﹝2010年9月28日﹞
﹝卡歷奇 > 伊斯坦堡﹞
喺伊斯坦堡食飽飯之後，就繼續我哋緊密嘅行程。
今次又再路經呢條唔知咩橋，上次同今次一樣，條橋都係有好多人喺度釣魚；而唔同嘅就係多咗我哋嘅一份失落。因為無得喺呢個博斯普魯斯海峽遊船河，唉……
﹝無言@伊斯坦堡﹞
過咗一陣，就去到呢間懶係高級 & 矜貴嘅杜瑪伯爵水晶皇宮，點解話佢懶矜貴呢，陣間再講，入門口前﹝其實呢張相係行完補番影嘅﹞就緊係要同佢影番張相先啦，如果唔係，大家又點會知佢懶矜貴呢！
﹝杜瑪伯爵水晶皇宮門口﹞
我話佢懶矜貴，係因為：
1﹞全世界人入門口一定要包好對腳，唔好踩爛佢d地毯呀；
2﹞場內完全禁影，驚死人公開佢d秘密咁，比得人入去睇仲有乜秘密吖；
3﹞驚死你班遊客玩偷影，好多『食Q』睇住你；
4﹞場內講解一定要由當地人講，唔識土耳其話就跟住行啦！
原本係可以分開英語團同華語團去行，點知呢間嘢突然轉軑，取消華語團，要我哋跟住前面嗰團唔知咩語團一齊行，領隊就緊係夾個當地導遊同d職員理論啦，最後我哋係輸家，唯有跟住行lor~~
﹝包好對腳先啦~~﹞
領隊同我哋講佢都好無奈，之前都唔係咁，既然呢度係人哋地頭，佢話乜就乜啦，一係就唔好睇，要睇就要聽話。咁咪照跟住人哋行lor~~ 前面就係人哋個唔知咩語團，我哋就同佢哋隔開少少，領隊就用廣東話去同我哋介紹，點知前面班人『shhh』我哋，話我哋嘈住佢哋，今次就到個當地導遊出手嘈番佢哋，結果，我哋由一團人變做兩團人，我哋就繼續做番一團廣東話團。
之前講過話呢間咁嘅嘢巴閉到唔比人影相，偷影咗而又比佢捉到就要即場delete，但我眼見呢班『食Q』就係隻眼開隻眼閉嘅，講白d，即係歧視，當地人就點都得，亞洲人就睇到實一實，超！唔影咪唔影lor！
一路行都無乜好細心留意佢呢個爛鬼皇宮，行到去佢個生招牌水晶燈時，我只係不屑咁望咗佢兩眼，幾多噸重又點吖，好勁咩！污糟到死，好心搵人整乾淨d先比人睇啦，懶巴閉咁！
好快趣就行到出門口，都不知幾開心呀！一出門口就見到個博斯普魯斯海峽，諗住可以行出少少同個海影張相，點知又係唔比lor！！人哋話呢個碼頭以前係比d蘇丹專用嘅，好高級o架，不過係以前嘛，到今日仲蘇乜丹吖，佢仲要巴閉到搵個軍人喺度守住，守住咪守住lor，做乜仲要揸埋枝槍呀！大笨象咩！真係唔『妖』佢都唔得！
﹝博斯普魯斯海峽﹞
下面張相就係行到去隻『大笨象』附近影嘅，正中間就係睇完個爛鬼皇宮個出口，如果唔係有d咁不愉快嘅經驗的話，相信影同睇呢張相嘅心情都會好d。
﹝杜瑪伯爵水晶皇宮出口﹞
我比較鐘意行呢個皇宮嘅外圍，有好多建築物都幾靚吓，好似我身後呢度閘咁，如果天氣好d，我相信影出嚟嘅效果會更好。呢度閘就喺個正門嘅左手邊。
﹝唔知叫咩名嘅閘﹞
望望錶，已經差不多夠鐘集合lu~~ 一去完廁所出嚟，老婆就即刻拉咗我入間紀念品店，原來行咗咁多日，終於喺度見到一個鐵做嘅鎖匙扣，諗都唔諗就決定買咗佢。有人話點解我仲鐘意買鎖匙扣，我就係鐘意佢夠地道夠hardsell，一睇就知喺邊度買，就算係去日本，我都一樣係會買鎖匙扣嘅！
快快手買咗之後就出去大門口集合，臨出門口前，同佢個唔知咩塔留個念先。
﹝到此一遊@唔知咩塔﹞
出咗嚟之後就搞笑lor~~ 我去咁多次旅行都未聽過 & 經歷過『盪失路』，但今次有幸比我見到同團有兩個團友走失咗！可能你會覺得我黑心，人哋人生路不熟，走失咗就會好驚，好應該搵佢番嚟，無錯，開頭我哋都係咁，只不過比我察覺到佢講大話，即係搵著我哋成團人嚟搞，仲洗可憐妳！
嚟參觀嘅時候，領隊已經講好咗幾多點出番嚟門口等，大部份團友已經到齊，就係有兩母女未出現，呢兩母女就係之前提過喺泳池影相呀，唔比個女食嘢，硬係要拉走個女出去食嘢嗰兩母女。
當地導遊就四圍搵佢哋，而領隊就打佢哋手提電話搵人，人又搵唔到，電話又無人聽，結果等咗唔知幾耐之後，領隊決定過對面等上車先，等過馬路時又影一餐，哈哈~~
﹝等過馬路時無聊搵嘢影﹞
呢個嘢好震o架，痴個背脊埋去可以做 massage 呢~~
﹝行人過路器﹞
呢度就係比薩達斯主場嘅球場，都係喺杜瑪伯爵水晶皇宮對面。
﹝比薩達斯主場嘅球場﹞
等過馬路時又見到d土耳其巴士，今次呢d比之前所見嘅大，而且靚好多。
﹝土耳其巴士﹞
我哋過晒馬路上旅遊巴之際，當地導遊終於搵到呢兩母女，一上車，個呀媽就『沙晒冧』，話要大家等真係唔好意思，因為佢見個皇宮無乜嘢好睇，就好快咁走咗出嚟，諗住上旅遊巴等我哋，點知一出門口就盪失咗路 wor。
一早講咗門口等啦，上旅遊巴等？妳知部車擺邊咩？一聽就知妳講大話啦！都費事踢爆妳。就係因為佢哋，搞到我哋無咗好多時間，餘下行程變得有d麻煩，最後決定兵分兩路，之後再分兩路。
唔參加自費項目嘅，就留喺旅遊巴上，由司機車佢哋去大市集行；去杜伯奇皇宮嘅就跟領隊坐當地電車去。老婆都不知幾開心，因為一開始 plan 呢個團時，我哋都已經諗緊有無d空檔位，可以比我哋自己坐吓當地交通，點知一個『盪失路』就幫咗我哋，哈哈~~
﹝土耳其電車 & 車站﹞
呢一個應該係總站嚟嘅，好多人等車，基本上，一開車門就無晒位，不過秩序比香港好，無爭位嘅情況出現。對於我哋嚟講，有無位坐已經唔係問題，有得搭電車已經好開心lu~~ 上得車就當然要『到此一遊』啦！
﹝土耳其電車車廂﹞
我哋就係由左手邊第一個站 - Kabatas 出發，好似坐咗 6 - 7 個站就落車，原本諗住落咗車都同個站影番張相，但係領隊叫我哋行快少少，否則真係唔夠時間，所以我哋都好聽話唔影相……住。我會喺 part 7c 再話比大家知我哋點樣可以邊行邊影，又唔會拖慢大家個行程，留意啦！
﹝土耳其電車路線圖 1﹞
﹝土耳其電車路線圖 2﹞
留言列表
