﹝2011年3月16日﹞
﹝繼續巴黎市內觀光﹞
食飽飯之後，就去暢遊塞納河，大約玩一個鐘頭左右啦，沿途可以欣賞兩岸嘅景色，佢會去到聖母院附近，仲可以睇到巴黎鐵塔tim~~去到碼頭嘅時候，見到佢個入口好似有d單張比人攞，諗佳睇吓咩單張啦，點知領隊趕我哋上船，想睇一陣都唔得，結果，只有聽話上船lor~~
呢架船好大隻，可以同時坐幾百人，由於天氣好嘅關係，全部人都坐上層，而坐得上層嘅人，個個都坐唔定，呢度又影嗰度又影，唔理背景係乜都好，總之乜都要影一餐，真係『啤』一聲~~
﹝遊船河中嘅聖母院及巴黎鐵塔﹞
遊塞納河嘅船有好多款，但係我就唔知道有咩分別，有人講解？有嘢食？有『蘇芬呢呀』？真係唔知道…
﹝唔同嘅遊船同埋景色﹞
坐船已經坐到有D無聊…咁就…搵D更無聊嘢玩吓啦，等我玩觸電！
﹝觸電？﹞
﹝巴黎鐵塔都唔係咁重吧~﹞
﹝巴黎鐵塔就係得咁高？﹞
老實講，呢個船河真係幾無聊，嗰種無聊法，到今日我再寫番出o黎都感受到，唔知睇緊嘅你覺唔覺無聊呢？
遊完船河，領隊應團友嘅要求，提早去老佛爺『濕平』，可以去老佛爺真係好開心，唔係因為可以掃貨，而係終於可以自由活動喇~~老實講，shopping呢樣嘢唔係咁啱我哋，再加上呢度已經比強國人淪陷咗，所以『此地』真係『不宜久留』呀。
既然都一場o黎到，點都要行個圈嘅，不過唔知係我肚餓定攰呢，行咗一陣就已經唔想再行，只係想快d走，完全唔想再逗留喺度，簡單講句：『我想走！』，當老婆問咗我幾次想行邊度呀，我就答『妳想行邊度就行邊度啦，唔洗問我啦~』當時，我真係好似字面咁嘅意思，總之行多一陣就唔好再行就得嘞，可惜，表達出o黎嘅時候並唔係呢回事，老婆一聽就知道要即閃，所以，老佛爺之旅好快就完結咗。
﹝老佛爺內﹞
人哋就去shopping，我哋唔行老佛爺又有乜好做呢？我哋行咗去羅浮宮……門口！為聽日嘅行程先做個pre-visit。
由老佛爺行去羅浮宮會經過3個metro站，唔想行嘅，當然可以坐metro啦，不過我哋鐘意行過去，因為我哋之前已經喺google map『行』過一次，途中係有d嘢睇嘅。
簡單講吓我哋點行先：
1. 我哋先由老佛爺出發，行到去歌劇院，唔係去聽歌劇，係影張相就走；
2. 由歌劇院一直行，中途去starbucks食嘢，再去行皇宮；
3. 由皇宮出番o黎，穿過個拱門，就去到羅浮宮嘞。
﹝由老佛爺行去羅浮宮﹞
唔知係咪室外嘅空氣比較好呢，行咗出o黎之後，就覺得個人輕鬆咗好多，行步路都快d，又可能係d街景比較吸引吧~~
行咗無幾耐，就見到呢個歌劇院，個外型好grand，唔入去聽歌劇都要『到此一遊』啦~~
﹝歌劇院﹞
經過歌劇院之後，我哋就沿住條大馬路行，途經一間starbucks，就入咗去食d嘢，可能肚餓嘅關係，好似好多嘢都好好食咁，我哋就買咗一隻巨型三文魚潛艇同一杯凍啡就算。
﹝巴黎starbucks﹞
食完嘢之後，我哋就繼續沿住歌劇院大街向羅浮宮方向行；我哋之前上網搵資料時，知道去到個拱門之前，係會有個皇宮嘅景點喺附近，但係喺google map嘅實景圖就見唔到，唔通佢唔喺條馬路附近？點都好啦，我哋都係諗住行到附近再搵吓，搵到就行，搵唔到就算。
當我哋去到『疑似』皇宮嘅地方時，就比d波波吸引住，原來呢個裝飾品係一個metro站入口。
﹝metro站入口﹞
影完相之後，我哋就行咗去上圖嘅左手邊，竟然比我哋搵到個皇宮入口！！
根據網上資料所講，呢個皇宮係叫做皇家宮殿(Palais Royal)，以前就係皇宮，家下就已經變晒做店舖lu~~ 而且仲有d條紋柱同埋銀球噴水池，一陣間我哋都會見到佢哋。
入到去之後，眼前所見就係好多嘅『棋子』，如果唔係事前做咗功課，真係完全唔會知道佢就係前皇宮嘅條紋柱。
﹝皇宮內嘅條紋柱﹞
正如之前所講，呢度仲有銀球噴水池，坦白講，咁都叫噴水池的話，真係幾『乸西』wor~~ 不過呢堆銀球都有個好處，可以唔洗用腳架o黎玩自拍，讚！！
﹝皇宮內嘅銀球噴水池﹞
我唔知呢個皇宮有幾大，但係我相信呢個皇宮一定係好靚嘅，如果唔係冬天的話，呢d樹有番晒樹葉之後，肯定靚晒啦，而且仲會鳥語花香tim~~ 從中間一路慢慢行的話，相信一定好寫意，絕對有渡假feel呀！
﹝皇宮內嘅林蔭大道﹞
原本我哋都想穿過呢個樹林仔，去另一邊睇吓，可惜時間緊迫，唔可以用太多時間去行，只係逗留喺呢度一陣就走，臨走前，見到有個婆婆餵麻雀仔，d麻雀仔好勁o架，初初見佢哋都只係啄地下d嘢食，食食吓之後，就已經凌空搶食，之後仲勁tim，唔等個婆婆放手，已經飛埋去直接食嘢，你話勁唔勁！
如果你好眼力，婆婆個袋側仲有隻白鴿一齊搵食呢~~
﹝餵麻雀仔嘅婆婆﹞
行咗一陣皇宮之後就出番去個波波metro站，再向左手邊嘅拱門方向行，穿過咗個拱門之後就係羅浮宮，亦都係我哋今次半日自由行嘅終點站。
當我哋見到呢個玻璃金字塔時真係好興奮，我哋終於搵到佢嘞！可能你會覺得我哋好白痴，見到羅浮宮吧，有乜好興奮？佢又唔會走，識路行o黎就搵到啦，係咪？無錯，見到羅浮宮係唔洗大驚少怪嘅，對於我哋o黎講，搵到佢，係另外一個意義。
當我哋開始plan呢個行程時，我哋只有3個半日時間可以玩自由行：
第一個半日：day1 倫敦嘅半日，已經玩咗
第二個半日：day10 巴黎嘅半日，即係今日
第三個半日：day11 都係巴黎嘅半日，即係聽日
對於我哋呢d無膽鬼o黎講，又唔識路又唔知點安排行程，既要有自由行嘅靈活性，又要有跟團嘅交通方便性，咁就要善用一d自由時間去滿足到我哋嘅願望嘞，當自己睇住自己所計劃嘅行程逐一實現時，嗰種高度滿足感真係不能言喻；而且我哋兩個計劃點樣行去d景點時，都有一種探險嘅感覺，雖然我哋去嘅地方唔係d荒山野嶺，蠻荒之地，由google map pre-visit，到真真正正咁見到實景，感覺上係將一d平面嘅資訊及圖片，變成一個實物放喺自己眼前，嗰種真實感就等於『讀萬卷書，不如行萬里路』！你明唔明我講乜呀？
講得太多題外話tim~~ ok，番去個正題先~~hehe~~
羅浮宮真係一個好出名嘅地方，我哋o黎到嘅時候大約係5點鐘左右，但係依然有人排緊隊入去，當然啦，企喺門口影相嘅人都唔少啦~~
﹝羅浮宮外﹞
由於今次嘅目的係搵羅浮宮，所以我哋只係企咗喺門口影幾張相就走人，之後就橫過咗個迴旋柱，向住個小小『凱旋門』方向行，呢個『凱旋門』比真正嗰個細好多~~
﹝『凱旋門』下嘅羅浮宮﹞
之後就喺個公園行吓睇吓咁lor，都無乜特別。
﹝羅浮宮外嘅公園﹞
睇睇錶，都差不多係時候番去老佛爺集合，不過……嘿嘿……我哋仲有一個任務未完成！
我哋沿住頭先條路番轉頭，去到唔記得邊個路口，我哋就轉咗入條內街，搵嘅就係呢間嘢 -- 國虎屋！我哋睇嗰本旅遊書推介呢間嘢，講到好似好好食咁，所以我哋諗住聽日嘅lunch會o黎呢度食，反正都係自費嘅。
﹝國虎屋﹞
行吓行吓終於行到老佛爺 -- 一個淪陷咗嘅地方，有幾淪陷？唔知wor，用淪陷程度o黎講嘅話，就只有淪陷ed、更淪陷同埋極淪陷之分！一眾強國人已經佔據晒所有名牌counter，當然包括埋退稅counter啦，而呢班強國人嘅『浸透率』極高，總之可以企到人嘅地方就見到佢哋，打蛇餅又有，三五成群嘅又有，唔知做乜嘅又有，痴埋牆高談闊論又有，阻頭阻勢又有，情況就有如浴室磁磚咁 -- 『菌』晒黑邊！恐怖。
好彩當時係冬天，企喺室外舒服得多，等下等下之際，領隊介紹咗個小販我哋識，佢買嘅鎖匙扣好抵買，好似係€2 - €3就有10個小巴黎鐵塔鎖匙扣，不過同佢買就要快手，佢哋呢d流動檔口隨時會比人拉o架，所以睇啱就即係比錢攞貨。
終於等齊人可以去食飯嘞！睇見佢哋就開心，人人都有幾袋貨喺手，相信佢哋一定好滿足吧~~
﹝餐廳內﹞
呢一餐『最後晚餐』係set餐，特別在多咗枝紅酒比我哋飲，其實喺呢度仲有個海鮮拼盤，睇落都幾吸引，不過要喺個set再另加的話，我相信會食唔晒，再者，領隊都無比呢個option比我哋。
﹝飲杯！之最後晚餐﹞
食飽飯之後就係番酒店，而呢一個西歐之旅亦即將完結，講到好似好灰咁~~ 唔洗怕！仲有聽日，聽日又係去羅浮宮……不過今次係我哋做『領隊』，帶班團友行去羅浮宮，仲會入去參觀埋tim，下一part再同大家講，good night~~
留言列表
