﹝2011年3月14日﹞
﹝阿姆斯特丹 > 布魯日﹞
各位早晨，今日嘅行程好簡單，我哋會繼續喺阿姆斯特丹境內，先去睇芝士廠同風車村，之後就會去遊船河，遊到咁上下就埋岸，上去鑽石工場參觀，參觀完畢就食 lunch；食飽之後就會離開阿姆斯特丹，進入比利時嘅國境，過境前會先停一停阿姆斯特丹機場，因為我哋當中有4位係10天團嘅團友，而我哋就要喺呢度同佢哋講再見。今日嘅行程大致上係咁，一陣再詳細講。
一如以往，我哋都會早少少起身，出去酒店附近行吓影吓相，不過呢間 Crowne Plaza Hotel 一帶就無乜好行，影過相，到此一遊就算數。
﹝Crowne Plaza Hotel@阿姆斯特丹﹞
三扒兩撥就食完個早餐，等齊人就上車出發去芝士廠同風車村，沿路都會見到d風車，不過全部都唔識轉嘅，唔知係未開工，定係呢d風車只係 display only 呢？根據領隊所講，現今嘅風車數量已經大不如前，所剩低嘅就只有百幾座……
﹝荷蘭代言人 -- 風車﹞
無幾耐，我哋就到達芝士廠 & 風車村，其實佢哋都只不過係鄰居吧~~ 入門口時，我哋都要乖乖地企定比『大會攝影師』影番張相，當我哋行完晒成個芝士廠同風車村後，可以去佢哋個 counter 買番張相，可以係一張相、一個鎖匙扣或者一個月曆；之後，領隊就叫我哋先行芝士廠，之後再行風車村，再行埋個木屐專門店，跟住就去番門口集合。
入到芝士廠就當然會見到好多芝士啦，而呢度嘅店員清一色都係女性，仲要著埋一身荷蘭特色衣著，原本我都想捉住其中一個影相，不過我見其他團友捉佢哋影相時，佢哋都好似唔係好願意，所以都係算罷啦~~
﹝芝士廠主角 -- 芝士﹞
究竟上圖嘅一舊芝士有幾大舊呢？直徑大約係6吋，厚3吋左右，都幾重o架，不過，比唔比攞上手影相就唔知，所以我哋好快手咁影完張相，就即刻放番低舊芝士，繼續參觀。可能我哋去到嘅時間仲早，見唔到d人喺度整芝士。
﹝芝士﹞
呢個芝士廠除咗芝士都仲有其他嘢賣嘅，例如楓糖餅啦、其他小食啦、羊毛啦、小手信啦等等，而楓糖餅就係領隊嘅推介，我哋每人都有試食過，唔係太甜，所以我哋全部人都有買到，加加埋埋都有成箱，結果，呀彬好抵得諗，自願幫我哋攞住好重嘅一箱餅，thank you 呀彬！！
買完餅之後，我哋就離開呢個芝士廠去風車村睇睇，臨離開之前，同個門口招牌影番張相先。
﹝參觀完芝士廠﹞
風車村一帶其實都幾大吓，喺有限嘅時間要行晒根本無可能，所以，我哋都係重點影幾張相就算，再加上我哋要搵一隻大木屐，呢隻木屐大到可以坐兩個人，所以一定要搵到佢！
﹝風車村﹞
行行吓，比我哋見到一部整芝士嘅機器，不過我相信係比人睇同影相嘅，應該唔會有人用o黎整芝士，因為呢部機實在太污糟，洗番乾淨都有排搞呀！
﹝整芝士機﹞
哈哈哈~~~終於比我哋搵到啦~~呢一隻木屐係一個必影嘅景點，去過荷蘭而無同過風車及木屐合照的話，簡直係無去過荷蘭呀！！
﹝荷蘭超加大碼木屐﹞
呢個木屐廠門口仲有幾對唔同size嘅木屐比大家影相，大家可以影到夠先入去參觀；由於朝早落過雨，隻大木屐有少少污糟，我哋都係就住就住咁『坐低』影。
影完隻大嘅，就自不然要搵隻細少少啦，就喺隻大木屐後面之嘛，咁就搵到嘞！初初我以為d木屐係唔郁得嘅，個個都要連腳帶鞋塞入隻木屐影相，點知，就比我見到個女人﹝上圖大木屐後面﹞影完相之後，縮番隻腳出o黎時，比隻木屐『kick』親，幸好佢無跌低，而佢嘅一『kick』就比我知道原來隻木屐係可以攞上手嘅，所以，到我哋影嘅時候都要攞佢上手影。
﹝小size木屐﹞
臨入門口前，仲有兩對放咗喺門口，等我哋再影多張先~~
﹝木屐影不完~~﹞
入到木屐廠就見到個木屐工場，我哋參觀嘅時候無人即場整木屐，不過我都唔知平時會唔會有人『表演』呢，只係好隨手咁執d 道具影吓相就算。
﹝木屐廠內﹞
叫得做木屐廠就當然會有好多木屐賣啦，而呢一個corner就可能一眼睇晒佢所有款式，唔好以為呢d木屐係display only，全部都有size o架，只要你睇啱個款，搵到個size，就可以攞落o黎試著，我當然有買番一對啦，仲揀咗對好可愛嘅牛牛木屐tim~~
﹝好多木屐比你揀﹞
呢一對就係我買嘅木屐，係買比自己嘅；而老婆都有買一對，不過佢就係買o黎送比朋友。比完錢之後，就當然同番個收銀姐姐影番張相啦~~ 呢個姐姐都好好人，好nice，一d都無嫌我哋d遊客麻煩，相比起其他景點嘅服務員o黎講，呢個係最好嘅！
﹝我比100分嘅收銀姐姐﹞
睇睇錶，又差不多係時候集合，我哋就喺集結地點附近繼續影相，好啦，就駁番兩張相比大家睇吓先，風車村同芝士廠一帶就係咁樣。
﹝風車村 & 芝士廠1﹞
﹝風車村 & 芝士廠2﹞
到集合嘅時候，領隊就叫我哋揀相，揀咩相？咪就係入門口嘅時候比人影嗰張lor~~ €10 就可以攞到一張剛才影嘅相，一個月曆同埋一個鎖匙扣，同老婆商量咗一陣之後就決定買咗佢，點知，收貨之後就覺得被搵笨。
€10 就有齊晒三樣嘢，除咗張相之外，全部都係現成嘢；個月曆封面有一個偷空咗嘅四方框，而我哋張相就zip喺嗰度，至於個鎖匙扣，就係一個普通到唔恨嘅貨仔，所以你話用€10 換呢三樣嘢值唔值吖？我就覺得唔值lor~~
值唔值都好，錢都比咗，都無辦法啦，咁就同佢o黎個合照先啦！仲有個靚靚packing包住o架！
﹝被騙了€10 @風車村﹞
去到呢一度，風車村及芝士廠就參觀完畢，下一站係遊船河！順路參觀埋個鑽石工場。
落咗車之後，領隊話比我哋知，步行@行人路都要小心d，因為呢一度除咗馬路同行人路之外，仲有單車徑！
歐洲好多國家嘅人都好響應環保，而荷蘭就係其中之一，有好多荷蘭人都會以單車代步，而單車徑就係佢哋嘅道路設計之一，正如下圖所見，行人路同馬路之間，紅紅地色嘅區域就係單車徑。所以，大家去荷蘭時，唔好淨係留心『汽車』，馬路之外嘅地方都可以令你發生交通意外。
﹝由左至右，馬路>單車徑>行人路﹞
行前無幾遠就到達我哋上船嘅地方，船程大約一個鐘。呢d船，船身唔高，大部份都係室內位置，只係得好少數室外位置，我哋上船嘅時候，船尾位置，即係室外嘅座位已經比人坐咗，我哋就只可以zip出去影吓相，其餘時間就係坐喺室內睇吓風景。
﹝準備遊船河﹞
坐呢d船，有一件事大家一定要切記 -- 室外嘅櫈面係唔可以企上去嘅！唔係因為會踩污糟張櫈，而係會發生危險！點解咁講呢？因為呢度嘅河道，係穿插於好多嘅街道，個情況就有d似威尼斯，只不過呢度d橋嘅樓底比較矮，如果你真係企高咗的話，一定會撼穿頭，所以，記得唔好企高，多謝合作！
由於呢一帶都有好多呢一類嘅船，所以成日都會見到唔同嘅船喺身邊經過，而下圖嗰一部就係比我哋坐嗰部靚d。
﹝船河中﹞
坦白講，呢個船河並唔吸引，不過當做觀光，睇吓荷蘭一帶都ok嘅~~
坐咗大約一個鐘，我哋停咗喺一個鑽石工場門口，亦即係我哋嘅下一個景點。難得地，今次嘅講解係由一個識講廣東話嘅職員帶嘅，佢由一舊原石開始講起，跟住又點樣切點樣打磨，又點樣同粒石去分grading……可能我對鑽石無興趣，越聽越眼瞓……
﹝鑽石工場一角 - Gassan Diamond﹞
睇完聽完一大輪之後，就當然係入正題啦-- sell 我哋買鑽石lor~~ 都係嗰句，我對鑽石無興趣，只係攞吓上手，摸過睇過就算。
﹝鑽石大晒冷﹞
行完成個鑽石工場，我哋無一個人買嘢，最記得有三樣嘢：
1﹞佢哋最誇口嘅144面切割
2﹞呢度嘅紀念錢幣壓印機係最貴嘅，人哋€1一個，佢就€2一個
3﹞每人入場都有個sticker，參觀完畢之後，係有塊板比你貼番上去
﹝好貴嘅紀念錢幣壓印機﹞
﹝貼紙板﹞
參觀完個鑽石工場後，我哋就去食飯，食埋呢一餐飯之後，又係一個離別嘅時候，我哋5對couple當中，有其中兩對係參加咗10天團，而今日就係佢哋行程完結嘅一日，所以，食飽之後，就送佢哋出阿姆斯特丹機場。
﹝阿姆斯特丹機場﹞
到達機場後，就目送4位團友離開，好唔捨得，話晒，大家一齊玩咗咁多日，唉~~ 拜拜呀政、Mandy、呀彬同Cookie，一路順風！
﹝拜拜4位團友﹞
後記，完咗呢個trip 之後，我哋喺email 中得知，佢哋4個人一齊被困阿姆斯特丹機場半個鐘，幾乎過唔到關，轉述如下：
話說，我哋個團係香港飛希斯路，停留一日之後，就由希斯路飛羅馬，去羅馬之前，領隊同我哋講，話羅馬機場移民局嘅職員未必會同我哋個passport 打個入境chop，有d會打，有d就唔會打，兩者都無問題，一樣可以過關，當中Cookie 個passport 就無被打入境chop，而個問題就喺阿姆斯特丹機場發生。
過關時，個關員只係見到Cookie 本passport 有希斯路機場個chop，但係就睇唔到佢點樣由倫敦飛過o黎呢片歐洲大陸，我估計當時個關員應該懷疑緊Cookie 係咪偷渡過境，所以喺個counter 度搞咗半個鐘先肯放佢走，最後，阿姆斯特丹機場就同佢咃整番個correction chop，再加多一個離境chop，咁佢哋先可以上機。
﹝Correction Chop for Rome & 阿姆斯特丹機場離境印﹞
Cookie 就講得幾輕鬆，我相信當時佢哋4個都幾徬徨，幸好，一切平安無事，安心番到香港。
留言列表
