﹝2010年9月23日﹞
伊斯坦堡機場 > 聖蘇菲亞教堂 > 藍廟 > 安卡拉Alkin Hotel
行完聖蘇菲亞教堂之後,就穿過剛才行過嘅公園仔,過對面行藍廟,要影得靚個藍廟就唔可以行得太近,除非你部相機夠wide啦,否則,會影唔晒佢6條宣禮塔。
﹝行經中間個公園仔時影到嘅藍廟﹞
由於有部份團友仍然『滯留』於公園仔內,已經行到去藍廟前面嘅團友,就繼續影住相o黎等。
﹝合照於藍廟前﹞
土耳其眾『多』之一嘅貓,真係隨處可見,隻隻都唔驚人,任摸唔嬲。
﹝好『多』嘅貓﹞
土耳其眾『多』之二嘅『雀仔』,你睇下個天,真係多到呢~~~
﹝好『多』嘅雀仔﹞
入到去藍廟就係香港人最鐘意嘅玩意,就係排隊!咪睇佢好似好多人咁,實際上,廟入面仲多人呀,下面幅圖所見嘅隊伍,唔洗10分鐘就已經入晒去lu~~
﹝排隊入藍廟﹞
入藍廟係要除鞋嘅,所以喺入口處會有膠袋提供,袋好對鞋就可以入去。你一見到下面張相就會話唔係咁多人吧,梗係啦,圖中所見嘅地方,係藍廟d人劃開咗唔比人入去嘅地方,我企到去最前仲要舉高部相機,先可以避開大多數嘅人咋!不過影影下我聞到陣臭味,原來係大家嘅『腳味』,個個除晒鞋就咁行入去,仲要咁多人,唔臭先奇!
﹝藍廟內守禮拜嘅地方﹞
每年都會有3個星期左右比d穆斯林齋戒,一到齋期,呢個藍廟就唔會開放,只會比d教徒入o黎祈禱,所以報團 or 自由行都好,記得問咗人哋土耳其個齋期係幾時,如果唔係就睇唔到藍廟呢。
藍廟點解會叫藍廟呢?一睇就知,唔洗多講啦!
﹝藍廟嘅天花﹞
睇得唔清楚?駁長d張相比你睇嘞,睇到未呀!
﹝藍廟一角﹞
其實呢個藍廟喺設計上有好多嚠可以講,又幾多條柱又幾多個圓頂呀,我就唔多講啦,自己上網搵資料啦!由於穆斯林嘅社會裡面,男尊女卑係分得好清楚嘅,下圖所見就係一個『女性專用祈禱室』
﹝女性專用祈禱室﹞
女性都可以入廟祈禱,不過就一定要去個『專用祈禱室』,因為大廳只係比男人用嘅。呢種文化同香港真係好唔同,喺教會祈禱又邊有分男賓部女賓部吖,一齊啦,麻鬼煩!當我再諗多諗嘅時候,就醒起保羅當年都有同d人拗呢個傳統,所以呢……文化呢家嘢,真係各處鄉村各處例呀~~
藍廟出面都有一個地方係比人淨身用嘅,佢哋好似話洗下條頸,洗下塊面同對手,就已經叫做潔淨咗,呢度d水龍頭係用得o架,因為我都有洗手,哈哈~~
﹝淨身用嘅地方﹞
行完藍廟之後,就出番o黎繼續影相。喺個公園仔附近,除咗剛才所見嘅麵包小販外,仲有賣土耳其雪糕小販,正如網上資料所講,呢類雪糕小販係會同你玩嘅,佢會用一支長長嘅鐵棍『了』d雪糕,有時又好大動作咁打響佢前面d『啷啷』,目的就係吸引你嘅注意力,繼而幫趁佢。
佢嘅技倆通常都係嗰幾招,不知就裡嘅就會比佢嚇親,知道嘅就得啖笑。
技倆一:親手遞個雪糕筒比你,當你伸手接時,佢就會轉一轉手腕,搞到個雪糕倒轉頭,等你以為跌咗個雪糕落地,其實係無甩到手,目的係玩你!
技倆二:親手遞個雪糕筒比你,當你伸手接時,佢就不斷咁上下左右四周圍郁,等你攞唔到,當你比佢玩到叉起條腰時,佢就會比番你,目的係玩你!
技倆三:佢會用支棍『痴』個雪糕,離遠遞個雪糕筒比你,當你伸手接住個雪糕筒時,佢就用d力扭動枝棍,咁樣,你就只係得番個筒,舊雪糕就比佢收番,目的就係玩你!
下圖就係技倆一,你睇個團友,攤開雙手以為真係整跌咗個雪糕,其實係虛驚一場,或者正確d講,係比人玩咗一嘢!哈哈~~~ 唔係個個雪糕小販都玩人嘅,有時唔會玩,有時會用第d技倆同你玩都未定,不過我見到就係以上3種技倆。我有無比人玩?梗係無啦,因為我9日以o黎都無買雪糕嘛~~睇人比人玩就睇咗好多次。
﹝玩人嘅雪糕小販﹞
團友們比人玩完後,我哋就去lunch,呢餐係食土耳其嘅set餐,亦係真真正正領教土耳其國菜嘅威力,奉勸各位跟團嘅朋友,如果你唔鐘意食、討厭食或者從來都唔食的話,你最好就:
1) 唔好跟團去,選擇自由行,自己order食乜都得。
2) 突破自己,跨出勇敢嘅一步,投入土耳其國菜嘅懷抱。
3) 堅持自己嘅口味,絕不讓步,寧願唔食!
咁土耳其國菜係乜呢?就係青瓜同蕃茄!你可以試下上網search『土耳其國菜』,應該search唔到,又或者都係搵番我呢篇嘢,點解?因為呢個咁有名堂嘅稱號係我私人醒佢o架,由第一餐食到最尾一餐,食set也好,buffet也好,呢d國菜係一定有o架,唔單只有青瓜『刺身』同蕃茄『刺身』,仲有蕃茄湯同蕃茄煮牛肉tim~~ 所以,唔鐘意食國菜嘅人就要留意啦~~
﹝土耳其國菜一:青瓜蕃茄沙律﹞
﹝土耳其麵包,即焗o架!﹞
﹝土耳其國菜二:蕃茄湯﹞
﹝雞肉+菜+白飯﹞
由於我係一個食青瓜同蕃茄嘅人,所以呢d國菜對我無乜影響,不過d waiter嘅service就麻麻地,因為個麵包好大份,幾個人分都會剩,而我又唔想浪費食物,所以,到最後食晒生果都好,我都想食埋d包,可能d waiter慣咗做團餐係會浪費好多食物,所以,佢哋一見我哋唔再食嘢時,就想收走檯上所有食物,包括我d包,我阻止過佢哋幾次,佢哋都依然要收,我就依然唔比,佢就好唔願意咁攞起d包,逐塊掉番上我隻碟度,心諗,我哋有比錢,做乜唔比我食?仲有,你隻手都唔知乾唔乾淨,污染我d包呀!
食飽飯就等車去安卡拉酒店,等車嘅時候見到呢個人拉住o架車,賣好多清潔用品,一見到佢就覺得佢好勁,小小一架車仔,可以用嘅空間都唔放過,務求用有限嘅空間,放盡所有可以賣嘅嘢,呢個marketing strategy真係掂呀!
﹝賣清潔用品嘅小販﹞
由於伊斯坦堡同安卡拉嘅距離比較遠,要坐幾個鐘頭車先到,所以我哋會坐2個鐘左右,就會到休息站休息下,去下廁所,買下手信或飲品食品。今次我哋買咗2枝土耳其汽水,另外,都試咗土耳其另一特色飲品 - cay,讀音係『猜』,即係土耳其茶,一杯cay大約係 1-2 LT,放粒糖就飲得,that's it!土耳其人飲得好甜,而我放一粒糖都覺得太甜。
﹝在休息站飲土耳其茶 - cay﹞
之後就繼續車程返酒店Alkin Hotel,領隊話今晚食buffet,一聽就開心,因為可以『自選食物』嘛,可惜,因為溝通出現問題,變咗做set餐,又係國菜~~
﹝土耳其晚餐﹞
食飽就番上房,打開窗,追下月先,果然仲見到8月16嘅月光。
﹝8月16嘅土耳其月光,再附加多一粒星星﹞
而家已經係夜深,所以要訓覺啦,聽日再同大家暢遊土耳其啦,早抖!
留言列表