鳥居坐落喺商業區嘅繁忙街道、十字路口旁邊，好似將傳統同現代放埋一齊咁，所以好特別囉，不過當親眼見到嘅時候，又唔覺得佢好特別，所以影咗兩張相就走咗lu~~
反而行多冇幾遠，見到大大座神戶大丸同前一條街嗰間唔知乜廟喺埋一齊仲得意，可惜間廟前面泊滿車，結果只係影咗個廟頂+大丸比大家幻想吓啦！
﹝古、今，東、西方建築文化交流﹞
仲有，呢度附近有間類似賣油畫用具嘅舖頭，個老闆娘勁好人，我哋只係買幾張postcard喞，都竟然有discount，而且張postcard係以神戶夜景做主題，仲好鬼靚tim~~望過對面竟然見到幾支『木遁』留低咗嘅柱，不過就唔見『大和隊長』喺度，哈哈！
喺十字路口離遠見到元町商店街，就係要轉彎嘅時候喇，轉咗彎只要一直行，就會搵到元町站，喺元町站斜對面向前行冇幾遠，就到咗我哋嘅『$0自費』之旅第三站：古古怪怪Shopping Mall~~
﹝三宮中央通一帶﹞
就係我哋身後面呢座建築物嘞！係咪好古怪呢？呢個商場叫Mediterrasse，外表雖然好特別，其實裡面根本同一般商場無異！
嚟到呢度，我哋嘅『$0自費』之旅又要結束lu~~只要沿住古怪Shopping Mall向右轉，就會見到我哋要返去集合嘅三宮商店街出口，快行埋三宮商店街，就會到返入口旅遊巴放低我哋嘅地方，之後就一齊去食飯……講真吖，其實我仲有啲地方想去，例如去睇超巨型鐵人28展覽，不過因為要搭車去，驚住趕唔到返嚟而作罷，只係喺三宮同元町行咗個圈咋~~
﹝古古怪怪Shopping Mall﹞
講返呢個商店街，地下除咗有名店同潮流服飾外，樓上仲有書店同HMV，本來就冇乜特別，不過加咗四條友仔喺度拖慢個快門扮晒嘢玩自拍，係咪即刻覺得冇咁悶呢……哈哈！如果啲路人可以再行快啲的話，相信個效果會更好！
﹝四條友仔扮晒嘢@三宮商店街﹞
講真呢個商店街都有樣嘢值得一提嘅，就係貨品介紹唔單只放喺牆上面嘅廚窗內，連地下面都唔放過，真係既有創意，又能夠善用空間；不過如果想望真啲件貨，豈不是要踎喺度睇？ 踎多兩踎，小心比人踩到兼起唔返身噃~~
﹝地下廚窗﹞
出到嚟集合地點，都已經開始天黑lu~~再望多一眼神戶市中心，我哋就要上返旅遊巴，啟程去食晚餐喇！是日晚餐：BBQ……
﹝黃昏的三宮市中心﹞
……唔係BBQ；係BBQ + 松阪牛 + 神戶牛柳 + 牡丹蝦，因為我哋之前order咗嘅松阪牛同神戶牛柳，今晚可以喺呢間燒肉店度燒咗佢，而牡丹蝦，就一蝦兩食，個頭同樣攞去燒，啲肉就梗係一啖食咗佢啦！
﹝松阪牛&神戶牛柳合照@燒烤店﹞
呢一餐，我哋重金禮聘咗其中一個朋友幫我哋燒牛肉，既然已經有人煮嘢，咁我哋雙手又咁得閒，咁就盡力影相同拍movie啦。可能我哋係成團人中食得比較『豪』嘅一group，所以隔離檯班師奶成日喺度問長問短，『呢啲係咩牛呀？』，『哦~~松阪牛~~好唔好味呀？』，『神戶牛好味啲定松阪牛好味啲呀？』，『啲牛你哋買咗幾多錢呀？』……總之就不停咀係咁問，其實我已經有啲不耐煩，唔知係咪佢哋啲男人都覺得佢哋煩，所以係咁叫佢哋擰番轉頭唔好阻住我哋食嘢。
算！唔講佢哋，講番啲嘢食先，牡丹蝦超大隻，由蝦頭到蝦尾，仲長過一隻手板，而且隻隻個肚都有一大抽蝦子，蝦肉超甜，蝦頭仲有好多膏tim~~而兩種牛當中，我就覺得松阪牛好食過神戶牛，雖然神戶牛貴啲，但松阪牛可能因為好多油花，燒完食落脆脆地，完全冇渣，正！神戶牛反而有啲靭，但係就牛肉味重啲。
唔知大家係咪覺得呢度無嘢食呢？其實呢度係食放題嘅，所以仲有好多其他嘢食嘅，而且汽水任飲，只不過，根據上次黑潮市場嘅經驗，我哋唔想再浪費食物，所以我哋主力食晒啲自費食物先，而當我哋食完蝦同牛都已經飽咗七、八成，所以其他嘢都係食咗少少就放棄，不過臨走都食埋支雪條先上旅遊巴~~
﹝極上滿足BBQ餐！﹞
食完飯，我哋仲未返酒店，皆因仲要去神戶港睇夜景，神戶港除咗有神戶塔同對岸嘅Mosaic摩天輪外，呢度仲有間幾靚嘅教堂仔，行上條天橋上面欣賞呢一帶，就可以一覽無遺，不過橋上面都幾大風，如果用腳架影相，就要小心啲喇！
﹝神戶港夜景﹞
離開神戶港，我哋就啟程返酒店lu~~點知喺酒店門口見到有架私家車比警察抄牌，雖然唔知佢究竟發生乜嘢事，但係就見啲日本警察同酒店職員都好似好緊張咁……
臨落車前，領隊同我哋講附近有間便利店，不過唔知收幾點，有興趣可以去行吓喎，因為我哋會住呢間酒店兩晚，今晚唔行，聽晚行都得……hehe，我哋梗係會行咗先啦，睇吓有乜嘢買之餘，仲要pre-visit吓附近有乜嘢行，聽朝早啲起身去行吓嘛~~
﹝日本『型』警﹞
呢間就係我哋連住兩晚嘅神戶Portopia Hotel，個lobby超大，皆因呢度其實係展覽場地，國際會議都有機會係度開，唔整靚啲，日本國咪好冇『飛士』，靚還靚，不過就遠咗啲囉……
﹝Kobe Portopia Hotel﹞
上房放低咗行李，我哋就出咗去行，由酒店大堂二樓行出天橋，經過咗單軌高架電車站﹝市民廣場站﹞落返地面，沿住大馬路向上一個站方向行大約10分鐘，見到一棵大樹同個類似大型屋苑嘅地方，就係便利店所在，去到嘅時候，好在仲未閂門，竟然比我哋掃到啲合味道限量阪杯麵，其實仲有抽獎㗎，不過因為我哋冇日本地址，所以冇得參加，嘥咗！買完嘢，我哋係咁意plan咗聽朝嘅晨運路線，就乖乖地行返酒店休息lu~~
﹝酒店附近便利店……其實都唔太附近！﹞
今晚我哋出嚟，除咗要去便利店外，就順便睇埋點樣搭車由市區返到嚟，因為我哋聽日唔會跟團玩足一日環球影城，所以自由活動之後就要自己搵車搭返嚟喇，至於我哋會去邊呢，就留返Day4至講嘞！最重要係睇落返嚟酒店都幾簡單，喺三宮搭Portliner第5個站落車，就可以沿住天橋行返酒店，不過都係幫個路線圖影張相先，費事有乜意外嘛……
﹝Portliner路綫圖+酒店地圖﹞
最快返到酒店嘅出口係『東出口』，沿天橋向國際會議場方向直去，就會見到酒店二樓商場嘅入口，如果想喺酒店正門返入去呢，就要喺另一個出口出喇，再經過個公園仔就會行到去，不過係乜嘢出口，我就已經唔記得咗lu~~﹝反正都唔會咁行嘛！﹞
﹝返回酒店路線﹞
今晚講住咁多先，聽日會係行程最精彩嘅一日，待續……
留言列表
