﹝2012年10月23日﹞
香港 > 高雄 > 旗津 > 船帆石
呢篇blog原本係應該有個前傳嘅，而我亦都好想為呢次旅行寫個前傳。因為呢次係我同老公第一次真真正正自由行，除咗機票係老公哥哥幫我哋訂之外，由做落地簽證、到search民宿、傾接送、定行程、搵租車……所有嘢都係我哋『親力親為』去完成；而且，因為我哋兩公婆都唔多識講/聽國語，所以溝通時，盡量將所有細節都喺email度問得清清楚楚，問完又問，問完又再問，﹝諗住可以﹞避免去到台灣要講國語嘅機會……仲有就係，老公為咗去到墾丁能夠自駕，專登搵師父補咗幾個鐘，將佢個雪藏咗n年嘅車牌解凍，夠激嘛！
……但係到今日要落手寫blog嘅時候，就好似好多細節都唔係太記得，冇辦法啦，唯有post返個我哋嘅計劃行程同大家分享住先啦！
﹝Itinerary﹞
言歸正傳，我哋終於等到出發嘅日子，本來應該好興奮，但係因為前幾日有朋友結婚，忙到乜都冇時間諗，連行李都係出發前一晚先執，結果……眼住瞓出機場。由於預先做咗online check-in，去到港龍櫃台只須要搞寄行李，同埋攞返張boarding pass就得；不過離開櫃台前，個空姐同我哋講咗兩句我哋完全聽唔明嘅說話，可能係佢太溫柔，亦可能係我哋太眼瞓，總之叫佢重複多次嗰兩句說話，我哋都只係聽到『……北極星，……』，就咁樣，我哋就帶住滿頭『問號』行入離境大堂！
今次我哋要去嘅登機閘口係507……嘩！乜有咁大號碼嘅閘口咩？好在香港國際機場啲指示非常明確，好容易就搵到個閘口……嘅方向；原來507係要搭接駁車去另一個停機坪嘅，呢個時候我哋亦都明白晒剛才個空姐講乜lu……我估佢係叫我哋去一個叫做『北衛星』嘅停機坪搵507號閘口，並唔係要我哋去搵『北極星』！
﹝北衛星的清晨﹞
經過大約個半鐘頭嘅機程，我哋終於到咗高雄，不過一落機就已經好迷茫，原來冇咗領隊、冇咗導遊，落咗機係會唔知想去邊……哈哈！
﹝高雄，我哋嚟喇！﹞
我哋十吓十吓行去等攞行李時，見到有個職員用條鐵枝頂住啲剛出嚟嘅行李，唔知驚撞爛件行李定驚佢會轆出條輸送帶呢？可能係怕啲行李飛咗落地，要搵人去執啩！不過一個轉頭就唔見咗佢……
﹝『專人招呼』行李員﹞
離開機場，超級容易就搵到捷運站；我哋第一個行程就係拖住個行李去西子灣，參觀打狗鐵路故事館……點知去到買車票問題就出現咗，原來自動售票機係唔收NT1,000嘅紙幣，點算！結果老公去咗票務處，講咗啲唔咸唔淡嘅國語，話比個職員知我哋冇散紙，佢真係好好人，幫我哋買完兩『個』單程票，仲送埋我哋入閘~~
﹝請留意：高雄捷運係唔收NT1,000紙幣ga！﹞
真方便，鐵路故事館真係喺正西子灣站旁，仲係免費入場tim~~
不過可能時間尚早，計埋我哋，嚟呢度參觀嘅人數埋都唔夠十個，場面非常冷清……
﹝打狗鐵路故事館﹞
館內展覽咗好多以前鐵路站有關嘅物件，另一邊就有個站長室同會客室之類，有興趣嘅，仲可以攞佢啲鐵路資料慢慢刨；呢個館仲設有Outdoor部份，不過除咗啲火車型號唔同之外，同大埔墟嗰個火車博物館分別唔多大，最奇怪係有兩隻變色龍花卉喺條路軌上面，唔知代表乜呢？Anyway，反正我哋嚟呢度，重點都係為咗cup印仔啫~~冇錯，呢度有成盤印仔任你cup，不過我哋記得帶印仔簿，唯有cup喺啲白紙度先啦！
﹝重點推介：超級無敵cup印仔﹞
根據行程，我哋係約好咗司機11:00嚟呢度門口等，司機嚟到就會打電話比我；其實對於『司機嚟到就會打電話比我』呢件事，我已經有啲緊張，不過諗住只要係收到個講國語嘅電話，即使唔識聽，都知道係司機到咗啦~~ 點知到差不多11:00嘅時候，我個電話真係響，電話裡面嘅人亦都係講國語，但係……佢竟然係一把女聲同我講：「dae bu chi，@#$%^&*……」
好驚呀~~！
我唔係驚司機甩底搞亂我哋嘅行程，而係開始明白到，喺台灣玩，原來真係要識講少少國語ga~~ 冇辦法啦，唯有硬住頭皮同佢講：「梳晚衣then巧嗎？」﹝又驚佢聽唔明，又驚比側邊啲人聽到~~﹞我用盡咗畢生最大嘅理解能力+專注力去分析呢個電話嘅內容，50%嘅內容大致上係話：「約定咗嘅包車因為xxx會遲15分鐘先到，要我哋喺故事館等一等……」由於始終覺得有啲不安，所以我哋喺故事館門口踱來踱去，終於都等到有架車停咗喺我哋面前，不過竟然係架的士，乜原來喺高雄『包車』=『的士』？個司機姐姐快手快腳落車一邊解釋遲到原因﹝我相信係！﹞、一邊就幫我哋上行李，比佢睇咗我哋個預計行程後，跟住佢就開車帶我哋喺高雄玩半日先入墾丁，司機姐姐好好人，一邊揸車一邊介紹吓高雄之餘﹝雖然我哋唔係太明……﹞，仲幫我哋慳啲時間玩﹝詳見下聞！﹞~~
﹝好好人嘅司機姐姐，下次去高雄，希望遇番佢啦！﹞
司機姐姐見我哋個行程上，會喺入墾丁前去前打狗英國領事館食tea，佢就建議我哋第一站去先，因為領事館就喺國立中山大學附近，只要轉兩個彎就到，而且去完旗津回程唔使兜返西子灣~~**慳咗時間玩(#1)
話咁快就到達目的地，咦，領事館呢？原來想去前英國領事館，係要爬上呢幾條長長嘅樓梯嘅~~﹝嚟呢度除咗好似我哋咁call車之外，仲可以由西子灣捷運站搭1號線巴士都嚟；當然仲可以步行40多分鐘前往啦！﹞
﹝國立中山大學旁﹞
爬吓爬吓，我哋終於『爬』到上嚟樓梯頂，但係眼前就只見到間廟同側邊有幾個檔口仔，原來要經過啲檔口仔，先至會見到個賣飛嘅counter；不過臨過去前我哋發現間廟前面有部壓銅板機，個sample都幾靚，於是就入咗NT30落部機度，諗住都摟一個啦，點知塊銅板出到嚟，得1/3嘅位置有圖案咋，豈有此理！！
﹝前英國領事館門口﹞
呢個前打狗英國領事館嘅外觀設計真係好英式，有啲似港大嘅一角；沿建築物旁小路向海邊方向望過去，可以清楚見到旗津半島近燈塔嗰邊，另一個角度就係高雄港，風景唔錯呀……嚟睇風景之餘，記得將張入場劵嘅票值當錢用返喎；我哋就用咗嚟買嘢食，而且仲發現呢間餐廳有樣新奇嘅玩具﹝枱面黑色著住燈嗰個﹞，原來其實佢只係個震動器，提你出去攞嘢食啫，哈哈~~ 除咗食嘢，攞張入場劵去門口個手信店買嘢都一樣可以當錢用！
﹝前英國領事館內﹞
食飽就落返去join司機姐姐入旗津，不過佢同我哋講架的士要過隧道才去到旗津，要兜好遠而且會浪費我哋嘅時間，建議車我哋去鼓山輪渡站先坐船過去，行咗炮台同旗津燈塔先，佢會預番時間去對岸碼頭附近接我哋，之後再去旗津嘅其他景點；對我哋嚟講，可以搭多樣交通工具，梗係『leu飯應』啦！司機姐姐諗得真係周詳……**慳咗時間玩(#2)
﹝無端端可以搭到船，太捧喇！﹞
由鼓山到旗津嘅船程，其實大約只須5分鐘，比天星小輪由中環去老尖仲要快，而且坐得舒服啲；我哋坐嘅呢架渡輪，名為『旗鼓一號』，臨落船見到另外一隻『卡啦伊』嘅渡輪，名為『旗鼓二號』，相信呢條航線如無意外應該係得呢兩隻船交替航行，仲有，呢種船嘅下層係可以載埋電單車ga，我哋都係落船才發現呢！
﹝旗津，我哋嚟喇！﹞
落咗船，好容易就搵到路牌去燈塔+炮台，不過行到去分叉路就要決定先去燈塔還是炮台，其實都係一樣，因為兩邊都通嘅，由燈塔上就會由炮台落，由炮台上就會由燈塔落，我哋行咗燈塔先，大概行咗10分鐘嘅斜路，就到達燈塔入口處……
﹝人生交叉點：去燈塔還是去炮台好呢？﹞
旗津燈塔範圍唔係好大，室內展覽嘅物品亦有啲無謂，但係環境都唔錯，最可惜係遇到好多『強國』遊客，好唔容易先搵到個冇乜人嘅位影相，唉~~
﹝旗津燈塔﹞
怱怱遊完旗津燈塔就去睇炮台，沿途經過一個類似防空洞嘅山窿，當我哋走埋去睇吓嘅時候，見到隧道尾有光，覺得呢條隧道係可以通去下面嘅，但由於怕唔知會去咗邊，而且條隧道好似有啲污漕，所以我哋考慮咗一陣就決定唔行落去，企喺門口影張相就算，點知原來影相都有罪！呢個窿表面冇乜嘢，其實係個野狗竇；影緊相嘅時候，已經聽到『胡胡』聲，影完張相，有6隻狗兇神惡殺咁衝上嚟追住我哋，幸好，我哋無事，安全撤退……大家路經呢個山窿時千其唔好走埋去呀！驚驚~~
﹝內有惡犬！﹞
比狗兇完之後，我哋就諗住『拿拿臨』去影埋個旗津炮台跟住落山搵返司機姐姐會合定吓神啦，點知原來呢個旗津炮台根本就冇任何大炮喺度，只有個疑似曾經放過大炮喺度嘅『遺跡』、仲有啲『手繪』大炮圖案顯示嘅公厠、同埋一個旁邊有塊寫住『旗津炮台古蹟故事館』牌坊嘅窿 ，個窿我哋冇行到入去裡面，因為怕又有狗撲出嚟；事實上，之後呢幾日行程，我哋都有若干次被狗兇嘅經歷，唔知係台灣啲狗特別兇，還是我哋已經比佢嚇窒咗，總之，依家諗起都仲有啲驚！
﹝旗津炮台﹞
落山時途經一個瞭望台嘅地方，可以見到整個海岸公園嘅景色，感覺好舒服，影完相就漫漫行返到碼頭，原來司機姐姐已經到咗，等緊我哋喇！
﹝回程往碼頭與司機姐姐集合﹞
上返的士，司機姐姐第一站就係帶咗我哋嚟海岸公園，因為呢個海岸公園嘅沙係黑色嘅，所以比較特別，行遠啲仲見到隻『巨蟹』同『Q版雞泡魚』tim，不過呢度熱死辣辣，我哋影完相就9秒9飛返上的士lu~~
﹝海岸公園﹞
櫈都未坐暖，就已經到咗第二個景點，原來海岸公園對面有個市場仔，要買旗津手信，就嚟呢度啦，我哋試食過一、兩檔，但係就覺得唔多啱我哋口味，所以乜都冇買到，但係如果肚餓的話，行返轉都應該可以飽到兩、三成！
﹝旗津市場﹞
行完街市，我哋問司機姐姐係咪有條星光隧道喺附近？點知佢竟然話唔係太清楚，一輪雞同鴨講之後，佢終於大概估到個位置，二話不說就U-turn返海岸公園，沿旁邊條路仔直入咗條村，可惜原來搭車係穿唔到去個隧道嘅……冇辦法，唯有行過去啦！經過艘維京船後再直去，就會見到星光隧道個指示牌，留意附近行嘅時候請小心，人同單車係要一齊行呢~~
隧道內嘅天花同牆身都畫咗好多星座嘅夜光圖案，相信夜晚睇會靚好多；而隧道出口就係剛才喺旗津炮台望落去嗰條好長嘅堤壩，仲有幾個紀念卑，不過條長堤係鎖住，行唔到出去嘅，所以影咗兩張相就行返轉頭lu~~
﹝星光隧道﹞
喺旗津……其實係高雄嘅最後一站就係風車公園，故名思義梗係有好多風車啦，而且仲有好多『海洋生物』tim！如果時間充足，呢度其實有座貝殼館，好似都幾多嘢睇，不過我哋要趕日落前去下一個景點，只好放棄佢啦！
﹝風車公園﹞
點解咁緊張一定要日落前到達下一個景點呢？原因係喺呢個旅程能夠嚟到呢度嘅機會只得一次，而且我哋唔知個exact location喺邊度，只知道係喺前往墾丁途中，喺南行嘅行車線旁邊有啲咖啡坐，可以一邊嘆咖啡，一邊睇日落……諗起都寫意……
我哋懷住戰戰兢兢嘅心情，經過枋山附近，開始見到一啲大大少少嘅咖啡坐，原來一帶都有好多檔，而且檔檔都好有特色呢~~ 我哋就係幫趁呢間叫『巧匠』嘅，皆因佢有車位泊車，而且仲有樓上雅座……我哋就係咁，一邊飲咖啡食pan cake，一邊睇住呢個景，正嘛？雖然未能夠睇到日落，但係都心足啦~~
﹝路旁咖啡坐﹞
﹝Leisure Tea…… NT380 only﹞
嘆完tea，可能tea氣攻心，我同老公一上返的士就瞓咗，醒嘅時候已經黑晒天，差不多去到恆春lu~~ 我哋今晚係住喺船帆石，一間叫『小徑』嘅民宿；而小徑最出名嘅，就係嗰間叫『船屋』嘅房，我哋就係book到呢間咁出名嘅房喇，係咪好羨慕呢！﹝起初我哋都覺得係……﹞
終於嚟到船帆石，司機姐姐送到我哋嚟『小徑』門口，仲幫我哋落埋行李，見佢咁好人，我哋就比多咗NT200佢做tips，唔知多定少呢？喺地下大廳登記入住後，我哋要沿住民宿門口旁邊嘅樓梯要上『船屋』，因為『船屋』位於頂樓，要攞住個喼經過呢條窄窄嘅樓梯，其實都幾辛苦…… 放低行李後，我哋就落街諗住搵嘢食啦，不過原來呢度方原幾千里都冇嘢食㗎！仲要都未行到出路口，又比狗嚇~~ 好在我哋有帶電筒，左射吓、右射吓，先嚇退啲狗，返到民宿……好在帶咗兩個杯麵，唔係我哋可能餓死咗喺民宿……
呢度雖然好多窗，但無論日頭或者夜晚，都係乜景都冇……住過之後，都唔覺得呢間『船屋』有咩咁特別，只係覺得個地有啲污漕，而且個wifi仲弱到喺房完全收唔到！不過，就喺我哋周圍探測wifi嘅時候，竟然遇到朋友，仲住喺我哋樓下，有冇咁啱呀！！﹝詳情請留意Day2嘅分享啦！﹞
﹝小徑民宿﹞
Day1 總結：其實今日主要係坐的士遊高雄，由西子灣玩到去旗津，第一次膽粗粗講國語、第一次比六隻狗兇；黃昏經過枋山嘆完tea，旁晚就落墾丁……去到船帆石想搵地方食飯，點知附連一間餐廳都冇，仲要又比狗嚇親，結果唯有返民宿食杯麵當晚餐，夜晚竟然遇見教會朋友，住埋同一間民宿，因此第二朝，我哋有免費早餐食，真係神嘅恩典，yeah！
﹝由旗津望向高雄、西子灣一帶景色﹞
留言列表
