一篇自言自語嘅廢文，不喜勿插
「愛人如己」，「你想人點對你，你先點對人」
相信每個基督徒都好明白以上兩句說話，亦都講過無數次，係咪？
若講「愛人」，相信好多人都好熱心好盡力去幫人，唔係要有乜嘢回報，而係真係出心出力去幫人。當對方婉拒自己嘅盛情時，自己總係覺得無所謂，因為自己真係好想幫對方。
假若呢一刻可以調換身分，自己又會點樣面對對方嘅盛情呢？無論自己幾唔掂都好，基於唔想麻煩到人嘅大前題下，通常都係話「唔洗喇，我自己搞得掂，ok㗎！」
係呢一刻，你覺唔覺自己精神分裂呢？你要人點對你，你先點對人吖嘛，當初自己咁熱心幫人，即係想人哋都咁對自己啦，係咪？當人哋好熱心幫自己時，自己會推卻呢？
當我自己去反省時，我不禁問自己：你係真心想幫人嗎？還是想透過幫人去滿足自己？點解你會見到人哋有需要，而忽視或掩飾自己嘅需要呢？
如果「愛人」真係要「如己」的話，我先要認識自己，先可以去愛人。如果我連自己都唔認真地愛，我又點可以認真地去愛人呢？
其實愛嘅關係好正，當你承認自己有需要，容讓身邊嘅人提供協助，你會感受到愛。當有機會時，自己又去幫返人，咁樣，大家就可以讓愛去延續落去。
無論係愛人愛自己，都要先用自己個「心」行先。如果唔用心去愛，咁樣仲可以稱為愛嗎？
CK Lam 發表在 痞客邦 留言(0) 人氣()
（2021年3月29日）
今日我嘅身份係陪診員，陪家人到醫院做 PET-CT，等候期間，見到5個中年，甚至更年輕嘅男女跟姑娘去做放射治療。見到呢個景象，我不禁嘆息：癌症遍及嘅年齡層實在係好廣闊。
坊間好多資訊都叫人要過健康嘅生活，多做運動呀，早睡早起呀，多菜少肉呀等等…如果大家都跟足晒去做，係咪真係可以避免有嚴重病痛？現實話我知：唔係囉！
無論你生活得幾健康都好，癌症一樣會搵上門。
無論你生活得幾混亂都好，可能會平安過一生。
世事無常，唯有調整自己嘅心態同生活去面對。
其實人生真係好得意，當你有好好人生目標時，一場大病，可以令你看破紅塵，萬事皆可放得低。
原來，腳步放慢，才能夠欣賞呢個世界。
原來，定睛細看，才能體會自然的奧秘。
原來，用平常心，才能看到世界真奇妙。
原來，平凡就是好。
平凡好簡單，就係用心去感受你每日必然發生嘅事情。
平凡，可能係身邊一片落葉。
平凡，可能係身邊一隻流浪貓。
平凡，可能係每日嘅日出日落。
平凡，可能係家人為你預備嘅一餐飯。
平凡，可能係每日車你返工嘅巴士司機。
平凡，可能係每日開門比你嘅看更。
平凡，可能係你一d都唔會留意嘅生活細節。
其實，能夠活得平凡，已經係最好。
CK Lam 發表在 痞客邦 留言(0) 人氣()
