﹝2011年3月7日﹞
﹝循道衛理聯合教會倫敦總堂 > 聖保羅大教堂 > 倫敦塔橋 > 大英博物館﹞
同總堂合照後,就要上車去下一個景點 -- 聖保羅大教堂,一上車無幾耐,又見到一架倫敦的士,好有特色,全車身都係廣告,如果睇唔到佢車頂個『TAXI』字樣,真係唔會知道佢就係一部的士。
﹝可愛倫敦的士﹞
兜兜轉轉之下,就經過之前所講嘅『大狗廣場』,正名係茶花格廣場﹝Trafalgar Square﹞,明明廣場上隻黑色嘅動物係獅子,但d人就叫佢做大狗,點解呢?原來一般人都認為獅子係威武嘅象徵,就好似香港嘅『獅子銀行』一樣,可惜,整呢個廣場上嘅獅子嗰班人,唔知係收錯 order,定係落 order 個人唔知道,整出o黎之後,就好似一隻好大好聽話嘅狗仔,既無張牙舞爪嘅威勢,亦無百獸之王嘅眼神,就係好乖咁伏喺個廣場度做『實Q』。
﹝茶花格廣場 - Trafalgar Square,當地人稱為嘅大狗廣場﹞
﹝獅子?大狗?﹞
沿途又比我發現到一間業務勁廣泛嘅舖頭,補鞋、配鎖匙、皮革用品、乾洗、做獎杯獎牌、金屬及玻璃品刻字、換錶帶電池一腳踢,你話勁唔勁?
﹝業務勁廣泛嘅舖頭﹞
終於到達聖保羅大教堂,我哋只係喺外圍影下相就走,無得入裡面行,所以只可以欣賞到佢嘅一角,由於我哋時間唔多,而且無上 google pre-visit 過,所以錯過咗佢正門嘅靚景,正門靚好多呢~~
﹝聖保羅大教堂,Saint Paul's Churchyard﹞
去完聖保羅大教堂之後,我哋嘅下一站就係倫敦塔橋 -- Tower Bridge,睇清楚,唔係 London Bridge,London Bridge除咗係條橋之外,仲係醫院嚟o架!
﹝倫敦橋醫院 - London Bridge Hospital﹞
喺呢度一定要同大家講清楚,倫敦有好多條橋,其中塔橋﹝Tower Bridge﹞係最出名嘅,而另一條比人『唱』到出晒名嘅,就係倫敦橋 -- London Bridge。其實 London Bridge 一d都唔起眼,普通一條橋吧~~ 但係就比人誤會咗以為下圖嗰條就係 London Bridge,可惜,佢係叫 Tower Bridge,唱歌嘅時候“ London Bridge is falling down, falling down.......”實際上 London Bridge 係無得開合,試問又點樣『falling down』呢?可以『falling down』嘅其實係 Tower Bridge。
﹝倫敦塔橋 - Tower Bridge﹞
領隊當時講咗個唔知真定假嘅故事比我哋聽,話說,好耐之前,有一個商人嚟到倫敦嘅時候,就一見鐘情咗條倫敦塔橋﹝Tower Bridge﹞,跟住佢就走去同英國政府講話要買咗嗰條 London Bridge,可能佢係想話買『嗰條倫敦的橋』,而唔係倫敦橋,英國政府就梗係肯賣啦,而佢仲驚死英國政府會反口,連 contract 都簽埋,到交易時,個商人話『貨不對辦』,依據番合約精神,英國政府就賣咗條 London Bridge 比佢,不過唔係 Tower Bridge,個商人就只好買咗返去喊三聲啦。
故事係真係假就唔知,你自己諗啦~~
倫敦塔橋橫跨泰晤士河兩岸,北岸連接住倫敦塔橋嘅地方叫倫敦塔 -- Tower of London,前身係一個監獄,現已變成博物館比人入內參觀,詳細資料可以瀏覽以下網頁:
Historic Royal Palaces
﹝倫敦塔橋及倫敦塔 - Tower Bridge & Tower of London﹞
而河嘅南岸,就係我哋四圍行嘅地方,我哋影完塔橋後,見有時間剩,就走咗去旁邊嘅帝國戰爭博物館﹝Imperial War Museum ﹞嘅紀念品店行咗個圈,我覺得入面嘅紀念品唔平,而且唔靚,所以無買到。其實,呢個博物館接連住一艘已退役嘅戰艦 -- 貝爾法斯特號巡洋艦﹝HMS Belfast﹞,只要比入場費就可以上船參觀,詳情可以去佢網頁睇睇。
Imperial War Museum & HMS Belfast
﹝帝國戰爭博物館 - Imperial War Museum﹞
同隻巡洋艦講聲拜拜後,我哋就上車去下一個景點,就係去倫敦嘅唐人街食飯,講開『食飯』呢個term,原來,行程表上列明『豐富午餐』或者『豐富晚餐』,即係食中餐咁解,所以,我哋一陣間就會食呢一個trip嘅第一餐『豐富午餐』。
上咗車無幾耐,就經過倫敦塔橋,過橋後會見到個城堡咁樣嘅地方,呢度就係倫敦塔,如果有得去行下就好啦~~
﹝途經倫敦塔﹞
呢一張相你又知唔知我想講乜?唔係想講條街名,唔係想講個匯率,亦都唔係想講個黑超女郎,而係想講個匯率表後面嗰個郵筒,點解個個郵筒都要日曬雨淋,風吹雨打,而呢個郵筒咁巴閉可以放室內嘆冷氣?
﹝好巴閉嘅室內郵筒﹞
呢一隻高踭鞋咁大隻,唔知邊個著得落呢?
﹝超大碼嘅高踭鞋﹞
行咗無幾耐,我哋就去到唐人街附近,準備去食飯,一落車就好有親切感,終於見到中文字,唔知呢間小明理髮係咪上海理髮舖呢?
﹝小明理髮﹞
由小明理髮行前dd轉個彎就係唐人街,一睇呢個生招牌就知道呢個係華人社區啦~~喺大英博物館個華人 guide 同我哋講,想睇唐人街就日頭去睇,唔好夜晚o黎,因為一到夜晚,呢個就會集結咗好多流鶯,有心者,o黎呢度當然無問題;如果只係想睇下的話就唔好去,因為d流鶯好狼死,兩公婆拖住手行街都唔理,照拋媚眼照放電照搶人老公,我唔知佢呢番說話真定假,只不過以一個居住當地嘅華人都咁講的話,我會選擇相信,你呢?
行入條唐人街之後,好快趣就搵到間餐廳食我哋第一餐『豐富午餐』,有點心同炒粉麵之類。
﹝唐人街﹞
我哋當然係同檯食飯啦,由於仲係好陌生,所以大家表現得好拘謹,都明白嘅,所以大家主力都係同自己嘅另一半傾計,都有部份時間同大家傾嘅。
食飽飯後,領隊就帶我哋喺附近行下街認下路,因為我哋陣間行完大英博物館後就係自由活動時間。一出條唐人街就見到一幅『壁畫』,舞獅舞到上外牆,相信只有中國人先做到,哈哈~~
﹝唐人街一角﹞
一個轉彎,見到個幾悠閒嘅清潔工人,推住部車仔就可以掃垃圾,幾舒服吖,不過唔知英國有無最低工資呢?同樣係$28,相信佢舒服好多wor~~
﹝英國清潔工人﹞
一路向前行,就喺一個街角停低咗,聽領隊講下附近有咩好行,而我哋就問佢 Regent Street 個遊客服務中心喺邊,點解我哋會搵呢個地方呢?我哋唔係想去Regent Street Shopping,亦唔係想搵資料點樣喺倫敦玩,而係我哋喺香港上網訂咗倫敦嘅 Oyster Card,憑 email 可以去遊客服務中心免費領取倫敦地圖一張,所以我哋先至問佢我哋應該點行,如果近的話就順便去攞埋。
不過佢指手劃腳完一輪後,我都唔知佢講條 Regent Street 喺邊,我就憑佢嘅形容估吓條街喺邊個方向,跟住就影低張相先,因為一陣間如果要去就要靠自己行。幸好,我同老婆決定唔去,因為由大英去番呢度較為遠。幸好x2,當我打呢篇 blog 時,我再上番 google map 睇下個遊客服務中心喺邊,原來係喺領隊所講嘅反方向!@%&*%^$&^)*(%w$#
﹝我意會錯嘅街,呢條係 Glasshouse Street,Regent Street 喺下一條街先啱﹞
被『老點』後就去番落車嘅地點等個司機,沿路見到一間好靚嘅『牡丹樓』,我相信佢只係佔咗個地舖吧~~
﹝『牡丹樓』﹞
由於塞車嘅關係,我哋改喺對面馬路上車,避開d塞車路段,上車無耐又見到另一款倫敦的士。
﹝倫敦的士﹞
呢個倫敦篇真係有好多o野講,跟住嘅行程睇 part 1c 啦~~
留言列表