﹝2011年3月6-7日﹞
﹝香港 > 倫敦 > 白金漢宮 > 西敏寺 > 大笨鐘 > 國會大廈 > 循道衛理聯合教會倫敦總堂﹞
呢個西歐8國之旅，正式喺3月6號夜晚開始，今次呢個trip行程緊湊，13日裡面要穿梭8個國家，好多人都話做乜要搞到咁趕，倒不如用13日時間，重點一d玩某幾個國家就算啦！其實，我哋都有考慮過，但係計下d交通費呀，酒店安排呀等等，都好似係差唔得幾多，所以我哋都決定繼續跟團。
出發當日有少少唔順利，一路都認為最perfect嘅安排，就係先坐巴士出中環，放低行李喺公司，食飽飯就上公司攞行李，喺樓下搭巴士去機場；點知當日改路，部巴士停唔到喺公司門口，只可以停喺Landmark，咁我o地就拖住2件行李由Landmak行去公司，之後就去食飯，攞番行李之後，畢打街仲係改路，最後就行出干諾道中坐A12出機場。
到咗機場，我哋好快就搵到個領隊，因為之前已經見過面嘛~~哈哈~~ 做咗d指定動作後，我哋就四圍行下啦，跟住就入閘lu~~ 到呢一刻，我同老婆都好想知道，究竟我哋呢個團其餘嘅8個人係咩人呢？
OK，又到入閘嘅時候嘞！喺等入閘之前，我通常都會忘記一件事，係咩呢，就係張所有同行嘅相機set埋同一個時間，有咩用呢？當我哋過晒d相入電腦之後，如果可以用時間o黎排序的話，之後 upload 同搵相都會比較方便，所以，我建議大家無聊等入閘時，最好就先較好個時間先啦~~
同閘口合照，已經係每個去旅行同寫blog嘅人嘅指定動作，我都唔例外……
﹝從16號閘登機往倫敦希斯路機場﹞
喺英航嘅帶領下，13個鐘頭後，我哋就已經到達希斯路機場；喺飛機上，我哋食咗2餐，有一餐唔記得影相，淨係記得影份早餐『比大家食』。
﹝飛機上嘅早餐﹞
一過咗移民局後，我就出咗機場大堂集合，終於可以見到其餘8位團友係咩樣，好彩，大家都唔係d『騎呢怪』，成團10個人，5對couples，由於初見面，大家都各自各精彩，各有各喺個大堂影相，偶然有1-2個shot會出現『協助時間』，即係我哋見到個男嘅幫個女嘅影完相後，女嘅又幫番個男影，呢個就係我哋嘅『協助時間』，跟住就會有人自動波咁講『洗唔洗協助呀』，每一對couple都會比部相機人哋，之後就埋位lor~~
如果我無記錯，呢個站係叫做 Heathrow Terminal 5 Station，想喺倫敦玩嘅朋友，就一定唔會對呢個鐵路圖覺得陌生，大家一定要 download 呢個 map 呀，如果唔係一定會好麻煩，我就 download 咗呢個map，覺得幾好用，等我 share 比大家先：
另外，去下呢一網站吖，除咗會教大家點樣搭 underground 之餘，仲有好多其他交通資訊：
﹝Underground Map﹞
四圍行之下，比我見到一個小型賭場，不過唔知佢係賭真錢定假錢，因為我無行到入去，而門口嘅地下就有個圖案，一睇就知未夠18歲就唔准入啦，雖然我夠秤，不過都無入，如果你又路過我呢度，又知道佢賭真錢 or 假錢的話，留個言話我知吖，唔該！
﹝機場大堂嘅迷你賭場﹞
等咗15分鐘左右，領隊就已經搵到個司機，咁我哋集合好之後就上車，去到呢一度，唔知大家會唔會問：『得10個人，會比部咩車我哋坐呢？24座小巴？照出部大旅遊巴？』呢個問題我都有問過個領隊，佢話公司唔會虧待我哋尊貴嘅客人，所以照出部大旅遊巴比我哋，聽到佢咁講我都定好多，我仲以為好似d國內團遊香港咁，司機後面個位疊高晒d行李，其餘嘅位置就坐人，哈哈~~
﹝只坐半日嘅倫敦大旅遊巴﹞
開車無幾耐，個領隊提醒我哋，喺英國，無論大車定細車，只要有安全帶，一律要扣上，如果比警察捉到你無扣安全帶就要罰錢，聽完之後個個都乖乖地，繼續坐定定，唔扣安全帶，哈哈~~
由於，landing 嘅時候仲係好早，所以會先車我哋去酒店，放低行李同埋食早餐，你睇，差不多到酒店時，太陽伯伯先至o岩o岩開工。
﹝喺倫敦見到嘅第一個日出﹞
一去到酒店，我哋就將所有行李放晒喺大堂，玩完番o黎之後就自己攞番自己嘅行李，跟住去 reception 攞房就ok，跟住就去食早餐，餐廳環境都唔錯，食物選擇都幾豐富，好多o野揀，而我哋都係揀番d慣常食開嘅o野就算，要一讚佢部多士機，烘出o黎嘅包都好好顏色，唔似得之前試過嘅酒店，烘一轉就唔夠色，烘兩轉就燶鬼晒！
﹝第一份英式早餐，享受 ing~~﹞
一出酒店就勁感恩，因為好好天呀，你睇個天好藍呀，而行車經過呢個地方就有一間叫 EMC 嘅公司，好大間，連續幾幢大廈都係佢嘅，佢仲勁到起個鐘比大家睇時間 tim~~ 唔知呢一間公司做咩業務呢？
﹝現正係早上8時10分，報時訊號係由 EMC 提供﹞
鏡頭一轉，我哋已經o黎到白金漢宮﹝Buckingham Palace﹞，可能我哋真係好早o黎到，無咩遊客喺度，反而有好多趕番工嘅人喺我哋身邊經過。
﹝白金漢宮門外﹞
門口呢個招牌大家都應該好熟識吧，『英皇御准 xxx』都係佢呢~~
﹝英皇御准 xxx﹞
喺白金漢宮對面有一個好大嘅雕像，面向四個唔同嘅方向，其中有一個有名o架，叫維皇﹝維多利亞女皇﹞，唔係維園﹝維多利亞公園﹞，唔好搞錯wor~~ 係就該煨lor~~ 坐10幾個鐘飛機仲喺維園 @@
﹝維多利亞女皇像﹞
喺雕像嘅後面，係一條大直路，個景好靚，左右兩旁都有林蔭嘅樹木，一直延伸到街尾，呢條街就叫做 The Mall，行到去最篤篤就係當地人稱為『大狗廣場』嘅地方﹝Trafalgar Square，茶花格廣場﹞，陣間我哋會路經過呢個廣場，到時再講點解佢會有呢個名。
﹝林蔭大道 - The Mall﹞
同皇后影完相後，我哋就行咗去白金漢宮嘅右手邊，見到有個幾靚嘅坑渠蓋，咁就當然要影咗佢啦，睇真d……原來呢個唔係坑渠蓋咁簡單，呢個疑似『坑渠蓋』嘅雕刻品係紀念戴安娜皇妃曾到此一遊﹝我估係o掛~~﹞，嘩~~ 咁都比我哋影到，影o個陣唔知係乜，打緊 blog嘅時候先知道，真係後知後覺呀，哈哈~~
﹝紀念戴妃曾到此一遊嘅雕刻品﹞
用咗20分鐘左右嘅時間，我哋就已經行完呢個白金漢宮，相信係因為只係喺門口行個圈，所以覺得佢無乜o野吸引，跟住我哋就行番去落車嘅地方上番旅遊巴，行番去嘅時候見到一部好得意嘅倫敦的士，手快快影咗佢先~~
﹝可愛倫敦的士﹞
臨上車前，又比我哋見到一群馬車經過，領隊話我哋真係好幸運，呢d馬車唔係咁經常見得到。
﹝馬車巡行中﹞
上車後，下一個目的地就係睇國會大廈、大笨鐘、西敏寺同埋循道衛理嘅倫敦總堂，好似好多地方要去，其實佢哋都係喺附近吧~~
﹝西敏寺，Westminster Abbey﹞
呢個西敏寺就係之前世紀婚禮，哄動全球嘅威廉王子同凱特行禮嘅地方。我哋去到嘅時候佢哋都仲未結婚，依舊有好多人排隊入去參觀呢個地方，由於我哋係跟團嘅，時間唔太多，所以我哋都係到此一遊就算。
喺西敏寺附近，就係大笨鐘，而國會大廈就緊貼住佢側邊。唔知大家會唔會覺得有d奇怪，點解兩個景點會近得咁緊要，如果大家上一上 google map 睇下就會知道，其實，我哋就只係企喺一個行人過馬路嘅三角位影相，影完呢邊，轉一轉，就係第二個景點lu~~
講開呢個大笨鐘，回想起小學年代，大笨鐘只係頭腦上知道有呢樣o野，從未想過可以見到佢嘅『真人版』，以前都會問點解佢會叫大笨鐘，唔通個鐘真係好笨？大個d嘅時候，就會覺得佢係笨重個笨，到今次上網 search 呢個地方時，原來最笨o個個係我，哈哈~~
﹝大笨鐘及國會大廈，Big Ben & House of Parliament﹞
唔知大家有無留意到圖正中有一個圓拱，一個摩天輪咁嘅物體呢？呢個就係倫敦其中嘅一個地標 - 倫敦眼﹝London Eye﹞，行完今日上午嘅行程之後，我哋就會自費上去睇下，詳情遲dd再講。
之後就沿著 Broad Sanctuary 行入去，行入少少就可以見到西敏寺嘅側面，同埋佢隔離o個間唔知咩o野建築物，都好靚o架，你睇下！
﹝西敏寺同埋附近嘅建築物﹞
喺西敏寺嘅對面，就係循道衛理倫敦嘅總堂，既然係會友，點都要同佢留個念吧！
﹝循道衛理聯合教會倫敦總堂﹞
之後嘅行程，請睇 part 1b。
留言列表
