松此放眼看世界

﹝2010年9月28日﹞

﹝卡歷奇 > 伊斯坦堡﹞

今日嘅景點有好多，由卡歷奇出發，坐3-4個鐘頭車去到達達尼海峽，坐『大孖車』過海，即係上層載人下層載車嘅渡輪，過海之後就到達 Tepekent；食飽飯就會去伊斯坦堡參觀杜瑪伯爵水晶皇宮，之前加插一段被抄牌嘅小插曲；由於時間緊迫，團友們被分開3隊，我哋就跟領隊坐電車去其他景點參觀，其他人就坐旅遊巴去大市集行。

分道揚鑣後，我哋就去睇杜伯奇皇宮同埋地下水宮殿，然後就番大市集行下，行完之後就同之前嘅團友會合食飯，食飽飯就出機場番香港，行程緊密嘅一日呀！

好，講完個框框就開始今日嘅行程。

仲記得尋晚我話同老婆今朝出番個碼頭影日出嘛？我哋緊係記得啦，仲好早起身tim！一出到去個碼頭就搵個好位等日出，等咗10分鐘左右，個天開始光，我就發覺有d唔對路，既然個天開始白，點解唔見個太陽側邊d光？我突然間醒起，尋晚我哋成棚人行李都唔要，都要衝出嚟呢度影日落，既然睇到日落，呢邊即係西邊啦，太陽東邊升起嘛，呢兩條『茂里』走去西邊睇日出！真傻瓜，哈哈~~

原來我份人比較鐘意玩photoshop，諗住日落都已經咁靚，日出都應該差唔多啦，所以喺個心裡面key個太陽上去，個心key完都唔夠，仲想喺現實中影番張相對比一下，真係超低能呀！我之前同老婆講呢件『糯爆』嘅事一定唔可以比人知道，但係一世人又有幾多次會『糯』得咁緊要吖？所以一定要『公諸同好』！隨便笑啦！

既然無日出睇，咁就喺呢度駁下相啦，先企喺碼頭影番埋去酒店先。

﹝由碼頭望番去嘅酒店一帶﹞

跟住就行番去酒店泳池附近，再駁多張愛琴海先。

﹝由酒店望出去嘅愛琴海﹞

呢度真係好靚，有d唔捨得走，不過唔走唔走終須走，番到上房檢查多次仲有無嘢執漏，臨出門口前，走出露台同呢間酒店影多張相先，『有泳池，有愛琴海，呀松看著是好的，這是在土耳其的第八日』。

﹝酒店泳池 + 愛琴海﹞

呢一間就係我哋住到唔捨得走嘅酒店，ida Kale Resort Hotel，臨走前都同佢影番張相先，如果有朋友有去到愛琴海一帶嘅酒店住過嘅話，記得話我知，我都好想知道呢一帶嘅酒店係唔係都係咁正，又或者，我今次住呢間已經係最cheap呢！

﹝卡歷奇 ide Kale Resort Hotel﹞

等齊人就驅車去達達尼海峽坐『大孖車』，正如之前所講，大孖車即係上層載人下層載車嘅渡輪，以前香港都有呢d船，比較深印象嘅係佐敦過中環，同埋觀塘過西灣河，我好鐘意一上船就喺上層食個麵，之後就走落樓下吹海風，然後就由下層上岸，不過家下好似已經無晒呢d船lu~~

不經不覺間，我哋就已經到達卡歷奇，達達尼海峽附近，呢一帶落過吓雨，亦都係我哋咁多日以嚟嘅第一場雨。

﹝卡歷奇達達尼海峽附近﹞

再行多一陣，我哋就開始上船lu

﹝上緊大孖車﹞

好快趣，我哋就已經連人帶車一齊上咗船，架車一停定，我哋全部人就上晒上層，指定動作就當然係四周圍影相啦！出發前就同個達達尼海峽影張相先，左手邊就係我哋嘅目的地 ─ Tepekent，右手邊係卡歷奇。

﹝Tepekent & 卡歷奇﹞

﹝大孖車@達達尼海峽﹞

開船後，有團友嫌大風得滯，就走咗入室內地方坐坐，我哋就未影夠，繼續穿梭於上層，當行到船尾位置時，見到個天好正，有大光照射住卡歷奇，有人話呢d光叫『耶穌光』，其實我都唔知點解會咁樣叫，不過我就好想知，耶穌再來時，係唔係咁樣裂天而降呢？

﹝大光照射住卡歷奇﹞

影咗一陣相之後，我哋都覺得有d凍，所以就走咗入室內小休一陣，呢度d櫈比油麻地小輪好好多，最少唔洗坐『冷板櫈』先啦。

﹝室內@大孖車﹞

小休咗一陣之後，我哋又繼續出去影相，喺度又見到土耳其眾『多』之一，就係熱情嘅土耳其人，當我一行過同佢哋 eye contact 過後，佢就示意想同我哋一齊影相，既然人哋咁熱情 & 大方，咁就影一張啦！

﹝熱情嘅土耳其人﹞

同呢幾個土耳其人影完相之後，我哋就走咗落下一層影相，喺個係船尾嚟嘅，由於唔係太多車，所以我哋可以睇得好清楚架大孖車係咩樣。

﹝下層@大孖車﹞

大約半個鐘左右，我哋去到伊斯坦堡lu~~ 即係再玩多陣就番香港，點解d時間過得咁快嘅！跟住我哋又再飛車去食飯，我哋有一段車程都係沿住達達尼海峽行嘅，幸運地又見到耶穌光。

﹝耶穌光@達達尼海峽﹞

之後，就開始遠離海邊進入內陸，咦？點解有隻艇仔喺屋頂嘅？唔通屋主驚住會有洪水，所以一早搵定隻艇仔，以備不時之需？

﹝艇仔在屋頂﹞

再行多一陣，我哋部車就比人截停咗，原來係有警察要查個司機d資料。

喺歐洲，每個司機都係有隻 disc，開車前就放隻 disc 入去部車度，一開車就開始記錄住佢嘅行車資料，例如佢係邊個，幾點開工，一日揸咗幾多個鐘頭車，有無超速等，好不幸地，個司機要食『牛肉乾』，我唔知佢有無超速，不過我哋 day 4 當日佢一定揸車多過 12 個鐘，而歐洲有個規定，係唔比d司機揸車多過 12 個鐘，因為驚佢哋太攰而發生交通意外，如有違反就罰錢了事，我哋個司機就咁比人扣咗錢，真可憐……

我唔係好記得個司機會比人罰幾多錢，喺佢比人 check 嘢同食牛肉乾時，我哋又影相，原來土耳其d公共巴士好 colorful，下圖有四部唔同顏色嘅巴士，除咗車款一樣外，你又見唔見到佢哋有咩共同之處吖？

﹝土耳其公共巴士﹞

你有無發現呢四部車個車尾都係『dup』低d嘅……我相信係因為太多人搭車，而且d人都坐晒近車尾，所以就搞到條尾轆避震『dup』晒，哈哈~~

抄完牌就繼續行程，食飯是也，part 7b再講！