﹝2011年3月8日﹞
﹝倫敦 > 羅馬 > 梵諦岡 > 鬥獸場 > 君士坦丁凱旋門 > 許願池﹞
快快手手寫好 & 寄咗 postcard 後，我哋就會去羅馬好出名嘅名勝 -- 鬥獸場 (Colosseo)，君士坦丁凱旋門 (Arco di Constantino) 同埋許願池 (Fontana di Trevi)，相信去得羅馬都一定會去嘅。
行咗唔係好耐，我哋就喺一條橫街落車，喺路口附近嘅地方，竟然比我見到我做緊嗰間公司嘅羅馬分公司，呢個世界真係細。
過埋馬路之後，就已經去到鬥獸場，而君士坦丁凱旋門就喺佢側邊，想一次過影晒兩個景點的話，就要行去君士坦丁凱旋門嗰邊，就好似我咁lor~~
﹝鬥獸場 & 君士坦丁凱旋門﹞
嚟到鬥獸場 (Colosseo) 時，大家要小心d，唔好比機會人哋『打刧』，除非你想啦~~
下圖正中央有一班人企咗喺度，佢哋圍住幾個著住羅馬鬥士服飾嘅人，呢班羅馬鬥士有固定『地盤』，亦都會四出『暸』人同佢哋影相，目的係想『打刧』遊客，不過放心，佢哋應該唔會真係打你刧，只不過影完相之後就會同你收錢，至於要幾多錢，咁就隨佢講，佢哋嘅做法同真係打刧又有乜分別呢？
所以，如果你真係想同佢哋合照的話，最好就講好價先影，否則，有排都甩唔到身呀！
﹝鬥獸場外會有人打刧o架！﹞
睇唔清楚？唔緊要，close up少少比你睇吓啦！
﹝『刧匪』@鬥獸場外﹞
我哋只係喺個外圍行吓睇吓咁，無入到去鬥獸場入面，唔係我哋唔肯比錢入去睇，而係唔夠時間，唉~~ 無法啦，跟團就係咁，好多嘢都唔到自己話事，唔緊要啦，上網睇人哋d相都知道個鬥獸場內係咩樣。
唔知大家有無留意到個鬥獸場外牆呢，點解有咁多癃嘅？如果我無記錯的話，d癃係之前嘅窗花或者欄杆嚟嘅，並唔係咩嘢子彈癃。據講，呢個鬥獸場以前係會養定d猛獸，隨時放出嚟同人打鬥，以娛樂當時嘅羅馬人，所以就要用d鐵欄『wun』住d猛獸lor~~ 其實呢d咁血腥咁殘忍嘅安排，又點可以成為一種『娛樂』呢？
逗留咗大約半個鐘左右，都係時候要集合嘞，等緊團友時，我哋又搵嘢影，結果老婆話要做『清潔工人』wor~~
﹝港產意大利『清潔工人』﹞
﹝君士坦丁凱旋門 + 鬥獸場﹞
等齊人後，我哋就向下一個景點出發 – 許願池﹝Fontana di Trevi﹞，羅馬境內最大最出名嘅噴泉。
途中，見到一個好搞笑嘅拱門，如果用個keyboard整番個樣出嚟 --> 『|| ^ñ^』，你話似唔似呢？哈哈~~
﹝|| ^ñ^﹞
去許願池同去梵諦岡一樣，唔可以直接去到，個司機要喺個比較遠嘅地方放低我哋，行大約20分鐘同埋行條斜路先至去到，領隊話試過帶一團，有老人家嘅，行到半路已經比人『炳』，話呢d咁辛苦嘅行程係唔應該安排比老人家，最弊嘅係，未去到前，個個都話要去許個願先得，如果唔係，點算去過羅馬呀！不過，行多兩步就即刻轉駄，超無奈呀！
落車無幾耐，就見到一條疑似『隧道』嘅物體，可能啱啱去完倫敦，我覺得係地鐵嘅出入口，不過，睇見佢燈都唔多盞，應該係公廁吧；全部錯晒！原來係行人隧道！唔係fa~~ 燈都唔多盞，行入去比人劏死牛都似！
上網查過字典，意大利文翻譯成中文：
Sottopassaggio = 地下通道，Pedonale = 行人。
﹝Sottopassaggio Pedonale = 行人地下通道﹞
既然要行20分鐘嘅路，咁就一定要過唔少馬路啦，但係過歐洲嘅馬路係同香港嘅唔同，係咪以為綠公仔一定行得，原來當紅燈著咗嘅時候，d車係可以轉右而唔洗停車！有團友過咗一半就企咗喺個小小安全島影相，跟住個領隊就喺對面馬路咆哮過嚟，叫我哋唔好喺馬路中心影相，因為d車會照轉右，一個唔覺意就會『辣』低我哋，好危險wor~~ 比人鬧wor，仲唔雞咁腳走咩~~
﹝過歐洲馬路初體驗﹞
行多一陣，我哋就到達許願池，嚟呢度嘅人真係好多，連許願池附近嘅馬路都有好多人，坐池邊hea嘅又有，拋銀仔許願嘅又有，搵位影相嘅又有，企喺度唔知做乜嘅又有，總之就乜人都有啦~~
幾經辛苦，終於搵到個位可以影相，影完就即刻行開，費事阻住其他人影啦！
﹝超多人嘅許願池﹞
我哋無『亂拋垃圾』去許願，不過都記得點樣去許願。大家先預備好 1-3 個銀仔，用右手揸住，背對個池，『誠心許個願後』，就從左邊膊頭拗出銀仔，that's it！至於用幾多個銀仔呢，係有分別嘅：
a. 拋一個銀仔 = I'll be back !!
b. 拋兩個銀仔 = 會同愛人番嚟
c. 拋三個銀仔 = 飛甩身邊嗰個
領隊就話最多拋三個銀仔，而我就咁諗，如果拋五個銀仔，會唔會有多重效應呢？
﹝許願池﹞
我哋用咗15分鐘左右喺呢度影相，跟住就四圍行，搵嘢食、搵嘢影同搵嘢睇，由於已經有d肚餓嘅關係，再加上太陽伯伯開始收工，搞到有d飢寒交迫咁，跟住就同老婆搵吓d小小 café，可以小嘆一下意大利咖啡同食件cake。去食嘢前見到一部自助售賣機，€1就有交易，唔算貴wor，不過我哋都無幫趁。
﹝意大利自助售賣機，€1有交易﹞
之後，我哋繼續喺附近邊行邊搵嘢食，最後就走咗入一間小café食少少嘢，一來，見行到攰，二來，都有d凍凍哋，想搵個地方坐吓，結果就入咗去呢度，買咗一個好大塊嘅蝴蝶酥同埋一杯熱朱古力，正想搵位坐時，個收銀唔比我哋坐，因為佢哋收我哋『立食』錢，堂坐要貴d呢~~
結果，咪企喺佢間舖度食lor~~ 不過算啦，係我哋唔明白人哋嘅收費同做生意方法吧，而且，都叫做有一個室內地方，可以比我哋取暖嘛！我就唔係好記得比咗幾多錢食呢一餐，淨係知個蝴蝶酥有我成兩部電話咁大㗎！
﹝比我部電話更大嘅蝴蝶酥﹞
我哋終於暖番d嘞，又係時候繼續行，今次我哋行咗去一間皮具店，因為皮革用品都係意大利嘅特產嘛！我哋喺呢度買咗3條皮帶，不過好奇怪，明明試嘅時候都覺得佢啱size，唔洗打窿，但係番到香港真係要用嘅時候，竟然太長，要打多兩個窿先用得……@@
買完皮帶，就搵咗嗰2個店員影番張相，因為呢個亦都係我哋今次任務之一，就係要同8個唔同國家嘅人合照。
﹝同意大利皮具店店員合照﹞
又係時候回程lu~~ 比大家睇清楚d個許願池係點樣先。
﹝許願池﹞
嚟呢度嘅時候，我哋由落車行到去許願池要成20分鐘，不過，到走嘅時候就覺得條路好似遠咗咁，可能行攰咗啦，而且都肚餓啦，所以，上咗車之後嘅目的地就係番酒店同埋食飯。番到酒店第一件事係攞房，入到房就當然係攤一攤先啦，小休一陣就要同間房影張相先，費事聽朝整亂晒先影啦，影響人哋酒店個image嘛~~
﹝Idea Hotel房間﹞
今晚呢一餐係食西餐，有湯有長通粉，有一片雞肉同埋一『執』菜，係一『執』極似煲完湯嘅湯渣嘅菜，都叫做有啖菜食吓啦~~ 而枱面枝酒係free嘅，可以隨便飲。當大家坐低時，大家就即時Wi Fi上網，可惜要酒店比password先得，一個轉頭個領隊已經比咗password我哋，真醒目！
不過餐廳個Wi Fi收得唔係咁好，團友Karen就出咗去『蘿比』上網上Facebook upload相，Brian就同我哋一齊食嘢，其實佢兩公婆成晚都無乜點食過嘢，當我哋以為d嘢唔啱佢哋胃口時，Brian就話比我哋知，佢兩個行許願池時，食咗2個pizza！
我哋就話唔係咁肚餓吓話？佢哋解釋話係因為誤會，所以叫多咗，點樣誤會呢，就係佢哋見到個pizza係已經切開咗，有個價錢牌喺前面，所以佢哋就認為個價錢係一片pizza嘅價錢lor，而佢兩個就想一人一件，所以就叫咗2份，最後，送到佢哋面前嘅就係2大個pizza，共14件！Tea Time食咗14件pizza，仲有『本事』可以食到個dinner？
﹝Idea Hotel餐廳﹞
食飽就番上房，早d休息，預備聽日嘅行程-- 佛羅倫斯﹝翡冷翠﹞、比薩同埋威尼斯！早抖咁多位。
留言列表
