(2018年4月22日)
第二天，忍者小靈精mode：又越過高山又越谷……
一早起身食完早餐上咗
🦁獅子山（Skansen Lejonet）晨運，再去小博門&
🎭歌劇院影住相等Maritiman Museum
🛳退役戰船開門；第一次深入戰艦&潛水艇參觀，原來做「潛水」員真係少啲體能都唔掂，爬上爬落一個鐘，我都已經腳仔軟，莫講話仲要工作…食完份好咸嘅
🍟午餐就去遊
🛥船河（Paddan Tour），之後行咗個無聊
🏛博物館（Universeum），再回酒店休息到差不多
🕣日落，跟住出動到Fish Church (Feskekorka)
🐟魚市場影
🌃夜景…返到酒店成身散晒！
經過一夜補眠之後，精神及體力都已經番晒嚟，再加上喺一個舒適嘅環境下嘆早餐，wow～～今日一定係美好嘅一日，雖然係陰天，亦無影響到我哋嘅心情！
（天陰下嘆早餐）
食早餐時見到出面好似好大霧，心諗今日天氣唔好，唔知會唔會落雨呢？既然而家喺度食緊早餐，不如set好部電話影個Time Lapse 啦！
(Time Lapse：雲霧中！)
我哋喺餐廳開門無幾耐就嚟到，所以無乜人，成場任我哋去行，呢度環境幾好，食物種類都好多，可以慢慢嘆，真係人生一樂也！
（食物種類選擇多）
食飽早餐之後就正式開始今日嘅行程，住呢間Gothia Tower有個好處，就係方便搭車！
（好方便四圍去嘅酒店）
雖則方便搭車啫，但係行車方向都要搞清楚先得呢，咁多日以嚟，我哋都搞唔清邊個方向先啱，所以次次都要用Google Map搵路，由Google Map話我哋知個方向，然後去搵車站，如果呢個方向唔啱，去番對面車站就會啱！🤣🤣
（我哋經常喺呢度搭車）
今日行程第一站係去獅子山（Skansen Lejonet），呢個獅子山有咩咁特別呢？其實我都唔知，只係上網搵呢度有咩景點時，無意間見到呢個地方，而網上介紹又叫佢做「獅子山」（見下文，我以為係……😅）咁搞笑，所以咪嚟睇吓囉！
由Gothia Tower去獅子山唔難，根據Google Map所顯示，落車後就向前行，U-turn，再行一段路就到。落咗車後，都唔覺得呢度有個「山」anyway，跟住地圖行啦，途中見到有人用部單車賣廣告，招生學「詠春」，當我見到呢個廣告時，我不禁地去諗「對於外國人嚟講，究竟中國功夫有咩咁吸引呢？」，究竟係功夫本身吸引？學功夫嘅心態吸引？定係對中國文化有興趣？報名參加嘅又有幾多人？
（「詠春」招生）
獅子山喺邊呢？就係向住單車尾方向行，跟住過馬路，過咗馬路之後就右手邊直行，喺行車天橋底U-turn，咁就目標在望嘞！
（喺行車天橋底U-turn）
呢度就係傳聞中嘅獅子山嘞！原來瑞典嘅獅子山同香港嘅獅子山有咁大嘅分別，喺香港，有個山嘅形狀好似獅子，所以叫獅子山；瑞典呢？有個小山頭，有個小城堡，城堡頂有隻小獅子，咁就叫做獅子山，我頂吖！究竟網上邊條友叫呢度做獅子山㗎！
去度呢一刻，我嘅意思係打blog嘅呢一刻，我同老婆講開比獅子山呢個景點坤咗呢件事，佢就同我講佢就係嗰個網友，「獅子山」呢個景點係佢改㗎！呀～～
（獅子山就在眼前）
我哋沿住馬路上去，行咗無耐就見到右手邊有條樓梯，上唔上去好呢？最後我哋都無行上去，因為唔想上樓梯，哈哈～～
（沿馬路向上行）
城堡一角有個標記，唔知咩意思，影低就算。
（城堡標記）
當我哋兜咗去正門時，發覺佢無開門，唔通未夠鐘？咁我哋就上網睇吓佢嘅開放時間啦，原來呢度唔係開放比公眾參觀嘅景點，可以預先申請搞party或其他function，其間我哋見到有人出入，當時真係有d想走去問佢可唔可以比我哋入去參觀一陣，哈哈～～
既然無得入內參觀，咁就喺門口影吓相就走，當我哋由樓梯行番落去嘅時候，發現呢度d石頭上佈滿有好多地衣，咁即係代表呢度空氣好好啦，咁就要趁機會吸多兩啖新鮮空氣先，吸呀…吸呀～～
（石頭上嘅地衣）
行完獅子山之後，下一個目的地就係Maritiman Museum，呢個時候又係出動Google Map嘅時候嘞！我哋要去番中央車站附近嘅商場Nordstan，然後再行多10分鐘左右就到。
當我哋穿過呢個商場時，途經一個好大嘅候車處，有便利店有櫈坐，而且空間感十足，唔係等車只係路過都覺得舒服呀。
（空間感十足嘅候車處）
我哋睇一睇其中一個指示牌，發現呢個真係一個好有規模嘅交通樞紐，可以坐車去斯德哥爾摩（Stockholm），甚至跨境去挪威嘅奧斯陸（Oslo），丹麥嘅哥本哈根（Copenhagen）都得！睇見呢個牌就知道自己幾咁大鄉里……
（Nordstan係一個跨境嘅交通樞紐）
穿過商場後就向海邊行，由於呢一帶都有好多修路工程，所以行出海邊都唔太容易……幾經波折，終於去到海邊，眼前呢個地標就係Göteborgsoperan，即係Opera House歌劇院，喺佢門口打個咭就走啦。
（Göteborgsoperan）
由歌劇院行去Maritiman都只係3分鐘時間，不過我哋都係一邊行一邊欣賞下四周嘅景色，所以用咗10多分鐘先去到Maritiman。
未去到門口，只係喺佢對面，已經見到好多架戰艦泊晒喺度，心情已經變得有d興奮，因為我從來未試過咁近距離見到戰艦，而且一陣仲可以入內參觀，正呀！
（Maritiman就喺對面！）
趁住我哋仲未行入去之前，我一定要比個忠告大家，參觀Maritiman需要嘅體能都頗高，唔係要你抬搬托，而係要爬上爬落好多樓梯，請睇清楚，係「爬樓梯」「爬樓梯」「爬樓梯」，唔係行樓梯，尤其係參觀潛水艇嘅時候，船艙細，通道窄，上落嘅樓梯係垂直嘅，而出入口都比較窄，身形高大或者比較肥嘅人就要注意。
Ok，參觀之旅正式開始！
（Maritiman Museum門口）
經過條橋之後就推門入餐廳啦，食嘢同買飛入場都係呢度，可以食飽先行，亦可以行完先食。
（食嘢同買飛都係呢個counter）
買咗飛之後，就可以正式參觀，基本上大家都唔洗著救生衣參觀嘅，而小朋友就一定要著。
（基本上係為小朋友而設嘅救生衣）
上到去第一個吸引我哋嘅，就係呢個潛望鏡，睇戲睇卡通片就見得多，原來個實物係咁嘅，不過唔知個潛望鏡係咪比人玩得多，左右扭嘅時候覺得好實。
（潛望鏡の初體驗）
跟住入咗去一艘唔知咩船嘅內部參觀，呢度可以理解到一架戰艦點樣落錨，雖然我見唔到個錨，但係睇見呢個裝置，都可以想像到個錨有幾大有幾重……
（落錨裝置）
行咗一陣之後，終於見到呢度嘅重點 -- 潛水艇！
（潛水艇）
未有咁快去到參觀潛水艇，不過就見到另一個有趣嘅設施 -- 浴缸！最有趣係有3個花灑，一個手揸兩個淋頭，點解會有咁多花灑呢？一個出熱水一個出凍水一個裝飾？一個洗頭一個洗身一個洗腳？真係唔係好明……
（沖涼都好有學問……）
兜兜轉轉之下，上到嚟甲板就見到呢兩枝炮，同埋枝國旗，影呢張相嘅時候，我記得我係想講為國家戰鬥嘅軍人，點樣雄心壯志去保衛國家，但係到打緊字嘅呢一刻，我反而唔想咁樣講…
呢兩枝炮令我想像到戰爭有幾可怕，只要按一個制，就會有粒炮彈射出嚟，跟住就有好多死傷，只要戰況持續，你又按我又按，結果就係屍橫遍野……或許，呢兩枝炮曾經為瑞典捍衛國家安全，與此同時，亦可能奪去不少嘅生命…🤧
（炮管下的情感…）
都唔知點解突然轉咗做感性mode，都係轉番個旅行觀光mode好d。
我哋終於嚟到呢隻潛水艇嘞！講起潛水艇，我就想起狙擊赤色十月呢套戲，都係講潛水艇嘅，不其然想起個船艙個畫面，究竟現實嘅潛水艇同戲入面嘅潛水艇有咩分別呢？答案原來係無分別：窄！
基本上呢度只係得一條管道嘅空間比人行，身材高大嘅人，係絕對唔適合入嚟做嘅，就用我自己嚟講吖，雖然身高得6呎，但係要喺呢度工作，我相信我一定會撼穿頭，再唔係就係塞住喺個通道口，唔出唔入，要搵人扯住我一隻手，然後「卜」一聲，我先至可以過到個窿，哈哈～
（潛水艇內）
（要「卜」一聲先過到去，哈哈～～）
（潛水艇操作員）
（叫咪！開飯喇飯喇飯喇～～）
（生得高嘅人，係好難喺潛水艇度瞓覺…）
另外一個令我大開眼界嘅，就係呢個魚雷發射器！原來d魚雷係安置喺呢度，最多可以裝6發魚雷，如果要作戰就會喺度發射，但係d軍人同d魚雷咁近，簡單d講，只要有小小失誤，咁就真係一獲熟嘞……
（魚雷發射器）
（魚雷嘅尾部）
之前同大家講過嘅「爬樓梯」，終於有機會比大家睇清楚點樣去爬。呢條係一條垂直嘅樓梯，出入口有幾闊？自己睇啦，如果身型比較龐大的話，我建議你唔好參觀潛水艇，我都唔知「卜」唔「卜」到一聲咁離開呢個咁狹窄嘅出入口啊～～
（潛水艇內垂直嘅樓梯）
究竟一個比我嬌小咁多嘅太太，佢上呢條樓梯又會唔會好困難呢？我相信會容易好多呢，至少唔會「卜」一聲先啦，哈哈～～
（預備爬樓梯）
（上咗一半）
（潛水員終於上到水面，yeah～）
整個過程嘅重點唔係爬樓梯，而係出口嗰條扶手棍，如果無咗呢枝棍的話，會令到爬出洞口嘅困難度增加…
（有枝扶手棍係方便好多～）
或許，大家會覺得用我太太做爬樓梯嘅model，實在感受唔到嗰份困難，不如今次換上我做model吖，不過就唔係挑戰垂直嘅樓梯！今次條樓梯有少少斜度，個出入口闊咗少少。
（換model，再挑戰爬樓梯！）
由呢個角度睇落去，個出入口同我兩邊膊頭都差不多咁闊咋。
（出唔出到嚟呢？）
為咗增加難度，我決定孭住個背囊爬出嚟，去到個出入口嘅管道位，真係塞住咗，我個心口要貼住條樓梯，等個背囊夠位過，我先至可以爬到出嚟，經過呢個實驗，生得高嘅人係唔適合喺戰船上工作㗎！
（終於爬到出嚟）
係度仲想講多件唔聽話兼發雞盲嘅事，話說我哋有一次無跟住個箭咀行，所以有部份地方係重複咁行，行多次無問題，不過要重複爬多幾次樓梯，呢個先係大問題啊！所以大家要記住，嚟得呢度就一定要聽話，而且要睇清楚指示去行，唔好四圍走啊，否則你就………哈哈～～
行完咁多路，包括冤枉路同冤枉梯之後，都係時候食lunch嘞，原本諗住出去出面搵嘢食，但係出到去都係唔知去邊度搵，既然呢度都有得食，不如就喺度食啦！
呢度即係入嚟參觀時買入場劵嗰度，呢度嘅食物選擇唔多，都係漢堡包同炸魚薯條嘅選擇，埋去counter落order，等一陣就有人送嘢食比你，不過餐具、紙巾同醬汁係要自己攞嘅，全部放晒喺counter嘅左手邊。
（等食中…）
（選擇唔多嘅餐牌）
老婆叫咗炸魚薯條，幾好食，薯條夠多，仲多到食唔晒；而我就叫咗個漢堡包，個包幾好食，薯條都好多，不過就勁鹹，可能阿廚師哥哥落鹽重手咗，所以d薯條都食唔到一半就放棄…
（船上午餐）
回想番今次參觀Maritiman Museum，我覺得真係好值得去睇，一個場地，有好多唔同種類嘅戰艦比你睇，仲可以入去船艙參觀，有d重要爬兩三層樓梯先有得睇，真係大開眼界；相比喺香港，想睇軍事設施的話，一年只得一次機會，仲要預早幾日去排隊，而且未必有飛派到比你，所以都係去人哋國家，睇人哋d嘢算啦～
下一站就係番市中心坐觀光巴士，同埋觀光船遊覽哥德堡市，去到觀光巴士站時，尾班車已經返咗嚟，個司機見我哋企喺個站度指手畫腳，佢唔開車走住，等我哋經過架巴士時，好有禮貌咁同我哋「沙冧」，話比我哋知是日尾班車已開，要聽日先有得坐，此等服務真係超窩心啊！
（觀光巴士站及觀光巴士）
無得坐觀光巴士，咁咪去坐觀光船囉，反正都係行前些少就到，喺網上搵資料時，有人話要預早卜定位，因為太多人參加呢個項目；同樣，亦有人話可以即場卜，如果有位，就可以即場上船，而我哋就係即場卜即場上到船。
我哋去到個counter，睇睇個船期，仲有成半個鐘先開船，咁咪埋去問佢仲有無位，佢話有，咁就留咗個位比我哋，so easy。
（去黃色牌下面做預約就可以）
其實架船咁大咁多位，應該唔難卜到位吧，究竟網上嘅留言係真係假呢？我就覺得兩者都啱。難卜，可能係夏天旺季時間；易卜，相信係冬天淡季時間，即係我哋到訪嘅4月。
（架觀光船可以接載好多旅客嘅）
上船之後就隨便揀位坐啦，大部分嘅人都會揀船頭，因為做講解嘅導遊係坐船頭，所以我哋揀坐船尾，最主要係唔洗同人迫，仲可以霸埋側邊位放袋，如果係旺季的話，坐邊都無所謂啦，相信會坐滿晒人呢～
（佔據船尾位置）
開船嘅時候，個導遊用瑞典文問大家識唔識講瑞典文，我哋當然無反應啦，之後佢就轉台講英文，之後嘅講解就用瑞典文同英文交替咁介紹附近嘅景點。我已經唔記得佢講嘅詳情，只係用相機記錄番一d特別嘅事情。
（可以旋轉嘅橋）
（橋底有足夠嘅支撐）
（香港仲搵唔搵到Ericsson嘅電話？）
有部份嘅橋底比較低，大家要坐低先可以安全經過，而導遊會預早同大家講定，所以大家要聽話啊，撞爛你個頭就無乜所謂，撞爛人哋條橋就有排賠啦，哈哈～～
（過橋前，請坐低）
行完內港之後，佢都有載我哋出海，會路過今朝去過嘅Maritiman Museum，不過呢度要提一提大家，出海嘅呢一段會有d凍，亦有機會被海浪整濕身，坐船頭嘅都可以放心，個導遊會放兩塊膠板喺船頭遮一遮，而我哋都平安地乾身而回，無濕到！
當返入內港後，我哋路經Fish Church (Feskekorka)，一個同魚有關，但係同教堂無關嘅地方，呢度係一個魚市場嚟㗎！上網搵資料時，發現好多人都影呢度，見佢咁靚，所以我哋今晚會嚟呢度影夜景。
（Fish Church （Feskekorka））
大約一個鐘左右，個Paddan Tour就完結，上岸嘅地方就係觀光船出發嘅地方，所以唔洗擔心比人車咗去第二度。下一站就係去Universeum，哥德堡嘅科學館，網上嘅評價對呢個科學館十分之好，一般逗留時間係2-3個鐘。
（Universeum）
入到去Universeum，第一件事係搭一架打斜向上行嘅升降機，好讓大家由最高嗰層開始參觀，之後就逐層向下走，直至去番地面。開始嘅時候，係參觀一d熱帶雨林嘅生物，其中有一部機係講青蛙嘅，按唔同制就有唔同嘅青蛙叫聲，聽完之後我都唔識分咩聲係屬於咩嘢青蛙，哈哈～～
（青蛙青蛙叫～）
行到去講蛇呢個展館後，我哋見到有個大電視播映住一條眼鏡蛇，而電視下面就有個金屬手板喺度，一睇就知放隻手埋去比蛇咬啦，當時懷住又要驚又要玩嘅心情放隻手落去…
（玩命の比眼鏡蛇咬）
隻手一放落去就即刻縮，驚佢咬我嘛，但係條蛇又無郁喎，我見佢無乜反應，咁就再放隻手埋去，2秒後再縮手，又無事喎；我相信當我再放隻手埋去時，應該會比佢「咬」，結果，我再放隻手埋去，突然間，條眼鏡蛇好快咁向下「咬」咗一啖，再配合埋「池」一聲，同埋有風噴落隻手度，我就咁比佢「咬」中咗嘞～～
（我比毒蛇咬中咗呀～～）
其實呢個遊戲係想話比大家知，眼鏡蛇嘅攻擊速度係非常快嘅，基本上係避唔到，我再試多次都係避唔到，雖然已經知道個玩法，但係由畫面配合埋聲音加感覺，嗰種刺激感真係幾好玩～
玩完咗個熱帶雨林之後，個展館就轉話題講太空呀，大自然呀，同埋一d小朋友嘅玩意，認真講，唔係咁啱我哋玩，而我哋亦覺得有d悶，反而身邊嘅小朋友就玩得好開心。所以我哋唔洗2個鐘就睇完，最後喺禮品店買咗少少嘢就走。
離開Universeum之後，我哋就番酒店小休，今次唔洗搭車，因為酒店就喺對面，呢間酒店有個特點，就係有個空中泳池，喺中間嗰座有個「L」形嘅玻璃牆，嗰度就係空中泳池，當時真係有人游緊水㗎！
（有空中泳池嘅酒店）
番上酒店休息咗一陣之後，我哋就去Fish Church （Feskekorka）影夜景兼食飯。去到Fish Church附近時，大約係7：30左右，剛好見到好靚嘅晚霞，見到靚景，當然要影低啦。
（晚霞）
影完相之後，我哋有d肚餓，所以就去搵地方食嘢先，行下行下就見到附近有間壽司店，不過尋日先食完壽司，再搵其他嘢食吧，結果當我哋差不多行完一個圈，都未搵到嘢食，結果都係要去番嗰間壽司店，正想叫嘢食時，個店員話佢哋已經截單預備收舖，無得坐低食，只可以做外賣，當時我哋實在太肚餓，所以就叫咗個壽司拼盤外賣，但求有得食，是但啦！
等緊外賣時，聽到其中一個店員講廣東話，我哋就同佢傾咗兩句，仲講笑咁同佢講「哥德堡最出名嘅嘢食就係壽司！！」哈哈～～
攞到外賣之後，就走咗過對面馬路，Fish Church隔離坐低食壽司，嗰一刻覺得我哋好慘，天氣又凍又大風，張櫈又凍，d嘢食又係凍，再加埋罐可樂，仲有乜嘢可以凍過而家吖！
（晚間「野餐」のFish Church）
食完壽司之後，就到此一遊啦！
（Fish Church門口）
（Fish Church對岸）
既然個個都話呢度靚，又用呢個景做postcard，咁我都唔執輸，影番一張Fish Church之鏡先～
（Fish Church之鏡）
影完相之後，就搭車番酒店，執好行李，預備聽日離開哥德堡去下一個城市 -- Malmo。
留言列表
