﹝2011年3月9日﹞
﹝羅馬 > 佛羅倫斯 > 比薩 > 威尼斯﹞
OK，食飽飽後，又係時候出發去比薩嘞，離開前，都要同呢間酒店留個念先，從外觀所見，真係唔似酒店wor~~
﹝食午飯嘅Delta Hotel﹞
坐大約一個鐘頭車就去到比薩﹝Pisa﹞，呢個比薩都好巴閉㗎，外來車一律唔准入去，要坐車，就坐佢哋d巴士，如果唔係就自己行入去啦！對於我嚟講又無乜問題wor，反正都係行20分鐘左右，不過，跟團就一定唔會要我哋咁『辛苦』啦，我哋係坐當地嘅巴士去睇比薩斜塔，每位 €1，團費已包！
﹝等巴士中﹞
由上車到落車都只不過係5分鐘，當日我哋上車時都算多人，有部份人要企位tim~~ 我哋就搵到兩個位坐，呵呵~~
﹝在巴士上﹞
由於落車地點並唔係比薩斜塔隔離，所以，我哋落車後仲要行多一段路先到。呢段路都有好多路邊舖仔賣手信，都係一d鎖匙扣同埋d小擺設，間間舖所賣嘅嘢同價錢都差不多，比較特別d嘅，就會賣酒、賣圍裙、賣口水肩咁lor~~
穿過d小舖頭之後，就會見到一個城牆，城牆入面就係好出名嘅比薩斜塔﹝Torre Pendente﹞。從個城門口入去，一大片草地就出現喺你眼前，再望遠少少就見到比薩斜塔。
﹝比薩斜塔﹞
當大家步入呢個城牆內時，左手邊嘅景色當然吸引啦，話晒都有個比薩斜塔撐吓場嘛~~ 而右手邊就係一排嘅手信店，呢度所賣嘅手信同出面都係差不多，不過佢哋有個共通點 – 唔同你講價！
我係鐘意儲鎖匙扣嘅，所以我就喺下圖所見嘅其中一檔買咗幾個，不過就買貴咗，只可以怪自己無睇清楚佢個價錢，因為佢哋每一檔個價錢牌都有唔同嘅 display，就好似『€5 for 3』、『1 for €2』、『€2/1』、『1/€2』咁，可能見得太多又比佢混亂咗，由於之前有個檔仔係寫住1for €1，而呢一檔個display係乜我就唔係好記得，總之一見到我就 assume係€1一個，最後，我哋就用咗€4買咗兩個鎖匙扣！唔怪得任何人，只可以怪自己，唉……
﹝比薩斜塔旁嘅手信店﹞
算啦，少少唔開心係唔會影響到我哋繼續 enjoy呢個 trip嘅！你睇，一個咁好嘅天氣，一個咁好嘅背景，再加埋個咁好嘅老婆，乜都唔記得晒lu~~
﹝藍天白雲@比薩斜塔﹞
嚟到比薩斜塔，點都要擺番d無聊『甫士』同個斜塔影番張相嘅，喺呢度，係可以見到好多人同你一齊無聊，所以唔洗介意咁多，想點影就點影啦！我哋都係影番 d standard嘅無聊相，就好似托住佢呀，頂住佢呀咁 lor~~ 不過，不得不讚吓團友呀彬同埋 cookie，佢哋真係好諗頭，下圖就係佢兩個合作影嘅相，成個塔都比你捉實，勁！
﹝好特別嘅比薩斜塔『無聊』相，多謝團友呀彬提供相片﹞
可能大家都會問：可唔可以上個塔度呢？答案係可以嘅，歐洲人又點會放過任何一個搵錢機會呢！我哋就無上到去，又係嗰句：跟團嘛，邊有咁多時間呢~~不過我上網搵資料時就發現，入場費好似係€17，仲要排隊，入去之後係要行樓梯上去嘅，都唔係太高……7層吧~~貼錢買難受？你去啦，唔好預我！
根據資料所得，上到塔頂，除咗睇吓鐘樓個鐘同埋睇吓個比薩市外，真係無乜吸引，值唔值得上去，就見人見智嘞。
既然唔上個塔，我哋就做番個遊客應做嘅嘢 -- 『悠悠閒，四圍行』！我哋就行咗去d手信店附近，點知比我哋搵到一部極鬼祟嘅錢幣壓印機，只要大家沿住右手邊d檔仔一直行，行到差不多最尾，喺一幢建築物前，有一部大約6呎高嘅機喺度，驟眼一睇，似係一部 touch screen嘅 information centre咁樣，我哋就係好奇先至行過去，點知一睇先發覺係部錢幣壓印機！
咁難得搵到佢，當然要整番個銀仔先啦，整完個銀仔之後，發覺個銀仔好多塵，相信係呢部機太鬼祟，無乜人知道，好耐都未做過生意而積晒塵吧~~
之後，我哋就行咗去比薩斜塔隔離嘅主教堂﹝Duomo﹞，有好多人坐咗喺度休息，又有一d人攤咗喺度曬太陽，好relax好有渡假feel~~
﹝比薩斜塔旁嘅主教堂﹞
呢個教堂個外貌好靚，如果你留心d睇，就會發現佢d圓拱位、柱身同埋每一層嘅小騎樓嘅雕功都好細緻；而正門就有三對青銅做嘅門，中間對門最大，有一班人圍住佢喺度指手劃腳，既然唔知有乜好睇，咁繼續行啦！
從主教堂向番個城門口行，就會見到一個圓柱型嘅建築物，佢就係洗禮堂﹝Battistero﹞，呢個洗禮堂又係唔知有乜好睇，所以淨係影張相就算。
﹝企喺洗禮堂前面影番個主教堂先~~﹞
行到呢一度，都差不多要走嘞，總括嚟講，呢個比薩區可以分為5樣嘢：
1) 手信 / 紀念品店
2) 比薩斜塔
3) 主教堂
4) 洗禮堂
5) 神蹟廣場
最吸引我嘅係比薩斜塔同埋個神蹟廣場，神蹟廣場就係一入呢度就見到嘅草地。呢度d草應該係有人打理嘅，因為呢度個個人都可以行上個草地都得，要行要跑要跳要瞓，悉隨尊便。
﹝悉隨尊便嘅神蹟廣場﹞
我企咗喺個神蹟廣場一陣，研究吓點解呢度會叫做神蹟廣場，終於比我諗到！
第一，呢度d草成日比人踩比車行都仲可以keep得咁青綠，仲唔係神蹟？
第二，部垃圾車咁樣行都唔會車親人，甚至車死人，仲唔係神蹟？
哈哈~~純屬個人吹水意見，唔好當真！
﹝充滿神蹟嘅神蹟廣場﹞
坦白講，如果有時間，我都好想攤喺呢度曬吓太陽，享受吓陽光，好 relax好寧靜咁享受一個下午，都不知幾正呀！
又係時候行到去門口lu~~ 亦都係時候同比薩講聲 bye bye，我問老婆，呢個比薩有乜好睇，佢就擺咗一個 post話比我知：一眼睇晒！
﹝神蹟廣場 + 洗禮堂 + 主教堂 + 比薩斜塔 1﹞
睇得唔清楚？唔緊要，下面呢張應該清楚好多！
﹝神蹟廣場 + 洗禮堂 + 主教堂 + 比薩斜塔 2﹞
之前講過話沿住比薩城牆外圍係有好多紀念品舖仔嘅，下圖就係佢哋其中一部份，通常都係賣比薩 oriented嘅小擺設，亦都有部份係賣衫賣口水肩賣 lace嘅。
﹝比薩城牆外圍紀念品舖仔﹞
如果嫌城牆一帶嘅舖仔搞到你花多眼亂的話，出到嚟巴士站附近之後就繼續亂啦！行完呢個比薩區之後，已經可以好肯定咁講，比薩一帶係遊客專區，專『打刧』遊客嘅觀光點，去到邊都好，d意大利人都會用盡方法去搵遊客錢。
﹝比薩巴士站一帶都仲有紀念品舖仔﹞
由於領隊一早已經講好咗，佢帶咗我哋去比薩斜塔之後，就要喺指定時間出番巴士站集合，而我哋兩個就唔知邊個彎位行錯路，不過都無問題，我哋已經預鬆咗少少時間出嚟，最後都可以喺指定時間集合到。
等齊人之後，就上巴士出番去出面個車站上旅遊巴，見到兩部麥當奴觀光車泊咗喺路邊，唔見有人排隊wor，唔知點樣先可以搭佢呢？會唔會比錢上車之後，架車就帶d遊客喺比薩市行個圈，之後就送番d老麥 coupon呢？
﹝麥當奴觀光車@比薩巴士站﹞
下一個目的地就係去威尼斯，無咁快去玩貢多拉，聽日先啦~~ 我哋呢一程比較遠，由日光白白坐到黑晒天，目的地就係番酒店食飯！
有無人估到下圖係咩嚟？提示，同今次個旅行完全無關嘅。…………開估，係我條電話繩！幾年前去韓國時，我當手信買咗呢條電話繩，一路用都家下，條繩都無斷到，勁呀！
咁我又做乜要影呢張相呢？其實，我係想話比大家知道，呢個歐洲之旅係會穿越好多條隧道，齋講無用，所以就用我條電話繩做 model，等大家都知道我哋行緊過隧道嘛~~
﹝穿越隧道中……﹞
不經不覺間，我哋已經由中午行到差不多黃昏，途中我哋見到一個山頭，仲有些少積雪，可見，歐洲嘅冬天仍然未過去，亦不其然咁令我幻想一下瑞士鐵力士山係點樣嘅呢？由於我哋兩個係未上過雪山，所以當我哋見到呢個山頭d雪時，就已經好興奮，仲話『唔知雪山有無 xxx呢？』，『唔知喺雪山會唔會見到 xxx呢？』，『上到去嘅時候，唔知個雪山仲有無雪呢？』哈哈~~~
﹝途中見到嘅雪山﹞
當我哋行到天都黑晒時，個司機駛咗去一個停車場咁樣嘅地方，咁佢做咩要嚟呢度呢？原來佢係要買類似路票嘅嘢，當我哋聽朝入境威尼斯時，就要用呢張路票嘞。而領隊就話，今晚買定會好d，因為今晚唔會再有行程，所以用多少少時間都無乜所謂，而且如果聽日先嚟買的話，我哋就要行回頭路，行程安排上會有d影響。
不過好奇怪，個司機落咗車都好耐吓，隔離遲嚟部車都開走埋，而佢就仲未搞得掂，都唔知佢搞邊科@@ 等緊佢嘅時候無嘢做，咁就影佢個背影比大家睇吓啦，佢好 cool 㗎，唔多講嘢唔識笑，從背後睇，加埋件大褸，真係好有深山大野人 feel~~
﹝我哋嘅意大利籍深山大野人司機﹞
搞咗一輪之後，終於搞掂個路票，我哋就可以繼續向酒店進發。
今次間酒店叫 Antony Hotel，無乜特別，無乜驚喜，不過夜晚嗰餐就食咗個超硬嘅豬仔包，亦都係我第一次用油醋去點麵包，原來都幾好味㗎，個包都顯得無咁硬。
﹝好硬嘅硬豬﹞
食飽飽之後就番上房，執拾一下之後，又係時候休息，聽日再講！同場加影酒店廁所一個。
﹝有 bidet嘅廁所﹞
留言列表
