(2018年4月23日)
第三天，張國榮mode：謝謝你風雨內，都不退願陪著我
Hea住玩嘅一日由
⚡雷雨交加開始，見停雨就去咗
🏫哥德堡大學行公園買紀念品，再上咗座紅白色
🖼地標影風景，喺附近隻
⚓船仔餐廳食咗個semi buffet；原本搭巴士係打算去行
🏰堡壘，結果行咗去
⛪教堂就回程，再塞住
🚂火車食住tea落Melmo，喺火車站是旦食份
🍔Burger King晚餐就慢溜返酒店，途中影到好靚嘅
🌉晚霞！
今朝早比雷公叫醒咗我哋，望出窗，烏雲密佈，行雷閃電落大雨，街燈同車頭燈滿佈整條馬路，見到d咁嘅情況，都係瞓多一陣先啦～～
（下雨天）
過咗一陣，出面嘅雨勢稍為緩和，咁就係時候去食早餐，食完嘢之後就返房執行李，check-out，然後行多陣哥德堡，咁就要去另一個城市 -- Malmo。我哋張「哥咭」同埋張transport card仲用得，所以要用盡佢！
（「哥咭」、transport card同房咭）
第一站，我哋去哥德堡大學，做咩要去？唔記得咗喇，老婆好似話要去買個pin喎～不過喺買pin以外，仲有一d意外收穫，一陣講。
（哥德堡大學門口）
呢間大學嘅主樓唔大，入咗去之後，一左一右睇晒，個走廊係拱門設計，幾靚，為呢度增添多一份書卷氣息！
（拱門設計嘅走廊）
入門口之後嘅右手邊，就見到間應該係校務處嘅地方，呢度唔單只做校務，仲賣埋紀念品，而我哋想買嘅pin就可以喺度買到。
（哥德堡大學pin）
一場嚟到，當然要四圍行吓啦，不過大學內部無得行，幫襯完個廁所之後，就出咗出面行，哈哈，估唔到喺呢度搵到童年回憶，完全係意料之外，大學公園竟然有得玩氹氹轉，有趣！
睇見呢個設計，8個坐位，4個有腳踏，4個齋坐，可以幻想到一個情況：
4個好努力咁出力「踩單車」，另外4個就喺度大叫「踩快d啦～」，如果我企喺隔離，我會比張單齋坐嗰4位，又唔付出又多多嘢講，咁就淨飲雙計啦！
（氹氹轉）
當我哋仲影緊相嘅時候，已經見到有班人向我哋呢個方向走埋嚟，相信係要玩呢個玩意吧，我哋都好識做咁讓座，之後佢哋就開始「一齊玩」，8個埋位，唔洗出力踩，側邊仲有幾個人幫手出力推，有人幫手，當然轉得快啦，轉咗一陣，有幾個人就換位玩，原先出力推嘅就坐低，原先坐低玩嘅就出力推，咁先叫做同朋友一齊玩嘛，呢d就叫做「獨樂樂，不如眾樂樂」嘞！
（獨樂樂不如眾樂樂）
玩完氹氹轉之後，我哋就去哥德堡嘅地標 --Gothenborg Utkiken ，一幢紅白色嘅「高樓大廈」，去呢度同去Maritiman Museum差不多，都係要穿過Nordstan同埋中央車站。
（哥德堡中央車站）
今次行嘅方向唔同，喺度見到個城市微型縮影，研究咗一陣都睇唔到自己喺邊，咁就到此一遊算吧！其實睇唔明都可能係正常，如果唔係，旁邊就唔需要加個指示牌啦，應該係……除非唔係🤔
（微型城市縮影）
行吓行吓之後，喺天橋上見到個「望遠鏡」，咁就好自然地望吓遠處係咩風景啦，只係地盤一個，有咩好睇呀？咁我就「烘」個頭埋去，睇吓有咩啦，點知漆黑一片……我見個「望遠鏡」側邊有個轉盆，咁就多手轉佢兩吓啦，又無事發生喎，咁呢個嘢整嚟做乜呢？
（「望遠鏡」？）
答案好簡單：「烘」個頭埋去，攪動個轉盆，漆黑嘅螢幕就會顯示一個圖像，就係呢個地盤完工後嘅景象，嘩～～真係好精彩呀（曲）🙁😲🙄😅，即時令我對前路充滿希望，真係希望聽日個地盆就完工，快d見到個實景，跟手就可以拆咗呢個咁無聊嘅「望遠鏡」！！
其實話佢無聊可能過份咗，再者，個「望遠鏡」有個牌，仲有d字寫咗喺度，相信都係講呢個嘢係乜嚟，只不過我哋唔識字，所以唔知佢要嚟做乜，先至會話人無聊啫。解釋完之後，我都仍然覺得佢好無聊，哈哈～🤣🤣
（千奇百趣，史上最無聊「望遠鏡」）
行多一陣就去到樓高22層嘅Gothenborg Utkiken，其實只係22層樓高，咁就叫做地標，換轉喺香港，我都唔知有幾多幢大廈可以放入「地標」之列啊…
（哥德堡地標：Gothenborg Utkiken）
如果有買Gothenborg Pass，去到counter交張pass比reception姐姐，出番張$0 SEK嘅單，咁就可以上頂樓觀光。
（用Gothenborg Pass可以免費參觀）
出咗單之後，reception姐姐就帶我哋搭升降機，上22樓係要佢哋拍咗咭先可以上得，所以唔洗諗偷偷地上去。
（要拍咭先可以去22樓）
22樓係一個觀光樓層，大家可以兜個圈，以360°嘅方式去欣賞呢個哥德堡市，呢度都有放一d檯櫈喺度，方便大家休息一下，又或者可以坐定定咁去欣賞景色。
（哥德堡市）
（哥德堡市）
大家會唔會覺得奇怪，今日落住雨，玻璃窗應該濕晒，點解我哋影d相又無雨點呢？其實呢度隔一段距離就有一隻窗，只要打開隻窗，就可以無阻隔咁去影相，記得做番個有手尾嘅人，開完窗記得閂番。
喺度要鄭重提提你，尤其是你用電話影相嘅，當你連機帶手伸出窗影相時，請捉緊你部機，否則你就會高空擲物，跌爛部機事小，傷到人就事大啊！
（有隻可以打開嘅窗仔，方便影相）
其實呢個景點嘅吸引指數只屬一般，就算無嚟到，我都唔覺得係一個損失，我估我哋都係逗留咗唔係好耐就走，行一個圈就覺得好新奇；行第二個圈已經有d滯；所以行唔到三個圈就拜拜～～落到樓下就影番剛才留連咗一陣嘅Gothenborg Utkiken，相中間圓形窗對上，多角形玻璃窗位置就係22樓。
（Gothenborg Utkiken）
離開後，我哋沿海邊向前行，見到有一艘好大架好多桅杆嘅船，唔通又有得入去參觀？如果係可以嘅話，洗唔洗爬樓梯先～👉👈
（好大架好多桅杆嘅船）
行到差不多到船尾位置，見到有個牌喺度，原來呢度係一間餐廳，一個半自助午餐都係SEK95，對番港紙都係$100左右，比我想像中平，所以我哋就喺呢度享受咗一個船上嘅半自助午餐。
（船上半自助午餐）
入到去之後就搵人帶位，嗰兩位姐姐就比咗份menu我哋揀嘢食，但我哋唔識瑞典文，所以佢哋就解釋咗一輪比我哋知係食乜，為免阻住人做生意，我哋是但揀咗2個會食嘅餐就算數，之後就自己搵位坐。
（Barken Vikings，瑞典文menu）
可能我哋嚟得唔合時，因為今日係星期一，亦都係中午上班一族嘅午飯時間，所以嗰兩位姐姐招呼我哋嘅時候，都面有難色，都明嘅，要解釋咁多先做到兩個客嘅生意，anyway，我哋都無比好多麻煩佢，只係用多少少時間去明白個menu，之後就即刻落order。
呢度係自己搵位嘅，我哋見大廳入面好多人，而且有d嘈，所以就揀咗個比較近buffet檯嘅位置。呢個buffet檯有好多嘢食揀，有唔同種類嘅麵包、沙律菜、甜品，仲有汽水同啤酒揀，我哋都係揀咗些少頭盤食，留番少少位食主菜。
（Semi buffet lunch）
(Buffet lunch bar)
食飽飽，同架船（餐廳）打個咭先～
（Buffet船）
其實呢架船隔離都仲有一架船，而呢架船就比人改裝咗，而家係一個停車場，呢個設計夠創意，善用資源，如果香港可以學習得到就好……
（由船隻改裝而成嘅停車場）
食飽飯之後，目的地係Bohus Fortress同埋Kungalv Church，去埋之後就完成今次歌德堡之旅。由Nordstan去Bohus Fortress可以搭一架Gron X嘅巴士，坐大約半個鐘就落車，然後再行多10分鐘左右就到。
落咗車之後，Bohus Fortress就喺眼前，跟住馬路行就可以到達，路上見到有盞燈，好得意，好似太空奇兵嘅威E，咁就影低佢先～
（威E@Bohus Fortress）
沿路行緊嘅時候，見到由路口行上去Bohus Fortress嘅路程都唔短，雖然揸住張「歌咭」可以免費入場參觀，但係喺有限時間內，一上一落加埋參觀時間，咁成件事情就變得好急趕，比走馬看花更急，再加上仲要捉緊回程巴士嘅班次，最後決定唔上去，用多d時間去hea行附近，所以路過影張相就當去咗。
減少一個景點之後，時間就變得充裕咗，可以慢慢欣賞周圍嘅景色，藍天白雲，有風吹住又涼涼地，真係好舒服啊～
（沿路風景優美）
（Bohus Fortress，拜拜～～）
行前多少少就見到Kungalv Church，有咩特別？唔知呀～喺Google map見到呢個地方，TripAdvisor又有人留言話值得睇，咁咪過嚟睇吓囉～事實上，咪又係典型尖頂教堂一間～
（Kungalv Church 1）
（Kungalv Church 2）
呢度附近嘅屋仔都係得兩三層高，而且用淨色油外牆，睇落去有一份簡潔舒服嘅感覺，再加上個單位應該唔細，所以我相信喺度住會好舒服。
（簡潔舒服嘅屋仔）
呢度有一間餐廳，屋頂寫住「1881」，相信係一幢歷史悠久嘅建築物，然後改建成餐廳，以延續佢歷史任務，可惜無時間入去坐坐，否則飲杯咖啡都好吖～
（歷史悠久嘅餐廳）
回程嘅時候，見到河中間有個「人」，一睇就知係雕像嚟，但係點解要放喺河中間呢？真係諗唔明……
（千奇百趣之河中雕像）
用老婆部相機zoom埋去睇吓係咩雕像先，只係見到一個傾斜咗嘅人……有無人知道呢個雕像代表乜？
（千奇百趣之河中雕像之傾斜咗嘅人）
我哋比原定嘅時間早咗10分鐘到達巴士站，之後就坐車番市中心，番酒店攞行李，再落番火車站，搭2個鐘頭火車去Malmo，返回一個同Copenhagen（哥本哈根）好接近嘅城市。
完成晒Gothenborg嘅行程之後，都係時候要諗吓今日嘅午餐去邊度食好，不如就喺火車上搞掂啦！反正要坐2個鐘先到Malmo；根據2日前坐火車嚟Gothenborg嘅經驗，餐卡其實有好多嘢食賣，只不過想多d嘢食揀的話，就要趁早去買。所以我哋上車之後，就即刻去餐卡睇吓有咩食，我哋揀咗三文治同沙律，再加一枝嘢飲，其實仲有pasta可以揀，不過我唔想用微波爐，所以無揀到。
（Lunch time~）
大約2個鐘頭之後，我哋就番到去Malmo，2日前，我哋就係喺度等轉車時，行咗去Knotted Gun，而家呢？都係向Knotted Gun個方向，不過要再行遠多少少，目的地係Clarion Hotel。
（Malmo，我哋番嚟喇～）
呢間Clarion Hotel對於我哋嚟講好抵住，住2晚，只收一晚價錢，何解？因為之前我哋喺「酒店」.com訂房，儲夠10晚，所以就送咗一晚比我哋，既然可以慳番一晚錢，咁就揀間好少少，又近火車站嘅Clarion Hotel嘞！呢間房都唔錯，不過就令我唔係好明，一舖雙人床，床面放咗2個枕頭同埋4個Cushion，一共6舊嘢喺度，有咩用呢？對於我嚟講，一個枕頭夠晒，其他雜物，都放埋一二邊啦…
（酒店房間）
酒店房間嘅風景都好靚，可以見到成個Malmo市。
（酒店房間景觀 1）
仲見到Malmo市地標：Turning Torso。
（酒店房間景觀 2）
（日落 Turning Torso）
今晚食咩好呢？不如近近地，喺火車站食算啦！一來方便，近酒店嘛，二來我哋聽日去Ystad，都係先去火車站，瞭解吓買飛嘅方法好d，費事聽朝搞唔掂而miss咗班火車就唔好啦～
我哋喺火車站行咗個圈，發覺都係無幾多間舖開門，所以就揀Burger King啦，老婆買嘢食，我去搵位，呢度其實係一個food court，有位就坐，所以都唔洗點搵位，等咗一陣之後就有嘢食lu。
（是日晚餐：Burger King）
食緊嘢嘅時候，我發現有個個子不高，著住便服嘅黑人，喺Burger King對出d檯附近四圍行，行完一圈又一圈，坐低一陣又再行，重重複複咁無停過，我即刻叫老婆睇緊自己d嘢，呢條友有古怪，唔知係咪想偷嘢！
當時有2個人剛剛嚟到，放低個袋喺個位度，然後就一齊去買嘢，而個黑人就繼續喺度兜圈，佢當然有兜過嗰2個袋附近，但係就無郁手；而我亦留意到放低袋嗰2個人，都留意到呢個黑人，佢哋無即刻攞番個袋，而係從遠處觀察，睇吓個黑人會唔會有咩行動。
就喺呢個黑人被監視嘅情況下，佢做咗一件莫名其妙嘅事，佢竟然走去其他檯度幫手收盤！倒晒垃圾之後，仲將d盤叠番好，咁奇怪嘅？呢條友搞邊科呀？最後，嗰2人捧住d嘢食，坐番埋位，個黑人無偷嘢，但係就繼續兜圈、坐低、兜圈、收盤，重複又重複，佢係咪有精神病？
見到咁，我哋都係食快d，此地不宜久留……所以即時轉場去搵部售票機～
（自助售票機）
今次我哋要買嘅係24小時Skane Travel Card，而我哋知道呢部自助售票機，只可以買點對點嘅單程飛，咁點買呢？喺上網睇人哋d blog，人哋又話買到wor，咁即係得定唔得呢？答案係得嘅！為免大家好似我哋咁，所以我哋將個「秘技」公開！
（重點：先按「Event」）
（Payment：揀Credit Card）
（終於見到24小時嘅option，2個人，揀2張）
（按「Yes」買飛，就係咁簡單）
當買飛嘅問題已經解決咗，心情都輕鬆番晒，咁就拖住手，行個圈先番酒店，順便欣賞一下Malmo嘅夜景。
（Malmo黃昏）
（Malmo夜景，右上角係Malmo中央車站）
聽日行程只有一個景點，但係絕不簡單……
留言列表
