﹝2010年9月26日﹞
﹝棉花堡 > 以弗所﹞
行完棉花堡之後，我哋就去食lunch，食lunch之前，我哋又停一個休息站，不過今次係油站，就係因為停咗喺呢個油站，我哋先至知道原來喺油站買嘢係比休息站平！
OK，之後繼續飛馳去食lunch，亦都係我哋今晚嘅酒店，個地方唔錯，可以食到土耳其特色食品 ─ kebab，我去攞嘢食時就好多人排緊隊，因為幾團人一齊到嘛，輪到老婆去攞嘢食時，竟然比佢攞到！唔係佢去排隊，而係唔知點解無人排！
﹝土耳其特色食品 ─ kebab﹞
今餐我哋食得比較開心，因為除咗國菜之外，仲有其他『食得落』嘅嘢食嘛~~
﹝土耳其國菜以外嘅食品﹞
快快填飽個肚之後，唔係check-in，而係向以弗所出發。呢個以弗所係一個歷史遺跡，亦都係聖經中曾經提及過嘅一個地方，不過好可惜，經歷過地震之後，呢度已經剩番一埋頹垣敗瓦，無復當年繁盛嘅風采。
﹝以弗所遺跡 1﹞
由於o黎呢度嘅人真係好多，再加上好多歐洲當地導遊，係要帶住成班團友逐個地方講解，所以大家一見到有空位就即『攝』即影，唔好放過d好開揚嘅機會。呢一幅相係我同老婆唔覺意同領隊走散咗，因為我哋覺得去到個路口應該轉右，即係我哋影相呢邊，所以快手快腳影番幾張相先，點知一影完就發現唔見咗班型團友，所以就等咗一陣間，點知都係唔見佢哋，當我哋行番去頭先個路口附近時，終於搵番佢哋，哈哈~~ 原來佢哋喺路口轉左，我哋覺得陣間行番轉頭都會經過呢個路口，到時先再行番左邊吧。
﹝以弗所遺跡 2﹞
其實呢度d遺跡真係好多，多到記唔晒，所以，make it simple，最深印象嘅係『遺跡』！無錯，跟我講一次，『遺跡』！
﹝以弗所遺跡 3﹞
我已經唔記得呢度d遺跡嘅名，咩議事廳呀，國會呀等等，我一概唔記得，只記得2個，下圖就係其中一個，廁所！
當我親眼見到呢個廁所時，我唔係問點解以前d人咁open，而係點解咁逼都可以一齊痾？
﹝以弗所廁所﹞
聽導遊講，以前d人就係喺痾緊嘅時候交換消息嘅，例如邊度呢期要好多米呀，邊個老闆無錢比呀等等，可能就係因為要互通消息嘅關係，所以大家『親密』d會好d呢，哈哈~~~
另外一個我記得嘅遺跡就係以弗所圖書館！呢個圖書館同大三巴差唔多，不過就比大三巴完整，o黎得以弗所而唔同呢個圖書館影相，相信無乜幾多個！而且唔影呢度，即係等於去香港唔上山頂一樣。由於天氣好嘅關係，真係影乜相都靚d~~
﹝以弗所圖書館﹞
﹝企近d個圖書館再影多張先~~﹞
面向圖書館嘅右手邊有條路，可以通去一個碼頭，仲會經過一個好值得參觀嘅露天大劇場，我哋就無去到個碼頭，因為領隊話唔值得去，不過，唔去碼頭都睇唔到個劇場，因為個劇場裝修中，唉~~~ 結果咪同個劇場前面d『遺跡』影番張相到此一遊lor~~
﹝以弗所劇場前嘅『遺跡』﹞
既然無去到碼頭，又無得睇個劇場，所以就沿路番轉頭，睇吓d柱群啦，亂石啦……等等，我哋亦都可以肯定領隊嘅說話係啱嘅，佢話呢度d石好多都係假嘅，『唔係呀fa~~』就係我當時嘅反應，當我再細心d觀察之下，又真係無錯wor~~有d比較整齊同埋比較『肆正』嘅石就係後期製作嘅。諗深一層又啱wor，如果真係得爛石同亂石睇嘅話，比著你都唔o黎睇啦，係咪！
﹝以弗所遺跡 4，圖右格仔衫個團友唔知搵乜呢？﹞
大家估唔估到下面張相我係o係邊個位影？hints：上圖可以搵到！
無錯，上圖中間上少少咪有棵樹嘅，我就係企喺嗰度影嘅，如果想『攝』呢個位就要快手，好多人都等呢個位影相o架。緊係啦，夠開揚，一take過影晒成個境咁滯，仲可以影埋個圖書館tim~~
原來呢條街叫克里特斯大街，多謝Amy『暗地裡』提供資料，搵料@your facebook，hehehehehe~~~
﹝以弗所遺跡 5﹞
呢個又係咩地方呢？仲記唔記得一o黎到呢度我哋咪同團友們走散咗嘅，呢度就係我哋剛才無行到又聽唔到講解嘅地方，所以係唔知咩地方o黎嘅，不過，既然一場o黎到，點都要影番張『到此一遊』嘅~~
﹝以弗所遺跡 6﹞
下面呢度就已經差不多行到去出口附近，呢個係一個小型音樂廳，又係好難先等到無晒人呢，老婆同我影完，一個轉頭已經有一堆人出現lu~~
﹝小型音樂廳﹞
呢個羊頭好似係佢哋d柱頭特色，都係唔知叫咩名。
﹝以弗所遺跡 7﹞
終於行到去門口lu~~『到此一遊』又點少得呢，仲有個重點介紹，陪我征戰咁多個國家係d咩呢？咪就係我老婆lor，哈哈~~~仲有我2部相機，Nikon FM2﹝菲菻機﹞同埋Sony DSC 2﹝digital﹞。
﹝到此一遊@以弗所﹞
等齊人之後就去皮革工場，亦都係一個劈遊客嘅地方，下圖著啡色皮褸嗰個人個樣好似碧咸o架！
呢度可以睇到d model 著住唔同嘅皮褸行cat walk，每件褸都有一個『冧把』，有興趣嘅就可以mark低佢，睇完cat walk就叫人攞比你睇。不過，記得唔好mark，除非你真係好想買啦，否則一比佢哋知道你有興趣的話，肯定成舖頭人招呼你呀！
呢度另一個selling point就係佢會捉幾個團友去做model，著住佢哋d皮褸行cat walk，下圖嘅左、中、右就係我哋嘅團友。
﹝皮革工場﹞
行完呢個工場就去咗一間手信店，可以買到好多土耳其嘅特產，當然一定有甜都不得了嘅土耳其軟糖啦，仲有d花茶呀咁lor~~最搞笑係個老闆，識講英文之餘，仲識d廣東話tim~~
之後就番酒店食飯，不過食飯前又有d『特別待遇』，不如你哋估吓有d咩咁特別吖！我相信你哋一定諗唔到，包括我自己都諗唔到！
呢間房竟然無電！我講多次，係無電！一入房，我哋就緊係check下間房啦，點知電視同冷氣都開唔到，好彩領隊喺附近，即刻叫佢搵人幫手，搞咗一大餐，又打大制，又出大櫃搞吓咁，都係搞唔掂，最後我同領隊講，不如換房啦，我唔想再浪費時間去等，當領隊安排咗間房比我時，我就同佢講，『呢間房唔會有問題啦嘛？』佢就話無問題，如果再無電的話，佢話會包我哋頭等機番香港。
一入到房即check有無電，結果呢間房OK，個領隊都鬆o左一口氣，唔洗upgrade 2 張頭等嘛。不過一閂門我就大叫『點解個露台有燕子竇o架！』嗚嗚~~~
食飯又係一個笑料時間，有一家人覺得嗰餐唔好食，咁就自己喺出面間餐廳﹝都係酒店自己d餐廳﹞買咗d嘢食入o黎，記唔記得我之前講過一對喺泳池影相嘅母女？個呀媽就懶勁，覺得自己有錢就可以威比人睇，見人哋有好嘢食，自己都唔執輸，就即刻拉走自己個女，出去出面間餐廳食嘢，但係個女啱啱先攞咗一碟嘢食，想食埋都唔得，扁住個嘴咁比個呀媽拉走咗。
在我而言，有錢又真係幾巴閉嘅，不過可惜吖，妳有錢但係唔識叫嘢食，又咪係要跟住其他團友叫嘢食，懶巴閉！
day 5講完，聽日再講啦，bye bye~~~
留言列表
