﹝2011年3月10日﹞
﹝威尼斯 > 米蘭﹞
去到呢一刻，意大利之旅都差不多要完結嘞，我哋仲有一個地方要去，係意大利最後嘅一站 – 米蘭。
去米蘭之前，我哋要醫吓肚先，今餐係豐富午餐，即係食中餐啦，呢一餐無乜特別，而唯一最吸引我哋嘅係個『蔥油雞』。
你哋睇吓下面張相，隻雞真係好慘，佢已經逃唔過呢一刧，燃盡自己嘅生命嚟填飽我哋個肚，有此情操，實在係一隻好雞！可惜，餐廳廚師並唔想就咁放過佢，一個被奪去生命嘅身體，仲要再次被d蔥掩浸至死，望見此情此境，真係悲從中來，只可以化悲憤為食慾，好叫隻雞唔好枉死，哈哈~~
﹝被殺兩次嘅蔥油雞﹞
如果問大家意大利有咩特色食品的話，相信好多人都會答係pizza同埋咖啡，以上嘅答案當然正確啦，不過仲有一樣嘢就未必有咁多人知，呢樣就係血橙！
﹝意大利血橙﹞
大家見到呢個橙會覺得佢係咩味呢？甜？酸？其實佢同我哋平時食到嘅橙一樣味，只不過係多咗d『意大利特色』吧！由於我唔係咁鐘意食橙，所以都係因為比面佢d血，所以食咗一件咁多，算係支持吓吧~~
食飽之後，我哋就驅車由威尼斯前往米蘭，途中無嘢做，就貪得意影吓車頭景物，點知比我哋影咗呢張相，一路上都唔知呢張相有乜特別，直至去到米蘭時，領隊先同我哋講，剛才見到有消息話米蘭有交通意外發生，幸好無影響到我哋。事後，即係而家，我用google翻譯話比大家知，究竟呢個message講乜！
﹝高速公路上嘅告示﹞
Coda = 尾
Dopo = 之後
Milano = 米蘭
Est = 東
Per = 對
Incendio = 火災
Veicolo = 汽車
查完字典再看圖識字，我估應該係『有汽車著火，交通擠塞，龍尾去到米蘭東。』多謝馬路之友提供資訊。
威尼斯同米蘭之間嘅路程都比較遠，所以我哋要去休息站停一停，今次又係停喺 Autogrill，不過呢個休息站同之前嗰d唔同，呢間大好多，但又不至於係最大嗰種。
﹝米蘭休息站 Autogrill﹞
一般嘅休息站，通常都只係有個便利店比人買嘢食買嘢飲，同埋去吓廁所咁；大dd嘅就會多個canteen之類嘅餐廳仔；再大d嘅，即係呢間，佢大到可以有得比人沖埋涼tim~~ 最大嗰d係可以比人留宿啊！
﹝可以比人沖涼嘅休息站﹞
呢個休息站仲比我發現多一樣嘢，佢有部自助賣藥機！呢部機全部都係意大利文，我想搞吓佢睇吓有d咩藥賣都唔得，可惜，我比佢玩番轉頭。
﹝自助賣藥機﹞
小休片刻後，我哋就繼續向米蘭進發，途中見到一部幾得意嘅車，有理無理，影咗先講，車身嘅人仔原來跑緊馬拉松，而車身嘅字仔就係寫住“Volkswagen the Official Car of Prague International Marathon”，除咗可愛嘅私家車外，仲有一部名副其實嘅『流動汽水車』，我覺得佢係一部『三腳雞』再加個斗改裝而成嘅，勁呀！
﹝馬拉松車仔同埋流動汽水車﹞
往米蘭途中，唔單只d車仔得意，連 Puma都唔輸蝕，整個卓球頭你睇吓先！
﹝Puma﹞
再坐多一陣間車之後，我哋終於到達米蘭，去米蘭，就一定要睇米蘭大教堂﹝Duomo﹞，聽領隊講，有人會叫佢做多奧莫大教堂，我就覺得叫米蘭大教堂順口d。
﹝米蘭大教堂﹞
我哋去到教堂對出個廣場時，見到好多人，好多小朋友都有好特別嘅打扮，個領隊話當時係意大利嘅唔知咩嘢嘉年華會，小朋友都會打扮到好靚出街玩，佢哋會揸住一袋紙碎向四周圍撒，包括身邊嘅人，年紀大dd嘅朋友就會用party玩嘅彩帶嚟噴人，仲要係趁人擘大口時先噴埋去，哈哈~~
我見到有幾個小朋友玩得好開心，有一個小朋友喺地下執咗好多紙碎，跟住就追住個朋友，一手捉住個朋友後，就兜口兜面撒d紙碎埋去，唔嬲不特只，仲笑得好開心tim~~ 之後佢哋就梗係禮尚往來啦，睇見佢哋真係玩得好開心！
其實我都有中招呢，正當我踎低影相時，我覺得個背脊好似比人拍咗﹝篤咗？﹞一下，跟住我就擰轉面睇吓咩事，原來有個小朋友喺我背脊貼咗條彩帶，佢一見我知道佢嘅『杰作』後就9秒9咁走咗去，哈哈~~
﹝嘉年華會中嘅小朋友﹞
記住，除咗嘉年華會時會中招外，呢個廣場仲有一類『白鴿黨』大家要小心！呢類『白鴿黨』通常都係黑人，佢哋會喺個廣場四圍行，仲會主動走埋你身邊，跟住就會揸住個拳頭遞d雀仔嘅嘢食比你，為免破財，記得千其唔好接！我聽朋友講，今年8月嚟呢度時，佢哋同團有個人一個唔小心接咗，結果多謝€20。
其實點解當地政府唔趕呢d人走呢？呢d搶刧嘅行為實在係好影響自己國家呢！
領隊一早通知咗我哋有d咁嘅事，所以我哋個個都可以『平安無事』咁繼續四周圍行，我哋就行咗去米蘭教堂旁邊嘅艾曼妞二世拱廊﹝Galleria Vittorio Emanuele II﹞，呢個拱廊係呈十字形，名店林立，最受歡迎就係老麥，除咗食物價錢比其他平外，仲有佢個廁所唔洗錢，所以有去呢度嘅朋友，記得mark住呢間老麥！
﹝艾曼妞二世拱廊﹞
由於當時正值係嘉年華會，喺個拱廊嘅十字正中央，就擺咗一個好大嘅counter去幫d人化妝，其中有一個化妝師化到自己成個法老王咁，真搞笑~~
﹝幫人化妝嘅法老王﹞
由艾曼妞二世拱廊一直行，行到出咗條走廊後，喺你嘅左手邊就見到達文西個石像。
﹝達文西石像﹞
當我哋睇完達文西個石像之後，我哋就急急腳咁行番出去米蘭大教堂，因為我哋仲未行米蘭大教堂入面，之前都只係喺門口路過咋！
入到去教堂之後，係一個好典型嘅哥德式風格嘅建築，樓底好高，石柱嘅雕刻好細緻，靚就當然靚啦，只不過可能歐洲風格嘅教堂都係差唔多樣，見多兩次就唔再覺得靚。
﹝米蘭教堂內﹞
行完教堂之後，我哋就喺個廣場一帶行吓，企喺廣場正中央，最好就梗係駁相啦！
﹝艾曼妞二世拱廊﹞
﹝米蘭大教堂及艾曼妞二世拱廊﹞
﹝艾曼妞二世拱廊及旁邊嘅建築物﹞
其實我係唔知道邊個叫艾曼妞二世，究竟佢有咩豐功偉業，何許模樣，我一概唔知，只係知道佢有個雕像放喺呢個米蘭大教堂前嘅廣場，上圖嘅左手邊就可以睇到。
﹝米蘭廣場及艾曼妞二世雕像﹞
上車後，我哋就去食埋最後一餐意大利飯，途中領隊指一指下圖嘅巴士站，佢話意大利d巴士站好好，有晒時間顯示話架巴士幾時到，唔洗d人等天光都仲未等到車，如果香港都有就好lor~~
﹝米蘭巴士站﹞
上咗車後，亦都代表呢個行程當中嘅意大利之旅部份已經完結，我哋用咗三日時間，由意大利嘅羅馬出發，一路向北面走，走過梵諦岡、佛羅倫斯、比薩、威尼斯，同埋最後一站嘅米蘭，之後我哋就會去瑞士。
去酒店嘅途中，領隊提醒我哋一陣落車時要小心，因為酒店附近一帶係d吉卜賽人出沒嘅熱門地方，佢哋最經常搶嘢。由於我哋落車之後仲要過馬路先去到酒店，所以領隊就叫我哋一定要小心隨身行李，而且唔好同佢哋有任何接觸。據講呢班吉卜賽人識法術，如果行到埋你身，佢就可以施咒，目的通常都係錢或者財物，所以落車時要小心，尤其係手抽袋，因為落車時一定係個袋行先，而d吉卜賽人就會『吼』呢個機會搶嘢，所以落車時記得要人行先。
我哋個司機好好呀，佢車到我哋去酒店門口放低我哋，唔洗我哋過馬路，可以一落車就入酒店，我哋先至無咁驚咋~~
留言列表
