﹝2010年9月24日﹞
安卡拉Alkin Hotel > 國父紀念館 > 鹽湖 > 地下城 > Asos Thermal Hotel
之前嗰晚間酒店比較普通，由於係歐洲酒店嘅關係，所以係無冷氣嘅，無冷氣咪開窗lor，個窗無蚊紗，一開窗就係一大片草叢，會有蚊嗎？幸好，無蚊，而且氣溫唔錯，少少涼涼地，冚被就少少熱咁啦；由上飛機到訓覺計已經有29個鐘無好好咁訓過，所以，尋晚係訓得好好嘅~~
一如以往，我哋通常都會比morning call早起身，唔洗同人迫之餘，仲可以四周圍行下嘛~~ 今朝個早餐係咁多日以o黎最好嘅，係因為有烚蛋食，仲要係分為3分 or 5分蛋，之後嗰幾日d蛋全部都係熟到透晒，一d都唔好食。
﹝我嘅3分蛋早餐 + 麵包 + 芝士 + 蕃茄刺身﹞
早餐通常都係buffet，選擇都算做多。
﹝早餐buffet檔﹞
食完早餐就番上房，final check下仲有無嘢未pack好，之後就放咗行李出門口，而我哋就走咗去酒店外面四圍行下。
﹝酒店房間﹞
一出到出面，天氣好好，有d涼，帶埋腳架就可以自拍，唔洗搵人幫手。
﹝酒店外嘅景色﹞
其實附近都無乜嘢好行，只係兜咗個圈就番酒店集合。身後就係我哋住咗一晚嘅酒店 - Alkin Hotel。
﹝Alkin Hotel﹞
﹝酒店門口﹞
喺酒店出面見到2部好舊嘅巴士
﹝土耳其舊巴士﹞
成個trip入面，好經常都會見到一d唔知咩嘢飛機飛過，總係會留下長長嘅尾巴~~
﹝唔知咩飛機﹞
坐咗陣間車，就到咗土耳其首都 - 安卡拉 - 嘅國父紀念館，上網用『國父紀念館』去search的話，係好難搵到呢個地方嘅，有見目及此，等我話比大家知呢個館叫咩名啦，佢個館名叫Antikabir Museum，土耳其國父叫做凱末爾，呢度就係安放佢嘅地方，沿呢條斜坡向上行轉左，上幾級樓梯就係國父紀念館嘞。
﹝國父紀念館前嘅斜坡﹞
我哋身後就係國父紀念館，好宏偉，地方好大，可惜我唔識土耳其文，佢d解說我一d都唔明，所以就做番遊客應該做嘅嘢，就係四圍行，四圍睇同四圍影，想體驗真正嘅4D，去土耳其國父紀念館啦！4D = 四維，即係四圍行呀~~
﹝國父紀念館﹞
行咗入去個紀念館之後，就見到左右兩排嘅大壁燈，個大廳嘅正前方就係『安放』國父遺體嘅地方，其實呢個地方只係一個做show嘅地方，各國政要元首去土耳其的話，就一定要到呢度，象徵性送下花圈咁，同埋比人影相lor~~ 至於，真正安放國父遺體嘅地方，就喺出面其中一個展覽館度，當然無得親身去參觀啦，但係可以透過佢個plasma睇下，由於，大部份嘅室內地方都唔比影相，所以無indoor相睇。
﹝安放國父遺體嘅地方 - 做show用嘅﹞
行完indoor就出outdoor行下，呢張相嘅主要背景係牆上嘅文字，只不過比個兵大哥阻住晒吧！
﹝國父紀念館外嘅牆﹞
影完呢張兵大哥相後就比人趕，趕咩呢？就係我個腳架！其實咩地方用得腳架，咩地方唔用得我都唔知，只不過人地『實Q』哥哥叫到，亦無謂同人作對，免得麻煩，咁我就夾番埋個腳架，無縮番短，就咁行去第2度影相，點知佢都唔比，係要睇見我收晒成個腳架先得！我覺得呢個要求有d過份，人多唔比用腳架，我可以理解，但舉目向田觀看，10個人都無，點解唔比我用？不過算啦，嘈都無謂，繼續行程！
之後就去咗紀念館門外右邊嘅長廊行，呢條獅子路好陰濕，留意地下d石塊，石塊與石塊之間就係陰濕所在，行下行下一個唔留神就會失足，一來一回呢條路，我都失咗5-6次足！
﹝陰濕嘅獅子路﹞
行到獅子路最後邊就會有2個展覽館，一個館放咗呢個紀念館嘅模型﹝走廊尾左邊嘅展覽館﹞，另一個館就放咗d大炮﹝走廊尾右邊嘅展覽館﹞。下圖就係個模型。
﹝國父紀念館模型﹞
上圖左上角就係國父紀念館，圖中兩排樹中間長長嘅走廊就係獅子路，圖右下角就係走廊尾嗰2個展覽館。
﹝放大炮嘅展覽館﹞
呢個又係咩地方呢，就係國父紀念館對面，呢個墓碑係放咗第2代國父嘅遺體，不過就唔記得佢叫咩名。
﹝第2代國父墓碑﹞
行完國父紀念館後就要集合啦，時間相當充裕，臨走前都o係門影番張到此一遊照先~~
﹝國父紀念館門外﹞
今次lunch係食set餐，個麵包好大個，有d韌，但係個味道都唔錯，如果一人一個包的話，就已經唔洗再食飯lu~~，除咗麵包外，土耳其國菜繼續登場。
﹝set lunch﹞
今之多o左d新鮮嘢，係蕃茄炒牛肉，咪睇個賣相咁肉酸，其實好好味o架，塗上麵包食一流呀！
﹝蕃茄炒牛肉﹞
飯後有生果，不過係淡到無味嘅西瓜……一片……咁大把，西瓜上面係另外一款可以選擇嘅甜品，稱得上甜品者，真係好甜……@@
﹝飯後果&甜品﹞
好，飯後行程轉part 2b.
留言列表
