松此放眼看世界

﹝2011年3月10日﹞

﹝威尼斯 > 米蘭﹞

今日係成個行程中嘅第4日，我哋仍然身處意大利，今日嘅安排係由酒店出發去水都威尼斯﹝Venezia﹞，團友們可以自己比錢玩貢多拉，喺威尼斯大小河道﹝坑渠？﹞中間穿插，欣賞兩岸嘅景色，仲有地道意大利船伕唱歌仔比你聽；之後我哋就會向意大利北部嘅米蘭進發，我哋會參觀全意大利最大嘅教堂 -- 米蘭大教堂﹝Duomo﹞，又或者叫多奧莫大教堂，順便會睇埋佢隔離個艾曼妞二世拱廊﹝Galleria Vittorio Emanuele II﹞；之後就會入住米蘭嘅 Holiday Inn，今日嘅行程唔急趕。

今日嘅我，仍然係時差中，不過就比之前一兩日好，精神好番 dd，可惜仲未可以早到少少起身喺酒店附近行吓。起身之後拉開窗簾，嘩~~ 天色唔係好掂，霧氣同煙霞都好勁，今日唔會落雨吧。

﹝天色唔太好嘅第4日﹞

我哋準時去到餐廳食早餐，典型西式早餐，無乜特別，不過就發生咗一件意外，幾乎令到呢個trip蒙上污點……

﹝食早餐中……意外發生前……﹞

個意外就係跌爛咗部相機！完全係我嘅疏忽，只可以怪自己唔小心 lor~~ 平時我係會將部相機放檯面，影完相就照舊放番檯面，如果出去攞嘢食時，我就會將部相機掛頸，番到埋檯之後就會放番喺檯面。點知今次影完相之後，我就放咗部相機喺自己大肶上個袋面度，無掛到上頸，一起身，部相機就由4呎嘅高空直衝地面，誓要同個地面鬥硬，結果我部相機輸咗……

一見到部相機『打敗仗』，我就即刻執番佢上嚟檢查吓，幸好，仲影到相，而且影完都仲睇得番，亦即係話，今次嘅意外就只係機身損毀，無傷及影相功能，不幸中之大幸。個機身嘅觀景器外殼裂咗同移咗位，有部份連接位被扯開咗少少，機身內置閃光燈用完之後冚得唔好，要冚多幾次先冚得實。

有團友安慰我話唔緊要啦，番香港可以 claim番嘛~~ 我都知可以 claim番，只不過……如果部相機呢一刻已經壞咗，function唔到，咁我餘下嘅行程咪只有老婆部相機可以用，兩個人用一部機，唔掂 wor~~ 再唔係就搵個地方買過部相機，即係焗住買部水貨機番香港，有乜頭暈身慶又係煩。

﹝受了傷的相機 >.<”﹞

又係時候離開酒店 lu，呢一間就係我哋住咗一晚嘅四星級酒店。

﹝值四星嘅 Antony Hotel﹞

我哋第一站係去碼頭，點解去碼頭？威尼斯有水都之稱嘛，唔搭船去，仲可以搭乜？沿途我哋經過一條橋，從橋望出去，見到個海面有一d海藻類同埋d竹欄嘅嘢，唔知佢哋係養蠔定養海膽呢？

﹝養蠔定養海膽呢？﹞

落車嘅時候，我都唔知自己身處何方，只知道企咗一陣間，就有個意大利人走過嚟，導遊同我哋就跟住佢行，之後，導遊話一定要等到個接頭人先得，如果唔係，去到碼頭都唔知邊隻船先至啱 wor~~

喺等個意大利人時，我凍到『滕滕震』，二話不說，圍番頸巾，拉埋件褸，收埋對手先，真係好凍啊~~

﹝好……凍……呀……﹞

行咗大約5分鐘左右，我哋就已經去到碼頭一帶，有好多船泊晒喺度，個意大利人叫我哋等一等，佢就去搵船，我哋無嘢好做，咁就當然係影相啦~~

﹝等船中……﹞

我哋成團得10個人，唔知會唔會比我哋包船呢？食懵咗咩，包船，搵個位坐埋一二角啦！

﹝已經坐埋一二角﹞

當我哋上咗船後，我哋就佔據咗個船頭位置，兩排對坐嘅位置都幾迫吓，我同坐我對面嘅呀政講，如果再多d人，我哋一定『問你點頂』呀，因為我哋兩個再比人迫埋d的話，我哋就會膝頭撞膝頭，話口未完，成個船頭位置就已經『淪陷』於一批大陸人手上，而我同呀政就……『問你點頂』 lor~~

由於﹝相信都係吧~~﹞成架船都係華人，而國內同胞亦佔大多數，所以沿途都係用普通話講解，而我d普通話就比普通更普通，所以都無留心聽佢講解d乜，同老婆同d團友傾吓計咁 lor~~而d國內同胞就吹水嘅吹水，聽講解就聽講解；其中有一個國內同胞竟然叫我哋靜d，唔好嘈住佢聽講解 wor~~唔係呀 fa！我哋嘈！

我哋已經無say聽一d我哋明白嘅說話去講解沿途風景，又比佢哋迫到我哋『瑟縮一角』，講大聲又唔夠佢哋大聲，講嘈，就更加唔夠佢哋嘈啦！成個船艙都充滿普通話，唔係連少少容人之量都無呀！我哋當然無出聲啦，我哋嘅回應就係影張相先，『yeah！』，我哋其中兩位團友已經比佢哋嘈到反晒眼 @@

﹝已『淪陷』嘅船頭位置，yeah~~﹞

沿途兩岸嘅風景都幾靚o架，好多好有歐洲風格嘅建築物，只不過比人咁樣『gut』咗嘢之後，都無乜心機去聽吓d普通話講解。

﹝沿途兩岸嘅建築物﹞

都唔記得坐咗幾耐船 lu~~總之上咗岸之後，我哋就向碼頭嘅左手邊行，行一段路仔就要上橋，上完橋之後又行一段路，又再上多次橋，好似好煩咁，但係呢d就係威尼斯嘅特色，話晒都係好出名嘅水都，d水道就當然係阡陌縱橫啦！

﹝碼頭一帶嘅建築物﹞

唉~~不經不覺~~

唉~~又行到~~

唉~~一個叫~~

唉~~嘆息橋~~

唉~~嘅地方~~

唉~~唉~~唉~~唉~~唉~~唉~~唉~~唉~~

我做乜要唉聲嘆氣呢，無錯，就係要應景！我背後呢條就係威尼斯一條好出名嘅橋，佢叫做嘆息橋﹝Ponte dei Sospiri﹞。嘆息橋嘅來由係因為古時嘅犯人，聽審及判刑後，就由總督府經過呢條橋就走向死牢，而呢條密封嘅橋上面有幾個窗口仔，亦都係囚犯們能夠望多威尼斯最後一眼，之後就不禁長嘆，唉~~來生再見吧~~

﹝唉~~嘆息橋~~唉~~﹞

過咗嘆息橋之後，我哋就到達咗一個叫雄獅小廣場﹝Piazzetta﹞嘅地方，穿過呢個廣場轉左，就係聖馬可廣場﹝Piazza di San Marco﹞，聖馬可廣場有兩個必睇嘅景點 – 鐘樓﹝Campanile﹞同埋聖馬可大教堂﹝Basilica di San Marco﹞。

其實，一行到個小雄獅廣場就一定見到呢個鐘樓，無可能見唔到呢！

﹝鐘樓﹞

聖馬可廣場旁邊有好多間露天咖啡茶座，有時間嘅嘅話，我都好想嘆吓咖啡，hea番一陣都好吖~~而呢個廣場亦有好多『轟炸機』，不過呢度嘅『轟炸機』就無梵諦岡嗰d咁勁，呢度d雀都係地下搵食吧~~下圖係一個好好嘅例證，引雀係唔洗用嘢食，就咁行過就已經有堆『轟炸機』做你跟班。

﹝『轟炸機』@聖馬可廣場﹞

一路以嚟，我所形容嘅『轟炸機』即係白鴿，不過今次嚟到呢個廣場，我發現有d『混水摸魚』嘅轟炸機。

﹝混水摸魚『轟炸機』﹞

去威尼斯當然唔係睇雀啦，仲有咩睇？睇 part b啦~~