﹝2011年3月12日﹞
﹝琉森 > 海德堡 > 法蘭克福﹞
一朝早，我哋就照舊早dd起身，走咗去睇個琉森湖，日落已經咁靚，唔知早上嘅佢又會唔會咁吸引呢？所以我哋就向呢個方向走，行咗無幾耐，竟然經過一間郵局，可惜，時間尚早，佢哋都未開門，既然無得寄postcard，咁就買個最平嘅郵政標籤當紀念品。
﹝瑞士郵政標籤﹞
由郵局向前行少少就可以見到個琉森湖，由於係冬天嘅關係，好多樹都變得光禿禿。
﹝琉森郵局外﹞
跟住我就企番喺原位駁番張相先。
﹝琉森郵局 + 舊橋﹞
其實呢一帶真係令人覺得好舒服，天氣又好，環境寧靜，唔好車，唔多人，如果可以再逗留耐d就好~~
之後，我哋行咗去橋嘅另一邊，喺呢個位置，尋日我同一對外籍遊客影過相，佢話要用個雪山做背景，可惜，當時個天好白，完全同個雪山jam埋一堆，睇唔到呢，到今朝，藍色嘅天空襯托住呢個雪山，very good~~~ 我當然就唔會咁蝕底唔影番張相留念啦！
﹝琉森橋一帶﹞
呢條琉森橋嘅另一邊係個火車站同碼頭，我哋就行咗入個火車站睇吓，話晒都係一個歐洲之星會停嘅車站嘛，無得搭都睇吓同影張相啦，影完之後都唔知背後嗰架係咪歐洲之星，哈哈~~
﹝琉森火車站﹞
有一張相我無post出嚟，就係我哋set腳架自拍個火車站外圍，當個相機嘅快門打開時，剛好有一部單層巴士經過，完成遮晒個火車站，真係約都無咁準時呀 @@
之後我哋就行番尋晚行過嘅橋邊，之前就講過話夜晚同朝早有好大分別，夜晚就乜都無，一到朝早就搖身變成一個市場，好多唔同種類嘅嘢都有得賣，最多係賣花同生果。
﹝琉森橋旁嘅市場﹞
行完一轉琉森朝市後，又係時候番酒店食早餐，check out 後就正式離開瑞士，進入德國。老實講，真係唔想離開瑞士，一個咁舒服咁寫意，治安又好嘅地方，真係想留耐d，不過無辦法啦，跟團就係咁，算吧，瑞士，I'll be back!! Don't miss me!!
行咗唔知幾耐，就去咗個休息站停一停，今次去廁所都有新奇嘢發現，呢度係有避孕套賣同性玩具賣，一律€4！當我細心睇清楚d時，避孕套只佔一格，其餘9格都係性玩具，原本歐洲人係鐘意玩性遊戲嘅……
﹝性玩意售賣機@休息站﹞
呢度嘅廁所同其他地方一樣，係要比錢嘅，仲要比€0.7，當你入咗錢之後，佢就會嘔張飛比你，用番呢張飛去佢個休息站買嘢，係可以當錢用嘅。我都唔係好記得我哋有無留番一張飛做紀念，我哋係有去佢哋個休息站買嘢嘅。
﹝€0.7嘅廁所﹞
休息咗一陣之後就繼續向德國嘅海德堡進發，沿路有好多呢d路牌，據領隊所講，呢d牌係想話比大家知道前面會有咩景點，根據一d人工智能嘅字典所翻譯，呢個景點係一個叫塞爾巴赫嘅地方，而google map亦都搵到呢個地方，所以今次證實到領隊無吹水。你知啦，好多時去旅行時，見到一d唔識唔明嘅嘢時，就一定會問個領隊，至於佢所講嘅係真係假就真係無人知，而今次佢無吹水就……印象分加少少比妳啦！！
﹝路邊景點指示牌﹞
其實沿路有好多唔同景點嘅牌，我都影咗好多，但無post晒出嚟，而我可以話比大家知，佢哋d牌係做得好認真同埋好精美，雖然所有嘅顏色都一樣，但係個圖案就真係個個唔同，而且都係跟住個景點嘅建築物去做，所以我重重複複咁影咗好多個牌。
之前都有提及過，今次我哋去歐洲嘅時候都仲係冬天，所以，好多地方都見唔到綠色嘅樹木，但係就發現有好多剛剛長出嘅樹葉，我同老婆講，會唔會有d係雀巢呢？
﹝初葉？雀巢？﹞
坐咗幾個鐘頭車之後，我哋就去到海德堡，今日嘅lunch係自費嘅，所以我哋就好自然咁問領隊有咩好介紹，佢就話佢每次嚟呢度都會幫趁一間餐廳，因為佢個環境夠舒服，一陣行街經過附近時會話比我哋知，結果呢，我哋全團人都去晒呢度食飯，哈哈~~
領隊就當然唔會同我哋一齊食啦，如果妳好眼力，就會見到佢喺下圖出現咗，就喺右手邊近住塊鏡，獨自瑟縮一角嘅黑影咪就係佢lor~~
﹝自費午餐﹞
一場嚟到德國，就當然要食佢哋好出名嘅咸豬手啦！由於領隊事前已經講過隻豬手都幾大隻，一個人未必食得晒，所以我哋5 pair人都諗住叫一隻咸豬手，再加少少其他嘢食，最後，睇完個menu之後，我哋5 pair人都叫埋同一個“set餐” -- 一隻咸豬手 + 一碟酸菜腸仔，哈哈~~但係都有d唔同嘅，就係我哋飲唔同嘅啤酒。
﹝set餐 x 5﹞
如上圖所見，麵包係送嘅，左邊嗰碟係酸菜腸仔，右邊一睇就知係咸豬手，而豬手前面嘅沙律係同豬手一齊上嘅，除此之外，餐前都有個沙律送比我哋，好細兜，2啖就食晒。
坦白講，呢隻咸豬手嘅份量真係唔細，不過佢哋整得好好味，就算有d飽飽滯滯都好，整番啖酸菜消消滯先，跟住就繼續食，最後，隻咸豬手就比我哋KO咗！
﹝被KO嘅咸豬手﹞
食飽飽後就有氣有力可以四圍行，我哋行過一間賣puff嘅舖頭仔，覺得佢d puff好吸引，因為佢有好多種味道揀，但價錢一d都唔平，只不過見佢好似好好味咁，而且直徑有成5吋，所以就入去買咗個大puff，係cappuccino味嘅，仲要買多一個鐵罐仔裝住佢，幾多錢就唔記得lu~~
﹝puff店﹞
今次行街目的有兩個，一個係我嘅任務，要搵一個德國人合照；而第二個任務就係老婆嘅，佢要盡量影多d呢一帶嘅舖頭招牌，因為做資料搜集時，有人報料話呢度d招牌好有特色，所以老婆就會重點出擊，誓要KO呢度嘅招牌！
講多無謂，睇吓我身後嘅呢條街，每一間都各有自己風格。
﹝招牌林立一條街﹞
行咗一陣就見到一間乾果舖，門口有個職員揸住袋蘋果乾比人試食，我好唔客氣咁試咗佢一舊，都覺得幾好味，喺未決定買唔買嘅時候，我就捉住佢影番張相先，哈哈~~德國任務完成！！
﹝與德國人合照@海德堡﹞
最後，我哋都有買番兩包蘋果乾，而呢個買嘢嘅過程當中，我就睇見一個現象：
店員：唔理個客人買幾多包，總之隨手執夠你想買嘅數量，然後入袋、比錢、交收、完成。
老婆：想買兩包蘋果乾送比人，由於係送比人嘅，所以佢會盡量揀兩包無咁碎嘅，送比人都好睇d嘛~~
可想而知，大家個value咁唔同，磨擦就總會有，當老婆揀緊嘅時候，個店員問我哋想買幾多包，我話要兩包，佢就即刻隨手執兩包、入袋、遞個袋比我、然後比錢，當時老婆好唔情願咁比錢，因為佢好想搵兩包完整d嘅比人，所以比完錢都好，老婆都繼續搵吓有無包無咁碎嘅，當個店員見佢仲揀緊嘅時候，就有d惡惡地咁話包包都一樣，而我就叫老婆走，唔好再理佢。
第一，我唔覺得d歐洲人會睇得起我哋d亞洲人
第二，攞到番香港之後，d蘋果乾都可能碎晒
第三，無謂影響旅行心情
所以，我哋收拾心情，繼續行埋呢條街，要完成第二個任務。
留言列表
