﹝2011年3月10日﹞
﹝威尼斯 > 米蘭﹞
去到水都威尼斯，好多人都會坐貢多拉﹝Gondola﹞，穿梭於威尼斯嘅大小河道，有個意大利船伕划船，仲會唱吓意大利歌比你聽，個情形同澳門威尼斯人酒店一樣，唔同嘅就係呢度d船伕真係要出力划船，一隻貢多拉可以坐到4-6人。
不過我哋兩個無坐到，唔係我哋唔想比錢坐，而係我哋想『行』威尼斯多過想『坐』，所以當其他團友上咗貢多拉後，我哋兩個就四周圍行，下圖就係已經出發玩緊貢多拉嘅團友。
﹝玩貢多拉嘅團友﹞
未去到威尼斯之前，我同老婆都考慮過玩唔玩貢多拉，唔係平定貴嘅問題，而係船上嘅30分鐘多d嘢睇，定係我自己行30分鐘會多d嘢睇呢？最後，我哋決定自己行，唔睇佢哋d『士釘突』嘢！
另外，我哋都有個問題，究竟呢度嘅河道係河定係渠呢？呢個問題……我留番一陣問吓d玩完貢多拉嘅團友先。
呢30分鐘入面，我哋就四周圍行，睇吓呢度睇吓嗰度同埋影吓相，我哋發覺d貢多拉隻隻都有唔同嘅裝飾，d坐位都有唔同，但係佢哋有個共通點，就係個船頭嗰把『刀』，唔知有咩意思嘅呢？
﹝貢多拉s﹞
當d團友上晒船後，我哋就喺附近行吓，睇吓威尼斯嘅內街，之後我哋見到有一間郵局，當然又係寄postcard嘅時候啦！出番郵局之後，我哋就見到一間街邊舖，掛滿咗好多小面譜，原來一年一度嘅威尼斯面譜節剛剛完咗，所以四周圍都仲有好多面譜賣，我哋都應吓節，買咗兩個面譜……送比人。
﹝賣面譜嘅小舖﹞
之後，我哋又再四圍行，行吓行吓之下先發現，原來呢度一帶都有好多碼頭仔比d船上落，不過就唔知佢哋有無分地盤或者公司，亦都唔知佢哋會唔會好似搭巴士咁，唔同路線有唔同站呢？又或者，多d碼頭可以多d機會劈d遊客呢~~
﹝貢多拉碼頭﹞
影呢一張相時，已經見到玩完貢多拉嘅團友，團友 Brian大讚好玩好值得玩，而我就無比佢嘅 comments令我覺得我損失咗，因為我要聽埋其他團友嘅意見先。
距離集合都仲有一段時間，我哋就向聖馬可廣場方向行，剛才經過嘅時候，已經見到有部份 café已經喺露天嘅地方放咗檯，點知家下行過就已經見到佢哋擺好好多檯 lu~~ 除咗檯多咗之外，遊客都多咗好多，都係趁住未有人幫趁前影番張相先，一陣人多就影唔到，最重要嘅係我哋唔會番轉頭嚟呢度。
﹝聖馬可廣場﹞
喺呢度，有網友介紹話呢度有間café d魷魚圈好食，咁我哋就諗住要試吓啦，只不過，當我哋問領隊時，佢話其實係唔好食㗎，所以我哋就無搵到，但係之後，再聽番d朋友講，d魷魚圈係好好食㗎，真後悔信咗個領隊講，就算幾唔好食都好，都係蝕嗰幾個€吧，但係家吓，唉~~ 蝕咗成個trip呀！想食番的話，又要請多次假，報多一次團先可以嚟呢度『蝕』番一次，呢個機會成本真係高呀！唉~~ 所以，下次有理無理都好，想食就食，想玩就玩，唔會再比人左右我哋嘅意願！
跟住我哋就繼續向聖馬可大教堂行，喺個教堂隔離就係一個叫鐘塔﹝Torre dell’Orologio﹞嘅地方，我就覺得呢個鐘塔無乜特別，只係因為佢個鐘有d似捷克嗰個天文鐘，所以先同佢影番張相，最後我先發現，其實佢完全唔似天文鐘，係我記錯吧，哈哈~~
呢個鐘塔頂有一個銅雕，係一個鐘再加兩個銅製嘅摩爾人，聽講話係敲鐘報時用嘅，可惜我哋經過嘅時候，個鐘無響過，我都好想知道佢呢個鐘 keep得好唔好，因為佢咁 open，好天曬落雨淋，會唔會大力d敲會敲爛佢呢？
﹝鐘塔 Torre dell’Orologio﹞
之後，我哋就由大教堂同個鐘塔之間行咗入去，小廣場中間有個水池仔，旁邊個水氹就有好多白鴿喺度沖涼，d白鴿唔係咁驚人，我試過企埋d影相，初初d白鴿都唔理我，不過都不減佢哋嘅警覺性，我再行埋d，佢哋就已經行開咗，不過都係唔捨得個水氹，一路『及』住我一路搵機會再埋位，哈哈~~ 算啦，唔阻班白鴿仔沖涼啦！
﹝白鴿仔沖涼中﹞
個水池一帶都無乜好睇，我哋就行番出去雄獅小廣場，呢一張相可以睇到幾樣嘢：
1﹞ 部份鐘樓﹝左手邊橙色﹞
2﹞ 鐘塔，同埋之前所講嘅銅雕﹝左中﹞
3﹞ 聖馬可大教堂﹝右中﹞
4﹞ 總督宮﹝右手邊﹞
5﹞ 我老婆副已變黑嘅全視線眼鏡，紫外線真係好勁呀！
如果唔講，唔知大家覺唔覺得佢副眼鏡係後期製作呢？
﹝從雄獅小廣場一次睇晒4個景點﹞
我哋見仲有時間，咁就沿住海邊轉咗去右手邊行吓，都係一d賣紀念品嘅舖仔，我哋買咗兩個鎖匙扣就行番去集合點，即係我哋上岸嘅地方。
沿住海邊行時，我哋發覺海邊有好多『鬚』，多到有d似恐怖片咁，好似同d貢多拉講“嚟啦……嚟啦……”睇見都覺得肉醱……
﹝海『鬚』﹞
呢一帶，除咗遊客多之外，貢多拉都有好多，喺海邊，閒閒地都有幾十隻泊晒喺度，不過就唔知佢哋幾時先開同埋開邊隻。
﹝貢多拉碼頭﹞
你哋睇吓下面張相，d遊客真係好多，而d café都好識做，一早就擺好晒d檯櫈，隨時做生意。
﹝即將被淪陷嘅沿海一帶﹞
之前同大家講過一條叫嘆息橋嘅地方，佢就係喺我哋身後條橋度望入去就係，基本上，大家係唔會miss呢條橋嘅，因為我哋行咗咁多條橋，係得呢條橋會有人企定定唔走，圍晒人都好，一個二個係都要影相，所以，大家只要留意一下邊條橋多人，相信嗰度就係嘆息橋。
﹝身後就係嘆息橋﹞
行威尼斯，除咗用貢多拉之外，仲有一d叫水上的士嘅工具，佢嘅設計比貢多拉實用得多，講到底，水上的士真係一種交通工具，係方便d人去唔同嘅地方，而且係行汽油或者電吧，如果靠d貢多拉，上多兩件貨就肯定個船伕划天光都唔得掂！
﹝威尼斯水上的士﹞
我哋繼續向集合地點進發，當我哋行經一個巷仔時，覺得條巷仔好得意，而且我哋認為入面應該有d嘢睇嘅，所以就決定同條巷仔影張相，然後再入去睇吓有咩好睇，但係影相嘅時候就遇到個難題，就係有個人企正喺條巷仔前面，結果，我叫老婆企過少少，而且『叉』起條腰，務求要遮住佢！結果成功咗！yeah~~
下圖有幾個牌仔，寫咗d意大利文，最高同最低嗰兩個就唔知佢講乜，而黃色個牌係講『教堂』，而銀色個牌係講『警察』，所以我哋行入去係會見到有一間教堂！
Chiesa ﹝意大利文﹞ = 教堂
Carabinieri ﹝意大利文﹞ = 警察
講清楚比大家知先，我係唔識意大利文嘅，只係打blog時用Google翻譯吧~~
﹝意大利得意巷仔﹞
呢條巷仔唔長，行咗一分鐘都唔洗就已經見到間教堂嘞，原來呢間教堂叫聖撒迦利亞教堂 (Chiesa di San Zaccaria)，其實，我唔知佢有乜特別，有咩好睇，只係路過呢度，到此一遊，打呢篇blog時，順便上 google map search一下先知道吧！
﹝聖撒迦利亞教堂﹞
睇完教堂就繼續向前行，沿岸係有好多大小嘅碼頭比人上落，大嘅碼頭就比d大船，車d遊客由唔知邊度嚟呢度，細嘅碼頭就比d貢多拉做生意；而對住碼頭嘅就係一列好有歐洲風味嘅屋仔同埋酒店，唔知係咪意大利d樓係有高度限制呢，近碼頭嘅屋仔都係差唔多高，只不過係外形同顏色唔同吧。
﹝碼頭一帶﹞
行行吓，我就見到有一個街邊小食亭，佢最吸引我唔係d嘢食，而係旁邊個汽水櫃，通常見到嘅水冷汽水櫃，都係一個櫃，用凍水浸住d汽水嚟整凍佢，而呢個汽水櫃就係用流動嘅凍水去整凍d飲品，由上而下咁流落去，去到最低又再泵番上去，既可以整凍d嘢飲，又唔會搞到佢一櫃死水，最緊要係可以用d水嚟洗手都得，呢個design唔錯，不過就會比較浪費食水。
其實呢張相係有個重點嘅，介紹部汽水機只係掩眼法，重點係右下角嘅白鴿！冬天用凍水沖涼，勁呀！
﹝街邊小食亭﹞
講到要去威尼斯，好多人一諗起就係『水都』、『貢多拉』同埋買名牌手袋，但係呢度有一樣嘢係可以同比薩睇齊嘅，就係『威尼斯斜塔』！
﹝威尼斯斜塔﹞
上圖絕對唔係錯覺，呢個塔真係向前傾斜㗎！我無吹水㗎！不過就當然唔好信呢個塔叫『威尼斯斜塔』啦，係我自己幫佢改㗎。
等齊人後，我哋就上船番去對面岸，今次坐呢程船就舒服好多，唔再被『淪陷』，唔洗再比人話我哋『嘈』，我哋鐘意坐邊就坐邊，正！原來有團友同我哋一齊響應咗呢個面譜節，既然人哋買咗，咁就借嚟影番張相先啦~~
﹝面譜節@船上﹞
喺船上面，我問咗另一個有玩貢多拉嘅團友呀政，我問佢好唔好玩，佢就答我『一般啦~~』，問多兩句之後，佢就再講多d，佢就話有d似喺條坑渠度行，不過就唔係每一段都係咁臭，只係某部份吧。
哦~~~ 原來係咁！我就將Brian同埋呀政嘅『貢後感』作個比較後，我就可以肯定咗呢個『魷魚圈定理』 -- 想玩就玩啦，唔好比人哋嘅意見左右自己嘅選擇！好唔好玩﹝食﹞係由自己去體驗嘅，既然一場嚟到，嗰少少錢就唔好慳啦，無謂事後揼心口呀！
講住咁多先，下一part行程去米蘭，陣間見！
留言列表
