（2017年4月14日）
尋晚中咗極強烈嘅眼瞓毒，在毫無招架能力之下，極速瞓著，然後一覺瞓天光，爽呀！！
今日嘅行程就係由赫爾辛基坐火車去坦佩雷 (Tampere) 行個圈，之後番赫爾辛基，簡簡單單，完全唔趕，hea住去行。
起身後，老婆就去整早餐，而早餐嘅材料尋日已經買咗，所以唔洗好耐就整好份早餐。
( 老婆整嘅愛心早餐，正！ )
食飽早餐之後就行去中央車站，好快趣，我哋就搵到一陣上車嘅月台，由於時間尚早，我哋仲可以喺車站四圍參觀一下。
唔知係咪歐洲國家都有morning market嘅習慣呢？喺車站呢度，我哋見到個女人喺度開檔，花檔嗰邊已經開好，而佢就忙緊開個生果檔，當有人問嘢買嘢，佢就即刻招呼咗客人先，之後就繼續開檔。我對d花無興趣，反而佢嘅生果吸引住我……
( 買咩好呢？15 16中……）
你睇吓d士多啤利，係咪好吸引呢？又大粒又紅，睇落仲好新鮮咁，仲邊忍得到手吖，速速磅水啦！
(d士多啤利真係好吸引～ )
其實唔單只士多啤利好吸引，佢嘅raspberry一樣都係好吸引，我見佢標價買兩盒會平d，但係就唔知可唔可以各買一盒都有得平，之後問咗佢，佢話同款買兩盒先有得平，最後我都唔貪平，各買一盒算，諗住一陣坐火車可以食，行到半路又可以食，幾好吖～～
( 士多啤利同raspberry各買一盒)
買完嘢之後都差不多要上車，由於我哋買嘅車飛係指定席，唔係是但搵度門搵個位就可以，所以我哋要先搵啱車卡，上咗車之後先再搵位。臨上車影番張相先。
(上車！ )
呢度d車好準時開，所以大家記得要守時，否則會搭唔到車啊！開咗車無幾耐，就見到有個職員check飛，同之前去鮑渥一樣，嘟到就即係ok，我哋當然無問題啦！
(坐車當然要買飛啦，因為實有人查飛嘅~ )
中途發生一件小插曲，有個媽咪拖住個小朋友上車，喺車廂度一手揸住車飛搵位，另一手就拖住個小朋友，我同老婆講，呢個媽咪真係辛苦，架車行緊，佢又孭住行李，又拖住小朋友，仲要邊行邊搵位，好慘…佢由車頭方向行入嚟，經過我哋身邊，再去咗另一卡；之後，又再入番我哋呢一卡，從我哋後面行番去車頭方向。
嗰一刻，我哋都覺得好奇怪，點解佢會搵唔到位嘅？後來，佢又再喺車頭出現，坐我哋前面個男人叫住個女人，傾完2句之後，個男人就起身，比個女人同個小朋友坐，原來，個媽咪買指定席，個男人就買咗自由席，而個男人就坐咗個媽咪個位。
經過呢件事之後，我會覺得為人為自己著想，都係買指定席好d，最緊要係有一個指定嘅位置比自己坐，另外，至少唔洗麻煩到人嘛。
喺呢一個鐘左右嘅車程，有咩好做呢？就係搵行程！其實我哋只係plan咗去Tampere，而無計劃去邊度，所以喺火車上都係睇人哋嘅blog，而最後就決定去參觀天文塔，好快趣，一個鐘頭就過咗，坦佩雷(Tampere)到著！
（坦佩雷車站）
去到火車站之後，見到有個遊客中心，入去睇吓有咩資料攞先，最後只係攞咗張Tampere嘅地圖。
之前所決定要參觀嘅天文塔有兩個：
Näsinneula Observation Tower，呢個就新d高d，塔頂風景都靚d；
Pyynikki Observation Tower，我估呢個應該係第一代天文塔，幾層樓高，舊d，風景都唔錯嘅；
兩者都各有特色，一陣帶大家去睇吖。
我哋選擇用步行嘅方式喺度「探險」，由火車站去 Näsinneula Observation Tower都只係30分鐘左右，一d都唔遠，再加上今日天氣好好又涼涼地，行得好舒服呢～
途中經過一間教堂，叫做Kirkko，到此一遊先～
(Kirkko嘅教堂 )
由Kirkko教堂向前行無耐，就經過一個公園。
(公園：Näsikallion suihkukaivo (Tirkkosen suihkukaivo) )
由呢個公園再向前行，穿過橋底之後，就會見到我哋第一個目的地：Näsinneula Observation Tower。當我哋經過呢個湖時，我發現湖面嘅雪同旁邊架船好似有d唔係好夾，如果湖水結咗冰，架船就唔會浮吓浮吓，相反，既然架船浮緊，白色嗰d應該唔係雪，係咪？
所以我執咗粒石仔做實驗，當我拋粒石仔落去時，我預計粒石仔會穿過d雪，直插入水，而結果呢？原來湖面真係結咗冰，而且都幾厚，粒石仔不但無打穿冰面，反而彈咗去好遠。經此實驗之後，我可以得出一個結論：個湖溶緊雪，只不過有部份仲未溶，偉論發表完畢，哈哈～～
(Näsinneula Observation Tower)
去到天文塔下面，見到好幾個購票亭，不過無開，場面好冷清，我哋經過咗購票亭之後就步入天文塔，地面嗰層係售票處，同埋紀念品店，買咗飛之後就可以搭升降機上去，升降機門打開，跟住我哋就「嘩」咗一聲…
(Näsinneula Observation Tower)
(到此一遊 )
見到呢個景，你話唔「嘩」又點得呢？
上咗去個塔之後就會發現，剛才所見嘅糊面只係「冰山一角」，原來呢個糊個面積好大，無論係水變冰，或者冰變水都好，相信都要好長時間……
我哋喺度可以360°咁欣賞坦佩雷嘅風景，除咗見到結咗冰嘅湖面外，仲可以見到樓下有個遊樂場，相信仲係冬季嘅關係，所以無開門。至於個塔入面，除咗睇風景之外，仲有一d講外太空嘅展覽。
(結咗冰嘅湖面）
( 呢個湖真係好大個 )
(相信呢架唔係破冰船吧~~ )
行咗一個圈之後，都係時候要食飯，與其出番去出面搵嘢食，不如近近哋上樓上個餐廳食啦，雖然係貴d，但係可以慳番d時間，都算做值得吖，係咪？
（一齊上，食餐貴d嘅～）
上到嚟，就有個好好禮貌嘅姐姐招呼我哋，坐低後，睇睇menu，都唔係貴到肉赤嘅價錢，可以接受，我哋叫咗嘢食之後就開始欣賞出面嘅風景，當我哋靜落嚟先發現，原來呢個係旋轉餐廳嚟㗎！我哋可以一邊食嘢飲嘢，一邊欣賞Tampere 360°嘅景色，所以呢餐就算貴d都好，我都覺得值得比。
（豐富而且好味嘅一餐）
食緊嘢嘅時候，突然醒起，我可以用time lapse同大家分享呢個360°嘅景色，所以即刻set機影相！為咗影呢輯相，我哋呢餐飯食咗一個鐘頭啊～～
Näsinneula Observation Tower @ Tampere (20170414)
食飽但係又未影完相，咁就計劃一下之後去邊度啦！下一站，都係天文塔！
( 今日嘅行程 )
離開呢個靚仔天文塔後，就開Google Map帶我哋去下一個景點 -- Pyynikki Observation Tower，路程都係25分鐘左右，一d都唔遠。當我望住個Google Map時，就發覺到而家嘅自由行比以前方便好多，就算無計劃行程都好，只要有得上網，就可以隨心咁搵地方去，又唔怕盪失路，Google Map加Internet，無敵呀！
途中見到有個特色球場，係將籃球場同足球場混合，呢個idea唔錯，不過就好似怪怪地咁，足球場大籃球場咁多，硬要放埋一齊的話，都唔知就得邊個。Anyway，呢個諗法係好嘅，如果使用率低，浪費一個球場嘅地方，總好過浪費兩個球場嘅地方，而且做維修都容易d。
(Fusion！！籃球場mix足球場 )
行咗25分鐘左右就到達呢個Pyynikki Observation Tower，相比之前睇嗰個，呢個明顯地無咁多嘢睇，不過就有佢古舊嘅味道。
(Pyynikki Observation Tower)
(上塔前Selfie一下先~~ )
嚟呢度，除咗要上個塔頂之外，仲有一樣嘢要做，就係食呢度嘅冬甩（doughnut），網上面好多人都讚佢好食，咁我哋就當然要一試啦。
我哋嚟到嘅時候，見到好多人排隊，我叫老婆排住先，我就走去前面睇吓排咩，迫到入去個窄門之後，左邊係Coffee shop，好多人排緊隊；右邊係上塔嘅，有架舊式升降機喺度，又或者行樓梯上去都得，無人排隊；當我行到去部升降機時，有個阿姐同我講，上塔要比錢，可以係Coffee shop度買飛。
之後我同老婆講繼續排隊，反正點都係要排呢條隊，所以我哋就一次過買冬甩同咖啡，再買埋上塔嘅飛。
(上塔要€2 )
其實睇番張相，個箭咀都指示咗個Coffee shop同買飛嘅方向，我哋總係唔識字，係要問人先安樂，哈哈～
已經唔記得個冬甩同咖啡要幾多錢，只係記得個檯面好多白沙糖，應該係上手或上幾手人留低，而Coffee shop就未有人得閒嚟清理；仲有，個冬甩真係幾好味，甜中帶d薑味同檸檬味，幾好食啊！
(好好味嘅冬甩）
嘆完個冬甩之後，我可以搭呢部古老升降機上塔頂，當我哋去到升降機門口時，正想搵番嗰個阿姐查飛，兼比我哋坐升降機上去，但係阿姐唔喺度，既然有飛在手，咁就當然用部升降機帶我哋上去啦！除非……你想行樓梯上去塔頂啦。
(唔想行上塔頂，可以搭部舊式升降機上去 )
升降機門開咗之後都仲未到塔頂，要再行多一層先到，呢條木造嘅樓梯都幾斜吓，上落嘅時候大家要小心，pk事小，整爛人哋d嘢都唔知點賠呀！
(仲要再上多一條好斜嘅樓梯 )
雖然呢個Pyynikki Observation Tower天文塔無咁高，但係個觀景都係好靚，仲可以見到之前個Näsinneula Observation Tower天文塔（圖右），其實天氣好，影d相都靚d，可惜……部相機個CMOS入塵，藍天白雲下竟然多咗兩點黑點，頂！！
(呢度風景都好靚，仲見到之前個天文塔 )
( Selfie @ Tampere )
( Tampere全景@Pyynikki Observation Tower )
喺個天文塔度影咗一陣相就走，回程時都係搭升降機，等緊嘅時候，由樓梯傳嚟好嘈嘅人聲，之後就見到一班外國人上到嚟，雖然我聽唔明佢講乜，但係見到佢哋笑住咁上到嚟，仲要上氣唔接下氣咁，我相信佢哋行呢條樓梯應該幾辛苦……升降機到嘞，走人，拜拜～～落到地面嘅時候，都唔見都之前叫我買飛個阿姐，如果我哋唔買飛，係咪即係可以免費上去？不過算啦，唔好貪呢d小便宜，反正加埋先至係€4。
離開呢個天文塔之後，我哋又要靠Google map帶路，帶我哋番去坦佩雷火車站，但係今次我哋睇錯兼行錯路，落咗呢條樓梯，穿過咗小森林，其實都唔係好遠，都係10分鐘左右嘅路程，只不過當我哋發現行錯路時，我哋要行番呢條樓梯上去，慘……😭😭
（行錯路……）
可能我哋比較鐘意「不走回頭路」，咁樣可以睇多d唔同景色嘛，可惜，今次要走回頭路，呢條樓梯上，呢條樓梯落……
行咗無耐，見到呢幢建築物，睇個外觀就以為係已經搬走咗嘅姆明館，上網搵資料時，已經知道呢個消息，點知真係咁「好彩」比我哋見到，既然咁幸運，咁就影相留念啦，影吓影吓影到去門口，原來呢間係圖書館，呢d咪叫一廂情願lor～～
（以為係姆明館，其實係圖書館啊！！）
行咗一陣，經過一幢都幾靚嘅建築物，上Google map都搵唔到叫咩名，但係見佢幾靚，咁就影番張相啦，不過要等一陣先無人經過。
(唔知咩名嘅建築物 )
穿過呢個「隧道」之後，就聽到好澎湃嘅水聲，原來我哋路經一個市內小堤壩，而堤壩上係嘅呢條橋，比人扣上好多鎖，即係情人橋啦！其實情人橋呢樣嘢唔係好難搵，亦都唔洗刻意去朝聖，只要係橋，有地方扣到個鎖，呢條就係情人橋嘞，唔好以為我吹水，赫爾辛基嘅烏斯佩斯基大教堂出面都係一樣㗎！
（只要係橋，扣到個鎖上去，咁就係情人
橋嘅右方，就係好澎湃嘅水聲嘅來源，你又估唔估到我喺呢個位置影乜嘢呢？
(我喺度影咩呢？ )
每次見到流動嘅水，我都好想影到佢好似絲帶咁嘅效果，可惜，技術同器材都未能配合，只係做到一般嘅效果，未係太滿意。
（原來係影『瀑布』！ ）
坦佩雷嘅行程去到呢度就正式完結，係時候坐車番赫爾辛基。
（兜咗一個圈，又番到嚟Tampere火車站）
坐低咗之後，就攞番今朝買嘅士多啤利同raspberry出嚟食，當係我嘅下午茶，當中有一粒超巨型嘅士多啤利，唔通中咗輻射？哈哈～不過有幾粒喺盒底嘅士多啤利被責爛咗，唔緊要，照食！
（巨型士多啤利下午茶！）
大約一個鐘左右，就番到赫爾辛基，個天都仲係咁光，你覺得而家幾多點？答案係晚上8點左右！
（晚上8點都未到，個天仲好光
尋晚番apartment時，見到附近有幾間餐廳 / 酒吧仔，諗住今晚可以幫襯吓，點知今日係復活節假期，竟然全部唔開！
去到apartment之前，我哋見到有間餐廳有開門，行埋去睇睇，竟然係係食中菜嘅，15 16緊幫唔幫襯好，我哋醒起上年夜晚嚟到時，樓下有間西餐廳，應該可以幫襯嘅……點知未行去已經見到佢烏燈黑火，即係無開門，唉……
當時我哋都唔知點決定，如果出番去中央車站搵嘢食，係咪一定有餐廳開門？如果無，番到嚟嘅時候，會唔會連呢間食中餐嘅閂咗門？但係我哋又好掙扎去食中餐，跟團就會食中餐，自由行都食中餐？
最後都係決定食中餐，因為唔想行來行去之後，到頭來都係無嘢食。推門入去嘅時候，個侍應用國語同我哋講，話唔好再揀嘞，因為附近無餐廳開門，而且佢哋d嘢好好食㗎！
坐低之後，照樣開壺茶比我哋飲，而揀嘢食就好搞笑，佢哋有餐牌提供，不要佢叫我哋行去下圖左邊嘅地方，睇圖落order，哈哈～我以為去日本言語不通先會看圖識字呢個方法，點知喺芬蘭同國內人溝通，都一樣係咁，真搞笑。
（由於係假期關係，去到北歐
落咗單之後，好耐都未有嘢食，而現場所見，計埋我哋，都係得兩檯客吧，應該唔會好忙啊～不過見佢哋嘅談吐，佢哋應該係識嘅，再加上d小朋友可以四圍走，而且又識得企喺廚房門口叫「媽咪」，而唔係直入廚房，如果無人教的話，小朋友係唔會知道唔入得廚房。
如此情景，我哋都只可以繼續等，而其中一個侍應都好照顧我哋，見我哋咁耐都無嘢食，應該都好肚餓，所以私人醒咗客炸曼頭比我哋頂吓肚先。雖然4個炸曼頭唔值咩錢，但佢好欣賞佢呢個咁貼心嘅舉動。
可能真係肚餓，我哋好快就食晒呢幾個曼頭，再等多一陣，終於上埋其他餸菜，撇除肚餓嘅感覺，佢哋d餸又炒得幾好味嘅，所以全部食晒！
（D嘢食都幾好味嘅~~）
食飽之後，可以好快就番上apartment，因為apartment同餐廳都係一座之隔，番到上房，就開始執嘢，預備聽朝早飛去丹麥嘅哥本哈根。
去到呢一刻，我有一件好重要嘅事要做，就係影赫爾辛基嘅夜景time lapse。上年，最後嘅最後一晚，我喺呢度set機影相，第二朝起身收機時，發現部相機（D600）已經陣亡，仲要係死喺「689」手上，真可惡！事隔一年，舊地重遊，今次我用部新換番嚟嘅相機（D610），再續我未影完嘅相。
兄弟，拜託你幫我完成呢個任務吧！
（夕陽醉了~~ ）
好兄弟繼續做嘢，我就……有d眼瞓，要眠一眠先，聽朝出嚟收機，辛苦你嘞，好兄弟！！
留言列表
