松此放眼看世界

（2017年4月13日）

一生人之中，有幾多嘢係可以keep到10年？

原來不經不覺間，我哋已經結咗婚10年。

搵咩去慶祝結婚10週年？去探險啦！去一D我哋未去過嘅地方！

4月13號晚，收工後就先番屋企，沖好涼後就出『雞場』，平安地出發，平安地過關，11個鐘頭後，就平安地到達芬蘭赫爾辛基。

出發前，老婆有d唔舒服，痾咗都好多次，所以臨上機前，佢都要清多一次腸胃，費事上到飛機再痾過。我話就算上到飛機要痾都無所謂啦，反正都未試過喺咁高嘅地方開大，係一個十分特別嘅經歷啊！😂😂

(香港嘅朋友，再見嘞，10日後見！)

過晒關之後，就搵到個閘口，估唔到，芬航已經被人踢到去500幾號閘口，見未上得飛機，就同d谷友Whatsapp吓，叫佢哋估下我哋去邊，我比咗以下提示，代表我哋會去嘅3個國家：

1. 桑拿

2. Ikea

3. 曲奇

你又估唔估到我哋會去邊度呢？

( 芬航已經被安排到500號閘口 )

( 目的地：芬蘭赫爾辛基 )

(鏡頭一轉，就只剩4分鐘就到達目的地，真係快！ )

已經唔係第一次坐芬航，每次芬航比我嘅感覺都係舒服嘅，尤其係個坐位，對於我呢D高人嚟講，有足夠嘅空間伸腳，你都咪話唔正！仲有，佢個電影真係好過國泰多多聲，再加埋個飛機頂同底CAM，嬴晒！

( 著地一刻  )

好快手地就攞晒行李，之後就係買車飛出市區，原本買飛一D都唔困難，只不過比前面個人阻一阻，以為部機好難搞，點知到我哋買飛時，好快趣就買到，yeah~~

( 買飛出市區 )

買咗飛之後，就沿住扶手電梯落月台，等一陣就有車，真係快。由於我哋係去Helsinki Central Station，所以P線車定I線車都啱我哋，如果你唔係去中央車站的話，最好就留意個行車方向，就算搭錯方向都唔係好大問題，因為佢哋係循環線，最終都去到目的地，只不過用多d時間吧。

( 有車，半個鐘就可以由機場出到市區 )

出市區途中，望見出面仲有好多雪，唔通出面仲係好凍？

( 點解仲有咁多雪嘅…… )

到達中央車站時，天氣寒冷之餘，仲要落雪，仲要係唔弱雞嗰隻，我哋一路向前行，一路比d雪打埋塊面同隻手度，最後頂唔住，行埋一邊戴埋對手套，再笠番頂帽先可以再向前行。

( 到達赫爾辛基中央車站，都仲未離開月台，已經『一朝白頭』 )

雖然會早check-in，但係都唔會多時間到可以自己整早餐，所以要喺中１央車站買定先，一陣攞咗房就可以慢慢嘆。

( 買定早餐一陣食 )

買完早餐就繼續向apartment方向行，上年嚟就落雨，今年嚟就落雪，唔通個天都唔鐘意我？

( 上年嚟，落雨；今年嚟，落雪。想點呀~~ )

由於可以比少少錢早Check-in，所以可以放低行李先至出去玩，但係apartment個姐姐好好人，不斷咁提供協助，最後搞咗一大餐之後，喺reception度用佢部電腦買咗巴士飛，完成購買手續後，我哋叫佢幫手print埋張車飛出嚟，佢就話唔print都得，因為完成交易後就會收到email，個email會有個QR Code，比個code車長嘟一嘟就可以，所以我哋都無再要佢print張車飛比我哋。

搞完車飛之後就上去攞房，今次間房喺二樓，打開門，同之前四樓嘅房都係一樣，雖然無上次嚟咁驚喜，但係個感覺依然都係要「嘩」一聲，唔理咁多，放低行李兼食埋早餐，休息一陣就出發。

( 攞咗房，食埋個早餐就出發 )

( 雖然樓數唔同，不過個間隔都係一樣咁大咁舒服@ Aallonkoti Hotel Apartments )

食飽早餐之後，就要去Kamppi Center搭巴士，目的地係鮑渥（Porvoo），亦都係今日唯一嘅行程。由apartment行去Kamppi Center都只係15分鐘路程，唔遠。

落到街仲係落緊雪，你睇，成個地都係雪，之前個reception姐姐都話好奇怪，早一日仲係好好天，估唔到今日會落雪，我哋真係貴人……

( 朝早，呢度仲係白茫茫一片，晏D就…… )

好快趣就去到Kamppi Center，但係問題而家先發生，我哋喺度行咗個圈都搵唔到個車站，最後我哋走去問人，原來車站喺樓下嗰層。

嚟北歐就係有呢個好處，用英文可以溝通到，仲唔洗比人白眼！

( Kamppi Center，落樓下就可以坐車去鮑渥 (Porvoo) )

輾轉間，終於嚟到車站，終於可以鬆一口氣……

( 幾經辛苦，終於趕得切開車前搵到個巴士站 )

北歐好多城市都大力推行環保，所以好多人上車時，都係show電話個QR Code比車長檢查，嘟到即係無問題，可以上車，而我哋就第一次用呢個方法上車，總係有d緊張，唔知係咪真係可以成功上車，當我哋聽到嘟一聲之後，即係無問題啦，我哋先至鬆一口氣……始終都係覺得有張紙揸手會安心d。

上咗巴士之後，打算搵個車頭位坐，可以好開揚咁欣賞風景，唔知係咪普遍嘅人都係咁諗，當我哋上到上層時，頭2行已經坐滿晒人，咁我哋就揀其他位啦。

大約一個鐘頭左右，就到達鮑渥(Porvoo)，落咗車之後，確認番回程時上車位置，咁就可以安心去探險嘞！由於落車時好凍，即刻搵個商場避寒先。

由於無乜點做功課，都唔知鮑渥有咩景點，淨係知道河邊有d紅色屋仔，所以就用Google map帶路啦，原來只需要穿過一個公園，過條橋就係，好！出發！！

( 鮑渥街邊見到嘅古董打字機 )

去到個公園之後，就見到有個銅像，之後轉右，就會見到呢條橋，我暫且稱佢為情人橋吧。

(鮑渥情人橋 )

過咗橋之後向右手邊行，沿路都無咩特別嘢睇，只係知道好凍，有時大風起嚟，d雪打落塊面都有d痛，再加上天氣乾燥，相信塊面已經變得好乾，所以面珠登都有d赤痛。

行咗大約10分鐘左右，終於見到鮑渥嘅紅色小屋，人哋話鮑渥嘅呢條河，襯埋呢一排紅色屋仔，就係等於浪漫，但係我唔覺嘅？唔覺嘅？ 

( 紅色小屋？浪漫？)

坦白講，浪漫嘅嘢，我真係唔太識，到此一遊吧。

( 浪漫？……sorry……唔太識…… 😅)

鮑渥同赫爾辛基相距一個小時嘅車程，兩地嘅天氣係完全無分別，一樣係咁大雪啊！

(鮑渥同赫爾辛基都係咁大雪 )

當我哋一路向前行，行到去另一條橋之前，我哋就見到一枝大炮，雖然我唔知呢枝炮有咩名堂，但係我相信呢度好多年之前應該曾經打過仗，而呢枝炮就係一個紀念。

( 相信係紀念曾經打過仗嘅大炮！ )

就係因為枝大炮，喺佢附近比我哋搵到一個地圖，介紹咗呢度附近嘅景點，估唔到，誤打誤撞之下，比我哋搵到d新景點，即刻豐富晒呢度嘅行程！😍😍

最近呢度嘅景點係火車站，我哋當然要去行吓啦！

( 多得呢個地圖，我哋又可以搵到多幾個景點 )

原定行程係見到條橋轉右，而個火車站就喺左邊，所以我哋先去左手邊睇咗個火車站先。

見到呢一個欄杆，就可以估到呢度應該係一個終點站，而前面就係總站個月台。

( 已荒廢嘅鮑渥火車站 )

相信係旅遊淡季嘅關係，所以行咗咁耐都見唔到有人，我哋想點影相都得，要selfie亦得。

( 唔知點解呢，有路軌出現，就會企上去影相嘅？ )

我唔識芬蘭文，究竟呢個「Porvoo Borga」係咩意思呢？會唔會係「火車站」咁解？

( 到此一遊@Porvoo Borga )

睇完火車站就行番去條橋度，過對面河之後，就去搵呢度嘅天主堂（Porvoo Cathedral）。

( 下一站：天主堂 (Porvoo Cathedral) )

上到嚟之後，諗住可以入去參觀吓，但係見到四圍都好靜，大門又閂咗，又無人行過，即係無得入去睇啦，正打算離開去下一個景點時，就見到有個婆婆入咗去，既然有人入去，我哋就當然跟住入去啦！

（見有人入咗去，我哋先夠膽開門入去 )

入咗門口之後，右手邊檯面有一碗5色玻璃珠，係比人祈禱用嘅，5種顏色代表唔同嘅禱告，已經詳細列明喺右邊，想為d乜祈禱，就攞起相對嘅顏色珠，然後放入左手邊嘅樽入面，咁就代表祈咗禱。唔洗擔心放粒玻璃珠入去時會整爛個樽，或者d玻璃珠，因為個樽已經裝咗d水，唔會整得爛呢。

(5色祈禱珠 )

祈禱後，就再推開一度門，呢度就係天主堂個禮堂，為咗唔想打擾人，我哋搵咗個位坐低咗，之後聽到有人唱歌，相信係為復活節崇拜練緊歌，不過喺度練歌人，大部分都係長者呢。

(教堂內有人練緊詩，相信係為復活節崇拜做準備 )

(鮑渥天主堂 )

呢度係鮑渥嘅舊城區，相比起我哋落車嘅地方，呢度d建築物都比較舊，而且都係得兩層高，舊城區加上冷清嘅場面，再加上寒冷嘅天氣，再配埋呢張相，係咪好有feel呢！哈哈～～

(鮑渥舊城區 )

( 鮑渥舊城區街道 )

上午行程完結，我哋就番咗去市中心搵嘢食，即係我哋落車附近嘅位置，最後都係選擇幫襯Hesburger，呢間舖頭嘅漢堡包都幾好味，d薯條比老麥好食，今次選擇正確！

(午餐時間：漢堡包@Hesburger )

食飽之後，下一個目的地係Porvoo Art Factory，我哋照番之前去搵紅色屋仔嘅方向，即係穿過之前個銅像公園，過埋情人橋，不過今次轉去左手邊，行咗一陣就見到呢個公仔，唔知點解，我一見到佢就覺得佢係醜比頭，哈哈～～

（鮑渥醜比頭啦~~  )

同醜比頭say goodbye之後，就去到Porvoo Art Factory，入去之前，發覺d街燈比人整到有d枯樹feel，都幾得意吖。

(Porvoo Art Factory出面嘅枯樹feel街燈 )

唔知係咪嚟得唔合時，個Art Factory都無咩嘢好行，所以借咗個廁所一用就走咗。

下一個景點就係要去搵一間黃色嘅屋仔，要番過去河嘅另一邊，我哋可以兜過去睇睇，跟住就番去車站等車走人。

路過河邊，全部舖頭都無開門，同Google map個街境所見嘅完全係兩回事，而河邊嘅船亦都無開，無辦法啦，淡季再加上仲係冬天，係無乜嘢睇，但係就可以舒舒服服咁四圍行。

(由於係冬天，河邊嘅船都唔開，我諗要過多一個月先開 )

根據之前見到嘅地圖，呢度就係黃色屋仔嘅景點，我哋前前後後咁行咗幾次，但係睇來睇去都唔知係咩景點，究竟佢點解係一個景點呢？

(真係景點嘅黃色屋仔）

去到呢一度，鮑渥嘅行程已接近尾聲，去到車站之後，見仲有時間，咁就入咗去超級市場買定今晚嘅晚餐啦！

北歐嘅超級市場地方好大，唔似香港咁細，乜嘢都好逼，貨物架好逼，比人行嘅路都好逼，所以嚟到揀嘢都可以好舒服。

兜咗一陣，我見到有個女人放咗幾個生果上個磅度，跟住就篤個電子屏幕，然後有張label print咗出嚟，佢就用個膠袋袋好d生果，然後貼個label落個膠袋度，跟住就去比錢。

我好好奇都想知道點樣自助買生果，所以走埋去部機度睇吓，發現個磅上面有好多唔同嘅數字，究竟d數字同d生果又有咩關係呢？當我行埋去d生果度就解決咗呢個問題嘞！

大家只要認住價錢牌隔壁個圓圈入面個號碼，就當呢個牛油果啦，個號碼係『110』，跟住放個牛油果上磅，再按剛才個號碼，即係110，咁部機就會因應個牛油果嘅重量，而print出一張價錢貼紙，客人只需袋好個牛油果，然後貼上貼紙，出去比錢，完成，so easy！！

(用心研究點樣買生果！@K-Market)

玩完一餐之後，我哋就番出去等巴士，我哋上車嘅地方係3號月台。唔知今次有無車頭坐呢？根據之前搭巴士嚟嘅經驗所知，車頭位應該有好多人吼住，而且我哋係中途站上車，無車頭位坐嘅機會都好大，結果，當然無車頭位坐啦。

(我哋搭16:10班車番赫爾辛基 )

大約一個鐘頭左右，我哋就番到Kamppi Center lu~~

大家請認住呢間巴士公司，上網早買飛有著數，隨時執到€1嘅平車飛！唔好以為吹水呀，出發前我哋真係見到有€1嘅車飛，只不過當時未決定到個行程同時間，所以無買，後來都見唔到有€1嘅飛出現，而我哋就要比€10買。

諗番轉頭，當初見到€1車飛時，就應該買咗先，就算買咗唔用，都係蝕€1，相反，用得著的話，我哋就賺咗€9，真係後知後覺呀！！😠😠

(隨時有平飛嘅巴士公司)

去到呢度，就要recall番今朝早嘅情景：

喺月台時，拖住喼，迎著風雪，凍到不得了去攞房；

出門口時，仲係好凍，四周圍都係雪；

而家呢？！陽光普照，乜雪都無晒！！D雪呢！D雪呢！

（已經溶晒雪……）

番到apartment之後，都係6點左右，見到個咁正嘅太陽，咁就出去曬吓太陽啦，最正就係露台有個玻璃趟門，可以隔開室外同室內，咁就唔洗凍親，d陽光又可以曬入嚟，嗰種涼涼地又暖暖地嘅感覺真係好正！咁就cc服服咁嘆咗一陣。

（好好地享受一下日光浴啦~~）

嘆咗一陣之後，老婆就去預備今晚嗰餐，我就繼續留守露台，目的就係要影赫爾辛基黃昏time lapse，上年嚟都有影，不過係影星流跡，仲攪到部D600壞埋，事隔一年，換咗部D610嘞，邊度跌低就要邊度起身，right？

(黃昏，赫爾辛基 )

（赫爾辛基日落Time Lapse）

今晚嘅晚餐材料就喺晒到，但係個「主菜」完全睇唔到，佢就係香港人嘅人間美食：出前一丁！！跟團要帶杯麵，自由行就要帶一丁，呢條新嘅formula要延續落去啊！

(是日晚餐，辛苦妳嘞，老婆！ )

今餐好健康，用咗好多蔬菜類嘅食材，因為我哋知道嚟緊幾日都要出街食，而歐洲國家應該係以肉食為主，所以有機會就要食多d蔬菜。

見到隻蛋就記起買材料時嘅苦惱，我哋想食煎蛋，要煎蛋就要有油，apartment無油，即係要買啦，超級市場賣嘅嘅油全部都係大枝裝，點買呀！最後我哋買咗舊牛油，今晚就用嚟煎蛋，聽朝就用嚟茶麵包，一物二用，抵買！

(D料好多，多到連個出前一丁都見唔到，哈哈~~ )

食完呢餐之後，我哋突然跌晒watt，覺得好眼瞓，已經再無能力做任何嘢，只可以盡快番房瞓覺……

回想番呢個情景嘅時候，我哋覺得攰都好正常，做番個行程回顧先：

13/4，番咗一日工，放工就番屋企攞行李出機場。

14/4，00：25起飛，航程11個鐘，我哋只係瞓得幾個鐘，去到赫爾辛基機場已經係當地時間早上6點鐘左右，之後就開始我哋一整日嘅行程。

喺體力無完全回復嘅情況下玩一日，唔攰先奇啦！不過咁，一個咁悠閒嘅一日，又真係幾舒服嘅～～

今日嘅行程就咁結束。