可能大家都去過海防博物館，不過，我都想做下導遊帶大家行下，有問題就出聲啦。
今日﹝2010年2月21日﹞，同屋企人去咗海防博物館行下，天氣都算唔錯，初初都有d陽光，可以曬下唔洗發毛，哈哈~~我哋由銅鑼灣坐2X去西灣河，再轉85去到海防博物館門口落車，一落車就知道自己無去錯地方，有圖為證啊！
﹝海防博物館入口﹞
一過咗個閘，就見到有條分岔路，右邊斜路係博物館入口，我哋行咗去左邊，沿路可以行到去個魚雷發射站，不過我哋無行到咁遠，只係去咗個分岔口無幾遠嘅火藥庫，即係幅圖嘅左手邊個拱門。
﹝入口嘅分岔路﹞
﹝附近會有個導賞圖介紹個展覽館嘅大約環境﹞
﹝火藥庫﹞
呢度就係個火藥庫，睇完都唔明點解會叫火藥庫？只係見到幾支炮吧！
之後，我哋就沿斜路上，去到半路就見到有支名副其實嘅「大炮」，同埋幾部軍車。
﹝名副其實嘅「大炮」﹞
﹝有坦克車同運兵車﹞
﹝想一家人一齊影相又唔洗人幫？利用個倒後鏡啦~~﹞
睇完軍車就繼續向上行，大門口旁有個「到此一遊」景點。
﹝海防博物館﹞
呢個博物館逢星期四休息，入場費成人$10，長者小童$5，買完飛就搭電梯上8樓，正式參觀呢個博物館。一開門轉右就見到個好開揚嘅風景，如果再好天d的話，相信嗰種渡假feel會好濃厚。
﹝風景開揚嘅海防博物館﹞
呢度有個好大嘅展覽館，分2層，唔方便行樓梯嘅人可以用升降機上落，地下嗰層有唔同嘅展覽室去講番香港打日本仔嘅歷史，沿廁所方向行，仲可以搵到個有無敵海景嘅餐廳仔，至於2樓呢，有一個小型電影院，仲有一個兒童天地，可以比d小朋友畫下畫同玩下電腦，行得太耐的話，又可以好容易就搵到張櫈坐下。
﹝展覽館﹞
﹝展覽館內有好多唔同類型嘅軍備﹞
﹝香港被佔領後被改名嘅街道﹞
﹝唔同種類嘅炮彈﹞
﹝兒童天地﹞
當我地上左2樓行經兒童天地時，有個媽咪比個「食蕉」請左出室外地方，因為餵奶比個小朋友都唔可以喺室內，我真係好佩服個「食蕉」，「不准飲食」真係要揸正嚟做，小朋友都無情講，勁呀！
當我地行左出室外坐坐休息時，聽到唔知邊度有「do do」2聲，放眼一望，原來水警查船，希望個船主無載違禁品啦！
﹝水警查船﹞
之後就約埋屋企去左杏花村食lunch，正！
