目前分類:旅行回憶錄 - 2010 土耳其篇 (17)
- Oct 14 Thu 2010 15:05
2010 土耳其之旅後記
- Sep 28 Tue 2010 14:41
2010 土耳其之旅 part 7c ﹝卡歷奇 > 伊斯坦堡﹞
﹝2010年9月28日﹞
﹝卡歷奇 > 伊斯坦堡﹞
一落車行咗一陣,就已經覺得個地方好熟口面,原來杜伯奇皇宮係喺聖蘇菲亞教堂附近,哦~~原來係咁近嘅。可能我哋 Day 1 嚟到伊斯坦堡時仲早,見唔到呢度嘅觀光巴士,紅卜卜好搶眼,如果可以無埋過車頂就更好。
﹝伊斯坦堡觀光巴士﹞
- Sep 28 Tue 2010 14:12
2010 土耳其之旅 part 7b ﹝卡歷奇 > 伊斯坦堡﹞
﹝2010年9月28日﹞
﹝卡歷奇 > 伊斯坦堡﹞
喺伊斯坦堡食飽飯之後,就繼續我哋緊密嘅行程。
今次又再路經呢條唔知咩橋,上次同今次一樣,條橋都係有好多人喺度釣魚;而唔同嘅就係多咗我哋嘅一份失落。因為無得喺呢個博斯普魯斯海峽遊船河,唉……
﹝無言@伊斯坦堡﹞
- Sep 28 Tue 2010 13:42
2010 土耳其之旅 part 7a ﹝卡歷奇 > 伊斯坦堡﹞
﹝2010年9月28日﹞
﹝卡歷奇 > 伊斯坦堡﹞
今日嘅景點有好多,由卡歷奇出發,坐3-4個鐘頭車去到達達尼海峽,坐『大孖車』過海,即係上層載人下層載車嘅渡輪,過海之後就到達 Tepekent;食飽飯就會去伊斯坦堡參觀杜瑪伯爵水晶皇宮,之前加插一段被抄牌嘅小插曲;由於時間緊迫,團友們被分開3隊,我哋就跟領隊坐電車去其他景點參觀,其他人就坐旅遊巴去大市集行。
分道揚鑣後,我哋就去睇杜伯奇皇宮同埋地下水宮殿,然後就番大市集行下,行完之後就同之前嘅團友會合食飯,食飽飯就出機場番香港,行程緊密嘅一日呀!
好,講完個框框就開始今日嘅行程。
仲記得尋晚我話同老婆今朝出番個碼頭影日出嘛?我哋緊係記得啦,仲好早起身tim!一出到去個碼頭就搵個好位等日出,等咗10分鐘左右,個天開始光,我就發覺有d唔對路,既然個天開始白,點解唔見個太陽側邊d光?我突然間醒起,尋晚我哋成棚人行李都唔要,都要衝出嚟呢度影日落,既然睇到日落,呢邊即係西邊啦,太陽東邊升起嘛,呢兩條『茂里』走去西邊睇日出!真傻瓜,哈哈~~
原來我份人比較鐘意玩photoshop,諗住日落都已經咁靚,日出都應該差唔多啦,所以喺個心裡面key個太陽上去,個心key完都唔夠,仲想喺現實中影番張相對比一下,真係超低能呀!我之前同老婆講呢件『糯爆』嘅事一定唔可以比人知道,但係一世人又有幾多次會『糯』得咁緊要吖?所以一定要『公諸同好』!隨便笑啦!
既然無日出睇,咁就喺呢度駁下相啦,先企喺碼頭影番埋去酒店先。
﹝由碼頭望番去嘅酒店一帶﹞
- Sep 27 Mon 2010 23:31
2010 土耳其之旅 part 6b ﹝巴格門 > 特洛伊 > 卡歷奇﹞
﹝2010年9月27日﹞
﹝巴格門 > 特洛伊﹞
食飽飯就再開車去特洛伊,即係木馬屠城記嗰度,唔好問我木馬屠城記個故事講乜,我真係唔知道,我依稀有d印象嘅就係細個嘅時候玩嘅電子遊戲機吧!
一去到特洛伊個門口,成大隻木馬放喺度,一睇就知無搵錯地方,如果有人『坤』你話呢隻就係當年屠城嗰隻木馬的話,千祈唔好信呀,因為呢隻馬太新淨,而且木馬屠城呢件事都唔知係真定假!
如果你細心少少睇下面張相,就會發現個馬肚有條樓梯可以比人爬上去嘅,無錯,真係可以上去嘅,你再望高少少就會見到有2層窗口,第一 or 第二層影相都得,當然要視乎有幾多人啦,上面大約可以上10個人左右。其實呢度仲有一個地方要影嘅,亦都唔係個個留意到,係我老婆咁眉精眼企先見到,喺邊度?陣間再講。
﹝特洛伊招牌 ─ 木馬﹞
- Sep 27 Mon 2010 23:02
2010 土耳其之旅 part 6a ﹝巴格門 > 特洛伊 > 卡歷奇﹞
﹝2010年9月27日﹞
﹝巴格門 > 特洛伊﹞
今日嘅景點就只有2個,巴格門 & 特洛伊。巴格門,即係聖經入面嘅別加摩,只係釋音上嘅唔同吧;特洛伊,即係木馬屠城記嘅地方,陣間再詳細講。不過請留意,係巴格門,唔係巴格達,我哋無去到伊拉克。
喺個燕子竇之家瞓咗一晚之後,都ok舒服啦,下圖就可以睇到嗰幾個燕子竇,可能細個嘅時候見得多,都唔覺得佢有d咩咁特別,但係搞笑嘅我哋,就試過閂埋度門,拉埋個窗簾,諗住等呢個燕子竇『主人』番嚟,順便睇下佢係咩樣,結果我哋等咗3分鐘就放棄咗,得出嘅答案就係『呢個係一個有燕子竇but無燕子之家』,enjoy the stay!
﹝有燕子竇but無燕子之家﹞
- Sep 26 Sun 2010 18:30
2010 土耳其之旅 part 5b ﹝棉花堡 > 以弗所﹞
﹝2010年9月26日﹞
﹝棉花堡 > 以弗所﹞
行完棉花堡之後,我哋就去食lunch,食lunch之前,我哋又停一個休息站,不過今次係油站,就係因為停咗喺呢個油站,我哋先至知道原來喺油站買嘢係比休息站平!
OK,之後繼續飛馳去食lunch,亦都係我哋今晚嘅酒店,個地方唔錯,可以食到土耳其特色食品 ─ kebab,我去攞嘢食時就好多人排緊隊,因為幾團人一齊到嘛,輪到老婆去攞嘢食時,竟然比佢攞到!唔係佢去排隊,而係唔知點解無人排!
﹝土耳其特色食品 ─ kebab﹞
- Sep 26 Sun 2010 18:09
2010 土耳其之旅 part 5a ﹝棉花堡 > 以弗所﹞
﹝2010年9月26日﹞
﹝棉花堡 > 以弗所﹞
早晨呀咁多位,尋晚訓得好嘛?我就麻麻地嘞~~點解?之前咪講咗lor,有部好凍嘅冷氣同埋好陰濕嘅蚊招呼我哋嘛!!
大家睇見下面間房嘛!唔太大間,嗰部分體冷氣就好玩o野,個風口較唔到上下吹,如果訓近部冷氣嘅話,即係要比部冷氣兜口兜面吹到正;如果訓近牆o個舖床,部冷氣又好似唔夠力吹咁遠,所以我哋都係揀咗近冷氣嗰舖床訓,2個人一齊訓又冚埋被,應該頂得住嘅~~
個答案係頂唔住嘅!因為張被有d薄,而且d風係吹住個頭,所以訓咗一陣就已經要熄冷氣,跟住精彩事情就發生嘞!竟然有蚊!!雖然有蚊紗隔一隔, 但都係阻止唔到d陰濕蚊招呼我哋,因為個蚊紗有d穿,開門閂門都會比d蚊走入o黎,結果遭殃嘅係老婆,真係慘。
當我哋熄咗冷氣無幾耐,隻蚊﹝相信唔只一隻吧!﹞就開始襲擊我哋,不過隔咗一排之後,隻蚊d攻勢就去晒我老婆度,其實大家又知唔知點解我會叫佢做陰濕蚊呢?就係因為佢專攻我老婆d『騎呢』位,例如眼皮啦,手指『la』咁lor~~仲要係隻蚊毒到不得了,玩完一日d毒都仲未散得晒,搞到佢仲有d眼腫腫tim呀!
﹝充滿住陰濕蚊嘅酒店房間﹞
- Sep 25 Sat 2010 17:47
2010 土耳其之旅 part 4 ﹝卡柏都斯亞 > 棉花堡﹞
﹝2010年9月25日﹞
﹝卡柏都斯亞 > 棉花堡﹞
今日個行程會好充實,充實到只有一個景點,就係轉酒店!無錯,由卡柏都斯亞坐旅遊車去棉花堡係好遠嘅,淨講車程都已經要10個鐘頭,再加埋停吓休息站同埋食飯,最少都要12個鐘,即係坐足全日車!
其實報團嘅時候,我哋都知道會有一程咁長嘅車程,雖然,其他旅行社可以用內陸機取代,不過就會貴dd,而且去嘅景點會少咗,再加上我哋覺得呢一段車程應該會有好多風景睇,同埋呢d咁長程嘅車,唔趁後生去嘅話,相信第時年紀再大就一定頂唔住,所以我哋都照報。
今朝早,好似8:30am就出發,所以我哋好早已經起咗身,除咗係我哋嘅習慣外,都要預番d時間搵人開番度門比我哋嘛,因為呢度死人壞鬼門用佢2日就壞足2 日!
一起身,就聽到酒店外面有d『啷啷』聲,出到露台之後,就比我搵到有人喺度放羊,可能城市人係無乜機會見到真正嘅牧羊係咩一回事,今次就比我親眼見到,會覺得好得意。同時亦都不其然咁想起大衛呢個牧羊人,其實帶住咁大群羊真係唔易,如果有猛獸出現嘅話,牧羊人又可以點樣驅趕猛獸之餘,又可以搵得番晒d四散嘅羊呢?亦都想起聖經其中一句:『我是好牧人,好牧人為羊捨命。』﹝約翰福音 10:11﹞
其實,我睇見呢群羊再諗起呢句聖經時,就想問:如果牧人為羊捨咗命,咁邊個可以繼續阻止d猛獸嘅攻擊呢?唔通呢個捨命係同歸於盡咁解?
﹝放牧中嘅羊群﹞
- Sep 24 Fri 2010 15:34
2010 土耳其之旅 part 3c ﹝卡柏都斯亞 > 柏夏背 > 居里默 > 石洞歌舞﹞
- Sep 24 Fri 2010 15:18
2010 土耳其之旅 part 3b ﹝卡柏都斯亞 > 柏夏背 > 居里默 > 石洞歌舞﹞
﹝2010年9月24日﹞
﹝卡柏都斯亞 > 柏夏背 > 居里默 > 石洞歌舞﹞
我哋一過咗馬路之後就見到身後嘅奇石林,可能大家都會覺得d石柱會唔會跌落o黎,其實唔洗擔心,因為佢哋唔係2舊石,係一舊o黎o架,因為以前嘅天災,例如地震呀,火山爆發呀等等,再加上風雨侵蝕,上高嗰截同下低嗰截冷卻時間唔同,所以佢哋先會有2截唔同顏色吧!
﹝有個穿咗窿嘅石柱﹞
- Sep 24 Fri 2010 15:02
2010 土耳其之旅 part 3a ﹝卡柏都斯亞 > 柏夏背 > 居里默 > 石洞歌舞﹞
﹝2010年9月25日﹞
卡柏都斯亞 > 柏夏背 > 居里默 > 石洞歌舞
今日行程好豐富,一早去玩熱氣球,睇奇石林,行居里默,參觀陶瓷工場,獵人谷,地毯工場,駱駝谷同埋睇石洞歌舞;行程好多,不過係一個唔係咁好嘅開始。
承接之前嘅不快,今日度房門問題依舊。由於今日行程好多,而且早出晚歸,我唔想玩完番o黎之後,仲要重覆尋日嘅經歷,所以出門時,我再試多次個房card得唔得,結果比我批中佢,個門鎖真係有問題,我頂吖!
一去到lobby,我就同領隊講咗呢件事,佢都擰擰頭咁話今晚再同我follow,都無計啦,反正都要今晚先做到嘢,咁就收拾心情專心去玩啦。
由於5:30 morning call,所以一出酒店個天仲係好黑,行到半路,個天開始光,大家都好期待可以上熱氣球睇日出。可惜,我哋排唔到最早嗰round,所以係睇住人哋上熱氣球睇日出吧!沿路個天好靚,o架車飛馳中嘅時候都要影低個靚景,有朋友問我係咪上咗太空,我問點解咁講?原來佢哋將張相倒轉睇,就以為我上咗太空,哈哈~~~
﹝在車上飛馳時看到的日出﹞
- Sep 24 Fri 2010 14:24
2010 土耳其之旅 part 2b ﹝國父紀念館 > 鹽湖 > 地下城 > Asos Thermal 酒店﹞
﹝2010年9月24日﹞
安卡拉Alkin Hotel > 國父紀念館 > 鹽湖 > 地下城 > Asos Thermal Hotel
食完lunch就繼續行程,途經一個叫鹽湖嘅地方,呢個唔係行程包埋嘅地方,領隊見有時間又路經,所以就帶我哋去行下;呢個湖好大,因為天氣嘅關係,d湖水已經蒸發晒,d鹽就剩番o係度,咪以為d鹽可以比你隨手攞走呀,d鹽已經同個地球成為一體,想掘一舊都唔容易,就算比你掘到,我都唔建議你食咗佢,個個o黎呢到都喺上面行,咁你同『lam』人鞋底有乜分別?
另外,今次影鹽湖比咗一個影相嘅實習機會,影海灘相要+ev,呢個技巧我知道,但從未有機會用過,今次用到lu~~,請睇下加無加ev同加咗ev嘅分別!
﹝無+ev嘅鹽湖,白色嘅地方有d瘀黑﹞
﹝+1 ev嘅鹽湖,白色終於變番白﹞
- Sep 24 Fri 2010 13:42
2010 土耳其之旅 part 2a ﹝國父紀念館 > 鹽湖 > 地下城 > Asos Thermal 酒店﹞
﹝2010年9月24日﹞
安卡拉Alkin Hotel > 國父紀念館 > 鹽湖 > 地下城 > Asos Thermal Hotel
之前嗰晚間酒店比較普通,由於係歐洲酒店嘅關係,所以係無冷氣嘅,無冷氣咪開窗lor,個窗無蚊紗,一開窗就係一大片草叢,會有蚊嗎?幸好,無蚊,而且氣溫唔錯,少少涼涼地,冚被就少少熱咁啦;由上飛機到訓覺計已經有29個鐘無好好咁訓過,所以,尋晚係訓得好好嘅~~
一如以往,我哋通常都會比morning call早起身,唔洗同人迫之餘,仲可以四周圍行下嘛~~ 今朝個早餐係咁多日以o黎最好嘅,係因為有烚蛋食,仲要係分為3分 or 5分蛋,之後嗰幾日d蛋全部都係熟到透晒,一d都唔好食。
﹝我嘅3分蛋早餐 + 麵包 + 芝士 + 蕃茄刺身﹞
- Sep 23 Thu 2010 13:24
2010 土耳其之旅 part 1b ﹝香港 > 伊斯坦堡 > 安卡拉﹞
﹝2010年9月23日﹞
伊斯坦堡機場 > 聖蘇菲亞教堂 > 藍廟 > 安卡拉Alkin Hotel
行完聖蘇菲亞教堂之後,就穿過剛才行過嘅公園仔,過對面行藍廟,要影得靚個藍廟就唔可以行得太近,除非你部相機夠wide啦,否則,會影唔晒佢6條宣禮塔。
﹝行經中間個公園仔時影到嘅藍廟﹞
由於有部份團友仍然『滯留』於公園仔內,已經行到去藍廟前面嘅團友,就繼續影住相o黎等。
﹝合照於藍廟前﹞
- Sep 23 Thu 2010 13:05
2010 土耳其之旅 part 1a ﹝香港 > 伊斯坦堡 > 安卡拉﹞
﹝2010年9月23日﹞
伊斯坦堡機場 > 聖蘇菲亞教堂 > 藍廟 > 安卡拉Alkin Hotel
其實個日期可以改為9月22日,因為夜晚集合,23日一早去到土耳其,仲可以喺空中追逐中秋嘅月光,一直追到去伊斯坦堡,係咪好浪漫呢~~ 講完我都有d想嘔呀!
呢日我覺得好特別,因為一朝早要攞晒所有行李番工,收工後食埋飯,然後再上番公司攞行李,就喺公司樓下等機場巴士入機場集合,一個超smooth嘅安排,哈哈~~
更特別嘅係粟米都係當晚差不多時間起飛,而佢就飛去大不列顛,我哋仲可以送佢機tim,不過今次唔同一般送機,我哋係同佢一齊入閘,過關,一直行到去佢個登機閘口,我都係第一次咁樣送機,都幾得意吖~~ 粟米就話好感謝主,為佢預備2個天使帶佢上飛機,因為佢自己一個人搭飛機會有d驚wor~~ 因為未得粟米同意,而我亦都無問,所以唔post粟米d相。
送完粟米,我哋就喺機場四圍行,見到有個兒童天地,地下舖咗個飛行棋比人玩,不過唔知有幾多人真係會玩呢~~
﹝飛行棋﹞
- Sep 22 Wed 2010 23:08
2010 土耳其之旅前傳
已經有2年無去過旅行,對上一次係2008年去東歐同北海道,之前plan過2009年去南非,可惜出發前外父有病去唔成,陪佢行咗11個月之後,所有事情都歸於平靜,我哋兩公婆都想去下旅行散下心。
由於2010年9月尾搭10月頭會有比較多假,所以我哋選擇搵長線團,即係最少7日嗰d,比較過日期、行程、團費等等事項,最後決定去土耳其,仲要揀搭好多及好耐車程嘅團,我哋跟美麗華去,2010年9月22日中秋節正日夜晚起飛。
出發前,我哋上網搵資料做功課,搵下搵下先發覺好困難,一來唔多blog講及土耳其,二來旅行團資料係中文,好難喺google map搵得啱個地方,三來地方名及譯名都好唔同,四來圖書館有關土耳其嘅書都唔多,所以砌資料砌得好辛苦。
就用以下地名比大家睇下有幾難搵:
以弗所係中文譯名,但係英文可以係Efes or Ephesus
居里默係中文譯名,英文係Goreme,不過網上中文名可以係格雷梅、高樂美~~
不過都算啦,我哋好enjoy呢個trip,風和日麗,藍天白雲,安排上都唔錯,只係成團人得我哋兩公婆有一d比較"特別"嘅經驗,遲d係詳細嘅blog再講啦,總括嚟講,好滿意呢,出發前睇下我哋今次點樣喺土耳其行個圈吖!
Ready to Turkey? OK, let's go!!