﹝2011年3月11日﹞
﹝米蘭 > 鐵力士山 > 琉森﹞
食飽飯之後，我哋就初次踏足鐵力士山，亦都係第一次踏上雪山，剛剛所想嘅問題已經唔存在，呢度真係有好多人滑雪，大家行嘅時候要小心d，總之keep住慢慢行就得，千祈唔好做“快閃黨”，因為當d行人太過大動作的話，係會好影響身邊嘅滑雪人士，總之你慢慢行，佢就自不然會避開你嘅，除非你想攬住其他人一齊碌落山啦！
出去行雪山前，唔該大家戴番副太陽眼鏡先，如果無戴到的話，我勸你唔好喺出面逗留咁耐，否則你對眼會好傷，有幾傷？一陣我入冰洞時再話你知，我所戴嗰副係一副cheap雞到唔恨嘅太陽眼鏡，保護唔夠，只能夠擋到部份太陽嘅折射，行嘅時候唔覺，但一入到室內你就……嘿嘿……所以我都好聽話咁戴番副眼鏡先，仲有，有圖為證，我哋已經到達人生最高“峰” -- 一萬呎高空！
﹝身處10,000 呎高空﹞
一開門，無想像中咁凍，而腳踏之地都仲係石屎地，仲未有雪踩，再行前多少少，就見到一個好開揚好開揚嘅雪山景，真係即場“嘩”咗一聲，呢世人真係從來都未試過見過咁靚嘅風景。
﹝身處比雲層更高嘅地方﹞
如廝美景，就梗係影低佢啦，呢度有個map，係話比大家知呢個景所見到嘅山峰叫咩名，我就無咁多時間同佢研究，做完『快影即閃黨』就即刻繼續向前行。
喺呢度，我真係好認同自己已經同老婆一齊去到人生最高峰，眾山都喺我腳下，所以讓我送一首歌比大家 -- Top of the World！
當我哋欣賞完呢個世界後，我哋就步出呢條『天橋』，正正式式咁踩雪地，可能呢個位置都比較多人行，我覺得個地好硬，似行緊d好『岩岩蠶蠶』嘅石屎地咁，唔算跣，仲未洗搵對配上冰爪嘅鞋嚟呢度行，只要大家唔好跑唔好急，一定唔會跣親，就好似我哋其中一個團友咁，著高踭鞋上嚟行都仲得，我唔相信著波鞋嘅你會有concern lor~~ 我仲記得個團友話報團嘅時候，係想試吓著高踭鞋行雪地嘅感覺，我喺度好『誠懇』咁邀請妳上嚟分享一下妳嘅感受，唔該！
而家唔係事必要妳講，但係妳所講嘅嘢，會好原本咁同所有網友分享，唔該！！
﹝雪地之初體驗﹞
我哋嚟到呢度係有2個任務要完成，當然唔計影相啦，第一，要裝一樽雪落山，等佢溶咗之後，就可以同老婆一齊試吓雪山雪水有咩唔同；第二，要影團體相。
裝一樽雪落山呢個任務看似無聊，但係對於我哋呢d未上過雪山嘅人嚟講，呢份經驗係好難得，而且，『上雪山，又豈可空手回？』，至於第二個任務就係其中一位團友提議嘅，我哋覺得呢個提議好好，所以一齊人就即刻set腳架做嘢，而我就當然唔會淨係要大家企定定影相咁簡單啦，唔該大家手執兩手雪，再加上一個靚靚笑容。
﹝交足戲嘅團友們@鐵力士山﹞
由於我未得其他團友嘅同意，所以佢哋嘅樣全部遮晒。
團體相呢樣嘢，好多年前跟團嘅時候都會有呢個環節，亦都係旅行社其中一個搵錢項目，老實講，有幾多人真係想要呢張相呢？我記得對上一次影團體相應該係2004年，當時係去濟洲嘅。但係今次嘅團體相就比較特別，唔係旅行社安排嘅，而係我哋自發性要影嘅，難得大家咁有興緻，咁呀彬同我就『拿拿聲』set腳架，兩枝腳架兩部相機影兩次，而我就叫大家執少少雪上手，每影一次就拋d雪上空中，咁樣影出嚟嘅相就唔會咁齋啦~~
咁多位團友，唔好意思，為咗一張無咁齋嘅相而犧牲咗大家雙手，sorry~~
影完團體相之後，我哋就四周圍行，點知比我哋搵到舊冰，個個都攞住舊冰影個夠，哈哈~~ 不過唔該快d，因為舊冰好凍啊！
﹝兩舊冰 + 兩個遊客﹞
行過兩步，就係一個滑雪場中轉站，我都唔知佢會車d人去邊，只係見一個個座位排晒隊咁比人車去另一個地方，我好想坐過去，不過唔知去邊又唔知坐幾耐，最後都無坐到過去，而個職員一見我哋指手劃腳時，就當然出嚟say個hi啦，佢行得出o黎就當然要捉住佢影相啦，瑞士任務完成 - 同瑞士人影張相，yeah~~
﹝與瑞士人合照﹞
我唔記得之前有無講過，今次歐洲之旅，我想同所去過嘅8個國家中，都會同一個當地人影一張相，所以我又KO咗一個國家嘞！哈哈~~
由於時間關係，我哋無再四周圍行，只係沿路互相協助吓，之後，有人忽發奇想，不如影一d跳起嘅相，初時好傻咁，用腳架set自拍，靠自己估個shutter時間，但係發覺個時間好難掌握，所以最後都係要延續呢個協助時間，要靠團友們嘅幫助，我哋只係跳幾次就搞掂！
﹝跳躍在鐵力士山﹞
從上圖可見，影『跳相』想有比較好嘅效果的話，唔該將大家件外套拉埋拉鏈先。
跳吓跳吓咁都搞到自己上氣唔接下氣，始終…唉……年紀大嘞……不過就正正係因為跳到慶起，所以上到雪山係一d都唔凍o架，仲有d熱tim，死未！
話口未完，又見番同我哋同車上嚟嘅瑞士人，佢哋來自日內瓦，又捉佢哋影相先，哈哈~~ 聽d團友講，佢哋睇過我哋個『艾天』，佢哋都覺得點解個團會趕成咁，比著係佢哋一定唔會去，咁又係嘅，歐洲人同香港人唔同，香港人乜都趕過人，好多時就咁錯過咗好多嘢；不過，嘆慢版嘆到好似佢哋咁，我相信無乜幾多個香港人會接受到……
﹝與瑞士人合照 2﹞
好快趣，又差不多行到番去個入口度，換句話講，雪山之初體驗即將完結，行到去門口就見到個『到此一遊』嘅景點，我哋就當然唔會放過啦，咁就唔該呀彬幫幫手，協助吓我哋，一個咁『士釘突』嘅景係滿足唔到我嘅，所以我同老婆就執起兩舊『雪』，為相片加少少生氣，但係呢個選擇幾乎出事，原來我哋執嗰兩舊唔係雪，而係冰嚟嘅！當我一拋舊冰出去之後，舊冰就不斷咁向前彈，幾乎打中我哋個攝影師呀彬，幸好舊冰臨時轉馱，無打中佢，噓……sorry 呀彬 >.<"
﹝到此一遊@鐵力士山﹞
大家要記住呢條『雪山戒嚴令』 -- 唔係自己堆砌嘅雪球就唔好執嚟掉人，呢一點領隊都有提我哋，只不過我一時唔記得，而且都無諗到輕輕一拋都暗藏殺機，所以，大家上雪山時，隨咗記得戴太陽眼鏡外，仲要記得唔好玩d『現醒』雪球，切記切記！！
臨入番去時，比我見到兩樣幾有趣嘅嘢，第一樣係露天茶座，我相信能夠喺呢度一邊食飯一邊嘆咖啡都幾舒服，仲要喺 Top of the World，諗起都爽呀！影呢張相時，我係set咗時間制，跟住就連機帶腳架咁舉高佢，所以圖中有個人好好奇咁望住個鏡頭，唔該晒呢位model，1、2、3、笑！『咔嚓』。
﹝露天茶座@鐵力士山﹞
另一個得意嘢，而且又係必影位就係呢條溫度計，無錯，身處 Top of the World 都係0°C。
﹝0°C@鐵力士山﹞
影完outdoor相就步入indoor，行一個人造冰洞，估唔到，喺出面玩咗一個鐘，一入到室內就好快咁出現咗短暫嘅雪盲現象，我初初只係覺得四周圍好黑，以為一光一暗，對眼未適應吧，點知原來唔係我想像中咁簡單，我雙眼完全睇唔到下半部份嘅嘢，亦即係話，如果我正常地向前望的話，我係完全睇唔到條路，我要dup低頭，好似d老花人士咁樣睇嘢，咁我就見得到條路；但係我就覺得有d奇怪，老婆就無事wor，佢嘅眼鏡都係包唔晒對眼啦，不過，我相信係眼鏡防uv嘅能力問題，我嗰副實在太cheap雞，所以就有咁嘅結局……
所以，經歷完呢一次之後，我就有以下嘅感受同大家分享：
我知道室外同室內嘅光差好大，但無諗過原來一副唔能夠完全保護雙眼嘅太陽眼鏡，包括佢嘅覆蓋面同防uv程度，係會有咁嚴重嘅後果，初初我真係以為自己盲咗，好彩，只係維持咗一段短時間，到行番去一d比較光嘅地方時，呢個情況已經無咗lu~~真係一個唔小心就嚇親，驚驚~~
﹝在冰洞內@鐵力士山﹞
行完個冰洞之後，一出門口就係一間手信店，成間舖都唔覺有乜想買，而老婆就搵到本簿仔，簡直係愛不釋手呀！呢本只係一本平平無奇嘅簿仔，內頁白雪雪，但係個SIZE就好啱我哋攞去日本cup印仔，可惜，佢實在太貴，我哋兜咗兩個圈，攞過上手幾次，都係唔捨得買，結果，老婆就放低佢，然後同我講『尤得佢啦，下次再嚟嘅時候，如果仲見到佢，而且仲想買的話，到時先買啦！』跟住，我哋就離開咗間舖仔。
﹝老婆好想買嘅雪山簿仔﹞
請留意我老婆嘅一番說話：『下次再嚟嘅時候』，呵呵，好一招以退為進，即係話我哋要『搵日』再嚟過，咁都比妳諗到，好嘢！
一個轉頭，我哋就集合咗一齊落山，上山時，坐三種唔同嘅纜車時都好多人，不過落山就舒服好多，可以四周圍行都得。同我哋一齊搭瑞士360嘅其中一個滑雪人好搞笑，佢條褲係印滿中文字o架！又或者可以咁講，佢條褲係一份報紙！查實呢個人識唔識中文呢？
﹝報紙褲﹞
終於要由Top of the World 重返人間，所見嘅一草一木都好真實咁呈現眼前，唉~~有少少唔想落山tim~~ 由纜車望番出去呢個雪山都幾特別，白茫茫一片嘅雪地，就只有D常綠樹不被『污染』，可以堅守自己嘅本性。
﹝重返人間中…﹞
搭完瑞士360之後，我哋就轉坐部紅色四四方方嘅纜車，今次出奇地少人，我哋又o黎多次大合照，連領隊都拉埋一齊影呀，哈哈~~ 喺度都要多謝同我哋一齊搭纜車嘅遊客，佢哋有份讓個位比我哋影相嘅。
﹝大合照@紅色纜車中﹞
最後終於重返人間，當我哋等緊旅遊巴嘅時候，我哋就四圍行吓，行咗入去一間手信店，其實瑞士有好多好有當地特色嘅手信，唔洗一定要買錶嘅，牛鈴都係其中一樣。傳統而且較為多人用嘅就係木造嘅，搖吓佢就會聽到『卜卜』聲；而我就比一個銅做嘅牛鈴吸引住，當我搖咗佢一下之後，嗰種『叮』一聲好清脆，幾秒鐘之後先停，當時我已經好想買咗佢，不過同老婆傾過之後，相信入到琉森先買會平d，所以…暫時放棄佢先啦！
﹝響聲好清脆嘅牛鈴﹞
去到呢一刻，又要停一停先，下一part會入到琉森市行吓，食飽飯之後，我哋會夜探琉森市，又會有咩事發生呢？下一part見！
留言列表
