﹝2011年3月7日﹞
﹝自然歷史博物館 > 倫敦眼 > Holiday Inn﹞
喺倫敦，我有兩個好深嘅印象：
第一，佢哋好等錢洗，去到邊都要比錢；
第二，呢度d博物館大得好緊要！
呢個自然歷史博物館當然唔夠賊仔館大啦，之不過，大唔過佢，並唔代表佢唔大嘛！門口嗰條龍骨已經夠晒大，你睇，連個樹幹都可以咁大，真係『咩樹幹 / 咩事幹呀！』
﹝咩樹幹呀！﹞
睇完個年輪之後，轉個彎又上多一層，又係一個好大嘅石塊 / 寶石展館，淨睇呢幅圖就知道佢真係好大，如果你仲要係有心機，逐個櫃去睇的話，我相信我哋搭飛機番香港嗰日你都仲未睇完！
我哋行咗一陣之後，就同 Brian 兩公婆分頭行，一來，我哋對d無得攞上手嘅展品興趣唔大，二來，我哋仲要趕下場，要上 London Eye 玩，所以就同佢哋『施於吐摩奴』後，我哋就一條直線行去最尾個展館，跟住就快撇。
﹝好……大……嘅……石塊 / 寶石展館﹞
係wor~~ 我好似唔記得話比大家知道，呢個博物館係唔洗錢入場o架！好抵睇！唔o黎就蝕呀！仲有，呢個博物館對面嘅 V&A Museum 都係唔洗錢入場，鐘意行博物館嘅朋友可以順路行埋。
呢度嘅展覽館係用唔同嘅顏色去命名，一共有5個館，想睇 Floor Plan 就 click 入下面呢條 link 啦~~
自然歷史博物館 Floor Plan
我哋只係行咗 Blue Zone -- 恐龍館，同埋 Red Zone -- 地球館，之後就喺地下大堂行個圈就極速徹退。
﹝Blue Zone -- 恐龍館﹞
之後，我哋就用咗一d時間去搵 Red Zone -- 地球館，因為跟據網上嘅資料所講，呢個 Red Zone 都係值得行嘅，所以就算攰都好，我哋都要搵到佢！
﹝Red Zone -- 地球館﹞
呢個 Red Zone 係講地球嘅演變，我哋當然唔會細心研究啦，我哋知道呢度有一個模擬地震嘅展區，都好想試下同感受下地震係點樣嘅，可惜，當我哋搵到呢個展區時，佢剛好震完，唔係呀 fa~~ 我哋就企咗喺度一陣，諗住佢好快會再震過，可能我哋太心急啦，等極都唔震嘅，算！我哋走！
我影咗兩張相比大家睇，係呢個博物館個 Main Hall，樓底好高，好有特色。
﹝自然歷史博物館 Main Hall﹞
出咗門口之後，我同老婆商量咗一陣，究竟我哋應該點行先好，原先個 plan 就係由 South Kensington 出閘，同個站頭影張相，然後就去自然歷史博物館，行完博物館後，就會行去下一個站 -- Gloucester Road，搵下嗰度一個幾得意嘅塗鴉垃圾桶，影番張相就坐 underground 去玩 London Eye。
點知，一開始就 miss 咗個站，影唔到個 South Kensington，最後，我哋決定唔行去 Gloucester Road，搵番個 South Kensington 就算，因為想用多d時間去睇下 London Eye 一帶嘅景色。
﹝好有特色嘅 South Kensington﹞
今次係由 South Kensington 坐Circle Line ﹝黃色線﹞，唔洗轉車，坐 4 個站就去到 Westminster。
﹝Westminster 站內﹞
其實，去 London Eye 的話，由 Waterloo 落車會近d，而我哋要早一個站落車，係因為想睇多次個 Big Ben，同埋都想沿住 Westminster Bridge Road 條橋，睇下呢條泰晤士河一帶嘅風景。
出咗 Westminster 站，成個 Big Ben 就已經喺你眼前，終於可以近距離接觸呢個大笨鐘，亦都可以知道自己比大笨鐘更『笨』呀，哈哈~~
﹝大笨鐘 Big Ben﹞
過咗馬路之後，就見到連接住泰晤士河兩岸嘅 Westminster Bridge，我哋沿住條橋行嘅時候，就已經見到倫敦嘅地標 -- Lonodn Eye，London Eye 旁邊就係 London Aquarium，原本我都好想去行下呢個 Aquarium，但係睇下網上嘅 comments，好多人都話去海洋公園會好睇好多，唔值得用成 £15.00 入去睇，所以我哋都無去到。
﹝從泰晤士河見到嘅 London Eye & London Aquarium﹞
行咗10分鐘左右，我哋就已經到達 London Eye 嘅入口，好多人排隊呀！不過呢條隊係上 London Eye 嘅，我哋都仲未上得去，因為未攞飛嘛~~ 入到去票務處仲嚇人，最少有40-50人排緊隊買飛，好彩，我哋喺香港已經上網訂咗飛，只要帶住個 email print-out，同埋當時登記嗰張 credit card，就可以去個 Net Booking Counter 攞飛，真係慳咗好多時間o架，完全唔洗排隊呀！
攞咗飛之後，我哋就去排隊上 London Eye，好奇怪，條隊短咗好多wor~~ 咁就即刻行快兩步去排隊先！上 London Eye 前，我哋要先經過一個安檢嘅 counter，輪到我哋過 counter 時，個『實Q』哥哥就同我哋講：
實Q：Where are you coming from?
我：We come from Hong Kong. ﹝跟住我就打開咗個袋比佢 check﹞
實Q：有無帶刀仔？﹝佢無check我個袋，轉咗講唔咸唔淡廣東話，仲扮到有d惡惡地﹞
我：無呀！
實Q：有無帶酒？
我：都無呀！
實Q：點解唔帶？
我：我哋都唔飲酒嘅。
實Q：你應該要帶酒嚟！
我：我有枝茶，你飲唔飲？﹝由背囊攞枝茶比佢﹞
實Q：Enjoy the trip~~ ﹝笑笑口放我哋上去﹞
我覺得呢個『實Q』幾可愛，可能見得英文人太多，見到d中國人就練下d廣東話，哈哈~~
呢個 London Eye 嘅車廂，就好似一個欖核形咁，中間有張長櫈，可以坐到10個人左右，同我哋同車廂嘅，都只係得10個人。其中有兩個鬼妹，一入車廂就坐咗喺車廂最出嘅地下，簡直勁討厭呀！最正個位比佢哋坐咗，又唔係影相，只係喺度吹水，阻鬼住晒！
﹝已經上咗 London Eye，右下角就係其中一個好討厭嘅鬼妹！﹞
上 London Eye 玩一個圈，大約要45分鐘，我哋5點鬆d就上咗去，當時仲係好光猛嘅下午時段，行咗¼個圈左右，已經開始日落，完全中晒我哋之前嘅 planning -- 上 London Eye 睇日落，真係好開心好感恩。
我哋可以睇到日落已經好開心，仲要比我哋睇到 London Eye 唯一一個紅色車廂，除咗個顏色唔同外，我都唔知佢有乜咁特別？
﹝London Eye 唯一嘅紅色車廂﹞
當我哋差不多去到最高點時，大笨鐘嗰邊開始變黑，條街都仲未開燈，日落倫敦真係好靚~~~
﹝日落倫敦 1﹞
當我哋望番去另一邊時，嗰邊都仲未天黑，另外，紅色車廂有好多人呀！
當個車廂由最高點開始回落時，突然間，眼前一亮，大笨鐘同國會大廈，加埋條 Westminster Bridge 一齊開燈呀！睇到呢個景之後，完全覺得呢個入場費係超值呀！我哋咁興奮，係因為我哋之前只係『諗住可以』上嚟睇日落，而實際上，我哋係無 check 過當日嘅日落時間，而今日所有嘅行程都係隨意安排嘅，所以大家應該明白點解我哋咁興奮！
﹝日落倫敦 2﹞
享受咗大約10分鐘左右嘅日落後，我哋都差不多玩完呢個 London Eye，我就同老婆講，車廂入面劃咗個影相位，究竟去到邊個位先影相呢？原來差不多到地面時，左右兩邊都有個大相機對住個影相位，大家只要企定定，對住個鏡頭笑，佢就會幫我哋影相，就係咁簡單。
影咗嘅相，可以喺紀念品店買番，就好似海洋公園一樣，會有埋個相套入住張相，原本我哋都想買嘅，始終一場o黎到，走咗之後都唔知幾時先會再o黎過嘛~~ 睇完相之後，我哋決定唔買，因為個 quality 好唔得呀！最後，我哋就喺個自助壓印機度整咗個銅板仔做紀念品就算嘞。
﹝望鏡頭啦~~ 笑~~ ☺☻☺☻☺☻﹞
﹝從 London Eye 上見到連接住 Waterloo & Embankment Station 嘅火車及行車橋﹞
落到o黎之後，個天都差不多黑晒 lu~~ 臨走前，同大笨鐘同埋國會大廈影番張夜景先啦~~
﹝大笨鐘及國會大廈夜景﹞
去到呢一個環節，倫敦之行已經接近尾聲，不過，我哋嘅觀光點仲未完！“下一個站係滑鐵盧 Waterloo”
Waterloo 同 London Eye 相距都係10分鐘路程，一d都唔遠，不過當時天氣比較凍，所以開頭嗰一半路程就行得辛苦d，之後就已經行咗入內街，有d大廈檔吓，我哋先至無咁凍。
其實我哋係可以上天橋，穿入一幢大廈再去 Waterloo，我哋無咁樣行，係因為我哋想同個站影番張相，呢度就係滑鐵盧站嘞！影完相之後，我哋就行咗上去個站度，仲攞咗佢哋一份免費報紙 tim~~~
﹝下一個站係滑鐵盧 Waterloo，凍到要戴手套啊~~﹞
Waterloo 係倫敦 underground 其中一個大站，而且佢仲連接住火車網絡 National Rail，包括歐洲之星，再加上當時大約係 7 點左右，應該仲係放工時間，所以個站有好多好趕嘅人，相比我哋呢d『悠悠閒，四圍行』嘅遊客，真係一個好強烈嘅對比，我就企定定影相，佢哋就快到無影！
﹝悠悠閒遊客 vs 快到無影嘅當地人 @ Waterloo﹞
行到呢一度，我哋已經有d肚餓，所以喺個站度行咗個圈，睇下有咩好食，睇過晒d價錢之後，我哋都差不多可以肯定，英國人真係好等錢洗，少少嘢食都要 £4 - £5，結果我哋決定唔喺度食，番酒店食杯麵！
喺呢個站走人都要好小心，之前都講過呢一個站係交通樞紐，一上錯車就唔知去咗邊度，所以我哋認清楚 underground 個 logo 先至行。
今次我哋由 Waterloo 去 Heathrow Terminal 5，由 1 區去到 6 區，係我哋今次喺倫敦最長嘅一段車程，要坐一個鐘頭有多，我哋先搵Jubilee Line ﹝灰色線﹞，之後就坐兩個站去到 Green Park，跟住就轉Piccadilly Line ﹝深藍色線﹞，向Heathrow Terminal 5 方向行，由於唔係每一班車都去 Heathrow Terminal 5，而我哋就要去到 Hounslow West 落車，等下一班會去 Heathrow Terminal 5 嘅車，聽完我嘅講解之後，係咪覺得好煩呢？
如果你有揸住張 underground 路線圖的話，你就知道我哋條路點行，實際上一d都唔煩，因為只係轉一次車吧~~ 不過最弊嘅就係我哋已經行到好攰，而且又有d肚餓，再加上要坐咁耐車，又唔敢瞓覺，所以呢一程車係最辛苦嘅~~
﹝喺 Waterloo 等車去 Green Park﹞
﹝去到 Green Park lu~~ 睇下我個攰樣……﹞
去到唔知邊一個站，架車停咗好耐，跟住就聽到廣播話前面有d事發生，列車服務稍為延誤，唔係呀 fa~~ 我哋想快d番酒店食嘢沖涼同瞓覺呀！過咗一陣間，就聽到閂門聲，但只係閂得一邊門，唔係就咁開車呀嘛~~ 倫敦 underground係舊，但不至於舊到要咁樣開車呀嘛？佢當然無開車啦，又再等多一陣，佢就開番度門再閂過，終於開車 lu~~
﹝閂一邊門就想開車？﹞
喺捱眼瞓嘅日子當中，時間係過得最慢嘅，好開心，終於到達 Hounslow West 呢個站，距離酒店嘅路程已經越o黎越近…… 希望去 Heathrow Terminal 5 嘅車好快就到啦~~
﹝苦笑中嘅我@Hounslow West﹞
好慶幸，等咗一陣間就有車，坐多幾個站就到咗 Heathrow Terminal 5嘞！之後，就要搵 shuttle bus 番酒店，從網上資料顯示，呢程車費係 £3 左右，不過領隊就話 £3 - £4，結果，呢程車係 £4.50！
去到呢一刻，我真係可以好肯定咁同大家講，英國人真係好等錢洗！一部穿梭幾間酒店嘅 shuttle，由上車到落車都係10分鐘左右，咁就要 £4.50！因為由 Heathrow Terminal 5 去酒店，全程都係行 highway，我哋先至行唔到番去，否則，我真係寧願行，都唔比呢d錢佢賺呀！
一番到酒店，我哋就去 reception 登記攞鎖匙，之後就去 bell counter 攞行李，除咗我哋之外，仲有一 pair 人未番，唔知係邊個呢？
一入 lift 就比部 lift『陰』咗一嘢，我入先，老婆行後，入到去就當然要㩒住個開門制啦，當老婆入咗o黎後，咁我就好自然咁㩒另一個制，右邊係開門制，左邊就應該係閂門制吧，點知，嗰個係警鐘嚟！有無咁玩嘢呀！有開門制無閂門制，仲要兩個制都著晒燈，擺明『陰』我啦！
﹝『陰』我一嘢嘅！﹞
去到呢一 part 就已經完成晒今日嘅行程，番到房，我哋兩個就分頭行事，一個執嘢去沖涼，一個就預備熱水煲整杯麵；食完杯麵後，一個就執o野，另一個就去沖涼，好快趣，我哋就已經 zzzzz…… 因為聽朝 4:30 morning call，7:30飛機去羅馬。
之前同大家講過嘅 Oyster Card，究竟係咩樣嘅呢？下圖就係我哋上網訂嘅 Travellers' Oyster Card，呢兩張 Oyster Card好抵買呀，因為番到香港後，有人問我哋借去英國用，咁即係話呢兩張 Oyster Card去過英國兩次呀！
﹝Travellers' Oyster Card﹞
下一 part 就會去我哋8個國家之中第二個嘅意大利！
留言列表
