松此放眼看世界

﹝2013年8月25日﹞

如果大家有留意個日期，就會知道我呢個西歐篇拖咗好耐，2011年3月去嘅旅行，要到2013年8月先打完，歷時2年5個月，當中都去咗幾次旅行，換句說話講，仲有好幾次嘅行程『未上架』，唉~~

Anyway，要做嘅嘢始終要做，未完成嘅嘢係要去完成嘅，所以呢個後記都係要完成嘅！

事隔咁耐，仲有咩好記呢？當然有啦！今次西歐之旅，對於我嚟講，係打破咗我一d童年嘅觀念，同埋開咗我嘅眼界，仲可以同老婆一齊經歷一d特別事，例如：

1) 歐洲，係一個我去唔到嘅地方
2) 大笨鐘一d都唔『笨』，笨嘅只係我自己
3) 由London Eye睇黃昏日落係好靚嘅
4) 梵蒂岡嘅聖彼得大教堂真係好宏偉
5) 原來比薩斜塔係咁細座
6) 喺威尼斯跌爛相機，好彩，仲影到相！
7) 米蘭出名嘅唔係教堂，而係白鴿黨
8) 喺鐵力士山踏上人生最高之顛
9) 德國咸豬手真係好巨型
10) 『印堂發黑』係一個最貼切嘅形容詞去形容科隆大教堂
11) 華倫丹係一個令我好驚喜嘅地方
12) 喺風車村見到巨型大木屐
13) 喺布魯日遇見一個好親切嘅修路工人
14) 布魯塞爾玩香蕉眼羊
15) 親眼見到巴黎鐵塔
16) 巴黎市自由行，搵皇宮 & 行羅浮宮

咁多日以來，真係好感恩，有一個好好嘅領隊，有一班好玩得埋嘅團友，剛好5對Couple，有好嘅天氣，大家一路平安……衷心感謝主。

﹝2011年3月17日﹞

﹝繼續巴黎市內觀光x2，之後就返香港﹞

今日嘅行程極簡單，起身食早餐，攞埋行李跟車出老佛爺，之後就係自由時間同埋自費食lunch，最後返老佛爺集合出機場返香港。

今日開始行程之先，等我講樣痴線嘅嘢比你知吖，呢個法國之旅有兩個半日嘅自由時間，原本我哋係想尋日嘅半日去行羅浮宮，而今日呢半日就去行凡爾賽宮o架！但係我個朋友同我講，兩個宮都好大好多嘢睇，而且凡爾賽宮喺好遠，搭得車去就已經要番轉頭，所以我哋先『取消』凡爾賽宮嘅行程吧~~夠顛吧！！

今日有幾個任務要完成：

1) 搵『羅浮宮三寶』

2) 搵達文西嘅倒轉玻璃金字塔

3) 搵Angelina買朱古力醬

4) 去國虎屋食lunch

可惜，成功率只有50%，點解？睇落去就知道…

尋日同今日都係由老佛爺行去羅浮宮，不過出發之前我哋會先去春天百貨買macarons做手信，當我哋去到嘅時候，呢間舖頭剛開門，諗住快快趣趣買完快d走，唔知係個法國妹未瞓醒，還是佢天生手腳慢呢？抑或係我哋買得太多呢？買一打macarons，講埋比佢聽要邊幾種味道，一夾一放重覆12次再包好，好簡單吧，咁都要搞咗我哋差不多成半個鐘，完成欽佩佢嘅工作 & 服務效率呀！

﹝Macarons Menu﹞

﹝2011年3月16日﹞

﹝繼續巴黎市內觀光﹞

食飽飯之後，就去暢遊塞納河，大約玩一個鐘頭左右啦，沿途可以欣賞兩岸嘅景色，佢會去到聖母院附近，仲可以睇到巴黎鐵塔tim~~去到碼頭嘅時候，見到佢個入口好似有d單張比人攞，諗佳睇吓咩單張啦，點知領隊趕我哋上船，想睇一陣都唔得，結果，只有聽話上船lor~~

呢架船好大隻，可以同時坐幾百人，由於天氣好嘅關係，全部人都坐上層，而坐得上層嘅人，個個都坐唔定，呢度又影嗰度又影，唔理背景係乜都好，總之乜都要影一餐，真係『啤』一聲~~

﹝遊船河中嘅聖母院及巴黎鐵塔﹞

﹝2011年3月16日﹞

﹝巴黎市內觀光﹞

﹝讓各位久侯嘞，我終於『的』起心肝再寫埋餘下兩日嘅行程，相隔咁耐都仲唔放棄，真係唔like自己都唔得！﹞

去到呢一日，已經係成個行程嘅最後一站 -- 巴黎，今日就只係喺市中心四圍行，無乜特別。我哋會先上巴黎鐵塔，又稱艾菲爾鐵塔，之後就去拿破崙墓、協和廣場同埋凱旋門，參觀完之後就去食飯；飯後就去塞納河遊船河，之後就有幾個鐘嘅時間去老佛爺Shopping，我哋就當然唔會喺呢個已被淪陷嘅地方久留，我哋選擇探路去羅浮宮門口一帶，預備聽日同埋D團友一齊去，之後就番老佛爺會合，會合之後就去食飯，全日行程就係咁！OK，Let's go~~

一如以往，又係早少少起身，不過今次呢間酒店附近無嘢好行，我哋就早d去食早餐lor~~ 食完早早餐就出發去巴黎鐵塔，唔…今日天氣普通。

﹝巴黎鐵塔附近﹞

﹝2011年3月15日﹞

﹝布魯日 > 布魯塞爾 > 巴黎﹞

嘆完青口餐後，又係時候同比利時say goodbye，跟住就會進入法國，亦即係我哋嘅行程最後一站，而今日下午嘅行程就係去蒙馬特山，我稱佢為賊仔山，因為呢一度有好多或明或暗嘅賊仔，一不留神，破財擋災吧，詳情陣間再講~~

進入法國之後，我見到一d廣告牌都幾得意，大家一睇個公仔就知道佢賣乜。

﹝玩小型賽車吧~~﹞

﹝2011年3月15日﹞

﹝布魯日 > 布魯塞爾 > 巴黎﹞

上文提到，今日我哋朝頭早有意外收穫，究竟係咩呢？就係可以親親大自然。

尋晚，唔知為咩事，我哋較個鬧鐘較早咗好多，落樓嘅時間係比morning call 早一個鐘有多，落到樓下，就同間酒店影番張相先，你睇，個天都仲係未光得晒，我哋應該係7:00am 未夠已經出咗門口。

﹝布魯日Apollo Hotel﹞

﹝2011年3月14日﹞

﹝阿姆斯特丹 > 布魯日﹞

送別4位團友之後，我哋就會進入比利時嘅布魯日，一個被聯合國教科文選為世界文化遺產嘅地方。坐咗4個幾鐘頭車之後，我哋就到達布魯日，我哋可以有大約一個鐘嘅自由時間，可以喺布魯日廣場四周圍參觀。

﹝布魯日廣場﹞

﹝2011年3月14日﹞

﹝阿姆斯特丹 > 布魯日﹞

各位早晨，今日嘅行程好簡單，我哋會繼續喺阿姆斯特丹境內，先去睇芝士廠同風車村，之後就會去遊船河，遊到咁上下就埋岸，上去鑽石工場參觀，參觀完畢就食 lunch；食飽之後就會離開阿姆斯特丹，進入比利時嘅國境，過境前會先停一停阿姆斯特丹機場，因為我哋當中有4位係10天團嘅團友，而我哋就要喺呢度同佢哋講再見。今日嘅行程大致上係咁，一陣再詳細講。

一如以往，我哋都會早少少起身，出去酒店附近行吓影吓相，不過呢間 Crowne Plaza Hotel 一帶就無乜好行，影過相，到此一遊就算數。

﹝Crowne Plaza Hotel@阿姆斯特丹﹞ 

﹝2011年3月13日﹞

﹝法蘭克福 > 科隆 > 華倫丹 > 阿姆斯特丹﹞

喺之前一part嘅酒店門外影完相後，就沿住條路向前行，就會經過一個海邊，可惜，天陰 & 密雲，否則呢度應該會好靚，我哋身後呢排屋仔亦都係一個好好嘅攝影地點，一陣再話比大家知有咩好影。

﹝華倫丹海邊﹞ 

﹝2011年3月13日﹞

﹝法蘭克福 > 科隆 > 華倫丹> 阿姆斯特丹﹞

咁多位早晨，今朝早係一個令人期待嘅早上，點解？因為前一晚領隊同我哋講咗兩樣嘢，

1) 酒店大堂有電腦用，唔洗錢上網；

2) 早餐極豐富，要預多少少時間食。

所以，我哋都早咗少少落去，一去到大堂，就見到部電腦無人用wor，咁我哋就當然唔會放過呢個機會啦，但係用用吓就發現有d唔妥，個keyboard好似同我哋用開嘅有d唔同嘅，但係睇落又好似樣wor~~ 當我認真少少去睇呢個keyboard時就發現到，個『Y』同『Z』係調轉咗，仲有咩唔同？自己去發現吓啦~~

﹝歐洲版keyboard﹞ 

﹝2011年3月12日﹞

﹝琉森 > 海德堡 > 法蘭克福﹞

其實呢條街都有好多唔同種類嘅嘢賣，有蘋果乾賣之餘，仲有真嘅蘋果，想朝聖的話，記得唔好錯過。 好彩，我哋路過嘅時候，iPad都仲未出到嚟歐洲，如果過多兩日的話，我肯定呢條街一定逼滿人！

﹝『蘋果店』﹞

﹝2011年3月12日﹞

﹝琉森 > 海德堡 > 法蘭克福﹞

一朝早，我哋就照舊早dd起身，走咗去睇個琉森湖，日落已經咁靚，唔知早上嘅佢又會唔會咁吸引呢？所以我哋就向呢個方向走，行咗無幾耐，竟然經過一間郵局，可惜，時間尚早，佢哋都未開門，既然無得寄postcard，咁就買個最平嘅郵政標籤當紀念品。

﹝瑞士郵政標籤﹞

﹝2011年3月11日﹞

﹝米蘭 > 鐵力士山 > 琉森﹞

離開鐵力士山後，我哋就向琉森市進發，一陣間同今晚，我哋都可以較為放心咁去行街，因為喺整個歐洲嚟講，瑞士係一個治安比較好嘅國家，所以我哋成團人都好期待可以行吓街，只因之前幾晚都無得行。

之前，我話過會有一個裝雪水嘅任務，其實，我哋已經喺捧住兩舊冰嘅地方完成咗，當時，係裝滿一整樽嘅雪，前後都只係兩個鐘頭左右，d冰已經所餘無幾，而且個份量仲比我想像中少好多。

﹝所餘無幾嘅鐵力士山雪水﹞

﹝2011年3月11日﹞

﹝米蘭 > 鐵力士山 > 琉森﹞

食飽飯之後，我哋就初次踏足鐵力士山，亦都係第一次踏上雪山，剛剛所想嘅問題已經唔存在，呢度真係有好多人滑雪，大家行嘅時候要小心d，總之keep住慢慢行就得，千祈唔好做“快閃黨”，因為當d行人太過大動作的話，係會好影響身邊嘅滑雪人士，總之你慢慢行，佢就自不然會避開你嘅，除非你想攬住其他人一齊碌落山啦！

出去行雪山前，唔該大家戴番副太陽眼鏡先，如果無戴到的話，我勸你唔好喺出面逗留咁耐，否則你對眼會好傷，有幾傷？一陣我入冰洞時再話你知，我所戴嗰副係一副cheap雞到唔恨嘅太陽眼鏡，保護唔夠，只能夠擋到部份太陽嘅折射，行嘅時候唔覺，但一入到室內你就……嘿嘿……所以我都好聽話咁戴番副眼鏡先，仲有，有圖為證，我哋已經到達人生最高“峰” -- 一萬呎高空！

﹝身處10,000 呎高空﹞
  

﹝2011年3月11日﹞

﹝米蘭 > 鐵力士山 > 琉森﹞

晨早起床，當然清新開朗啦，亦都係我哋離開意大利嘅時候，進入瑞士嘅懷抱，臨走前，同間房影多張相先，唔係我唔捨得佢，而係影低佢d罪證！！檯上面個牌話到明 Wi-Fi Hot Spot，點知間房係無 Wi-Fi嘅，呢d咪叫做欺騙顧客lor~~

﹝酒店房間嘅罪證﹞

﹝2011年3月10日﹞

﹝威尼斯 > 米蘭﹞

去到呢一刻，意大利之旅都差不多要完結嘞，我哋仲有一個地方要去，係意大利最後嘅一站 – 米蘭。

去米蘭之前，我哋要醫吓肚先，今餐係豐富午餐，即係食中餐啦，呢一餐無乜特別，而唯一最吸引我哋嘅係個『蔥油雞』。

你哋睇吓下面張相，隻雞真係好慘，佢已經逃唔過呢一刧，燃盡自己嘅生命嚟填飽我哋個肚，有此情操，實在係一隻好雞！可惜，餐廳廚師並唔想就咁放過佢，一個被奪去生命嘅身體，仲要再次被d蔥掩浸至死，望見此情此境，真係悲從中來，只可以化悲憤為食慾，好叫隻雞唔好枉死，哈哈~~

﹝被殺兩次嘅蔥油雞﹞

﹝2011年3月10日﹞

﹝威尼斯 > 米蘭﹞

去到水都威尼斯，好多人都會坐貢多拉﹝Gondola﹞，穿梭於威尼斯嘅大小河道，有個意大利船伕划船，仲會唱吓意大利歌比你聽，個情形同澳門威尼斯人酒店一樣，唔同嘅就係呢度d船伕真係要出力划船，一隻貢多拉可以坐到4-6人。

不過我哋兩個無坐到，唔係我哋唔想比錢坐，而係我哋想『行』威尼斯多過想『坐』，所以當其他團友上咗貢多拉後，我哋兩個就四周圍行，下圖就係已經出發玩緊貢多拉嘅團友。

﹝玩貢多拉嘅團友﹞

﹝2011年3月10日﹞

﹝威尼斯 > 米蘭﹞

今日係成個行程中嘅第4日，我哋仍然身處意大利，今日嘅安排係由酒店出發去水都威尼斯﹝Venezia﹞，團友們可以自己比錢玩貢多拉，喺威尼斯大小河道﹝坑渠？﹞中間穿插，欣賞兩岸嘅景色，仲有地道意大利船伕唱歌仔比你聽；之後我哋就會向意大利北部嘅米蘭進發，我哋會參觀全意大利最大嘅教堂 -- 米蘭大教堂﹝Duomo﹞，又或者叫多奧莫大教堂，順便會睇埋佢隔離個艾曼妞二世拱廊﹝Galleria Vittorio Emanuele II﹞；之後就會入住米蘭嘅 Holiday Inn，今日嘅行程唔急趕。

今日嘅我，仍然係時差中，不過就比之前一兩日好，精神好番 dd，可惜仲未可以早到少少起身喺酒店附近行吓。起身之後拉開窗簾，嘩~~ 天色唔係好掂，霧氣同煙霞都好勁，今日唔會落雨吧。

﹝天色唔太好嘅第4日﹞

﹝2011年3月9日﹞

﹝羅馬 > 佛羅倫斯 > 比薩 > 威尼斯﹞

OK，食飽飽後，又係時候出發去比薩嘞，離開前，都要同呢間酒店留個念先，從外觀所見，真係唔似酒店wor~~

﹝食午飯嘅Delta Hotel﹞

﹝2011年3月9日﹞

﹝羅馬 > 佛羅倫斯 > 比薩 > 威尼斯﹞

咁多位早晨，今日行程普通緊湊，食飽早餐後，就由羅馬出發去佛羅倫斯﹝又或者叫做翡冷翠﹞嘅米高安哲奴廣場，從高地睇吓佛羅倫斯市，之後就去意大利另一個名勝 – 比薩斜塔，睇完之後，就會入住威尼斯嘅 Antony Hotel，行程大致上係咁，詳情慢慢再講。

今朝起身，依然係未瞓醒，無計啦！仲係時差中，明明瞓得都算多，而且一覺到天光，但係個樣依然呃唔到人……應該係未食嘢吧，等我食埋個早餐先啦，個樣一定精神好多。

﹝睡眼惺忪的我……﹞