﹝2011年3月9日﹞
﹝羅馬 > 佛羅倫斯 > 比薩 > 威尼斯﹞
咁多位早晨，今日行程普通緊湊，食飽早餐後，就由羅馬出發去佛羅倫斯﹝又或者叫做翡冷翠﹞嘅米高安哲奴廣場，從高地睇吓佛羅倫斯市，之後就去意大利另一個名勝 – 比薩斜塔，睇完之後，就會入住威尼斯嘅 Antony Hotel，行程大致上係咁，詳情慢慢再講。
今朝起身，依然係未瞓醒，無計啦！仲係時差中，明明瞓得都算多，而且一覺到天光，但係個樣依然呃唔到人……應該係未食嘢吧，等我食埋個早餐先啦，個樣一定精神好多。
﹝睡眼惺忪的我……﹞
食完早餐之後嘅節目唔係即刻上車，而係出去酒店門口同間酒店影番張相，由於我哋遲咗少少，所以影相嘅時候，又比領隊『咆哮』我哋，你睇，我哋其中一個團友被『咆哮』後，即刻雞咁腳跑番上車，哈哈~~
為免大家誤會，我哋個領隊 – 唐唐，係好好人嘅，一d都唔惡，只不過，有時要『鞭策』吓我哋先至會咆哮啫，當然啦，咆哮我哋一定會接受，做法當然係依舊啦！
﹝Idea Hotel 門外﹞
上車後，領隊就同我哋講解一下意大利歷史呀，佛羅倫斯有乜出名呀，米高安哲奴又係邊個呀……我當然唔會留心聽啦，反正聽完都係水過鴨背，所以我就專心影相，你睇，晨霧都仲未散晒o架！
﹝晨霧仍未散去﹞
途中，我哋見到一部歐洲之星，佢速度真係好快，我哋影咗好多次都影唔到佢車頭，當然唔係快到無影啦，而係我哋專心影風景，所以無留意佢嘅出現，一見到嘅時候，就只係影到佢個車身。
﹝歐洲之星﹞
由酒店去米高安哲奴廣場比較遠，所以我哋會停一停休息站，去到休息站，除咗休息同去廁所之外，更重要嘅事情就係買手信！相信呢間 Autogrill喺歐洲都係一間幾大嘅公司，因為好多地方都見到佢。
﹝中途休息站 -- Autogrill﹞
上到去休息站，當然係四出『搜括』新奇又好玩嘅嘢啦，既然比我哋『搜括』到，又點會唔影相呢？不過，我要提吓大家，大部份嘅休息站職員通常都會唔准你影相嘅，不過佢講完就算，只要佢睇唔到，你就可以……咩啦，醒少少，唔該！
﹝好多朱古力嘅休息站﹞
Kinder係一款我都幾鐘意食嘅朱古力，一見到歐洲版50cm長嘅Kinder時，我簡直係兩眼發青光，同佢影完相後，我當然要幫佢辦理『移民手續』番香港啦~~
﹝50cm長嘅Kinder﹞
我都知實有人問『50cm即係有幾長呀？』，好一個勁深奧嘅問題，50cm即係大約有兩枝半雀巢大紅袍烏龍茶咁高lor~~
番到香港之後我先知道，原來佢只係用一個50cm嘅外殼，包住三包Kinder吧~~味道無咩唔同，食晒d朱古力後，呢個包裝就成為我嘅裝飾品！
﹝實物比例下嘅50cm Kinder﹞
上番車之後，再坐多無幾耐，我哋就去到佛羅倫斯嘅米高安哲奴廣場﹝Piazzale Michelangelo﹞，呢度係我哋喺佛羅倫斯唯一嘅景點，你可以話係景點又得，係休息站亦得，反正都係順路停一停，比大家落車行吓街睇吓景影吓相吧~~
﹝從米高安哲奴廣場見到嘅佛羅倫斯﹞
上圖所見到嘅就係佛羅倫斯嘅老橋﹝Ponte Vecchia﹞，我去人哋嘅blog搵資料時，好多人都會行呢條橋，而我亦assume我哋都會行嘅，可惜，遠眺算吧~~
呢個廣場係喺個山上面，所以觀景都比較開揚，而去到呢個廣場，就一定見到對面圓拱頂嘅聖母百花大教堂﹝S. Maria del Fiore﹞。
﹝聖母百花大教堂﹞
其實呢個廣場真係無乜嘢好行，除咗有幾間舖頭仔賣吓紀念品外，就係睇景同埋睇廣場中間嗰個米高安哲奴銅像。
﹝米高安哲奴銅像﹞
其實呢個米高安哲奴銅像都幾污糟，周圍都係黑色一撻撻，所以同佢影番張背光相，再加多個太陽冠冕比佢靚仔一下先~~
至於廣場同佛羅倫斯中間條河叫咩名呢？佢叫做阿諾河﹝Fiume Arno﹞，如果可以坐船仔的話，沿住呢條河一路向左邊走，係可以去到比薩一帶嘅，不過，千祈唔好問我要坐幾耐，我都係純粹喺google map睇到吧~~ 而且我相信，阿諾河係無渡輪服務嘅。
﹝分隔佛羅倫斯嘅阿諾河﹞
喺個廣場逗留咗一陣之後，我哋就要上車向另一個景點出發 – 食午飯！上車前，我哋部車就停正喺一個巴士站前，從相中可見，呢個應該係觀光巴士站，不過已經封咗lu~~
﹝米高安哲奴廣場觀光巴士站﹞
大家請睇清楚，想去比薩就跟住條河去啦，哈哈~~
﹝沿阿諾河左行，係可以去到比薩嘅！﹞
今次嘅午餐，係去一間叫Delta Hotel嘅地方食意大利粉，沿途見到一個小型飛機場，講得小型就梗係比小型飛機升降啦，唔通整部大型民航機喺公路旁邊咩！
相信大家都認同我呢句說話吧，不過呢句說話喺幾日後就唔能夠成立嘞，點解，因為我哋真係見到有架大飛機，喺我哋頭頂嘅天橋行過lor~~
﹝公路旁邊嘅小型飛機場﹞
差不多到酒店時，我哋見到路中心有個大木轆，當然佢碩大嘅『身軀』固然吸引我哋，只不過佢嘅支撐點係點樣『十卜』到佢呢？打大風嘅時候，佢真係可以企得穩？呢個問題亦都係佢吸引我嘅地方。
﹝路中心嘅大木轆﹞
終於有飯食啦~~~ 今次嘅午餐好豐富﹝我覺得﹞，有麵包、有湯、有pizza、有意粉、有雞扒薯角同埋紅酒，都不知幾豐富呀！由於今餐係食茄汁意粉，而老婆係唔食茄汁嘅，所以一早就同領隊講定要安排轉第二樣意炒，結果，就轉咗一款少少辣嘅傳統意粉。
﹝一張相已經包括咗紅酒、pizza、意粉同麵包﹞
喺度食飯都幾好吖，d意粉係即炒比我哋嘅，所以每人都分到一碟，可能真係幾好味嘅關係，所以男子組好快就食完一碟，個waiter就問我哋洗唔洗加意粉，有兩團友要加，而我就唔加，因為我知道老婆應該食唔晒佢自己個portion，我會食埋佢嗰份，而且，個waiter都係隨手夾一個portion比我哋，結果佢兩個第二份嘅portion比第一份更多。
﹝帶少少辣嘅傳統意粉﹞
呢份就係食完意粉之後嘅主菜 – 雞扒拼薯角。
﹝雞扒拼薯角﹞
食飽飽，有咩好做呢？最好就係四周圍影相，影吓杯影吓碟影吓個餐廳，總之乜都影一餐啦，最後，就捉咗個waiter做『人肉佈景板』，個個團友都走去同佢影相，可惜，我去咗廁所，無同呢個意大利人影相tim~~
﹝老婆同個意大利waiter合照﹞
Ok，講住咁多先，飯後行程去比薩，請留意 part 3b啦~~
留言列表
