﹝2010年9月23日﹞
伊斯坦堡機場 > 聖蘇菲亞教堂 > 藍廟 > 安卡拉Alkin Hotel
其實個日期可以改為9月22日，因為夜晚集合，23日一早去到土耳其，仲可以喺空中追逐中秋嘅月光，一直追到去伊斯坦堡，係咪好浪漫呢~~ 講完我都有d想嘔呀！
呢日我覺得好特別，因為一朝早要攞晒所有行李番工，收工後食埋飯，然後再上番公司攞行李，就喺公司樓下等機場巴士入機場集合，一個超smooth嘅安排，哈哈~~
更特別嘅係粟米都係當晚差不多時間起飛，而佢就飛去大不列顛，我哋仲可以送佢機tim，不過今次唔同一般送機，我哋係同佢一齊入閘，過關，一直行到去佢個登機閘口，我都係第一次咁樣送機，都幾得意吖~~ 粟米就話好感謝主，為佢預備2個天使帶佢上飛機，因為佢自己一個人搭飛機會有d驚wor~~ 因為未得粟米同意，而我亦都無問，所以唔post粟米d相。
送完粟米，我哋就喺機場四圍行，見到有個兒童天地，地下舖咗個飛行棋比人玩，不過唔知有幾多人真係會玩呢~~
﹝飛行棋﹞
由於用咗一d時間去送粟米，所以無乜時間行下入咗閘嘅香港機場，好快就行咗去預備上機。
﹝42號閘﹞
大約11個鐘左右，就由香港飛到土耳其嘅伊斯坦堡，降落嘅時間大約係當地早上嘅5點幾，你問番我喺機上點渡過11個鐘的話，我真係無乜印象，好似都係打下機，訓下覺，食下野咁lor~~不過就真係唔係咁訓到。
﹝飛到伊斯坦堡lu~~﹞
你睇，離開機艙時個天都仲未光，一落地就好開心，因為可以再次“腳踏實地”咁做人啦！
﹝仲未天光嘅伊斯坦堡﹞
一落飛機就行過對面搭巴士過移民局。
﹝跑道上嘅機場巴士﹞
一去到機場唔係過移民局，而係交“水費”，坐咗咁多個鐘，總有d水要交嘅，呢度個廁格都幾得意，按2下制可以慳水？唔係用多d咩？
﹝趣怪提示﹞
呢度d移民局人員普遍都ok快手，不過我排緊呢個就超慢，其他人過晒關我呢度只係過到1-2人，真係慢到無人有~~
﹝超慢嘅8號仔﹞
過完關就係唱錢，建議大家都係喺行李帶附近嘅bank唱錢，個rate會好過出咗機場唱，呢度有幾間bank都可以唱錢，不過就唔識睇邊間個rate好d。
﹝機場內唱錢的bank﹞
呢d就係土耳其里拉，當時個rate大約係 LT 1 ﹝里拉﹞ = HKD 5.30。
﹝土耳其里拉﹞
原本領隊話即刻去今日行程，不過當地導遊話太早，去到個境點附近都係等，所以叫我哋喺機場遊蕩一個鐘左右，咁我哋就行咗一陣，搵咗間咖啡店飲杯咖啡休息下，同老婆搵個位坐低之後，我就去買咖啡啦，仲揀緊咖啡時，有2個職員指住我部相機話要影相，但係奇就奇在用我部機影佢哋2個，佢哋就只係想我做影相呢個動作，而唔洗比個email我，叫我send番張相比佢，真奇怪~~
買咗杯好貴嘅咖啡後﹝大約HKD50﹞，我就梗係捉番佢o黎影相啦~~
﹝與土耳其人合照﹞
再睇番呢張相，我都覺得我同佢有好多好相似嘅地方，身高啦、髮型啦、姿勢啦同埋件衫，哈哈~~ 唔通我哋係同事？
﹝咖啡店一角﹞
我哋就係幫趁呢間咖啡店，右邊角落就係我哋頭先坐嘅地方。
﹝Gloria Jean's Coffees，點解coffee要加s？﹞
集合之後就開始行程，第一站係去聖蘇菲亞大教堂，除咗景點係主要影相嘅地方之外，沿途嘅景色都唔可以放過。
﹝沿途嘅舖頭﹞
途經比薩達斯足球隊﹝BJK﹞主場球場。
﹝比薩達斯主隊球場﹞
落車地點係聖蘇菲亞教堂同藍廟中間嘅公園仔，呢個公園仔一帶有好多合法嘅流動小販攤檔，身後嘅係賣土耳其麵包嘅小販，d麵包都幾出名o架，不過我無買到，有團友話好硬呀~~
﹝公園仔外嘅麵包小販﹞
由於聖蘇菲亞教堂未夠鐘開門，我哋就喺公園仔行下影下相，閒逛中就發現咗土耳其眾『多』嘅其中一多：『貓』，d貓一d都唔驚人，隻隻貓都好樂意比人摸呢~~
﹝土耳其花貓 - 眾多貓咪中我最鐘意呢類貓﹞
每個參觀嘅景點都會派一張入場券，今次係小羊羊參觀蘇菲亞教堂。
﹝小羊羊參觀聖蘇菲亞大教堂﹞
呢個聖蘇菲亞教堂個入口同門口都唔係好有氣派，唔講都唔知佢咁出名。
﹝聖蘇菲亞大教堂門口﹞ ﹝聖蘇菲亞大教堂內部﹞
場內有部份地方係唔比開閃燈嘅，唔洗擔心會比人鬧，因為唔用得閃燈嘅地方就會有『實Q』睇場，同埋會有個牌話比你聽唔用得閃燈，總之乖乖地聽話就ok啦~~
﹝天國之門與地獄之門﹞
﹝唔比用閃燈影嘅壁畫﹞
趁住仲喺樓上，影番個全景聖蘇菲亞大教堂比大家睇下先，領隊話呢個教堂1年365日都會有裝修，只不過係唔同地方吧~~ 我影相嘅地方係入口嘅左上方，而裝修緊嘅地方就喺我下面，所以影唔到，hehehehe~~~
﹝聖蘇菲亞大教堂全景﹞
喺地下嘅一個角落，有一個幾靚嘅閣樓仔，係比當時嘅蘇丹o黎守禮拜嘅，唔知家下仲有無呢~~
﹝比d蘇丹守禮拜嘅閣樓仔﹞
其實地下嗰層都仲有好多嘢睇，圖書館呀、大花樽呀等等，仲有一個『洞』，好多人排隊塞隻手指公入去轉個圈，據了解，如果能夠成功轉到一整個360°嘅圈，呢個人就會行好運，因為太多人排隊，所以我哋無試到。擔心轉唔到一整個圈？唔洗怕，我教你！
Assume你用右手，先將手指公塞入去，然後手腕逆時針轉到盡，呢個時候，你應該係右手食指向下，手指尾向上，記住食指個位置，跟住順時針轉手腕，你隻食指應該可以去番個起點，恭喜你！你係一個好運嘅人！唔明？都唔怕，在場嘅『實Q』會教你o架！
行番去個入口同個大殿之間個走廊仔度，都仲有一d展覽品喺度，不過就唔知係乜，都無乜心去研究佢，只知道係一個好大嘅……面盆，係…o掛@@
﹝放喺走廊嘅面盆﹞
出咗去門口之後就四周圍行，搞笑嘅係我又再遇見土耳其眾『多』之一嘅貓，今次嘅相遇唔係佢行過我摸佢，而係當我半踎跪喺度影相時，隻貓就跳咗上我大脾，我初初以為佢只係對前腳踏咗上我大脾，而後腳就企嘫地下，當我影完相一睇，隻衰貓竟然成隻企咗上我大脾，仲望住我同“meow”我 tim~~ 可惜無影到相，我只係就咁起身，佢就跳走咗，但係就留低4隻貓腳印比我@@
行過少少就見到一d比人潔淨嘅地方，因為見唔到有人o係度潔淨自身，所以唔知道仲有無水出。
﹝比人潔淨嘅地方﹞
之後行程轉 part 1b，陣間見！
留言列表
