（2018年4月21日）
第一天，達明mode：長路遠征，疲倦也未停……
凌晨機
🛫芬蘭赫爾辛基轉機去
🛩丹麥哥本哈根，喺機場就即買火車飛到
🚞瑞典馬爾默，再轉高速火車到
🚅哥德堡，買咗Travel Card後搭巴士返
🚌酒店check-in，放低行李後就搭望吓隻🚌哥德堡號；回程搭船去
🚢食飯，再搭電車返
🚋酒店休息…
今年，我哋又再去北歐，同上年一樣，都係去瑞典、丹麥同芬蘭。不過今年就特別少少，我哋會去玩哥德堡 -- 瑞典第二大城市。
今年嘅安排時間比較急，由攞假、訂機票、度行程到出發，都係短短一個月左右嘅時間，但係都ok嘅，反正都係同老婆去探險吧，見到乜就玩乜啦！
4月20號（星期五），收工後即刻番屋企，沖個涼之後就出機場，到達機場後，唔好理自己有幾肚餓，記得要「攞蛋仔！」「攞蛋仔！」「攞蛋仔！」。之後就諗住試玩自助check-in，點知搞唔到，最後都要埋counter搞，後來問counter個哥哥仔，點解我哋會搞唔掂，佢簡單一句就KO咗我哋：要寄行李就唔可以用自助check-in，講完！
入閘前都仲諗緊食乜，最後都係決定入咗閘先食，相信選擇會多d，點知揀來揀去之後都係揀翠華，唉～食飽後就慢慢行去閘口，預備踏上北歐之旅！
（0025 去赫爾辛基！）
今次依然係坐Finnair，因為佢哋嘅飛機真係好舒服，坐位唔窄，機艙唔嘈，而且好穩定，再加上佢哋嘅飛機餐都幾好食，所以就再揀番Finnair。
（飛機餐 - 晚餐）
就以呢個炒麵做例子，坐國泰（CX）食嘅炒麵係「餅麵」，一叉落去，就係成底麵叉上嚟，「揚」都「揚」唔開；而Finnair呢，d麵係可以「揚」得開，可以逐少逐少食，就只係一個炒麵，高下立見。
（飛機餐 - 炒麵）
好快趣就去到赫爾辛基，跟住就轉機去哥本哈根，去到哥本哈根機場，見到行李帶有幾張鐵鑄嘅長櫈比人坐，原來呢d櫈已經有百幾年歷史，真係唔講唔知……
（丹麥鐵鑄長櫈）
攞咗行李之後，深深地吸一口氣，作好準備，預備去戰地售票處買車飛去Malmo（馬爾默）！！回想番上年喺呢度買飛嘅情況，「戰地」呢個名，絕對唔係浪得虛名，但係今次呢個「戰地」已經停戰，回復番「和平盛世」，竟然可以輕鬆買飛，真係估佢唔到！
（已經回復「和平」嘅「戰地」售票處）
買完飛之後，就去搵月台上車，我哋會坐09：02往Karlskona方向嘅火車去Malmo，大約要30分鐘左右就到。
（等火車去Malmo）
穿梭於丹麥哥本哈根同瑞典Malmo嘅火車，係會經過一條叫松德海峽大橋（Øresundsbron），上年嚟嘅時候，喺哥本哈根上車時，已經要查護照，去到瑞典嘅時候亦都要查，但係今年只係入境瑞典嘅時候先要查，真奇怪，不過話就話查護照，其實都係比d警察望一望就可以，有d兒戲呢。
到達Malmo嘅時候都係09：30左右，跟住就即刻買火車飛去瑞典第二大城市：哥德堡（Göteborg），我哋要坐嘅班次係11：02開出，大約兩個半鐘就到達Göteborg，車費係SEK430兩位。
我哋計劃行程時發現，由Malmo去Göteborg嘅火車班次都好密，但價錢就好大出入，可以平到SEK4xx，亦可以貴到SEK1xxx，點解會咁大分別嘅？細看之下，原來高速車係平d嘅，站站停反而會比較貴！我哋都唔趕時間，一定係買又快又平嘅車飛啦，兩個人，2rd Class，SEK430。
記得善用SJ個網頁啊：
喺自助售票機買飛非常容易，只要你識英文同有credit card就可以，以下係購買程序：
先選擇語言（英文），然後按「Buy Ticket」
選擇目的地，喺「To」一欄打Göteborg，打咗頭幾個英文字母之後，個screen就會顯示「Göteborg」，唔洗再打字，直接揀佢啦，跟住按「Continue」。
按「+」add passenger，因為我哋得兩個人，所以按一次就可以。
再按「Continue」
去到呢一步就要留意，之前所講，唔同班次會有唔同價錢，所以去到呢一步要小心揀班次，我哋所揀個班車係11：02開出，2 Class，車費係SEK430，早一班或遲一班就要SEK744，所以唔想浪費無謂錢及時間的話，呢一步一定唔可以錯。
再按「Continue」
呢一步可以揀有特別需要嘅位，例如：帶單車、帶寵物或帶輪椅，呢d類別係會額外收費，我哋就揀咗「Seat with table」，唔洗額外比錢嘅。
輸入旅客名字，我哋好聽話，打咗個passport name落去，因為驚一陣查飛會對名嘛，後來發現查飛係唔睇名嘅。
去到呢一步，再睇清楚自己有無買錯飛，如果無，就先tick咗左下角「I accept ......」，然後按「Pay」
按完「Pay」之後，當然要比錢啦，呢度唔收cash，所以喺個screen隔離有個付款keypad，插張credit card入去啦，佢哋收VISA、Master同AE嘅。
個Payment screen就唔方便show出嚟，總之就跟指示做啦，一d都唔難㗎！
Yes！！成功買到車飛！！請留意下面張相，重點唔係張車飛，而係車飛嘅背景：SJ counter VS 自助售票機。
我哋初初就係入去個SJ counter買飛，既可以問嘢，亦都可以買飛嘛～入到去問嘢都無問題，一去到買飛呢件事上，個職員好好人咁話比我哋聽，喺度同佢買飛的話，要額外比多SEK100做手續費，如果用出面部自助售票機的話，就唔洗比手續費。精明嘅你，精明嘅我，當然係去門口部自助售票機買飛啦！
講番張火車飛先：
日期：21 Apr 2018
Train：Malmo C kl 11:02，即係11：02由Malmo Central Station 出發
Til: Goteborg C kl 13:25，即係13：25到達Goteborg Central Station
Tag 486，即係第486號列車
Vagan 3，即係第3卡車
Plate 41，即係第41號坐位
成功解讀張火車飛後，就可以預番時間去搵486號列車喺邊個月台。
（成功買到火車飛）
買咗車飛後，就喺車站度搵早餐食，點知無乜舖頭開門，真奇怪，我哋買飛嘅時間已經係9點幾啦，北歐人真係唔洗do？
我哋行咗個圈之後，最後幫襯咗自助售票機右手邊嘅cafe仔，買咗2個包同一杯咖啡。
（輕盈早餐）
食飽早餐後都仲有d時間，咁就喺車站行個圈，發掘一下新事物，比我哋搵到一排locker，可以方便遊客暫放行李，SEK70可以存放4個鐘，SEK80就可以存放一日，如果短遊Malmo一日的話，可以善用呢d locker，咁就唔洗秤住d行李四圍走。
（Malmo Central Station嘅locker）
我哋喺車站行行完一個圈之後，都仲未夠鐘上車，咁就行咗去車站出面，搵一個好近嘅景點 -- Knotted Gun，距離火車站只係2分鐘路程。
出咗火車站之後就要開始注意安全，因為呢度嘅路面係分為：
1⃣ 行車路，即係馬路啦；
2⃣ 行人路；
3⃣ 單車路，呢條路喺1⃣同2⃣中間；
對於我哋呢d香港人嚟講，係會完全忽略呢條單車路，因為香港無單車路呢樣嘢，所以好多時我哋都係企喺單車路等過馬路，亦都為駕單車人士帶來好多不便，所以我哋去到紅綠燈前都會同自己講「睇單車，睇單車，睇單車」，重要嘅事情要講3次。🤣🤣
（Malmo Central Station）
過條馬路，行落幾級樓梯，喺河邊就見到佢，呢個Knotted Gun唔係好大個，係用嚟宣揚和平嘅，詳情就上網睇啦，我唔多講。
（Knotted Gun）
睇睇錶，都差唔多係時候番去火車站，去到火車站再睇睇我哋班車喺邊個月台開先，哦～～係7A，火車站有好清楚嘅指示，所以搵月台絕對唔係難事。
（Malmo Central Station Platform 7A）
搵到月台後，原來架車已經到咗，咁就去搵第3卡先，喺歐洲搭火車同喺香港唔同，喺香港，d車係開定門等你上；而歐洲呢，係要自己㩒制開門，個制就喺車門綠色嘅圓圈。
（第3卡）
上圖個車門仲有一d資訊比大家，坐位1-48喺左邊，右邊係餐卡同詢問處，所以上車後，係先轉左搵位先，搵到位之後，一陣再參觀架火車啦。
入到車廂後，好快就搵到個坐位，你見到我個椅背上有舊灰色嘅四方膠嗎？坐位編號就可以喺度睇到。
（輕鬆搵到位）
歐洲火車基本上係好準時嘅，所以我哋坐低無幾耐就開車嚕。開咗車無幾耐，我就行去餐卡睇吓有咩嘢食賣，呢度有三文治、意粉、小食、咖啡、茶及汽水等等供應，有微波爐可以翻熱食品。
（火車上的餐卡）
坐高速火車由Malmo去Goteborg，大約要兩個半鐘，至於有幾高速呢？其實我都唔係好在意呢個問題，只不過有時都會留意架火車究竟會行幾快呢，初初見佢行188km/ hr，已經覺得好快，點知有一次見到行200km/ hr，嘩～～真係好快呀！
（高速火車真係夠晒高速！）
好快趣就去到哥德堡Goteborg，到步第一件事係搵Visitor Center，之前買咗Gothenborg Pass（我哋叫佢做「高咭」），就係要去遊客中心攞。攞完高咭之後，就要搵便利店買travel card，真係麻鬼煩！好似以前咁，一張city card包埋景點同埋交通，咁就煩少好多嘢啦！
（Goteborg Central Station）
（藍白色嘅係高咭，綠白色係travel card）
去到酒店後，喺大堂check-in時，個reception姐姐話mini bar入面有2枝sparkling wine係送嘅，如果唔鐘意飲，可以用汽水代替，但係二者只可選其一，我聽完之後都覺得有d怪怪地，不過唔理咁多住，攞鎖匙上房先！入到房，第一時間放低晒所有行李，再check check間房，有冷氣，著到燈，有冷熱水，最緊要check埋個雪櫃，好彩，唔係鬼鼠雪櫃*，整體上都好好，再加埋個靚靚風景，正！
*鬼鼠雪櫃*
即係雪櫃內所有嘢都係放置喺感應器上，只要攞起枝嘢飲，即刻計錢。有時真係會多手睇吓有咩嘢喺雪櫃，咁樣就比人計錢，真係好唔抵。另外，呢d鬼鼠雪櫃有個唔好嘅地方，無多餘位置比我雪自己買嘅嘢飲。
（番到酒店！）
小休咗一陣之後，望一望個時間，係瑞典時間下晝3點左右，加番6個鐘，就等於香港時間晚上9點，數數手指，原來我哋已經用咗21個鐘頭嚟到呢度，又好似耐咗d bor～ 再計多次先：
1⃣ 香港飛赫爾辛基用咗9個鐘
2⃣ 等轉機落哥本哈根用咗2個鐘
3⃣ 飛落哥本哈根用咗2個鐘
4⃣ 由哥本哈根坐火車落Malmo用咗1個鐘
5⃣ 喺Malmo食早餐加等火車用咗2個鐘
6⃣ 坐火車上Goteborg用咗2個半鐘
7⃣ 攞「高咭」加搭車返酒店用咗1個鐘
加加埋埋又真係要20個鐘bor～ 好彩係搭夜機，中間可以瞓番幾個鐘，所以呢一刻都唔係太攰，ok，咁就開始今日嘅行程啦！
今日行程係搭車去睇哥德堡號，之後坐船番過對面岸，食飯，番酒店休息。
（是日行程）
出發前，用Google map帶路，搭咩車，點樣行，一目了然，只不過呢，搵到車站唔代表一定啱，因為仲要搵啱方向嘅車先得，所以去到車站之後，要對一對Google map所講嘅方向，如果唔啱的話，過對面就ok。
（哥德堡號）
如果持有「高咭」的話，係可以免費入去參觀，不過我哋去到嘅時候，佢已經閂咗門，無辦法啦，冬天時間玩歐洲係咁㗎嘞，尤其是係呢度，一般嘅博物館嘅開放時間，都係由11點到4點左右，基本上張「高咭」一日只可以用到2次左右，當然，你可以用跑景點嘅方法用盡佢，但係趕成咁，為咩呢？
去到哥德堡號到此一遊後，就沿海邊行，向住碼頭方向行，行到盡頭會見到一個紅磚建築物，叫做Vindarnas tempel，我都唔知佢有咩意思，又或者想紀念d乜，只不過係路過呢個景點吧。
（Vindarnas tempel）
呢個Vindarnas tempel吸引我嘅地方唔係外形，而係佢內部嘅十字形嘅設計，當你去到一個適當嘅位置，然後瞓低喺地下，向上影相，就剛剛好係一個十字架。
（十字架@Vindarnas tempel）
跟住我哋就繼續向前行，沿路真係好舒服，有太陽曬住，但係又涼涼地，又有風吹住，無嘢好趕，好輕鬆寫意咁繼續行，行吓行吓就見到呢條橋，過咗橋之後，就可以去到個碼頭，我哋就係要去呢個碼頭（Slottsberget）等船。
（Slottsberget碼頭就喺對面）
嚟到碼頭時，上一班船走咗無幾耐，咁我哋就等下一班船啦，都係10分鐘左右吧，我哋等船嘅時候，發現身邊其他乘客嘅衣著都好特別，有人著住大褸，有人只係著住件好薄嘅恤衫，亦有人著住件薄褸，而我呢，就著住羽絨加Goretex，同一個溫度下，大家嘅衣著可以有咁大出入嘅？唔通大家嘅體格真係差咁遠？
等咗一陣，就見到有架船嚟緊，亦見到有踩單車嘅乘客等上船，我真係好欣賞歐洲嘅交通工具嘅體貼，帶寵物帶單車都無問題，而其他乘客都唔會對呢d乘客眼啤啤；反觀香港，無論係交通工具同乘客質素，都比人哋國家遜色…
（有船喇～～）
上咗船之後，大部分人都入咗去下層坐，室內嘛，唔洗凍住食風嘛。而我哋就走咗上上層參觀，影咗2張相後，就去番室內坐，哈哈～
坐咗幾個站之後，就去到另一個碼頭，叫Stenpiren，呢度上岸有2個原因：
1⃣ 上岸後會見到一個幾靚嘅建築物
2⃣ 呢個建築物入面有餐廳
（Stenpiren）
從網上資料所提供，呢度應該係間西餐廳，但係我哋見到嘅係一間日式餐廳，當時都諗咗一陣喺唔喺度食，因為原本嘅行程係呢度上岸，轉車去另一個景點，行完之後就喺附近搵飯食，但當時我覺得有d攰，而且呢度個環境同嘢食都幾吸引，所以我哋取消下一個景點，改喺呢度食飯。
由於時間尚早，講緊都係5點左右，所以太陽伯伯仲未收工，喺餐廳都感受到嗰種溫暖，坐低咗之後，都仲有諗過會唔會太早食飯呢～～只不過經過咗咁多個鐘頭嘅旅程，都應該早d食完早d番酒店休息。我哋叫咗個12件壽司拼盤，再加多一個魚生沙律飯，食物質素比我想像中好，正。
（好味日式晚餐）
食飽飯就喺餐廳出面影吓相，之後就返酒店，搭咩車返酒店？搵Google Map啦，當我哋差不多去到巴士站時，已經見到架巴士埋緊站，我哋就跑快2步追上架車，上到車之後先識問：啱唔啱方向㗎！結果係搭錯方向嘅，哈哈～～好彩我哋係用Day Pass，指定時間內任搭，搭錯車又洗咩驚吖！下一個站落車，過對面搭就ok啦！
好快趣就已經返到酒店，放低埋個袋，衫都未換之際，疲倦感突然飆升，係極速飊升嗰隻，說時遲那時快，就已經攤咗落床，都唔知有無3秒鐘，就已經瞓著咗！我依稀知道自己曾經醒過幾次好短嘅時間，但係都係不敵疲倦感，繼續瞓，直至第二日。
據老婆所講，我維持咗同一個睡姿好耐，費事嘈醒我兼冷親，所以同我冚咗件衫等我繼續瞓，而佢就一邊執嘢，一邊期望我會「瞓醒」，但當見到個天逐漸變黑，就知道我無咁快會醒，所以都係熄燈瞓覺。
～Day 1行程完結～
留言列表
