松此放眼看世界

﹝2011年3月8日﹞

﹝倫敦 > 羅馬 > 梵諦岡 > 鬥獸場 > 君士坦丁凱旋門 > 許願池﹞

呢一日，就要一早離開倫敦，向意大利嘅羅馬進發，亦都係我哋今次八國旅遊嘅第二個國家。

瞓過一覺後，又要晨咁早碌起身，因為要搭朝早7:30 嘅飛機去羅馬。由於，今日太早起身，酒店餐廳仲未有早餐食，所以我哋要自己喺希斯路機場搵早餐，唔知你會唔會覺得我哋蝕咗呢？睇落好似係，其實係無嘅，因為我哋第一日落機時，已經食咗佢個早餐。

去到希斯路機場，搞好咗d行李後，我哋就散隊食早餐，由於我哋都仲未瞓醒，一定食唔到個正常份量嘅早餐，所以我哋就去咗 Starbucks 買咗2個牛角包加一杯咖啡就算。

﹝未瞓醒樣@希斯路機場 Starbucks﹞

食完早餐後，個人都仲係未瞓醒，目光依然呆滯，梗係啦，香港飛倫敦嗰13個鐘都只係瞓得嗰6-7個鐘，跟住就由朝早 5:30 玩到夜晚成10:00，即係玩足一日，瞓得嗰 4-5個鐘又再起身上路，唔攰就假！

我哋喺個機場四圍行下，咦？呢間舖頭仲喺度wor，架招牌車仔 -- mini cooper，依然無攞走，對上一次o黎呢度已經係2008年 lu~~

﹝招牌車仔@希斯路機場﹞

轉眼間，又係集合時間 lu~~ 7:30 希斯路飛羅馬。

﹝拜拜~~ 倫敦﹞

上飛機無幾耐，又有早餐食 lu~~ 好彩，之前都係食少少就算，食太飽會食唔到呢一餐啊~~

﹝往羅馬嘅飛機餐﹞

坐咗大約兩個鐘頭飛機就去到羅馬機場lu~~ 出咗閘之後，就當然要喺機場大堂等領隊搵司機啦，當我哋等緊嘅時候，我發覺呢個羅馬機場好細，同香港相比就差得遠，唔講其他，淨講樓底啦，唉……

﹝羅馬機場大堂﹞

當領隊叫我哋上車時，突然間，我飄咗個念頭出o黎『今次會坐部咩車呢？』當我哋一路行去停車場時，出現喺身邊嘅都係d細車，最大嗰部都係24座，其實都啱嘅，得10個人，坐24座都好合理吖，不過，到最後，我哋都係坐大巴。

上車前，我已經同老婆夾好晒，我拉行李，佢就上車搵位，點解要咁做呢？因為我哋習慣咗坐車係會乜都影一餐，如果唔搵到個位係有一大塊玻璃窗的話，我哋就唔能夠好盡情咁影相嘞。

而我哋係慣咗搵近車尾嘅位，一來離個領隊遠d，就唔洗成日比佢問嘢啦，二來車尾比較少人揀，尤其係個團人多，而且有老人家，三來人少的話，我哋仲可以霸埋附近d位擺什物呀，係咪好有計劃呢~~

結果，同團嘅團友全部唔坐車尾，咁就益晒我哋兩個，成個車尾12個位任我哋坐。就係因為我哋走咗去車尾，原來車尾其中有一排櫈中間係有張枱o架！

更好笑就係成個trip完咗之後，如果我唔講，佢哋都唔知道原來部車係有張枱o架，哈哈~~~

﹝搵到張枱 & 奸笑中的我 ☻☻☻﹞

上咗車之後，第一個景點係……食 lunch ！！都差唔多啦，7:30am 上飛機，飛兩個鐘，攞埋行李等埋旅遊巴都差不多 11:00am，都係時候比大家食飯啦~~ 我哋食飽飯後會去梵諦岡，所以，我哋會去梵諦岡附近食飯先~~

途中見到一張幾搞笑嘅 poster，影嘅時候，唔知佢係乜，番到香港先至知道，原來呢套戲叫做『馬拉高』 @@

﹝Italian Rango = 香港馬拉高﹞

鏡頭一轉，就已經落咗車，身處嘅地方已經好接近梵諦岡，更接近嘅就係我哋食飯嘅餐廳，我就正正企喺佢門口lor~~

﹝等食飯中……﹞

等緊入餐廳時，領隊就喺門口同我哋講吓呢度d人點樣悠閒，做乜嘢都慢過人，治安都ok，好多司機泊低部車，就咁走咗去，防盜都唔洗 activate。呢頭講完，我哋就望過對面馬路，咁啱見到有部私家車停咗喺度，我就諗緊究竟呢度嘅治安係咪真係咁好呢！

跟住就見到有部中型車從後慢駛接近呢部私家車，由於之前領隊話呢度d人好悠閒，而呢部中型車都好悠閒，佢仲悠閒到『慢溜』撞埋去前面部車度，我哋11個人一齊做證，真係『嘭』一聲撞埋去o架！

﹝11人一齊目擊撞車事件﹞

更加正嘅就係個司機同埋個乘客，落車時，係咁二望吓架車，之後就同我哋笑笑就走咗去，唔係呀話！

算啦，佢哋撞車都唔關我事嘅，都係入餐廳醫肚先，入到呢度就搞笑 lor~~ 我相信呢一間係中西餐兼營嘅餐廳，一睇d杯就知啦！唔夠中式茶杯用，就用 espresso 杯頂住先，你睇吓有幾搞笑？中式茶壺配一系列唔同嘅咖啡杯，唔知會唔會變咗飲鴛鴦呢？

﹝中式荼，咖啡杯淺嘗！﹞

『豐富午餐』都係無乜特別，所以無影相，但係就有影個飯後菓 -- 意大利血橙，其實呢d血橙同我哋平時食到嘅橙無乜分別，只不過係d橙肉多咗d紅色吧~~

﹝意大利血橙﹞

出番餐廳時，之前撞人嗰部車已經『逃之夭夭』，可惡呀！

跟住就坐車入梵諦岡城，由於我哋唔可以坐車直接去到聖彼得大教堂，所以要停喺附近嘅停車場，出咗停車場之後，正要轉左去聖彼得大教堂時，就見到一部好有特色嘅小食車，不過唔夠時間『裝』下佢有無意大利嘅特色嘢賣，影張相就算啦。

﹝意大利小食車﹞

再向前行無幾耐，就已經見到呢個『轟炸機廣場』﹝聖彼得廣場﹞，跟住，領隊就帶我哋行咗去廣場中央嘅方尖碑附近，左右都各有一個圓形標記喺地下，我哋就行咗去其中一個嗰度，當時都有班人企喺呢個標記度影相，咁呢個標記又有乜咁特別呢？原來企喺呢個標記上，睇番個廣場左右兩條長走廊嘅柱時，因為設計獨特，走廊四行嘅柱會變到得番一行，我哋只係喺個標記附近影相，都可以見到部份嘅四合一效果lu~~

﹝轟炸機廣場 --> 聖彼得廣場﹞

o黎到呢個『轟炸機廣場』嘅朋友要留意，因為呢度真係有好多『轟炸機』，收到『柯打』就出動『轟炸』大家，就算『巡邏』中，都會『轟炸』你；如果你唔想慘被轟炸，就記得要戴帽，唔好當我講笑呀，當領隊企喺個標記附近同我哋講解時，佢險被一個重磅『流彈』撃中，當你見到嗰d『碎片』時，你都咪話唔驚…… 有一個手板咁大『pat』o架，仲戴唔戴帽？

﹝喺高空『士釘敗』嘅『轟炸機』﹞

今日真係好好天，遊客都好多，所以要排半個鐘先可以入到去聖彼得教堂，你睇我哋背後條隊，好彩我哋排隊時無被『轟炸』。

﹝排隊 ing 過安檢﹞

我哋排嘅呢一段，係要經過一個安檢 counter，就好似大家番大陸過關一樣，放低個袋落去條輸送帶，過一過 X-ray，咁就 ok lu~~ 據領隊講，呢個 counter 形同虛設，雖然有『實Q』睇場，不過佢哋從來都無截停過一個人，去 check d 疑似危險物品。

過完個 counter 後，我哋又再排隊，今次就真係排隊入教堂嘞！

﹝排隊 ing 入聖彼得教堂﹞

終於去到聖彼得教堂門口嘞！望番轉頭，廣場正中央就係方尖碑，左右兩邊走廊有一個稱號，叫做『母親的雙臂』，帶領著每一個信徒o黎呢一個廣場，我唔係天主教徒，不過都被吸引咗o黎呢一度……參觀。

﹝從聖彼得教堂門口睇番呢個『轟炸機廣場』﹞

呢個教堂係有好多嘢睇嘅，由於我哋有一個特別任務要做，所以我哋都無好仔細咁睇呢個教堂，最記得就係呢個教堂內部係呈十字型，正中央就係一個叫『聖體傘』﹝Baldacchino﹞嘅地方，聖體傘下面就係聖彼得嘅墓穴。

﹝聖彼得教堂內﹞

﹝聖體傘﹞

﹝聖彼得教堂內﹞

之前咪講過我哋有一個特別任務嘅，究竟係咩呢？就係要喺梵諦岡寄 postcard 比朋友！出發前做資料搜集時，知道如果喺聖彼得教堂頂樓寄信的話，會有梵諦岡個郵戳o架，所以我哋都想去呢度寄信。

可惜，我哋上唔到去，唔係唔肯比錢上去，而係無時間！結果，出咗教堂就去咗右手邊嘅郵局買 postcard 同寄埋。收到梵諦岡 postcard 嘅朋友們，你哋嘅 postcard 就係由呢個郵筒寄出o架！

﹝梵諦岡郵票﹞

ok，梵諦岡行程去到呢度，一陣會去羅馬鬥獸場，君士坦丁凱旋門同埋許願池，詳情請留意 part 2b！