﹝2011年3月11日﹞
﹝米蘭 > 鐵力士山 > 琉森﹞
離開鐵力士山後，我哋就向琉森市進發，一陣間同今晚，我哋都可以較為放心咁去行街，因為喺整個歐洲嚟講，瑞士係一個治安比較好嘅國家，所以我哋成團人都好期待可以行吓街，只因之前幾晚都無得行。
之前，我話過會有一個裝雪水嘅任務，其實，我哋已經喺捧住兩舊冰嘅地方完成咗，當時，係裝滿一整樽嘅雪，前後都只係兩個鐘頭左右，d冰已經所餘無幾，而且個份量仲比我想像中少好多。
﹝所餘無幾嘅鐵力士山雪水﹞
未去琉森市行之前，我哋會先去一個叫垂死獅子像嘅地方參觀，我都唔係好記得呢個故事係點樣發生，只係記得隻獅子好忠心，死都要攬住主人個盾牌wor~~
落車後，過咗幾條馬路就嚟到一間好有瑞士特色嘅餐廳仔，無得幫趁都要影番張相先，由於領隊不斷咁催逼我哋叫我哋行快d，唔係趕住隻獅子“收工”，而係我哋實在係一批好典型嘅香港人，乜都要影一餐，所以拖住大家嘅腳步。我哋兩公婆見個領隊就快要咆哮之際，就雞咁腳跟實佢先，要影相就趁嗰個時候影，當領隊又再大叫“唔好影相住，行快d啦~~”嘅時候，我哋就幫口嗌“快d啦~~”，哈哈~~
﹝行快d啦@特色瑞士餐廳仔前﹞
一個轉頭就去到個垂死獅子像，坦白講，唔係跟團的話，我一定唔會嚟呢度，都唔知有乜好睇，一個獅子像，一個水池仔，幾隻鴛鴦遊下水咁@@
﹝垂死獅子像﹞
當睇完隻獅子後，我哋就可以慢慢行番去部旅遊車度，而領隊又無再咆哮，所以我哋可以好自在咁影相，有圖為證，我哋已經到達瑞士嘅琉森市。
﹝觀光@琉森市﹞
其實上圖嘅地方仲喺隻獅子附近，只不過等過馬路無嘢做就影相吧~~
一轉眼，終於到咗我哋可以行街嘅琉森市，估唔到，瑞士都有個傳統英式郵筒，唔通瑞士做過英國殖民地？
﹝琉森街頭 1﹞
喺街頭嘅一間手信店，終於比我見番個牛鈴，真係平d o架！！不過為免買貴嘢，行多一間舖頭之後就買咗lu~~ 多謝瑞朗CHF60，即係差不多HKD500，相信係我一直以來買得最貴嘅手信。
之後就繼續行街，即係我哋兩公婆最鍾意嘅活動，唔係我哋鐘意行街買嘢，而係可以四圍行，四周圍影相，可以買吓一d特色手信，一個唔覺意比我哋搵到個郵局仲好，可以寄埋postcard 做手信留念。不過，今次就搵唔到郵局，只係影相吧~~
﹝琉森街頭 2﹞
之後，行咗去一間百貨公司吧，就係因為唔知有咩想買，所以就四周圍行lor~ 一入到去就見到好多白兔，如果識用3D眼睇嘢的話，見到呢一堆白兔應該會好立體@@！因為下一個月就係復活節，所以好多地方都賣白兔-related產品，而Lindt呢個牌子簡直係佔據晒成個"孖屐"。
﹝好多無家可歸，等待被領養嘅白兔﹞
見個百貨公司都無乜嘢好行，我哋就走番出嚟，繼續行街，行到一條街尾嘅地方，有一條維修中嘅橋，而橋嘅附近都好靚，而且個環境都好舒服，難怪周圍嘅人都好『他條』，或坐或企，或煲煙或嘆啡，總之就係一個無所事事嘅生活，歐洲人真係嘆。
我哋就搵咗一個corner位影相，呢個位都幾難就o架，因為有好多地方都有人『打躉』，要避得開佢哋之際，仲要搵到個位set腳架真係唔簡單啊~~
﹝琉森街頭 3﹞
行完琉森內街都仲有d時間先集合，咁我哋就行咗去琉森湖一帶，由於期近黃昏，相信呢一帶都會幾靚，一去到，就見到好多樹圍住個湖，而個湖就有好多天鵝喺度游吓游吓咁，而個湖周圍就有一d好似我哋咁嘅遊客喺度遊吓遊吓咁lor~~
企喺呢條橋度影相都幾好，一邊係琉森市，一邊係個琉森湖，一邊係個碼頭同火車站，歐洲之星都會停呢度，另一邊就見到琉森好出名嘅舊橋，有去琉森就一定會影呢條橋，所以我哋喺呢度都逗留咗好耐。
﹝琉森街頭 4 - 左邊係琉森市﹞
去到呢個咁靚嘅地方，又點可以唔駁吓相呢？
﹝琉森街頭 5 - 左邊係琉森市，右邊就係個碼頭同火車站﹞
都差不多係集合嘅時候嘞，我哋就慢慢行番去個集合地點，臨過馬路前，又駁多一張相先！
﹝琉森街頭 6﹞
過咗馬路之後，就見到條舊橋，除此之外，仲有個雪山呀！而家我哋影相呢個位置好似好空蕩蕩咁，原來聽朝早就會好唔同，暫時賣下關子先。
﹝琉森街頭 7 - 舊橋﹞
集齊人之後，我哋就番酒店先，其實間酒店一d都唔遠，架車兜咗兩個圈就到咗；我哋各人放好晒行李後，就去酒店餐廳食飯，我已經唔記得呢一餐係食乜，只係記得有兩個薯餅同一條腸，等我同佢重組一下先，咁食起上嚟都開心d嘛！
﹝開心晚餐﹞
呢一餐嘅味道好一般，最吸引我哋嘅係一個餐廳女侍應，佢係一個中國留學瑞士嘅學生，佢識講廣東話，而佢就好慘，比個餐廳經理鬧到九彩，我只係覺得寄人籬下就係咁慘，根本就無做錯嘢，只不過郁d都要鬧，好可憐，試問，喺一個長時間被監視嘅環境，仲要係比人雞蛋裡挑骨頭咁睇住，唔緊張就假啦，做得唔自然，出錯就必然o架啦，咁都要鬧，如果唔係留學的話，我相信佢走咗好耐。
食飽之後，我哋成團人都決定一齊出去四圍行吓，而其中有人提議不如試吓fondue﹝芝士火鍋﹞，我都好想試，因為我未食過，不過臨出發前，我就話有幾多人想食，有人就話嗌幾個fondue然後share lor~~ 我就話歐洲人好等錢洗，我哋呢d一廂情願嘅諗法未必行得通，喺香港就話可以去大家樂，幾個人share一份餐je, 去到歐洲未必行得通wor~~最後，我哋決定出去求證一下，結果，比我講中咗！！
更搞笑嘅係，我哋吹水話搵兩個人先入去，叫定兩個fondue，然後，不斷咁換人，直至我哋10個人全部食過為止，哈哈~~ 唉，近排嘅香港人真係好可憐，夠錢去旅行唔夠錢消費，仲要食嘢都食得肉酸過人…… 以上純屬吹水，唔好當真！！
ok，既然唔食fondue，咁就四圍行啦，原來夜晚睇呢條舊橋仲靚，行埋上去之後，就發現佢post咗好多畫，不過我無研究佢嘅故事講乜，行過就算。
﹝舊橋﹞
行吓行吓之際，比我哋見到領隊同司機wor，哈哈~~又係時候影個合照先，相信呢一張相已經可以見晒我哋成團人，10個團友，1個領隊，1個司機，齊晒！！
﹝晚間合照@琉森市﹞
我哋影完呢張相之後，就再行前少少，就去番之前日頭嘅時候，我哋行街時見到嘅一條維修中嘅橋，我哋見好多人都行過去，而我哋又有興趣兜個圈先至番酒店，所以我哋一齊行咗過呢條橋，其實都無乜特別吧~~ @@
當我哋過咗橋嘅另一邊之後，就發覺唔係好認得條路，行咗一陣之後就有人話不如call領隊，我就話都好wor，話比佢知我哋蕩失路，要佢嚟搵番我哋，唔係搵我哋一兩個人，而係成團人呀，然後我哋就作咗一段設計對白：
團友：喂，唐唐呀！
唐唐：係呀，咩事？
團友：我哋蕩失路呀，出嚟搵我哋吖！
唐唐：你哋喺邊呀？有幾多人？
團友：我哋成團人都喺晒度，都唔知自己喺邊，點算好？
唐唐：成團人都會蕩失路！玩嘢呀！
團友：係呀，就係玩嘢lor，妳出唔出吖！
以上純粹吹水，唔好當真，只係設計對白吧！
最後，當然無搵唐唐啦，我哋都搵得番條路番酒店，而且瑞士一帶嘅治安都比較好，我哋都唔太擔心會有意外，縱然有行錯少少路，咪當行多一陣街lor~~ 總之順利回歸！
ok，瑞士之行，暫時告一段落，下一part會講我哋去德國海德堡同法蘭克福，陣間見！！
留言列表
