(2012年6月17日)
(香港 > 芬蘭赫爾辛基 > 伊萬洛 > 薩米馴鹿場)
今日嘅行程就係由香港直航到芬蘭赫爾辛基，等6個鐘之後就轉機上伊萬洛(Ivalo)，正式進入北極圈，去到伊萬洛之後，就會直去酒店，放低行李，食個lunch，跟住就去薩米馴鹿場，睇吓鹿同埋認識吓薩米文化，之後就番酒店休息。
計劃半年之後，終於可以踏足北歐嘅土地，Yeah~~
但係一諗到茶會見到嗰班C9，個心即刻涼咗一截，會唔會真係同佢哋同團呢……
今次係坐零晨機直飛赫爾辛基，所以要夜晚到機場集合，我哋一如以往，比原定時間早咗少少到，先報到同埋寄行李，然後就四圍行吓啦；但係再集合時，惡夢就正式開始……我哋真係同嗰幾個C9同團……
算啦，享受行程吧~~搵個登機閘口先啦~~
(AY 070班機，19號閘口)
今次第一次坐芬蘭航空，原來芬航嘅坐位都好闊落，一d都唔頂腳，相信呢11個鐘應該有覺好瞓吧！可惜，偏偏遇到個唔願瞓嘅鬼婆，成機人瞓晒，就只得佢一個會邊睇戲邊大笑，嘈住成機人，唉~~
比人嘈醒咗又無嘢好做，咁就睇吓有咩好睇，原來個電視連接住飛機嘅兩個鏡頭，一個影住機頭，一個影住機底，又幾得意wor 。
(飛機頭嘅景象)
初初睇都覺得幾過癮，但係睇耐咗就覺得好悶，原來揸飛機係悶過揸車好多o架！揸車，至少都會有唔同嘅風景睇，可以上落斜同轉吓彎；而揸飛機呢，眼前就只有天與雲，好悶呀，如果想做Caption Cool的話，先決條件係要望住同一個景10幾個鐘都唔覺悶。
後來唔知幾時個鬼婆靜咗， 我又唔知幾時自己又瞓咗，當我醒咗嘅時候，我就推高個窗望吓街，嘩，正到無朋友呀！搭飛機都可以有日出睇呀~~
(飛機上的日出@俄羅斯上空)
不經不覺間，已經到達赫爾辛基，相信呢一程機無覺好瞓，所以對眼好黑，不過重點唔係呢樣，而係我身邊已經有一d騎呢團友出現，包括西瓜夫婦同埋國產六人組……
(赫爾辛基海關)
如果大家有上網搵資料的話，應該會知道赫爾辛基機場係有好多插頭比人叉電，一排櫈就已經有成10個插頭，真係唔洗擔心電話電腦唔夠電。
(隨便叉電啦@赫爾辛基機場)
由於轉機時間有6個鐘頭，所以我哋有好多時間去行，去得芬蘭，就一定會見到姆明(Moomin)同埋佢個好朋友史力奇。
(北歐招牌人物，姆明 & 史力奇)
之前搵資料時，都知道赫爾辛基機場有好多唔同嘅雕塑睇，所以我哋都四圍咁去搵，終於搵到其中一個。
(好大個嘅雕塑)
唔知你會唔會問點解會有張櫈呢？其實我都唔知，只不過行過又見到，咁咪拉佢過嚟用lor，用完擺番好就OK啦~~
行吓行吓，又比我哋見到個膠樽回收機，之前睇電視目到，今次就親眼見到。其實佢只係一個回收機，無乜特別，但係歐洲政府提倡環保，每個回收嘅樽都會有錢比番你；反觀香港，嘿嘿……回收箱即係垃圾箱，如果香港都可以做到有錢比的話，我相信比錢整機條數仲大。
(膠樽回收機)
望望錶，都只係行咗一個鐘左右，要用6個鐘頭淨係行個機場，實在係太多，所以我哋就行出機場，睇吓有咩好睇先！講你都唔信呀，原來『行出機場』係好冒險o架！陣間再講有咩咁冒險。
出到機場，空氣清新，北歐嘅空氣真係正！話就話出機場行，我哋都只係喺外圍行吓就算，未夠膽坐車出城行，哈哈~~其實大家都估到啦，機場外面根本係無嘢好行， 只不過我哋唔想就咁等時間過吧~~
(赫爾辛基機場外)
行咗一陣都有d凍凍哋，咁就番番入機場，諗住跟番頭先條路行番入去候機室，點知，度門只可以出無得入番去，咁就搵過第二條路啦，結果兜咗個圈都搵唔到條『輕易』入番機場嘅路，結果就問人啦，佢指指樓上，咁我哋就上去啦~~
(難關就在前面…)
上到去先知道，原來要經過個安檢先可以入去機場，呢樣唔驚呀，行到埋去先知道要比埋個Boarding Pass佢睇 ，否則唔準入去，好彩之前領隊已經比咗我哋，如果唔係，就真係要搵領隊嚟救我哋……
入機場吧，唔洗咁嚴呀~~喺香港，想去機場咪去lor，去完T1咪去T2再行，再唔係，番番去T1搭巴士都仲得呀！邊洗pass o架！ 佢要我哋出示Boarding Pass嘅時候，我同老婆都呆咗一呆，之後就醒起自己有Boarding Pass，咁咪即比過安檢lor~~
因為從來冇諗過入機場都要Boarding Pass，呢個係咩嘢鬼地方嚟o架！今次仲要嚟呢個機場好幾次tim~~
終於入得番機場嘞，之後就無再四圍行，搵個Priority Pass Lounge食吓嘢、hea吓就算，老婆有Pass，唔洗錢，我就要比70幾蚊美金，計番港紙都係200零蚊，兩個人除番都OK啦。
可能係收錢嘅關係啦，呢度無乜人，任飲任食，仲有得上網，幾好呀，所以我都要開機上吓網，順便處理一下d Draw Something債，哈哈~~
(仲可以同屋企人Skype~~)
食咗一陣嘢同Hea咗一陣之後，咁就離開呢個好舒服嘅環境，再喺機場行吓睇吓影吓相咁就去集合，同D團友見番面之後，有人問呢幾個鐘做咗D乜，咁我就話出咗機場出面行，不過出面無嘢好睇，跟住個團友就『車』我，話『既然無嘢好睇，咁做咩要出去行？』我就話『就係我行咗出去，先可以話比妳知出面無嘢好行，咁妳先有得『車』我嘛！』哈哈~~
講完兩句就上機，原本都好好天，點知突然落雨，唔知幾個鐘之後嘅伊萬洛有無雨呢……
(下雨天…)
其實擔心咁多做乜吖，唔通見佢落雨就回程番香港咩！繼續飛去伊萬洛啦！
千祈唔好睇少呢一幅圖，北角(Nordkapp)已經喺我哋眼前，根據我哋嘅行程，我哋會去呢度睇『午夜太陽』，見到已經興奮！
(向伊萬洛進發)
唔記得飛咗幾多個鐘，終於嚟到伊萬洛機場，打開機門就見到咁好天，感謝主！
(伊萬洛機場)
呢個機場其實好細，落咗機之後，行幾步路就到。飛機細，機場又細，人手自不然都係少，所以等攞行李嘅時間都比較長，無聊得滯就四圍影相lor，呢個機場仔都好用心去佈置，可能位居北極圈內啦，D佈置都係離唔開d鹿，影吓影吓先發覺原來今日真係好好天！
(伊萬洛機場)
(好好天啊~~)
當我哋等齊晒所有人之後，我哋就去今晚入住嘅酒店食飯兼Check-in (喺度真係要讚一讚翠X，基本上佢哋都會安排我哋去酒店食飯，所以膳食方面真係唔錯，值得推介)，去到酒店嘅時候，但當中卻暗藏『殺機』，因為今次嘅『騎呢』經歷正式開始……
當大家就坐時，就自不然會同隔離團友傾吓計，一開口就即刻好奇怪，唔係佢哋嘅口音有問題，而係用『乜生乜太』去稱呼大家，大佬呀，一開口就即刻時光倒流30年，點解咁奇怪o架~~
其實我有話過比佢哋知我叫『CK』，但係佢哋都係要叫我哋做『林生林太』，唉……
係咁意食飽之後就走咗出去酒店嘅後花園影相，順手呼吸一下北歐嘅清新空氣，呢度有一架爛爛地嘅鹿車，唔知係咪聖誕老人上年派完禮物就整爛咗呢？
(爛爛地嘅鹿車)
原本我都有打算坐上去嘅，不過見佢好似唔多穩陣咁，費事坐爛人哋架車啦，萬一真係爛咗，都唔知點賠番比人，都係企喺旁邊影張相就算吧~~
沿住河邊行都幾舒服，可能空氣好，氣溫適中，仲有四周圍都有好多綠色植物吧，真係有一種好寫意嘅感覺。
(酒店後面)
(今晚就係住呢度)
之後就離開酒店，去薩米馴鹿場，未去馴鹿場之前，我會覺得鹿係一種好馴良嘅動物，好大隻，有一對好靚嘅角，會有少少怕人；而現實中所見，佢真係好大隻，不過對角就唔係想像中咁靚，好似生到岩岩蠶蠶咁嘅……
呢度D鹿都好得意，當我哋行晒入去個鹿場時，隻隻都『射厘眼』望住我哋，完全唔想理我哋，當鹿場主人比咗D食物我哋時，D鹿就變得好雀躍，仲好親民tim，哈哈~~
(馴鹿場嘅馴鹿)
只要有嘢食，D鹿都好少理我哋，你有你摸，我有我食。
(馴鹿場嘅馴鹿)
(小鹿班比？)
玩完D鹿之後，我哋就入咗一間屋仔，聽吓當地嘅薩米人講解一下佢哋嘅歷史，佢哋都有教我哋學用薩米話講1-10，唔好問我點讀，未出呢度個門口就已經唔記得啦！
(薩米人屋仔)
除咗教吓薩米話之外，佢哋都介紹一下佢哋嘅薩米服飾，當然又係有好多都唔記得啦，其中佢哋把刀仔就比較深印象，因為佢哋每個薩米人都會配帶喺身邊，換句話說，呢把刀就係佢哋嘅搵食工具，都啱嘅，北歐地方咁原始，有把刀旁身都可以保護到自己之餘，亦都可以保護到屋企人同埋自己嘅動物。
(薩米人嘅刀仔)
你估吓呢一舊係咩嚟吖？
(你估吓係乜？)
相信你都係估佢係一舊木頭吧，都啱，只不過呢舊木有D唔同，佢凸出嚟嗰舊嘢就係用嚟整杯嘅，聽講話佢生得好慢，所以每隻杯都得來不易，而且唔會一樣樣。
呢隻杯就係咁嘅樣，我哋可以用嚟飲咖啡，而且仲有塊曲奇食，哈哈~~
(薩米咖啡杯)
其實呢個薩米馴鹿場都有D悶悶地，不過好彩，唔洗悶太耐就可以出嚟行吓，我都幾鐘意睇呢D郊區嘅地方，所以開咗門之後，好多團友仲圍住間屋仔影相時，我同老婆已經行咗去第二度影相，正正係因為我哋唔係咁鐘意跟大隊，所以我哋就搵到D好嘢影相，係咩呢？就係鹿角！一副好靚嘅鹿角！
呢個鹿角係吊喺兩棵樹中間，唔多留意的話，就會比佢嘅保護色隱藏咗，真係少D眼力都搵唔到，當我搵到之後，就當然叫老婆過嚟一齊
啦，好快趣，就比其他團友發現咗我哋，當然亦都會見到呢副鹿角啦，佢哋都好好，等我哋兩個影完先埋位影。
(好靚嘅鹿角)
可能大家都會好好奇咁問，呢D鹿角同我哋平時好貴買番嚟鹿茸有咩分別？分別就非常之大，馴鹿嘅角係唔可以食用嘅！靚嘅鹿角可以用嚟影相，唔靚嘅又可以用嚟做乜呢？答案就係做掛衫勾！佢哋話用鹿角做嘅掛衫勾非常之硬淨，可以掛到好重嘅嘢都唔會爛，通常會爛都係爛係收螺絲個位…
唔洗我講，補品VS掛衫勾，大家都知道佢哋嘅分別吧~~
(四圍都有好多鹿角)
臨走前，我見到有條柱，咁就走埋去影張相，有個牌指住『台北 7611KM』，台北同芬蘭嘅伊萬洛嘅距離即係有幾遠呢？
假如伊萬洛係有一條路直通到台北，揸住部車以時速70公里去駛，咁就要行大約109個小時，除番1日24小時，咁樣就即係要不眠不休咁揸4日半先到達，
又真係幾遠wor~~
(指示牌)
番到酒店已經係夜晚，但係點解仲係咁光猛嘅？夏天嘅北歐係永晝，即係無夜晚嘅，如果大家見個天未黑就唔去瞓覺的話，我相信你一路都唔洗瞓！
另外我發現到酒店房間外有個溫度計，我相信呢個設計非常之實用，北歐冬天嘅時候一定好凍，而個溫度計就可以話比大家知室外溫度係幾多，大家唔好睇少呢個溫度計，佢-50°C都可以用得，可想而知，北歐凍起嚟真係可以好凍……
(溫度計)
今日嘅行程就係咁簡單，明天繼續。
留言列表
