2010年11月26日﹞

奧武山公園駅 > 舊海軍司令部壕 > 旭橋駅

食飽飽後,我哋就搭單軌火車到奧武山公園駅,原本係諗住轉巴士去舊海軍司令部壕,但係諗諗吓,行去都係25分鐘嘅路程,不如行吓當散步咪仲好。不過好好笑,我哋一落到地面就已經行錯方向,好在行咗幾步就發現點解我哋頭頂會係單軌火車條路軌嘅?莫非我哋想行去下個站?

﹝奧武山公園駅﹞

 250 往旧海軍司令部壕009.JPG   

行咗冇幾耐就見到間好古怪嘅屋,外牆好多木製部份,同旁邊嘅屋格格不入,周圍仲掛咗好多『還元水』嘅廣告,夠竟乜嘢係『還元水』呢?呢間係住宅定係公司呢?

﹝『還元水』屋﹞

 250 往旧海軍司令部壕014.JPG

沿住7號幹線,經過咗幾個街口,我哋遇到條三岔路,根據巴士路線,我哋應該係沿中間條路行,但係望望吓個地圖,又好似靠左邊條路近啲喎;結果我哋就『懶』醒咁行咗左邊條路,亦即係錯誤嘅開始……

﹝7號幹線中﹞

 250 往旧海軍司令部壕017.JPG   

行吓行吓,我哋見到間郵政局;於是二話不說就走咗入去買郵票同Postcard啦,點知問啲職員寄Postcard去香港要幾多錢,佢話要『等等』﹝問咗一輪之後佢答我哋要70円﹞;揀好Postcard叫佢攞,又要『等等』﹝Counter唔夠咁多張,要入倉揾貨﹞,寫完啲Postcard,去比錢買郵票寄,都要『等等』﹝原來我哋揀果啲Postcard唔係Standard Size,郵費要220円﹞。唉!結果一等就成個鐘頭冇咗,咁之後咪唯有行快啲 lor…

﹝『等等』『等等』『等等』…………郵政局﹞

 250 往旧海軍司令部壕023.JPG

離開郵局我哋繼續向部壕方向行,不過越行就越唔對路,好似行咗入啲民居度咁;其中有幾家人嘅屋頂都有呢啲『花花燈』,相信應該係附近學校嘅小朋友美術勞作堂嘅功課,既環保又有創意!

﹝創意『花花燈』﹞

 250 往旧海軍司令部壕027.JPG   

好嘢!我哋冇行錯路喎!終於見到個『海軍壕公園』嘅路牌嘞!請留意圖右一個放o係地下嘅白色牌。不過一轉彎,原來仲有條長長嘅上斜路要行;唉!算啦!冇行錯路已經好好……所以大家記得記得記得,喺之前條三岔路,要揀中間果條行呀!

﹝海軍壕公園路牌﹞

 250 往旧海軍司令部壕028.JPG

哈哈!終於嚟到喇!呢個公園除咗有個紀念碑同呢座圓形展覽館外,其實喺度望番落那霸市區嘅風景都幾靚,始終係高地嘛!

海軍壕公園

 250 往旧海軍司令部壕035.JPG   

影完相就行咗落個部壕度諗住買飛入場啦,點知比錢時先發現入場券嘅價錢竟然貴過張傳單上面寫果個價錢喎!於是我哋遞張傳單比個職員睇吓啦,跟住佢就係咁同我哋講『Ticket, ticket』;原來持有全日單軌車票嘅人士,只要購票時出示就會有『電視框』,有團友唔知道就買咗貴飛喇,而且售票處對面仲可以『cup』個紀念印 tim;買咗飛後記得影吓個部壕通道…… Poster先入去喎,個背景曾經呃到人話係實景o架!

﹝部壕通道 Poster﹞

 250 往旧海軍司令部壕049.JPG

我哋係先行咗個同售票處同層嘅展覽館先至入去參觀部壕通道,呢個展覽館主要係展示二次大戰當時喺沖繩戰役嘅情況同軍備。不過我哋冇乜興趣睇呢啲嘢,行咗個圈就出番嚟 lu~~

﹝地面展覽館﹞

 250 往旧海軍司令部壕046.JPG   

展覽館外走廊掛咗好多呢啲一條條嘅嘢喺個牆度,知唔知係乜呢?

﹝走廊掛飾?﹞

 250 往旧海軍司令部壕051.JPG

近啲睇其實係紙鶴,相信係用嚟悼念戰爭死難者,或者係安慰家屬咁樣……隻隻都好靚而且七彩繽紛,日本人真係一個好有感情嘅民族啊!

﹝七彩紙鶴﹞

 250 往旧海軍司令部壕058.JPG   

部壕內部,除咗有四通八達嘅通道外,仲有好多信號室、控制室、長官休息室……而呢個就係醫療室;由圖可知,戰時啲傷兵就係咁,無論重傷定輕傷,都屈埋喺呢個窿度,都幾慘!

﹝醫療室﹞

 250 往旧海軍司令部壕072.JPG

其實個部壕唔係好大,半個鐘左右就行晒;喺臨離開部壕前仲可以睇番沖繩戰役嘅紀錄相片,比參觀者感受吓當時戰爭嘅慘況同埋幾滿目瘡痍……

﹝沖繩戰役相片﹞

 250 往旧海軍司令部壕088.JPG   

一走出部壕就見到幾間小商店,主要係賣紀念品;我哋見到其中一間小商店嘅門口有堆日文然後寫住2,000円,於是就走入去問吓個老闆娘乜嘢2,000円啦;點知原來係一套5Postcard嘅價錢,仲以為係有2,000円紙幣賣 tim~~﹝因為據聞2,000円紙幣係為咗紀念當年各國高峰會喺沖繩舉行而發行,所以相信呢度係全日本最易搵得到2,000円紙幣嘅地方﹞

唔知係咪老闆娘見到我哋個失望樣就估到我哋想要乜呢?佢就叫我哋入佢舖頭,同我哋嘰呢咕嚕完幾句就打開咗個收銀機,攞咗張2,000円出嚟,我哋就梗係呢呢嗱嗱攞兩張1,000円同佢換咗佢啦;同個老闆娘換完張2,000円之後,佢仲送埋疊Postcard比我哋 tim,哈哈!呢個日本老闆娘真好人,可惜,唔記得同佢同埋個舖頭影番張相……

﹝由小商店往下行,就係我哋喺Google pre-visit過嘅戰壕入口﹞

 250 往旧海軍司令部壕089.JPG

離開部壕後,就係我哋『熟口熟面』嘅街道,因為上google pre-visit過嘛~~ 途經一個公園仔,見到個唔係好覺有盡頭嘅滑梯,落咗去都唔知點樣上番嚟,好驚呀!唔知圖右條『茂里』係咪想『sir』落去呢?

﹝無盡頭滑梯﹞

 260 回旭橋乘巴士往知念002.JPG   

行咗落大街之後,我哋係會經過一個巴士站嘅,諗住搭巴士去旭橋駅,因為對腳都已經行到好攰 lu~~點知班巴士啱啱開咗冇耐,下一班要等成半個鐘;冇辦法啦,唯有繼續行……﹝好可憐呀!﹞

﹝沖繩巴士站 - 宇栄原団地前站﹞

 260 回旭橋乘巴士往知念013.JPG

返到旭橋,梗係影張相先啦;今晚再返嚟,就一定黑晒天 lu!影完相,就快啲跟住嚟轉巴士啦~~

﹝旭橋駅﹞

 260 回旭橋乘巴士往知念023.JPG   

我哋搭去邊?陣間先講……首先又要讚吓啲日本人;當我哋離開旭橋駅,諗住行去個巴士總站搵個水牌,睇吓我哋要搭嘅巴士個站喺邊度,點知我哋都仲未諗到應該行邊個方向嘅時候,就無端端有個日本人﹝相信係巴士站職員吧,因為佢有著制服﹞喺旁邊問我哋想搭乜嘢車?嘩!效率超高!唔通我哋額頭鑿咗『遊客』兩個字?

﹝那覇巴士總站﹞

 260 回旭橋乘巴士往知念027.JPG

其實我哋後面就係個水牌,而且個水牌仲超易明;可能我哋額頭唔係鑿咗『遊客』兩個字,而係『低能』兩個字至真!

巴士站水牌

 260 回旭橋乘巴士往知念031.JPG   

哈哈……我哋就係喺呢個巴士站度等搭後面顯示板上果架車,即38號,終點站係志喜屋,而我哋嘅目的地就係知念;至於去知念有乜嘢睇,咁就要留意沖繩の旅 Day 2C嘅內容喇!

那霸巴士總站往知念

 260 回旭橋乘巴士往知念032.JPG

未上巴士我哋就已經好緊張,點解緊張?有睇前傳嘅朋友就應該知道,喺沖繩搭巴士係同香港唔同嘅,仲『有啲複雜』tim~~ 點複雜法?總知一上車,就要記得喺個黃色箱仔攞張整理券先啦,至於車費幾多錢,就要睇你喺邊度落車喇!詳情陣間再講解~~

不過呢度搭巴士有樣好,就係有兌換機﹝圖中銀色果個﹞,只要係1,000円以下,就可以兌換;即使落車先知到冇散紙,都可以慢慢找散再入車費;如果喺香港,就一定比人怒『啤』,但呢度就唔會,乜都可以慢一啲,不過雖然係咁講,我哋落車果陣都依然好緊張,始終都驚阻住人……

﹝搭沖繩巴士第一課﹞

 260 回旭橋乘巴士往知念034.JPG   

仲有嘅係,呢度嘅巴士係設有優先席嘅,固名思議,就係要讓坐比有需要人士啦,而呢度啲人又真係會咁做嘅……不過奇怪嘅係,坐優先席嘅就識讓坐,但係坐雙坐位嘅,就竟然將側邊個位放晒嘢唔比人坐,即使啲人企到出門口,佢哋都好似冇諗過攞番起啲嘢咁,夠竟點解呢?

﹝優先席﹞

 260 回旭橋乘巴士往知念037.JPG

好嘞!輪到講吓呢度啲車費嘅計算方法啦……

頭先上車時攞咗果張整理券,其實上面係印咗上車時嘅區號,即係好似我哋咁喺總站上車,就係第一區,所以整理券上就印咗個『1』字;喺那霸市內落車都係第一區,車費就係220円;離開那霸市再遠啲,第二區嘅車費就會喺個顯示牌個『2』字下面,顯示出好似係160円,而第一區嘅車費就會跳去280円,即係如果喺第一區上車,第二區落車,車費就係280円;如果喺第二區上車,第二區落車,車費就只係160円唧,如此類推……落車時只要將張整理券連埋車費一齊放入錢箱就OK;而我哋……好似搭到第19區,架車由冇乜人搭到好多人,又由好多人搭到冇乜人,我哋終於落車 lu,車費多謝810円!

﹝料金顯示牌﹞

 260 回旭橋乘巴士往知念036.JPG  

經過個多鐘頭嘅車程,終於到知念 lu…… 

arrow
arrow

    CK Lam 發表在 痞客邦 留言(0) 人氣()