﹝2011年3月14日﹞
﹝阿姆斯特丹 > 布魯日﹞
送別4位團友之後，我哋就會進入比利時嘅布魯日，一個被聯合國教科文選為世界文化遺產嘅地方。坐咗4個幾鐘頭車之後，我哋就到達布魯日，我哋可以有大約一個鐘嘅自由時間，可以喺布魯日廣場四周圍參觀。
﹝布魯日廣場﹞
落車後，我哋都覺得有d奇怪，明明講好咗由阿姆斯特丹機場開始，行兩個鐘左右就停休息站，之後再坐多兩個鐘左右先會到達布魯日；而家就一氣呵成，直踩4個鐘，咁就比佢呃咗個景點 -- 休息站！之後問番領隊點解唔停休息站，佢就話見我哋瞓晒，所以唔嘈我哋，叫司機唔洗停，直去布魯日，等我哋可以休息多d wor~~
有睇我個blog 嘅朋友都應該知道，我哋兩公婆係好少會坐車瞓覺嘅，而且，我好肯定我哋一定無瞓！ 咁講法，即係個領隊擅作主張啦，回水呀！回水呀！
唉，咁就無咗個休息站，悲！領隊之後就當然無再繼續呢個話題，佢就講解一下呢度有咩好睇，之後就解散，幸好，臨解散前就比我哋見到個郵局，算啦，慳咗搵郵局嘅時間就當補番啦！收到由布魯日寄出嘅postcard 嘅朋友們，你哋d card 就係喺呢度寄出嘞！
﹝布魯日郵局﹞
呢度有個叫聖血教堂 (Basilica of the Holy Blood) 嘅地方，就係我哋身後黑色嗰間，我唔知佢有咩咁出名，只不過係領隊有提過，而我哋又有路經，咁咪影番張相到此一遊lor~~
﹝布魯日聖血教堂﹞
正當我哋行到一條巷仔時，見到路口有兩個修路工人做緊嘢，我哋就當然無理佢哋啦，我哋就經過咗佢哋身邊，再行前咗少少之後就set 腳架影相；影完相之後，其中一個修路工人就走埋o黎，話可以幫我哋影相，既然你咁熱心，我哋又點會拒絕你呢！而當佢同我哋影完相之後，我就捉住佢同佢影番張相先，佢亦無拒絕我哋，比利時任務，DONE！！
﹝與比利時修路工人合照﹞
影完相後，我哋都有傾番兩句：
工人：Where are you come from?
我：Hong Kong. Have you been there?
工人：Yes, I had been there many years ago.
我：Really? Where did you go?
工人：I had been the Temple Street and Mongkok.
我：Did you go to the Peak?
工人：No, I did not go there.
我：You'd better to come again. People who visit HK and do not go to the Peak, means he had never been to HK.
工人：Ops...
我：Well, let's meet there someday. ^^
點解我會咁記得呢一番咁普通嘅說話呢？就係因為一般嘅歐洲人都係比較睇唔起亞洲人，而呢個人竟然唔係咁，反而係主動接觸我哋，所以我對佢嘅印象非常深刻，可惜，我無問佢叫咩名，不過算啦，我總係覺得一個咁樣嘅相遇，已經係非常之難得，並且難忘。唔知會唔會有一日喺山頂真係見到佢呢？
同佢say goodbye 後，我哋就繼續行，不過就覺得無乜好行lu~~ 所以駁番幾張相就算數。
﹝布魯日廣場 1﹞
﹝布魯日廣場 2﹞
﹝布魯日廣場 3﹞
之後就夠鐘集合番酒店，等緊人嘅時候，我就問領隊，假如10天團嘅團友玩到第10日嘅時候，覺得仲想同我哋玩埋嗰3日的話，佢可唔可以安排到，領隊話唔係唔想做，而係未必做得到，而且會好麻煩。
第一：一定要同公司請示，而公司應該會唔批；
第二：假如公司ok，佢都仲要睇吓餘下行程加唔加到位，例如之後嘅船河同埋上巴黎鐵塔；
第三：唔知酒店有無房；
第四：機票，亦都係最難confirm嘅一個環節。
既然搞到咁麻煩都未知得唔得的話，不如簡單d講句『唔得』就算！
人齊後，我哋就番酒店食飯，呢一餐係食西餐，我就加咗杯當地出產嘅比利時啤酒，味道同一般啤酒差唔多，無乜特別。
﹝晚餐加多杯比利時啤酒﹞
食飽飯之後就番上房休息。
聽朝早會有少少驚喜，係我哋早起身嘅收穫，欲知後事如何，下回自有分解！
﹝番房休息﹞
留言列表
