﹝2010年9月24日﹞
安卡拉Alkin Hotel > 國父紀念館 > 鹽湖 > 地下城 > Asos Thermal Hotel
食完lunch就繼續行程，途經一個叫鹽湖嘅地方，呢個唔係行程包埋嘅地方，領隊見有時間又路經，所以就帶我哋去行下；呢個湖好大，因為天氣嘅關係，d湖水已經蒸發晒，d鹽就剩番o係度，咪以為d鹽可以比你隨手攞走呀，d鹽已經同個地球成為一體，想掘一舊都唔容易，就算比你掘到，我都唔建議你食咗佢，個個o黎呢到都喺上面行，咁你同『lam』人鞋底有乜分別？
另外，今次影鹽湖比咗一個影相嘅實習機會，影海灘相要+ev，呢個技巧我知道，但從未有機會用過，今次用到lu~~，請睇下加無加ev同加咗ev嘅分別！
﹝無+ev嘅鹽湖，白色嘅地方有d瘀黑﹞
﹝+1 ev嘅鹽湖，白色終於變番白﹞
由於個鹽湖好大，我哋都只係行咗陣間就回頭，因為再行遠d都好，都係睇鹽，只不過係白d吧，所以無再行lu~~
﹝鹽湖嘅乾水草﹞
鹽湖附近都有d舖頭仔賣d鹽製品同手信，不過價錢就比較貴，我就唔會買嘞。
﹝鹽湖舖頭仔﹞
行完鹽湖就繼續上路，向地下城出發。呢個地下城係以前d人為咗逃避比人追殺而建成嘅，入面d路好窄吓，有部份地段仲要踎低行，又或者要『烏』低身行過去。同團有個龍友有個大背囊跟身，重量都有番咁上下，結果一路行一路嗌救命，試過行到條走廊中間停咗喺度，因為對腳頂唔順，所以在此提醒大家，請輕裝行地下城。
﹝地下城入口﹞
﹝比較闊落嘅走廊﹞
﹝請『烏』低身，唔該~~﹞
﹝少d腳骨力都搞唔掂呀﹞
﹝有部份地段光源不足﹞
﹝要踎下啦~~﹞
﹝放心，到此一遊吧，唔洗行入去嘅﹞
行咗半個鐘左右，終於可以出番o黎lu，不過對腳就比較攰，見番個太陽，又可以挺起胸膛都不知幾舒服呀！
﹝地下城出口﹞
玩完地下城就去連住2晚嘅酒店，呢間酒店係全個trip最差嘅酒店 - Asos Thermal Hotel，亦都係我哋2公婆黑仔嘅開始，詳情陣間再講。
其實，土耳其真係好大，淨睇呢幅相都知，一望出去，好遠先有個山，所以沿途有好多平原，圖中所見就係我哹旅遊巴個影，一部坐30幾人嘅巴士被反影後，就有如一部私家車，真搞笑，哈哈~~
﹝旅遊巴剪影﹞
由於景點同景點之間個距離都幾遠下，坐3-4個鐘頭車乃等閒事，所以，我哋已經由仲有太陽嘅時候坐到日落lu。
﹝往Asos Thermal Hotel途中的日落﹞
一去到呢間酒店時，個大堂都算唔錯，但係一上Lift就出事，嗰d Lift門係無sensor嘅，即係平時我哋見Lift門閂埋時，會伸手揚一揚度門，跟住度門就會彈開，right？呢度唔work o架！我縮手縮遲d就會連手都無埋！仲有，唔知係咪部Lift有問題，無論按開門or閂門制都好，佢都會閂門，所以話呢間酒店係一間『黑店』都唔會過份。
我哋住8樓，一出Lift口就漆黑一片，以為歐洲地方搞環保，所以d走廊燈轉晒做有sensor，有人行過先著燈，點知我太抬高佢啦，成條走廊跟本都無著到燈，都唔知佢係慳電定壞燈，總之就盲摸摸咁去搵自己間房。
﹝從Asos Thermal Hotel 8樓嘅lift lobby 望落地下，仲有幾層都無開燈﹞
一心諗住入咗房放低行李就去食飯，點知我哋入唔到房，經我同其他團友嘅房間個門鎖cross check過之後，我已經好肯定係個電子門鎖壞咗。當我落番reception同d staff講呢件事時，佢就換過張房card比我，由於言語溝通問題，我只好相信佢，用佢張card再上房試過，結果都係開唔到。
當時，已經有部份團友已經安頓好，預備落去食飯，我就託其他團友見到領隊時，話佢知我哋仲未入到房，其間有個bell boy路過，雖然佢英文唔得，佢都好盡力幫我，可惜，個問題係個電子門鎖，佢都做唔到d乜，等咗一段時間都無人上o黎後，我就再落多次reception，我見到領隊已經幫我做緊嘢，不過酒店未有人手幫到我，而個staff就再次比過張card我，我即場爆個當地導遊 “It is the 3rd time you give me the card and it doesn't work. Go and check the lock!!” 我知唔關個當地導遊事，但係只有佢先可以幫我話到比班staff知個問題。
最後，又係嗰個bell boy攞咗部機同我一齊上番去，reset個電子門鎖同張card，我哋先有房入，唉~~
食咗餐無乜特別嘅自助餐，即係土耳其國菜啦，炒飯啦，甜到死嘅甜品啦~~由於已經一肚火在先，所以食咗少少就番上房食杯麵。
同呢間鬼酒店嘅不愉快經歷仲未完，day 3再講！
留言列表
