﹝2011年3月12日﹞
﹝琉森 > 海德堡 > 法蘭克福﹞
其實呢條街都有好多唔同種類嘅嘢賣，有蘋果乾賣之餘，仲有真嘅蘋果，想朝聖的話，記得唔好錯過。 好彩，我哋路過嘅時候，iPad都仲未出到嚟歐洲，如果過多兩日的話，我肯定呢條街一定逼滿人！
﹝『蘋果店』﹞
假如朝聖都朝到腳攰的話，唔洗驚，星巴克就喺附近，我哋無幫趁到呀，剛剛先食咗飯，又邊洗飲咖啡呢，不過，根據上次去捷克嘅經驗，我相信呢度嘅咖啡會貴過香港，如果係路過我呢個blog，而且又有去呢間星巴克的話，唔該話聲我知一杯Grande size Caramel Macchiato 要幾多錢吖，唔該！
﹝星巴克咖啡店﹞
其實，歐洲嘅建築物係好有自己嘅風格，初初睇，真係覺得佢好靚，但係當你每日都同佢哋 hi & bye 的話，我相信你應該乜嘢感覺都會無晒，聽領隊講，呢個係乜乜式建築，所以個外形就係乜乜樣；而另外就係物物式建築，個特色就係物物頭加物物腳；聽佢講完乜式物式後，我淨係知道自己聽唔入耳，唔識唔識&唔識，所以個外形就係『O』晒咀。
﹝歐洲風格建築物﹞
呢條街仲有一個特色，就係有一班人同你 free hug，只要你願意的話，衝埋去同佢哋攬吓啦，佢哋好歡迎大家同佢哋擁抱吓，而我就無去到，因為要執行任務呀！
其實呢個影招牌嘅任務一d都唔難，只要你夠時間，夠電，夠耐性，夠腳骨力同埋夠咭影相的話，你一定可以影到飽。
﹝部份海德堡一帶嘅招牌﹞
上圖一個『咀咀』招牌係一個幾出名嘅朱古力店，好多人都會叫佢做『海德堡之吻』，又或者叫做『學生之吻』。喺廿世紀初，d女仔好難識到男仔，因為d女仔出出入入都有工人或褓姆陪伴左右，好聽就叫陪lor，唔好聽就係唔比個女仔識男仔去拍拖，而d女仔就用一盒朱古力送比男仔作為一種暗示，咁樣就可以瞞騙到d褓姆，又可對對方有d表示，既大方又得體，所以一路流傳到今日，就用咗兩個學生頭做logo，而且好出名tim。我哋無入到去呀，去到門口影個招牌就算，影唔到個門口，因為有好多車泊晒喺出面嘛~~ 聽落好似好奇怪吧，上網search『海德堡之吻』 啦，應該會清楚d~~
而另一個出名嘅標誌就係隻馬騮仔，一陣會講點解佢咁出名。
鏡頭一轉，我哋就去咗行聖靈教堂﹝Heiliggeistirche﹞，唔洗錢入場，如果想上去教堂上面的話就要比錢，入到去記得唔好大聲講嘢，因為呢度嘅規矩係唔准講嘢！
﹝聖靈教堂外﹞
一入門口就見到有個女人坐咗喺counter，檯面仲有個錢箱，又話唔洗比錢嘅？唔好會錯意~~ 入聖靈教堂嘅地面嗰層參觀的話，真係唔洗比錢嘅，只不過如果你想上樓上睇嘢嘅話，就要比錢個女人，買番張飛先可以上去，我同老婆商量咗一陣之後，就決定行完地面呢層先再決定，如果呢一層都唔吸引，我哋就唔上去，行完之後，都覺得唔係太吸引，所以我哋無上到去。
由於我哋參觀嘅時候係無崇拜，所以成個教堂都好靜，只係有一班遊客四圍行吓睇吓咁lor~~
﹝聖靈教堂內﹞
出咗個教堂之後，我哋就搵咗個開揚嘅位影相，呢一個位好正，前面一大片空地，無嘢阻隔，最適合就係駁相，正！
﹝聖靈教堂一帶﹞
呢一帶內街嘅地方都睇咗好多嘞，都係時候出去條舊橋行吓同埋探吓隻馬騮仔，正當我哋向舊橋方向行嘅時候，我就見到有一個女人拉住部車仔，而車仔上就載住個小朋友，我覺得呢部車仔好得呀！又可以載人載貨，如果出街買嘢買多咗，可以叫個小朋友落車，甚至幫手拉埋一份都得tim~~ 我都好想知道呢一部車係自製定現貨買嘅呢？
﹝好實用嘅歐洲車……仔﹞
之前都講過，去海德堡就一定要行條舊橋﹝Alte Bruecke﹞，其實大家所見到嘅呢條橋已經唔再『舊』lu~~ 因為原本嘅舊橋係木造嘅，唔知喺邊一年，比人一把火燒咗，事隔又唔知幾年，政府終於起番條橋，不過就唔再係木造lu~~
講咁耐，究竟條舊橋係咩樣嘅呢？會唔會行過咗都唔知呢？基本上係唔會嘅，除非你有極嚴重嘅『日盲症』，又或者患上嚴重『發雞盲症』啦，否則真係無乜可能miss到lor~~ 咁大個橋頭建築物都睇唔到！唔係呀嘛~~
﹝海德堡舊橋橋頭﹞
呢條舊橋橫跨內卡河畔兩岸，行到去橋中心時，記得唔好錯過山頂嘅景點呀，山上面有一座古堡，叫做海德古堡﹝Schloss Heidelberg﹞，都有好多年嘅歷史，不過唔知去到邊一年就變咗做一間大學，咁究竟呢度係古堡定大學呢？
﹝海德堡古堡大學﹞
從網上資料所知，呢個古堡都好值得去參觀，可惜，我哋係跟團嘅，無時間上去睇……
去到呢一度嘅朋友請留意，呢條橋兩旁先係行人路，中間係馬路o黎嘅，所以唔好企正路中心影相，不過就算我提咗你，而你又記得都好，去到嗰度嘅時候，全世界人都唔會理，照行晒出馬路影相，而我親身所見就有一部車經過，縱使好多人阻住條路都好，個司機都好有耐性咁慢慢行，唔知下次你遇到嘅司機會唔會咁有耐性呢？
呢條橋有三個景點，第一個，橋頭建築物，已影！第二個，海德堡大學，已影！第三個，橋頭嘅馬騮仔，未影！
我好記得我哋領隊介紹呢隻馬騮仔時，叫我哋記得『捐』個頭入隻馬騮頭度，左手就摸住塊銅碟，我哋就問點解要咁樣做，佢就賣個關子唔講住，叫我哋照做無蝕底wor~~ 我相信我哋呢班團友都好聽話，應該有跟佢嘅說話去做。
之後，領隊就講番個原因比我哋知：
1﹞塞個頭入去隻馬騮度= I will be back
2﹞摸住隻銅碟= 財富
信不信就由你嘞！不過我就唔會信嘅。
﹝海德堡馬騮仔﹞
臨走前，比我發現到呢條舊橋嘅歷史，雖然我唔識德文，不過都影咗佢先，試吓用d人工智能嘅字典幫吓手先！
﹝舊橋歷史﹞
原文： 1284, 21. MAI ERSTE ERWAHNUNG EINER NECKARBRUCKE IN HEIDELBERG
翻譯： 1284 21 五月 第一 提 一 內卡橋 在 海德堡
原文： 13-18 JAHRHUNDERT HOLZBRUCKEN AUF STEINPFEILERN
翻譯： 13-18 世紀 木料道橋 作者 石柱
原文： MEHRFACH DURCH HOCHWASSER UND KRIEG ZERSTORT
翻譯： 多 按 防洪 與 太平洋戰爭 銷毀
原文： 1784, 27. FEBRUAR EISGANG MIT EXTREMER PEGELHOHE
翻譯： 1784, 27. 二月 冰 與 極端 高電平
原文： 1786-1788 WIEDERAUFBAU ALS STEINBRUCKE
翻譯： 1786-1788 重建 ?? 石橋
原文： DURCH MATTHIAS MAYER (+ 1791)
翻譯： 按 馬蒂亞斯 邁耶﹝+1791﹞
原文： DIE PLASTIKEN - ATHENE UND KURFURST KARL THEODOR
翻譯： 雕塑 - 雅典 與 大選帝侯號 卡爾 特奧多爾
原文： UMGEBEN VON FLUSSGOTTHEITEN-VON
翻譯： 包圍 作者 黃河神
原文： FRANZ KONRAD LINCK (1730-1793)
翻譯： 弗蘭茲 KONRAD LINCK (1730-1793)
原文： 1945, 29. MARZ SPRENGUNG ZWEIER PFEILER DURCH DIE WEHRMACHT
翻譯： 1945, 29. 三月 爆破 二 柱 按 “ 武警部隊
原文： 1946, 14. MAI BEGINN DES WIEDERAUFBAUS
翻譯： 1946, 14. 五月 年初 ” 重建
原文： DURCH RUDOLF STEINBACH (1903-1966)
翻譯： 按 魯道夫 施泰因巴赫 (1903-1966)
原文： 1947, 26. JUNI EINWEIHUNG DER WIEDER HERGESTELLTEN BRUCKE
翻譯： 1947, 26. 六月 就職 “ 稀土 製品 橋
當我上google search完之後，都覺得呢個人工智能字典都幾好用，呢條橋嘅故事可以簡單d講，1284年起呢條內卡橋係木造嘅，喺13-18世紀時，就因為天災同戰爭而銷毀，去到1786年，有人用咗3年時間重建呢條橋，去到1945年，又比人炸咗，之後，到1947年，就用稀土重建多次呢條橋直到今日。
原來，呢條橋係經歷咗咁多事先可以有今日…… 好啦，咁就駁張相比大家欣賞吓內卞河兩岸嘅景色啦！
﹝內卡河兩岸﹞
之後，我哋就夠鐘集合lu~~而海德堡之旅亦告一段落，下一站就係番酒店。沿路經過法蘭克福機場，一睇就知呢個機場唔掂啦，我哋行過都見到佢咁『頭痛』，入到去仲得了！
﹝令人『頭痛』嘅法蘭克福機場﹞
轉眼間就已經番到酒店，而今日嘅行程亦告一段落，『施於吐摩奴』！
﹝法蘭克福 Dorint Hotel & Resort﹞
留言列表
