﹝2011年3月11日﹞
﹝米蘭 > 鐵力士山 > 琉森﹞
晨早起床，當然清新開朗啦，亦都係我哋離開意大利嘅時候，進入瑞士嘅懷抱，臨走前，同間房影多張相先，唔係我唔捨得佢，而係影低佢d罪證！！檯上面個牌話到明 Wi-Fi Hot Spot，點知間房係無 Wi-Fi嘅，呢d咪叫做欺騙顧客lor~~
﹝酒店房間嘅罪證﹞
﹝打呢一篇blog真係超火滾，yahoo blog upgrade完之後，加相又麻煩，format又麻煩，有時要用mouse先point到某d位，用keyboard個箭咀係去唔到，有時又掉番轉，搞邊科呀！！﹞
如常咁食完早餐之後，我哋就上旅遊巴，喺車上，領隊話比我哋知，歐洲嘅司機，佢哋嘅工時係唔可以超過12個鐘，每2-3個鐘就要比佢休息10-15分鐘，如果比人發現的話，個司機係會比人罰錢嘅。而我就好好奇咁問，又無人跟車，邊個會知佢超唔超時呢？佢有無休息，又或者休息咗幾耐，又有邊個知呢？答案就喺下圖：
﹝行車記錄﹞
如果大家好眼少少的話，就會見到佢有一條『心電圖』嘅線喺度，呢個就係個司嘅『叻確』，幾點開工幾點收工，行咗幾耐車，有無休息，休息咗幾耐，有無超速都一次過睇晒，而個司機係有責任keep住個『叻確』2-3個月，一個唔好彩，比白炸炸中的話，就要交出『叻確』比人check，一有違規，罰錢了事，不過就白做一日lor~~
呢個做法其實都唔錯，因為做司機呢種職業係好傷神，會影響判斷能力，亦即係直接影響乘客安全啦，所以，呢個機制係好嘅，不過，我又唔相信，行車行多咗 or 休息少咗會有好大影響，老實講，出力管吓d司機有無瞓足8個鐘仲好啦，限死晒d行程呀！！
行咗唔知幾耐，終於要進入瑞士嘅國土，我哋唔洗落車過呢個關閘，只係停咗一陣，司機落車比人check少少嘢就可以開車。
﹝由意大利過瑞士嘅關閘﹞
過咗關無幾耐，我哋就要停一停休息站，呢個休息站有一個display corner，係介紹一條長17km嘅隧道，我哋一陣會行經呢度，可惜，我唔識睇佢d瑞士文，所以唔知佢講乜。
﹝17km隧道簡介﹞
去休息站又豈可空手而回呢？我就食咗一杯blueberry yogurt，領隊介紹話好食、唔甜，我試完之後都覺得唔錯，可以一試。
而老婆就無嘢買，咁就隨手攞d瑞士特產影吓相lor~~
﹝好重嘅king size三角朱古力﹞
可能身處歐洲，好多嘢嘅size都好大，就算朱古力醬都一樣咁大。
﹝好大嘅king size朱古力醬﹞
離開咗個休息站後，就係要行經呢條17km嘅隧道，由於未預備好，入隧道時未開始同佢計時，行咗一陣先計，無所謂啦~~
﹝在隧道中﹞
用咗大約13分鐘時間就行完呢條隧道，如果用簡單嘅數學計一計，就知道個司機好乘，無超速。
限制車速：80km/hr
隧道長度：17km
算式：
80km：60mins = 17km： x mins
x = 60 (17)/80
x = 12.75 (mins) = 12 mins 45 sec
都差不多啦~~
﹝用咗差不多13分鐘行完條17km隧道﹞
離開隧道後，我哋就繼續向英格堡高地進發，目的地係鐵力士山。途徑一d小村莊，好有飄零燕feel，話唔埋會見到尼路同凱狄都未定呢？我每次見到呢d咁嘅地方都不其然想問吓，佢哋點樣駁水電煤同internet？
有時我又會諗，如果我住呢一度，我可以捱到幾耐？習慣咗香港嘅多采多姿生活，喺呢度一切變得平淡，可能短住一星期都仲ok，可以享受吓農村生活，同個大自然好close，吸盡天地間嘅日月精華，相信個人都會精ling d~~
﹝瑞士小村莊﹞
當我哋一路向鐵力士山進發時，身邊嘅景色真係好靚，隨手搵部相機，用auto mode都可以影得好靚。你諗吓，坐旅遊巴隔住塊玻璃都有咁嘅質素，如果可以比我哋落車影的話，我肯定影得更加靚呀！！
﹝好靚嘅瑞士景色﹞
唔知坐咗幾耐，終於到達鐵力士山……腳，英格堡高地，團友落車第一件事係影相，領隊落車第一件事係叫我哋唔好四圍走，乖乖地喺度影相等佢番嚟，既然我哋係一班又乖又聽話嘅團友，咁就當然喺附近影相啦。不過就有d奇怪，當我身後呢部巴士掟個靚彎，停定落客(埋站?)之後，佢唔係即刻開走，而係轉牌落車休息。
奇怪一，就咁掟個彎 = 埋站？
奇怪二，落車休息都要整個溫馨提示 --> Pause？
﹝溫馨提示巴士﹞
下圖右手邊就係剛才架巴士停車嘅地方，呢個位可以見到我哋一陣上山嘅starting point，我哋即將會坐三種唔同嘅纜車上山，最後，我哋會登上我哋人生嘅最高峰，一個一萬呎高嘅山頭！即係有幾高？唉~~ 都『士啤是快』咗係一萬呎，都仲要問幾高，自己攞把12吋間尺度一萬次啦！！哈哈~~ 再遲吓上到去個山，你就會知道我哋身處嘅地方比雲層仲要高，好有秦始皇feel呀 --> 大便……呀……唔係，係大地在我腳下！
﹝即將登上纜車上山﹞
可能你會好奇問我點解會影下邊左手邊幅相，影呢張相有2個目的：
1) 左手邊幅圖嘅左邊，已經講咗一陣嗰三個站嘅站名﹝山峰個名﹞同埋高度
2) 左手邊幅圖嘅樹林中間有條路軌，放大咗之後就係右手邊幅圖，呢架登山纜車係大風雪時用嘅，纜車唔行得時，用嚟車d人上山嘅
﹝上山在即﹞ ﹝登山纜車﹞
我哋上山當日好好天，唔洗坐登山纜車上山，亦都好慶幸我哋唔洗坐，因為一入咗山窿就乜都無得睇。
領隊買完飛之後，就同我哋略略講解一下一陣嘅行程，之後就排隊上山！！呢個算做lobby吧~~ 好多人，好多滑雪人，亦有好多滑雪用品；原來，上鐵力士山滑雪係可以唔洗帶滑雪用品，可以喺呢度租都得，可惜，我哋無時間玩，無得試下滑雪嘅滋味；不過，就算有得玩，我相信我都會幾驚，因為……未玩過lor~~
﹝可以租滑雪用具上山滑雪﹞
排隊期間，身邊都有好多滑雪人喺我哋周圍，好彩，唔滑雪嘅人都唔少，唔洗搞到我哋咁異相，只見所有滑雪人都好熟手咁插晒d雪橇喺度車門度，然後就好快手咁跳咗上車，一架車可以坐6個人，佢哋d歐洲人已經夠大份，再加上著咗d厚衫，應該更大份吧，佢哋都唔介意6個人迫埋一齊，勁呀！！
聽領隊講，佢哋咁快手係因為佢哋趕住滑雪，點解咁趕呢？原來佢哋都係同我哋一樣，由呢一度開始上山，一路上山頂，到咗山頂後就即刻滑落山，滑到落山腳之後，又要急急腳再上山滑過，所以咪咁趕lor~~
海洋公園嘅吊車，我相信好多人都坐過，被fing出去嗰一刻係唔會驚嘅，但係當你見到下圖嘅時候，你驚嘛？
﹝fing你上山﹞
又唔係玩過山車，洗乜fing得咁勁呀！！雖然被fing出去時會有少少驚驚地，不過都唔及同我哋同車嘅歐洲小朋友咁驚，因為我哋全程喺度影相呀，讚嘆一下身邊嘅景色呀，總之成程都嘈到拆天啦，個小朋友就瑟縮於一角咁望住我哋，而坐我身邊嘅外國人就無理過我哋，原來中國人，呀……唔係，係香港人先啱，原來香港人比吊車更恐怖，哈哈~~
都唔知用咗幾多時間上山lu，因為身邊嘅景色實在好吸引，我哋不停咁影相，當我哋仲搭緊第一轉車時，我哋已經身處雲層咁上下嘅高度，可想而知，呢個鐵力士山真係好高。
﹝坐第一種吊車上山中﹞
唔知坐咗幾耐就到咗第一個轉車站。
﹝轉車站﹞
搭完『車立』之後就可以好近好近咁睇到個雪山，仲見到有d滑雪人士tim~~
﹝等緊第二轉纜線﹞
今次呢部纜車可以載到好多人，我諗30-40人都得，不過就無位坐，全部人都要企，而且可以見到好多好熱衷於滑雪嘅外國人。佢哋個個都全副裝備，預備由山頂疾衝落山腳，唔知好技術嘅人有無樣睇呢？恐怕技不如人的話就要碌落山呢，哈哈~~ 不過呢一張相仲有一個main point話比大家知道，上雪山一定要戴﹝係配戴唔係攜帶﹞太陽眼鏡，最好就係包晒成對眼啦，否則，你會比雪地反射嘅陽光『撐』親，唔係講笑o架！輕則，好似我咁，就有短暫嘅雪盲；重則，視力受損，去玩吧，唔洗搵命搏嘅~~
﹝剛上第二轉纜車上山﹞
第三轉車有個名堂o架，我幫佢安咗個名叫『鐵力士山360』，因為呢部纜車係可以360°旋轉嘅，而呢一部纜車依然有好多滑雪人士。
﹝鐵力士山360﹞
坐第一轉纜車時，我哋嘅上到嘅高度就係同d雲層差唔多，你睇，到第三轉車時，我哋已經比雲層更高，再過多一陣，我哋就可以無阻隔咁親親鐵力士山lu~~
﹝鐵力士山360上, 已經比雲層更高﹞
ok，上到雪山有咩做呢？我哋有幾件事要做：
1﹞食飯
2﹞行雪山
3﹞行冰洞
終於上到雪山啦~~ 一個一萬呎嘅高空，我哋可以睇住個雪山食飯，正啊！！一入門口就見到呢個景，你話正唔正？
﹝力士山上嘅餐廳﹞
個景固然吸引，不過有一個附帶條件，就係好熱，唔係呀嘛！上雪山話熱？搵邊個信！！無錯，雪山係凍嘅，不過個餐廳就好熱，其實，我覺得佢唔係熱，只不過，大家著多咗衫，以防一陣行雪山時會凍親，再加上個餐廳可能開『恆』個暖氣，所以咪好熱lor~~ 原本著晒上身嘅褸呀，頸巾呀，唔該同我全部除晒佢，否則你一定熱死。
呢一餐都幾好味o架，檯面上嘅嘢食，就由我哋兩公婆，再加另外一對couple搞掂晒，一睇就知唔會食得晒，所以，我哋個『呀舖廚』就係食『食送』唔食飯，最後，湯豌咁大嘅飯係完全無郁過,，而其他嘢食就比我哋ko晒。
﹝午餐@鐵力士山﹞
唔知你覺唔覺得呢一餐好中式呢？醬油餐具同食品都好中式，更中式嘅係佢樽水，個label仲show中文字tim，但係個容量就係歐洲寫法，即係邊度製？
﹝中國水？歐洲水？﹞
食食吓飯嘅時候，發現眼角有好多嘢『揚揚貢』，一擰轉頭就見到好多雀仔喺度飛，唔係呀fa~~ 成萬呎高空都有雀？佢哋仲飛得好快tim~~ 真係勁！！但係點解搭飛機時又唔見有雀呢？奇怪@@
﹝鐵力士雪山雀s﹞
食飽飯之後就預備行雪山，好緊張好期待，究竟一陣間d雪係點嘅呢？個地下會唔會好跣呢，行唔到幾多步就跌低？空氣會唔會好稀薄，行快兩步都呼吸困難？d雪會唔會好鬆軟，每行一步都『雪足深陷』？想知係點，下一part話比大家知。不過出門時，記得同個招牌影番張相，到此一遊嘛~~
(到此一遊@鐵力士山)
part b見！
留言列表
