松此放眼看世界

﹝2011年3月15日﹞

﹝布魯日 > 布魯塞爾 > 巴黎﹞

上文提到，今日我哋朝頭早有意外收穫，究竟係咩呢？就係可以親親大自然。

尋晚，唔知為咩事，我哋較個鬧鐘較早咗好多，落樓嘅時間係比morning call 早一個鐘有多，落到樓下，就同間酒店影番張相先，你睇，個天都仲係未光得晒，我哋應該係7:00am 未夠已經出咗門口。

﹝布魯日Apollo Hotel﹞

出咗酒店之後，喺我哋嘅右手邊有條好似比人散步嘅小徑，我哋就沿住條小徑行咗入去，路邊一路都有條欄杆圍住，而欄杆入面就係一大片草地，睇落又唔似係塊田，咁佢哋圍住塊地做乜呢？行咗一陣間之後，就去到一個閘口嘅地方，係無上鎖嘅，我哋諗咗一陣，究竟比唔比我哋d閒雜人等入嘅呢？如果當我哋行完番轉頭嘅時候，個閘已經比人鎖上，咁我哋點算？我就同老婆講，一個咁嘅閘，鎮咗又點，我哋都可以輕鬆爬過去啦！所以我哋就拉開個閘，然後繼續『探險』。

﹝往『探險』前嘅閘口﹞

行咗幾分鐘之後，就見到一群瞓覺羊，而呢一群羊就令我明白點解呢度要圍住一大片草地，原來呢片草地係d羊羊嘅後花園~~ 閒時可以搵個樹蔭瞓吓覺，瞓醒之後又可以出去散吓步食吓草，做羊又真係幾嘆wor~~

﹝草地 & 羊羊﹞

其實我哋都好想摸吓d羊，可惜，呢群羊完全唔理我哋，瞓覺嘅瞓覺，眼超超嘅眼超超，總之就係唔行埋o黎，點知突然之間，d羊全部醒晒，仲走晒埋o黎個鐵絲網度，原來有個『熟客』經過，呢個熟客就係一個帶住隻狗狗散步嘅伯伯，我相信呢個伯伯係經常o黎呢度嘅，所以d羊一見到佢就好興奮，簡直係可以用發狂o黎形容呀，再者，d羊又唔怕隻狗狗，隻狗狗又唔多理d羊，所以我覺得佢哋係見慣見熟嘅。

個伯伯帶住d餅乾o黎餵羊，佢沿住個鐵絲網一路行一路餵，而d羊就好興奮咁撲晒上個鐵絲網爭食，有d唔撲上鐵絲網嘅羊就出盡力塞個頭入d鐵絲網窿度，個情況真係好搞笑，當個伯伯經過我身邊時，佢好友善咁比咗塊餅乾我餵羊，當時我真係好開心，跟住我就好開心咁攞住塊餅乾同老婆講，話比佢知個伯伯比咗塊餅乾我，我哋大家都好開心，因為我哋有得餵羊，而最後，老婆就讓咗個餵羊嘅機會比我，而佢就影我餵羊lor~~

當我揀好咗想餵邊隻羊之後，老婆就預備好幫我影相之際，點知我都仲未預備好餵羊嘅時候，隻羊就撲咗上個鐵絲網度，極速秒殺咗我塊餅乾@@ 可憐嘅餅乾，未影番張相就已經香消玉殞……既然無咗塊餅乾，咁就同隻羊影相啦。

﹝極速秒殺我塊餅乾嘅羊羊﹞

上圖我身後嗰個人，就係比餅乾我餵羊嘅伯伯。呢隻羊真係好乖，任我哋摸同影相都唔走，而且仲冧到醒隻香蕉眼比你睇，哈哈~~

﹝香蕉眼羊羊﹞

呢段與羊共處嘅時間真係好開心，而開心嘅時間往往都係過得特別快，睇睇錶我哋差不多玩咗成個鐘頭，都係時候要走嘞，臨走前，同隻香蕉眼羊影多張相先，今次唔再影佢隻眼，而係影佢一身羊毛，你睇，好厚毛呀！

﹝好厚毛嘅香蕉眼羊﹞

除咗同佢影相留念外，我哋仲攞咗一『執』羊毛做手信，唔好誤會我哋好殘忍咁監生搣佢一『執』毛，而係從鐵絲網上搵一『執』比較乾淨嘅做手信吧。

番到去酒店之後，都難掩我哋興奮嘅心情，早餐時，我哋都有同d團友講我哋剛才嘅經歷，團友Merrick 知道後，佢都想出去睇吓，可惜，時間不足，佢去唔到…… 

食完早餐之後，我哋就番上房攞行李，臨走時，走埋窗邊影低我哋玩羊嘅地方先，我哋剛才就係由呢條路行入去，下次如果大家有去呢度的話，都可以行吓呢，希望你哋會有比我哋更精彩嘅經歷啦！

﹝羊羊小徑﹞

今日第一個景點係布魯塞爾嘅撒尿小孩，行去參觀前先加插一個shopping 環節，領隊帶咗我哋去買truffles，佢話呢度買平d wor，咁咪聽佢講買番幾盒做手信lor~~

題外話，老婆都買咗一盒truffles 返去比公司同事食，當剛剛開咗傳出去比人食嘅時候，一個好唔生性又論盡嘅同事，竟然將成盒truffles 倒瀉咗，仲想唔出聲，連句sorry 都唔想講，可知呢一份心意幾貴呀！買得番一盒truffle 都買唔番老婆嘅一番心意呀，衰人！

OK，繼續行程，行咗無幾耐，就去到撒尿小孩個銅像度，去到嘅時候，好多人都埋位影相，而老婆就好似睇唔到個小孩咁wor，佢仲四周圍望吓個小孩喺邊，原來佢認為個撒尿小孩銅像應該好大個，而且應該比人一眼就睇到，所以到佢見到個『真身』時，佢就話『吓！就係呢個？咁細個嘅？』

﹝撒尿小孩銅像﹞

撒尿小孩嘅故事我就唔多講，反正領隊一定會講，再唔係，上網都一定搵到。

而撒尿小孩呢一個故事應該好深入民心，我哋所行經嘅地方，都見到好多撒尿-related 嘅事物，就連薯條都要痾埋一份！

﹝撒尿薯條﹞

我哋路經睇完撒尿小孩之後，就向布魯塞爾大廣場嘅方向行，我身後條街無乜特別，但牆上條樓梯好似畫得幾立體wor~~

﹝牆上立體畫﹞

去到布魯塞爾大廣場時，領隊都係如常咁講解吓呢一帶有咩好行，聽完之後就解散自己行。行行吓，就發現有好多人圍住一個地方，有人影相有人摸吓個銅像，我記得上網搵資料時係有見過呢個像，不過到寫blog 嘅時候就搵唔番，哈哈~~ 其實，我覺得呢個銅像都好慘，個個行過都『非禮』佢，仲比人『非禮』到『立立令』tim~~

﹝『立立令』銅像﹞

呢個布魯塞爾大廣場，都係被聯合國教科文選入咗為世界文化遺產，坦白講，我覺得呢度同布魯日廣場好相似，而最大分別就係我身後嘅高塔。

﹝布魯塞爾大廣場 -- 高塔﹞

要影呢個高塔真係唔簡單，上圖嘅自拍照係用腳架幫手嘅，我只係就咁開咗枝腳架，唔洗加長，仲要好低炒先可以影得晒個塔，如果你識得搵張相嘅水平的話，就會發現個水平位大約喺我個膝頭度，可想而知，用一部唔夠wide (35mm) 嘅老爺機去影呢個塔會有幾辛苦。

呢個廣場中間都有d地檔賣吓嘢，我所見到嘅就係一d賣花嘅小舖，下圖左手邊就係個高塔，你睇，就咁影都只係影到佢一半多dd咋！！

﹝布魯塞爾大廣場﹞

之後，我就試吓駁相，想將呢一帶嘅景色拚埋一齊，影嘅時候唔知道會駁唔到，番到屋企用個photoshop merge 埋就知道，原來將一d高度差別好大嘅相駁埋一齊的話，係會駁得唔靚，甚至乎駁唔到tim~~ 最後，我放棄咗地下嘅部份，先可以保留到呢一帶嘅建築物。

﹝駁相@布魯塞爾大廣場﹞

我記得呢個廣場係有一個類似博物館嘅地方，原本想入去行吓嘅，最後都無行到，唔係因為要比錢，而係唔夠時間，再加上入到門口望兩眼四圍d嘢吧，個security 都好似好唔鐘意咁，由佢眼神中我可以睇到佢嘅意思 -- 想睇就比錢，唔比錢就唔該你走，唔好阻住個地球轉！之後，我哋就行咗入d橫街，都無乜嘢好睇嘅，不過，行行吓就見到一個visitor center，我哋就行咗入去睇吓有咩著數嘢先，原來最著數嘅嘢就係可以免費上網……15分鐘！

﹝Visitor Center @布魯塞爾大廣場﹞

集合之後，我哋就會去食飯，今餐係布魯塞爾『特色』青口餐，我哋六個團友都好好奇，究竟呢個青口餐會有幾『特色』，會點樣display，到最後，係換o黎失望……講得青口餐，大家都assume 佢係西餐，點知……睇圖啦，唔想再多講呀。

﹝布魯塞爾『特色』青口餐﹞

呢一餐都食得飽，大家都係重點要食晒佢d青口，話晒都叫『特色』青口餐嘛，唔食晒佢咪好唔比面？飯後，我哋就去法國嘅巴黎，下一part 見！