2011 西歐8國之旅 part 7a ﹝法蘭克福 > 科隆 > 華倫丹 > 阿姆斯特丹﹞－松此放眼看世界

﹝2011年3月13日﹞

﹝法蘭克福 > 科隆 > 華倫丹> 阿姆斯特丹﹞

咁多位早晨，今朝早係一個令人期待嘅早上，點解？因為前一晚領隊同我哋講咗兩樣嘢，

1) 酒店大堂有電腦用，唔洗錢上網；

2) 早餐極豐富，要預多少少時間食。

所以，我哋都早咗少少落去，一去到大堂，就見到部電腦無人用wor，咁我哋就當然唔會放過呢個機會啦，但係用用吓就發現有d唔妥，個keyboard好似同我哋用開嘅有d唔同嘅，但係睇落又好似樣wor~~ 當我認真少少去睇呢個keyboard時就發現到，個『Y』同『Z』係調轉咗，仲有咩唔同？自己去發現吓啦~~

﹝歐洲版keyboard﹞

玩完電腦之後，就當然要去睇吓呢度嘅早餐有幾『豐富』。領隊話，之前嘅早餐，通常攞咗一兩轉嘢食就唔會再行，頂多行夠三轉，但係呢度係好吸引大家不斷咁食，因為呢度嘅選擇實在係好多好新鮮，而且地方好乾淨好光猛，睇見都好想食呀！

﹝早餐大晒冷﹞

呢一次嘅早餐，絕對係咁多次去旅行當中最好嘅一次，平時嘅我，攞兩次嘢食就算數，但係今次，我記得好似行咗起碼四次！

食完一個極豐富極飽嘅早餐之後，就係時候集合，坦白講，我仲想繼續食。跟住我哋會去科隆大教堂參觀，食埋個lunch之後就會離開德國，向荷蘭進發。噢……玩咗咁多日都係好天，到今日，大家都做咗貴人，落過雨之餘，而且個天都仲係好黑，唔知去到科隆係咩天氣呢~~

﹝唔好天嘅一日﹞

一如以往，坐車就唔一定要瞓覺嘅，我哋會不斷咁影相，今次就影到一幢直角形嘅大廈。

﹝直角形嘅大廈 ﹞

坐咗唔知幾耐車之後，終於到達科隆，落車時已經無落雨，只係個天仲係陰陰地，雲層好厚，唔緊要啦，無雨落已經 very good 啦~~

行到去附近就見到部『火車』，其實佢係一部觀光車，相信比咗錢之後，佢會有人沿途講解一下科隆一帶嘅景點。

﹝科隆『火車』﹞

再行前多兩步，就見到科隆大教堂，未o黎呢度之前，已經知道佢係全球數一數二嘅大教堂，但係當我親眼見到佢時，我就覺得佢好污糟，可能佢個design比較『岩蠶』，d窿位就裝晒塵，再加上落過雨，搞到成個教堂都黑晒，所以我覺得佢似『印堂發黑』多d。

﹝『印堂發黑』嘅科隆大教堂﹞

喺度，我想同大家分享一下同科隆大教堂合照嘅心得，如果你部相機好似我嗰部咁，唔夠wide的話，咁就要整番張低炒相，幸好，呢度一帶都有一d唔太高嘅柱仔，大家可以借o黎企下，而攝影師就唔該踎一踎，相信應該可以影得晒成個科隆大教堂。

不過有一樣嘢我就真係唔識影，希望有高人可以指教吓。一個魚肚白嘅天，加上一個『印堂發黑』嘅科隆，仲要影埋自己；點樣先可以個天唔over，科隆唔會黑媽媽，而個人又唔會黑沉沉呢？一部傻瓜機真係可以做到？其實，我已經有答案……約個好天嘅日子再影過！

擾攘咗一輪之後，終於可以入去科隆大教堂裡面嘞，入到去嘅時候就發現好多人，原來大半個禮堂都比佢block咗o黎做崇拜定祈禱，有幾個著住紅袍嘅神職人員守住主要通道，如果唔係入去守禮拜的話，佢哋係唔會比你入去嘅，所以，我哋只係影咗幾張相就走，最吸引嘅就係教堂嘅玻璃窗。

﹝科隆教堂內嘅玻璃窗﹞

下圖就係科隆大教堂嘅內部，大部份人都係被阻隔於『禁區』前。

﹝科隆教堂內﹞

臨離開之前，駁番張相先，呢張相可以清楚咁睇到科隆大教堂個印堂有幾黑，而且仲可以見到我之前所講嘅柱仔，好多人都會企上去影相啊！

﹝科隆教堂﹞

行完教堂之後就去食飯，其實呢一帶都係熱門嘅旅遊區，人多車多不在話下，仲要係大大部嘅旅遊巴，而一部咁豪華嘅車我又點會放過呢？影佢不特只，仲要用埋佢塊車頭玻璃o黎自拍，一舉兩得，正！

食過lunch後就繼續上路，上車無幾耐，就發現d雲開始散開，可以見到個藍天lu~~ 真開心，感謝主！

﹝開始天晴，往荷蘭去！﹞

其實，我兩公婆真係幾鐘意一路坐車一路影相，因為沿路所見嘅嘢，全部都係去旅行嘅bonus，一花一草都好，都係景點以外嘅收穫。我點解咁講呢，係因為好多時喺電視睇到嘅旅遊特輯，都會講好多跟團以外嘅所見所聞，對於我哋呢d跟慣團嘅人o黎講，有幾多真係自己能夠親身經歷呢？莫講話親身嘗試，能夠見到都已經好好嘞！

而今次所見到嘅就係旅行車。可能大家會覺得無乜特別，但係對於我o黎講就幾特別；我曾經睇過一個節目，叫『80後環遊世界』，係由兩個韓國人做嘅，有一輯係講美國遊，佢哋就係坐住一部旅行車穿州過省，一切起居飲食都同部車有關，食啦，瞓啦，休息啦，全部都喺部車度搞掂，但係部車都要『食』吧，而佢哋好雞手鴨腳咁同部車入油嘅一幕，我依然記得好清楚。

而下圖呢一部車吸引我嘅，就係同部車叉電嘅兩夫婦，我唔知道佢哋係咪放緊假四周圍玩，我所睇到嘅就係兩公婆一齊去完成一件事，係何等嘅美麗！

﹝叉電中嘅兩夫婦﹞