2011 西歐8國之旅 part 11 ﹝巴黎 > 香港﹞－松此放眼看世界

﹝2011年3月17日﹞

﹝繼續巴黎市內觀光x2，之後就返香港﹞

今日嘅行程極簡單，起身食早餐，攞埋行李跟車出老佛爺，之後就係自由時間同埋自費食lunch，最後返老佛爺集合出機場返香港。

今日開始行程之先，等我講樣痴線嘅嘢比你知吖，呢個法國之旅有兩個半日嘅自由時間，原本我哋係想尋日嘅半日去行羅浮宮，而今日呢半日就去行凡爾賽宮o架！但係我個朋友同我講，兩個宮都好大好多嘢睇，而且凡爾賽宮喺好遠，搭得車去就已經要番轉頭，所以我哋先『取消』凡爾賽宮嘅行程吧~~夠顛吧！！

今日有幾個任務要完成：

1) 搵『羅浮宮三寶』

2) 搵達文西嘅倒轉玻璃金字塔

3) 搵Angelina買朱古力醬

4) 去國虎屋食lunch

可惜，成功率只有50%，點解？睇落去就知道…

尋日同今日都係由老佛爺行去羅浮宮，不過出發之前我哋會先去春天百貨買macarons做手信，當我哋去到嘅時候，呢間舖頭剛開門，諗住快快趣趣買完快d走，唔知係個法國妹未瞓醒，還是佢天生手腳慢呢？抑或係我哋買得太多呢？買一打macarons，講埋比佢聽要邊幾種味道，一夾一放重覆12次再包好，好簡單吧，咁都要搞咗我哋差不多成半個鐘，完成欽佩佢嘅工作 & 服務效率呀！

﹝Macarons Menu﹞

其實我哋同埋幾個團友行落羅浮宮係可以搭metro嘅，而同行嘅團友都想搭落去，但係我就唔係好想，點解呢？因為metro會有扒手lor~~

出發前，我同一個曾經住咗法國一段時間嘅朋友傾計，講吓問吓法國嘅嘢，包括食嘢呀、搭車呀、行街呀、景點呀，同埋注意事項等等，佢叫我盡量都唔好搭metro，因為metro有好多人而且會有好多扒手，而我哋個樣一睇就知係遊客，一定好容易咁成為目標，佢話除非有當地人陪我哋四圍去啦，否則去行街算數吧~~

其實，佢仲講咗一d佢住法國時嘅親身經歷比我知，嗰種驚嚇程度真係嚇死人，總之我聽完之後，淨係知道『metro係會食人o架』！所以，團友們，雖然我遲咗好多先講，但係都希望你哋明白我嘅苦衷…

今日行嘅路線同尋日一樣，又係要經過歌劇院。

﹝歌劇院﹞

﹝波波Metro站﹞

之前講過話穿過個拱門就會到達羅浮宮，下圖就係三個行車拱門嘅其中一個，我好佩服呢度嘅司機，尤其係大車嘅司機，條路好似只係比佢架車闊少少吧，技術差d都過唔到呀！

﹝通往羅浮宮嘅拱門﹞

尋日，我哋行呢度嘅時候，天氣好好，而且唔多人；但係今日就天陰而且大風，仲有好多人排隊tim~~

﹝羅浮宮門外﹞

去羅浮宮有咩好睇呢？其實有好多嘢睇，要逐一睇晒跟本唔可以短時間內完成，就算係走馬看花都好，都要花好多時間去行，所以就要重點出擊，去得羅浮宮就唔可以錯過佢哋嘅『羅浮宮三寶』，即係：

1) 蒙娜麗莎

2) 勝利女神

3) 維納斯女神

但係唔知點解，之前比個領隊擾亂咗我哋，結果我咗無理到個維納斯女神像，反而周圍搵拿破崙加冕幅畫，可惡呀~~

﹝剛剛入咗羅浮宮﹞

言歸正傳，入到羅浮宮第一件事係買飛，由於我哋無預早訂飛，只可以買即場，而即場飛都有兩個買法，一係去最多人嘅counter排隊，又或者好似我哋咁，去自助售票機買飛。呢個自助售票機一d都唔難搞，揀啱語言，跟住步驟去做就得。你睇，人哋仲排緊隊嘅時候，我哋就已經買咗飛，可以搵『三寶』lu~~

﹝羅浮宮嘅自助售票機﹞

入咗場之後，好似係我話要玩自拍，想一take過影晒所有人，又驚角度唔啱，又驚手震，又驚影唔齊人，最好就係放部機落地，一次過影晒6個人，正！你估我喺邊？

﹝自拍@羅浮宮﹞

已經唔記得入咗場之後行邊一便，淨係記得有好多雕像，只係影咗某幾個就算數，其實，個維納斯女神像就喺呢度，可惜，我哋無影到，因為我哋已經轉移咗視線去搵拿破崙加冕幅畫，黠解會轉移？咪就係比領隊介紹&講咗幾次&重點推介lor~~自己做好咗notes都比人side track到，你話係咪低死吖！

﹝羅浮宮其中嘅雕像﹞

麻煩大家認o住呢條走廊尾，亦即係我哋身後嘅樓梯，嗰度就係三寶之一嘅勝利女神！

﹝勝利女神就在眼前﹞

由上圖可見，呢三寶都有好多人圍觀，想昒到張無乜人嘅相就一定要等，一有機會就要快手！

﹝勝利女神﹞

1120 參觀羅浮宮 041.JPG

其實香港人好應該向歐洲人學習一下，每一個擺設都總會有一d人喺附近，或遠或近咁圍住，佢哋真係會攞住一d資料去認識眼前嘅擺設，有d人就會眼定定咁望住佢，有d人會用紙筆畫低佢；相對之下，我哋就好似玩野外定向咁，睇地圖、搵目標、影相，之後就下一個目標，直至任務完成。

點解勝利女神會無咗個頭呢？佢對手又去咗邊？勝利女神真係『神』？佢又『勝利』咗d乜呢？我相信係有答案嘅，Google一下就會知道啦，係嘛？

其實我都認為行博物館應該慢慢行，可惜，我哋呢d跟團嘅人，所有行程都限時限刻，要喺有限時間做最多嘢，最好嘅方法就係乜都快！

﹝靈異照片之勝利女神﹞

之後，繼續我哋嘅『野外定向』，行到一個展覽室，有好多好靚嘅畫喺度，而我哋留意到展覽室嘅天花都好靚，所以又係一個自拍嘅好機會。

﹝油畫展覽室 & 天花﹞

1120 參觀羅浮宮 081.JPG

終於比我哋搵到蒙娜麗莎嘞！不過好失望。

其實上網搵資料時已經知道呢幅畫好細，但係，當我哋親眼見到嘅時候，真係比想像中更細…

﹝蒙娜麗莎﹞

『三寶』果然名不虛傳，呢位莎姐可以成功地吸引幾十人去圍佢，如果你想同莎姐影張正面相，你前面應該會有最少30人喺度舉機影相，最好嘅方法就係慢慢咁迫到去最前面，咁就唔會有阻隔，不過我都要提提你，如果你生得太高的話，你就唔好迫埋去 & 賴死唔走。而我，就選擇咗離遠zoom爆佢，自問都算手定，可惜都係敵唔過身邊嘅人群，鏡頭前面總係有好多雜物，又會比人撞啦，影到好多隻手啦，好多個頭啦，好多部相機啦；當我以為機會到嘅時候，又會撞正有人開閃光燈，又或者有點紅色嘅提示燈射咗埋去…總之就好難影到張好嘅~~

最後都叫做成功比我影到，不過就多咗好多『人』同莎姐一齊……

﹝蒙娜麗莎﹞

之後就去搵比人side track咗嘅最後一寶 -- 拿破崙加冕。

喺呢度，無論係唔係三寶都好，都總會有一班人圍觀任何嘅嘢，呢一張相已經係屬於少人嘞~~

﹝拿破崙加冕﹞

任務一：『尋找羅浮宮三寶』Completed！！整體成功率 = 25%

任務二：搵達文西嘅倒轉玻璃金字塔！

﹝倒轉玻璃金字塔﹞

搵呢個倒轉玻璃金字塔唔難，但係要搵個出口出番去就有d難。

此行喺羅浮宮內最後嘅任務，就係搵呢個倒轉玻璃金字塔，當我哋搵到佢之後，就唔想行番轉頭去個入口度走，而我哋又見到個倒轉玻璃金字塔附近好似係接連一個商場，所以我哋相信係有另一條路可以出到去嘅，但係我哋喺個商場搵咗一陣都搵唔到出口番地面，結果都係選擇放棄，與其浪費時間去搵路，不如由正門出番去就算，唉~~

任務二：搵達文西嘅倒轉玻璃金字塔，Completed！！整體成功率 = 50%

出到門口，影番張倒轉羅浮宮，襯番個倒轉玻璃金字塔先~~

﹝倒轉羅浮宮﹞

去到呢一刻，我哋仲有兩個任務：

1) 搵『羅浮宮三寶』<-- Completed

2) 搵達文西嘅倒轉玻璃金字塔<-- Completed

3) 搵Angelina買朱古力醬

4) 去國虎屋食lunch

之前上google map已經知道大約點行，總之，出咗羅浮宮，向住個凱旋門方向就一直行，行到大約個公園中間就右轉，出咗閘口再過馬路，之後就向番羅浮宮方向行，行過幾間舖就會搵到。

﹝向Angelina進發！！﹞

唉~~一路行、一路掛住影相，結果我哋早咗轉彎呀~~做好晒功課都失敗收場~~

我哋早咗一個閘口出咗公園，而Angelina嘅位置就係喺呢個閘同下一個閘嘅中間對面馬路，可惜呀可惜呀~~山長水遠o黎到而空手回，真係心口都打穿幾個呀~~

1) 搵『羅浮宮三寶』<-- Completed

2) 搵達文西嘅倒轉玻璃金字塔<-- Completed

3) 搵Angelina買朱古力醬 <-- Fail

4) 去國虎屋食lunch

懷住破碎嘅心情，向住國虎屋直走，由於早一日已經搵到佢喺邊，相信呢個任務一定『實食無痴牙』啦！

點知又再人算不如天算！

相信國虎屋真係好出名，唔單只吸引到我哋呢d海外遊客，仲吸引到好多本地人，再加上又係lunch時間，所以，我哋去到嘅時候已經大排長龍。望望錶，都剩番唔係太多時間，排得隊o黎，要食埋飯再行番去老佛爺集合，根本趕唔到，所以……呢個任務又失敗！

1) 搵『羅浮宮三寶』<-- Completed

2) 搵達文西嘅倒轉玻璃金字塔<-- Completed

3) 搵Angelina買朱古力醬 <-- Fail

4) 去國虎屋食lunch <-- Fail

最後總結一下，我哋只係成功咗一半，可惡呀~~ 明明已經做好晒功課，都唔可以100%完成，真係好有挫敗感，無辦法啦，最後就幫趁咗隔離舖食拉麵。

﹝去唔到國虎屋…去札幌啦~~﹞

呢餐麵就無乜特別，始終喺法國食拉麵好似唔係咁『應景』，之後我都有同老婆講，既然食唔到國虎屋，我哋又點解要去食拉麵呢？我哋應該揀其他法國嘢食嘛~~﹝老婆：係啦，係啦，點解呢？﹞

﹝札幌拉麵﹞

食完麵，就係時候回程集合，不過見仲有時間，咁就去『會食人嘅metro站』睇吓啦，其實，同我哋香港嘅地鐵無乜分別，不過每個閘就多咗塊長板，唔比人『捐』過去，亦都唔比人跨欄。

如圖所見，出入都幾唔方便wor~~

﹝會食人嘅metro站﹞

之後就去番老佛爺門口同其他團友集合，集合前又入去老佛爺行吓先，順便去埋廁所呢。

尋日，o黎呢度嘅時候係黃昏時段，而家就係中午時段，究竟個淪陷程度有咩分別呢？我話比你知吖，係比尋晚更淪陷呀！！ d嘢真係唔洗錢嘅咩？點解班強國人可以入o黎燒銀紙燒幾日都都仲有貨o架！佢哋邊買邊印銀紙o架？好恐怖呀~~

最後都終於等齊人，齊齊出發去機場，呢條路已經行過好多次，每次都喺我唔為意嘅情況之下，比個『貨櫃箱』走咗，今次，係最後一次可以影到佢，我叫埋老婆一齊昅實佢，千祈唔可以放佢走，因為我哋已經接受唔到再一次任務失敗，雖然係影得細d，不過都叫做完成到呢個任務嘛~~

﹝雙撲手貨櫃﹞

出到機場就係其他團友最忙嘅時間，因為佢哋要退稅，呢個時候領隊當然要幫手啦，而當中就只有我哋兩公婆可以四圍行吓，因為我哋無入d貴價嘢嘛~~

﹝退稅中…﹞

退完稅之後，就係另一個緊張時刻 -- 寄行李！！

大家血拼完咁多日之後，相信都會有唔同程度嘅斬獲，或大或小或重或輕，一上磅就知道龍與鳳，由於我哋回程時只得6個團友加領隊，所以係大家一齊去各自嘅counter辦理登機手續，亦都唔會知道大家有無超重，好慶幸我哋就無超重，仲有找1 kg tim~~ 當我認為我哋已經好貼近23 kg時，原來maverick仲勁，佢哋件行李重22.9 kg呀！！