﹝2010年9月27日﹞
﹝巴格門 > 特洛伊﹞
食飽飯就再開車去特洛伊，即係木馬屠城記嗰度，唔好問我木馬屠城記個故事講乜，我真係唔知道，我依稀有d印象嘅就係細個嘅時候玩嘅電子遊戲機吧！
一去到特洛伊個門口，成大隻木馬放喺度，一睇就知無搵錯地方，如果有人『坤』你話呢隻就係當年屠城嗰隻木馬的話，千祈唔好信呀，因為呢隻馬太新淨，而且木馬屠城呢件事都唔知係真定假！
如果你細心少少睇下面張相，就會發現個馬肚有條樓梯可以比人爬上去嘅，無錯，真係可以上去嘅，你再望高少少就會見到有2層窗口，第一 or 第二層影相都得，當然要視乎有幾多人啦，上面大約可以上10個人左右。其實呢度仲有一個地方要影嘅，亦都唔係個個留意到，係我老婆咁眉精眼企先見到，喺邊度？陣間再講。
﹝特洛伊招牌 ─ 木馬﹞
其實特洛伊呢個城都好慘吓，跟據書上嘅資料所記，呢個城經歷過好多次地震，起好一段時間又地震，震散晒d地方又再起過，起好晒又再震，起起震震咗好多個世紀，下面張相就可以話比大家知道，泥土唔會呃人，唔同顏色就可以代表唔同年代嘅時期。
﹝震完又起，起完又震嘅特洛伊城﹞
有d考古學家就喺d泥土上label 咗唔同嘅數目字，等有心『考究』嘅人可以睇得清楚d。
﹝特洛伊城﹞
下面呢張相就可以清楚d話比大家知道，呢個特洛伊城點樣玩層層疊。
﹝特洛伊城層層疊﹞
一路向前行，又見到土耳其『眾多』之一嘅貓，呢隻貓就搞笑lor~~ 『好狗唔攔路』大家應該聽過，『好貓唔攔路』你又聽過未？
正當我哋向前行時，呢隻貓就企正路中間，咁啱d團友又鐘意貓，個個都摸隻貓，又影相咁，我都無佢哋咁好氣，你有你玩貓，我哋就繼續影相，下圖就係古時嘅祭壇，唔知邊度係殺牲嘅地方呢？
﹝祭壇@特洛伊﹞
當d團友玩夠隻貓後，就輪到佢哋影相我玩貓，不過比老婆怒啤咗一嘢之後就即刻向前行，驚驚……
之後就見到一個小劇場嘅地方，初初仲有一班歐洲團喺度講解，一個轉頭又有2個團友喺度做龍友，搞到我行幾轉先影到呢張相！
﹝小劇場@特洛伊﹞
過咗個小劇場後，會經過一堆遺跡，過咗堆遺跡之後，無記錯嘅話，前面直行就係去番個入口度，左手邊會有條樓梯仔，只見樓梯，睇唔到係行去邊，幸好，有團友上咗去 & 極力推薦我哋要上去行下，既然人哋咁介紹，咁我哋就行上去啦，原來呢個地方係可以『摸』到隻馬仔呢~~ 所以呢個景係唔可以miss嘅！
﹝馬仔乖@特洛伊﹞
『摸』完隻馬仔就行番出去同隻馬仔影相，之前我有提及過可以上去第一 or 第二層影相嘅，到我哋出到嚟時，咁啱又無乜人wor，咁我哋兩公婆就可以霸晒隻馬仔嚟影，我先『上馬』，上到第一層就先影一張。
﹝第一層馬仔@特洛伊﹞
我再走上第二層後，老婆就交咗部相機比領隊幫手影相，而老婆就急急腳咁走上嚟影個合照。喺呢度影相要有少少嘢留意一下：
1﹞ 唔好淨係企喺個窗口等影相，如圖所見，個人伸出少少窗外會容易d見到個人；
2﹞ 窗口前係有一排櫈嘅，可以借佢嚟企高少少，不過唔好企太高，同埋唔好伸咁出，有危險呢；
3﹞ 上馬仔條樓梯比較直同埋窄，上落要小心，尤其係有人一齊上落時。
﹝在馬仔握握手@特洛伊﹞
當我哋影完合照時，老婆就留喺隻馬仔度，我就落番去同佢影馬仔，一影完老婆之後，佢就由隻馬仔度嗌落嚟叫我唔好走，我都未知咩事時，佢就叫我踎低同我影相，咁我就照做啦，影完之後，老婆話比我知，原來地下都有隻馬仔o架，哎呀~~~點解我頭先睇唔到o架~~~
呢度就係我開頭所講，好多人都留意唔到嘅地方，去特洛伊嘅朋友要留意啦！
﹝地下都有馬仔@特洛伊﹞
離開隻馬仔前，影多兩張相先。
﹝馬仔@特洛伊﹞
行完特洛伊就去卡歷奇，即係今晚我哋住嘅酒店，呢間酒店係成個trip最最最驚喜嘅地方，因為真係好靚！點靚法？陣間再講。
坐咗唔知幾耐車，架車就駛咗入條巷仔度，條巷仔唔係太闊，但都夠比架旅遊巴過，一見呢d咁嘅景，就聯想到呢間酒店唔會好得去邊，我相信同團d團友都係咁諗，原來我哋睇嘢睇得太表面嘞。
一落車，就停正喺門口，大門無乜特別，一入咗酒店正門就不得了啦……個lobby 喺短短數十秒內，就只係淨番領隊同導遊喺lobby辦理緊攞房手續，仲有，就係團友嘅行李，究竟發生咩事，可以令到d團友連行李都唔要就走咗去呢？
原來，lobby再出去就係一個泳池，泳池再出d就係一個小碼頭，而小碼頭直指嘅就係愛琴海，當時，已經接近黃昏，太陽都差不多落山，如廝美景，個個都一枝箭咁衝出去影相。
﹝日落@愛琴海 1﹞
原本，我都唔諗住跟風走出去，同老婆傾咗兩句之後，就跟住大隊一齊出去，因為等得派鎖匙，再聽埋個領隊講嘢後，相信個太陽已經落咗山，而且，我哋應該趁住未係有太多團友出去時，先影一d無『閒雜人等』嘅相先，所以，我哋放低行李就即刻出去影相。
出到去就已經有部份團友影緊相，仲有d好唔識趣咁走咗出個碼頭，大佬呀，諗下人哋啦好唔好，個個都爭住同個愛琴海 & 日落影相，你就走咗出去阻住晒，幸好，同團有一pair團友都好幫忙，我哋互相幫大家影，總之個目的就係有自己，有愛琴海同埋日落，至於d『閒雜人等』就用我哋去遮住佢啦！
﹝日落@愛琴海 2﹞
我哋影夠就撤退，一來，唔好阻住人，二來，都要搵番自己d行李，三來，有d肚餓，想快d食嘢。一番到lobby就只係見到領隊同埋d行李喺度等我哋，跟住我就講咗句『都唔知呢班咩人嚟ga，為咗影相，自己d行李都可以唔理，仲要癲到連d手信都可以唔理，呢d就係香港人，哈哈~~~』
領隊都知道唔可以一次過等齊人，所以就見到人就派鎖匙同埋指示我哋上樓上食飯，而今次又見證到咩叫『執輸行頭』，我哋係屬於早上去嘅團友，所以，我哋一上去就坐晒d近窗口位，一邊食一邊睇住個愛琴海，so good~~~ 而遲嚟嘅團友，就只可以帶住失望嘅眼神望住我哋，而佢哋就要坐遠d。
話就話坐近個窗，但又不至於window seat，所以我哋就趁住有空檔，就走近個窗再影多次呢個日落 & 愛琴海，再加泳池。
﹝日落@愛琴海 3﹞
呢一餐都係自助餐，d 嘢食好咗d，唔知係唔係個景夠醒神，搞到d 嘢食都覺得好食咗呢？見心情靚，就比咗 5LT 要咗枝啤酒同老婆一齊飲，呢一餐有老婆一齊，有嘢食，有嘢飲，仲有靚景睇，人生一樂也！
食飽飯就番房休息下先，呢間酒店係一d西班牙式2-3層高嘅屋仔，我哋間房有個露台仔，望出去就係頭先個泳池同埋個愛琴海，由於今日都幾熱下，所以沖完涼先至落去四圍行下。
﹝房間@愛琴海旁酒店﹞
今次嚟土耳其有一個目的，就係影星星，之前有一兩晚可以試下影，不過，由於太攰嘅關係，所以無影到，今晚心情好，個地方又正，而且仲有個碼頭仔方便埋tim，所以我哋就走咗去碼頭影星星。
一路行出去嘅時候，發現有好多土耳其嘅學生都嚟咗呢度，聽領隊講，土耳其係會比d學生去下旅行體驗一下，而呢個碼頭就集結咗好多學生喺度，好熱鬧，由於土耳其人對亞洲人情有獨鍾，所以我哋2個喺呢個碼頭咁耐，就比d學生望咁耐。我都唔理佢哋咁多，佢有佢哋吹水，我哋有我哋影相，set好腳架就影星星。
買咗呢部 prosumer 嘅 dc 咁多年都未用過嚟影星星，望住部機都唔知點 set 好，最後，都係用 manual mode，iso 800最細光圈最慢快門影，希望有d成績啦。
用呢個 set up 影一張星夜要差不多一分鐘，試咗幾張之後，都係用 iso 200最細光圈最慢快門影最好。雖然影唔到星星嘅色彩，不過，可以影低呢個喺香港睇唔到嘅星夜時，我真係好開心，喺香港，見到10粒星星已經好幸運，分分鐘要企定定慢慢搵tim。
喺呢度，望上個天一陣間，等對眼適應咗個種黑暗後，d星星係多到你數唔晒。
﹝星夜@愛琴海﹞
當我哋四圍望時，比我哋見到『海星』呀！下圖左下角最光嗰粒星，就係我哋兩公婆所叫嘅『海星』，並非喺海度見到嘅海星，至於點解叫海星就唔詳細講。
好多時，我哋放工番屋企時，都會見到呢粒『海星』，今次嚟到土耳其都見到佢，唔通佢都跟埋我哋一齊嚟？佢就好啦，唔洗比錢就有得去旅行……
﹝海星@愛琴海﹞
一路影嘅時候，個夜空都好清澈，完全無雲，亦都無諗過會有雲，影多兩張之後，個天竟然有雲，仲好多tim~~ 所以就唔再影lu~~
今晚真係好滿足，估唔到成個trip去到最後嗰晚先至變得咁精彩。之後，就同老婆番上房執好行李，因為聽日就要離開土耳其返香港。當我哋差不多行到番房時，我同老婆講不如聽朝早d起身出嚟影日出吖，老婆都話好，咁我哋就懷著一份期待嘅心情執嘢同瞓覺。
Day 6行程到此為上，明天請早。
留言列表
