松此放眼看世界

﹝2010年9月25日﹞

﹝卡柏都斯亞 > 棉花堡﹞

今日個行程會好充實，充實到只有一個景點，就係轉酒店！無錯，由卡柏都斯亞坐旅遊車去棉花堡係好遠嘅，淨講車程都已經要10個鐘頭，再加埋停吓休息站同埋食飯，最少都要12個鐘，即係坐足全日車！

其實報團嘅時候，我哋都知道會有一程咁長嘅車程，雖然，其他旅行社可以用內陸機取代，不過就會貴dd，而且去嘅景點會少咗，再加上我哋覺得呢一段車程應該會有好多風景睇，同埋呢d咁長程嘅車，唔趁後生去嘅話，相信第時年紀再大就一定頂唔住，所以我哋都照報。

今朝早，好似8:30am就出發，所以我哋好早已經起咗身，除咗係我哋嘅習慣外，都要預番d時間搵人開番度門比我哋嘛，因為呢度死人壞鬼門用佢2日就壞足2 日！

一起身，就聽到酒店外面有d『啷啷』聲，出到露台之後，就比我搵到有人喺度放羊，可能城市人係無乜機會見到真正嘅牧羊係咩一回事，今次就比我親眼見到，會覺得好得意。同時亦都不其然咁想起大衛呢個牧羊人，其實帶住咁大群羊真係唔易，如果有猛獸出現嘅話，牧羊人又可以點樣驅趕猛獸之餘，又可以搵得番晒d四散嘅羊呢？亦都想起聖經其中一句：『我是好牧人，好牧人為羊捨命。』﹝約翰福音 10：11﹞

其實，我睇見呢群羊再諗起呢句聖經時，就想問：如果牧人為羊捨咗命，咁邊個可以繼續阻止d猛獸嘅攻擊呢？唔通呢個捨命係同歸於盡咁解？

﹝放牧中嘅羊群﹞

 食完早餐之後，就係再搵酒店員工幫手開門，番房再check多次有無嘢執漏，同埋拉埋d行李走，點知又係嗰個bell boy幫我，唔通佢哋工時好長，定係佢番通宵？

下面呢張相，係我影羊之前影嘅，酒店外係一片好大嘅草地，一起身見到呢個景都好開心好舒服。如果你夠眼力嘅話，你就會搵到呢群羊，喺幅圖嘅左手邊幢大廈附近，當然，我影d羊嘅時候，d羊已經行到去正中間lu~~

﹝Asos Thermal Hotel外嘅景色﹞

臨上車前，同呢間爛鬼酒店影番張相先，認住佢呀！如果大家『有幸』入住呢間酒店，又有我同一樣經歷時，記得我個處理方法，甚至叫人即時換房！免得一肚氣呀！

﹝拜拜~~Asos Thermal Hotel﹞

今次呢個土耳其之旅係我哋去咁多次旅行當中，車程最多嘅一次，據領隊所講，呢個trip淨講坐車時間，都已經差不多要50個鐘頭，等我計下我哋個trip有幾多時間玩下先：

day 1夜晚差不多12點起機，無得計。

day 2-9，共8日，即係8日 x 24個鐘 = 192個鐘

頭尾2日機程，共23個鐘

全部車程共50個鐘

訓覺時間，7晚 x 6個鐘 = 42個鐘

最後，192 - 23 - 50 - 42 = 77。

我哋只係有77個鐘係用o黎食嘢同觀光，其實都好似幾少wor~~不過唔知有無計錯呢？哈哈~~

呢12個鐘頭裡面，我哋都無乜點訓過，都係傾下計呀，影下相咁lor~~天氣好嘛，成日都藍天白雲，不過就比我哋發現咗d團友有好怕曬，全部人都拉晒窗簾，係得我哋個窗全程﹝9日﹞都無拉過窗簾，因為我哋想睇嘢、影相同埋曬吓太陽。有個團友走咗去車尾，打橫霸晒所有位置訓覺，最搞笑係佢搵條行李帶綁住個位同自己，咁就唔洗轆落地啦，真搞笑。

﹝12個鐘頭車程所見嘅風景 1 - 得意招牌﹞

﹝12個鐘頭車程所見嘅風景 2 - 小型奇石林﹞

﹝12個鐘頭車程所見嘅風景 3 - 孤苦伶仃樹﹞

一路上都見到好多嘅雀仔飛過，不過就未見到一大群飛過，今次就比我哋見到成群飛過，好壯觀呀！呢d就係唔訓覺嘅收穫。

﹝12個鐘頭車程所見嘅風景 4 - 群雀亂舞﹞

﹝12個鐘頭車程所見嘅風景 5 - 風景﹞

﹝12個鐘頭車程所見嘅風景 6 - 藍天白雲﹞

下面呢一張相無乜特別，佢無乜特別就係因為佢係一張相，話唔到比你知現場係有幾搞笑。

圖中條膠喉穿咗個洞，所以有d水射出o黎，d雀仔就係等緊d水沖吓涼咁lor~~喺個噴水口前面嗰隻大呀哥最惡，個噴水口就只可以比佢自己用o黎沖涼，其他雀一走近d都比佢趕走，搞笑位就係呢度，佢要趕其他雀嘅話，即係唔可以霸住個位啦，其他雀就趁呢個空檔『抽抽水』，到個大呀哥趕完先頭嗰隻嘅時候，見到個位比其他雀霸咗時，佢又要忙住趕第2隻，真係忙~~~

雖然停個燈位都係1分鐘吧，隻大呀哥就已經『籐』咗5-6轉，究竟佢霸個位個目的係乜?

﹝12個鐘頭車程所見嘅風景 7 - 街頭雀霸﹞

今日嘅車程真係好遠，不過，當我用欣賞嘅眼光去睇身邊嘅事物時，其實呢12個鐘都唔係咁難過。好似司機咁，唔知係佢交遊廣闊吖，定係土耳其人比較熱情呢，當我哋喺公路上飛馳時，有時會經過一d街邊舖頭仔呀，對面行車線嘅車呀，爬咗人哋頭 or 比人爬咗頭，又或者係油站，佢都會響咹叫一叫d人，路邊d人就會揮揮手示意『你好嗎！』，而其他車嘅司機都會響咹回應，我覺得呢d溝通方法好有人情味，好得意。

佢哋d車有2款or更多款唔同嘅響咹模式，喺香港常聽到嘅當然有啦，佢哋溝通嗰一款係比較特別，唔識得點形容，總之聽落就比較自然同舒服啦！

﹝12個鐘頭車程所見嘅風景 8 - 休息站﹞

呢段長車程當中係會經過一個叫康雅，又或者叫孔雅，其實都係講緊同一個地方，呢個叫康雅嘅地方就係旋轉舞嘅發源地，所以呢一帶都會有好多同旋轉舞有關嘅嘢出現，好似我身後咁，就係一個好好嘅例子。仲有d旋轉舞公仔啦，旋轉舞cd啦，旋轉舞小擺設啦……等等。

﹝12個鐘頭車程所見嘅風景 9 - 康雅﹞

﹝12個鐘頭車程所見嘅風景 10 - 旋轉舞旅遊車﹞

﹝12個鐘頭車程所見嘅風景 11 - 向上散射嘅光線﹞

呢部就係同我哋跑足9日嘅烈火戰車，唔好睇少佢呀，係benz o黎o架！行車時好穩定，好好力，仲行得好快tim~~唔知大家會唔會有d奇怪點解架車咁乾淨呢？

其實，每停一個休息站都會有人幫手洗車嘅，至於收費就無定嘅，不過我就唔記得我哋個司機比開幾多錢。

﹝12個鐘頭車程所見嘅風景 12 - 烈火戰車﹞

今晚入住嘅酒店有d似烏溪沙青年旅舍，有得游水同埋浸溫泉@@，今晚呢間酒店無死人壞鬼門招呼我哋，不過就有部好凍嘅冷氣同埋好陰濕嘅蚊招呼我哋，詳情留番聽朝先講。

食完個自助餐後，我哋就上房換衫去玩水，不過唔知係咪太耐無游過水呢，游完無幾耐就已經有d攰@@，之後再試埋佢個溫泉，d水好熱，真係要逐吋逐吋浸落去先得，一踩落地就浸到心口左右啦，唔算深水，不過唔知係咪d水太熱同埋少人o黎呢，除咗近上落個位係可以企得到之外，遠少少嘅地方都好滑，好似有好多菁苔咁。

由於d水比較熱，我哋都係玩咗一陣就番上房休息lu~~

聽日再見。

資料補充：

呢一日其實有d唔開心，因為去唔成一d自費活動，我哋見一場o黎到，點都想睇多d嘢，見識多d，點知因為無法同所有團友達成共識，即係去就一齊去，只要有一個唔肯去，咁就一齊唔好去。

自費活動可以去參觀駱駝商旅酒店，天然藍湖同埋博斯普魯斯海峽遊船河，呢3個地方我哋都想去。可惜，每個活動都有人唔玩，到最後全部都去唔到，真係唔開心；更唔開心嘅係，已經去到駱駝商旅酒店門口，只要一齊say yes就可以去睇，點知有人say no，無奈地，掉頭走，唉~~~

﹝駱駝商旅酒店﹞