松此放眼看世界

(2012年10月24日)

船帆石 > 墾丁

前一日，無論日與夜，都比狗搞到心慌慌，好彩帶咗個杯麵，唔洗餓住瞓覺。到半夜，呢度落咗場好大嘅雨合，好似打風咁，人哋話墾丁好少落雨，點解我哋咁好彩？

... 第二朝早嘅天氣，依然係密雲有雨， 不過好在，一切都有恩典搭夠…😇😇

(民宿窗外嘅景色)

之前提到，竟然喺度都撞到朋友，仲住埋同一間民宿，不過佢哋玩埋呢日就要返香港，影張相算啦！ 

(香港堂之友)

由於朋友前一日喺後壁湖買返嚟嘅三文魚刺身放咗入雪櫃冰咗，但係又趕住返高雄，結果我哋就多咗份『恩典早餐』……哈哈，多謝晒！ 

(恩典早餐)

其實，我哋食完早餐，都要執嘢準備退房，開始展開今日嘅自駕遊之旅，好緊張呀！

(船屋@小徑民宿)

話咁快，陪我哋玩一日嘅戰車就到咗~~ 呢度租車好簡單，只要一早預約咗，佢就會駛架車去你指定嘅目的地，辦理好簡單登記手續，話俾佢知邊度收返架車就ok喇！

仲有樣貼心服務，就係預設埋廣東話GPS比我哋用，驚死我哋唔識聽國語… 😅😅 

(人生第一次自駕遊)

交收完畢，執埋行李，同間民宿影多幾張相先走；呢間民宿除咗頂樓嘅船屋外，其他地方都好用心機設計，即使細微嘅位置，都有特別嘅裝飾。

(小徑民宿)

事不宜遲，雪藏牌解凍第一擊，出發！ 開車前影張相，就揸車去油站入油先…由船帆石經過墾丁大街去油站都好順利，不過喺油站就泊錯咗位，因為唔記得咗架車係左軚…🤣🤣

(雪藏牌司機)

其實從油站出車都滴晒汗，因為成條路兩邊線搵架車都冇，我哋諗咗好耐都唔太肯定入邊條線先啱，好在最終都行啱，否則可能迎頭相撞！😌

入滿油後，第一站就係返回墾丁大街搵蘋果咬一口 ROOM check-in，不過由於間民宿太新，GPS都搵唔到，結果又要出動我哋啲唔鹹唔淡嘅國語，問咗幾個人先搵到~~

(墾丁大街)

放低行李，自駕行程開始……第一個景點係大街口嘅墾丁青年活動中心入面嘅青蛙石，可惜一落車就大雨，好在有架車，可以上車避吓雨先，等咗幾分鐘就細雨晒，可以落車去尋找青蛙石…✌

(前往尋找青蛙石)

沿濱海步道行十幾分鐘就會見到蜂巢岩同青蛙石 仲有啲好似珊瑚嘅石，唔信呢度係由海床上升而形成都唔得！ 呢一帶嘅石頭只要加啲想像，就乜都可以見得到！

(青蛙石步道)

我哋行完呢條青蛙石步道先見到有個牌寫住「入口」，原來我哋掉轉方向行… 我哋嘅「出口」原來係入口…😅

「出口」…唔係，係「入口」附近有個青年活動中心，其實同渡假屋/青年旅舍一樣，可以卜佢當酒店住，都幾有特色。

(墾丁青年活動中心)

上返車，都未揸番到船帆石又落大雨……唉！ 唯有泊低架車喺度等…等…等…😴😴

(風雨中嘅船帆石)

襯停雨，就快快手手同呢個『尼克遜』影張相先~~

(與「尼克遜」頭合照)

玩咗成朝，都係時候食晏…原本我哋係想前一晚嚟呢間沙灘小酒館食晚飯，點知一落街就比狗嚇，而且條街連街燈都冇枝，所以呢…唔緊要，嚟食晏都一樣得！

(沙灘小酒館)

非常好食的一餐，重點推介：xx濃湯、白酒蛤唎義大利麵…… 好多人都話呢度啲嘢好好食，我哋終於都食到喇！😋😋

還有，沙灘小酒館嘅counter附近有個Wi-Fi password，唔想浪費data就過去登記吓喇…

(沙灘小酒館之美食篇)

食飽後行咗落沙灘小酒館對面嘅香蕉灣漁港，不過冇乜嘢好睇…

(香蕉灣漁港)

上返車，行多冇幾遠就到砂島貝殼沙灘，不過砂島係一個自然保護區，周圍已經圍起鐵絲網，唔比人入去；想睇吓呢度啲砂有咩特別的話，可以去佢個展覽廳睇吓。

(砂島)

(砂島貝殼展示館)

根據旅遊書，下一個景點就會係埔頂，但係上嚟呢度的確有啲難度，因為要由砂島掉頭，再上一條好窄嘅上斜山路，好驚會遇到對頭車，點知真係遇到，仲要比個GPS不斷話我哋「你行錯咗路，你行錯咗路……」…知道喇，好煩呀😖！！幸好，最終平安抵達！

埔頂除咗有好靚嘅民宿外，仲有好大塊嘅草原，既然咁難都嚟到，襯冇人，跳吓先，不過跳早咗…😂😂

(埔頂「跳」)

途埔頂條路繼續去，好快就到達龍磐公園，落車嘅時候，要同幾部旅遊巴嘅學生一齊行出呢個「公園」，原來墾丁都可以咁多人喎！😅

(龍磐公園)

(人山人海@龍磐公園)

好在龍磐公園夠大，除咗被學生攻佔咗嘅部份外，過少少都仲有另一個平原，呢度一個人都冇😎😎

不過龍磐公園係勁大風，我哋影呢一張相都要鼓起勇氣先影到，因為呢度大風到可以連相機帶腳架都吹郁……🌪️

﹝吹到頭都甩@龍磐公園﹞

過咗龍磐公園冇幾耐，就去到風吹砂；呢度嘅地貌好得意，條路旁邊忽然間會變咗塊沙地……

(風吹砂)

而且四圍都真係好多砂，沿風吹砂對面地盆直上，可以去到另一個絕密影點（其實我都唔知呢度叫做邊度……😅）

(風吹砂對面地盤)

網上有人講，海國七號入面有一幕就係去呢度取景，咁咪試吓去搵囉~~ 不過絕密影點好似要行好遠，結果行過咗草原就返轉頭放棄咗~~🤣🤣

(絕密景點……附近)

繼續向滿州東海岸進發，條路可以飛得好爽啊，yeah！

(滿洲東岸)

過冇幾耐就會見到茶山吊橋，又名港口吊橋，如果比咗錢就可以行過去，不過我哋無行到，影張相就當去咗算！

(茶山吊橋)

終於嚟到尾站 -- 佳樂水，泊好架車就要去轉觀光車， 有導賞帶我哋沿途睇石頭，當然係要比錢啦。

(佳樂水)

……唔係嘛？呢架就係觀光車？不過都幾得意吖，同埋我哋四點半嚟到，已經係尾班車lu~~ 去佳樂水睇石頭就要坐佢哋嘅車，如果唔坐，就唯有步行喇！不過都係坐會好啲，因為有講解，而且去到舊石附近佢會停車比大家影相呢~~ 

(好有「特色」嘅觀光車)

呢度啲石好得意，由於受風浪侵蝕，雕琢出各式各樣的奇岩怪石，如：仙女石、 臥豬石，或稱死豬石、蟾蜍石、犀牛石等……（當然都係要加啲想像力啦！）

(犀牛石就喺下圖嘅右邊，想像到嗎？)

觀光車行到最尾站，我哋就可以落車15分鐘，影吓身後面嘅人面石……見到嗎？就喺個牌嘅上面囉， 都話要加啲想像力 ~~

(人面石@佳樂水)

睇完石頭返出嚟都已經日落，仲諗住喺旁邊嘅海鮮檔買海膽食，點知已經收檔lu~~

(話咁快就日落)

原本下一站係去鵝鑾鼻睇日落，可惜個太陽實在落得太快，再加上行錯路，又見有狗……唉，都係回程好啲！鵝鑾鼻……聽日先去啦！ 呢個就係我哋嘅「手持」GPS，租車公司話原本嗰個係set喺車頭，可惜爛咗，所以就比咗呢個我哋用……😅

(「手持」GPS)

回程時，個天黑得好快，行行下都有啲驚驚哋，仲落返雨…… 好不容易返到嚟民宿提供嘅免費停車場，原來喺正墾丁牌樓隔離，好方便。

(返到嚟喇！)

返到墾丁大街，又見到龍磐公園嗰班同學仔，查實係咪所有嚟墾丁嘅人都係咁樣玩？🤔

(墾丁大街)

稍稍休息又落去行墾丁大街行吓，順路食飯……第一餐正式喺呢度食嘅晚餐@雲鄉泰國晚菜館（其實喺香港都好少食泰國菜！）

(雲鄉泰國菜館)

>月亮蝦餅：都幾好味；
>涼拌生蝦：味道怪怪哋，冇蝦味；
>脆皮炒芥蘭：咪又係炒芥蘭一碟，冇乜特別……

(晚餐)

好似話呢間已經係最好食嘅泰國菜館，但係我哋真係唔太識欣賞，覺得麻麻地唧！

(一試無妨)

行行下發現墾丁熱爆玩意：手繪紋身圖案，可以保存大約一星期，我哋梗係點都襯下熱鬧啦，佢真係畫得好快同好靚呀！

(手繪紋身7日版)

蠍子：NT100
楓葉：NT200

(乾咗之後嘅手繪紋身)

Day2 總結：第一次自駕遊，可能真係駕駛經驗不足，緊張之餘都覺得危危哋；但係又真係好感恩，因為有架車 ，行行下落大雨「唔使怕」，比狗兇「亦都唔使怕」，總算順利喺墾丁東海岸兜咗個圈！ 仲比我哋卜到一間好正嘅民宿；大床、大浴室、大露台，可以望到墾丁大街，又可以睇到星星，旺中帶靜，靜中又好鬼方便 ，perfect ！

(好正嘅民宿)