(2012年6月18日)
(伊萬洛 > 挪威卡拉紹克 > 康寧斯雲)
今日嘅行程比較精彩（我覺得～～
），先去伊洛尼湖行吓，行完湖區之後，就會駛過芬蘭同挪威嘅邊界，去薩米文化公園行吓同食飯，食飽飽後就要步上10萬8千里長征，直指康寧斯雲，稍作休息及吃個晚飯之後，就會去睇午夜太陽，而呢個節目亦都係我最期待嘅～～
如常地，我哋都係會早過Morning Call起身，起身之後就先行過一個住宅區，可能時候仲早，都無人嘅，我哋就喺人哋門口影張相就算。
(北歐人嘅屋企)
之後就行咗去個湖邊，其實呢度係好舒服嘅，天氣微涼，空氣清新，好正吧~~可惜，呢度有好多『蚊』！係一群一群咁『嬲』住我哋，原本仲想行多一陣先走，只不過D蚊咁唔歡迎我哋，咁就到此一遊就走啦！
(酒店附近嘅湖邊)
睇睇時間，都差唔多要番酒店，喺門口無聊地飄一飄先！
(無無聊聊飄一飄)
等齊團友後，就係一輪嘅乜生乜太早晨，然之後就上車……救命……
上咗車之後，目的地係伊洛尼湖，我都唔知呢個伊洛湖有咩咁特別，可能係一個中途休息站，可以比大家休息一下，並且買下手信吧。點都好啦，去到邊就影到邊！話時話，呢度又真係好寧靜，好舒服。
落車後，領隊就話比我哋知，呢度有個舖頭賣手信，出面有廁所，如果有時間，可以過對面馬路影吓相，我同老婆講『緊係去對面影相先啦！』當我哋走過馬路時，已經有其他團友跟住一齊o黎，過咗馬路之後，我已經見到個靚位影相，所以二話不說，即刻拖埋老婆一齊，急急腳走去個景點，當我SET緊腳架時，已經聽到有團友以千里傳音高呼『嘩~~林生，你企個位好靚呀，等我都o黎影張相先~~』佢唔出聲尤自可，一講完之後，就見到成班團友就向我哋個方向行過o黎，我同老婆就快手快腳影番幾張相就讓位，我唔想比人逼咗落個湖度…
(伊洛尼湖)
(平靜嘅湖泊)
(到此一遊@伊洛尼湖)
呢個湖區唔係好大，見到D屋仔喺度，相信係可以比人哋泊D旅行車，咁就可以慳番D住宿費，可惜，我揸唔到呢類車，仲未可以享受呢種旅遊方式。
早一日，已經稍稍認識過馴鹿，今日去到呢度，又可以見到佢哋啊~~
(『小』鹿與我@伊洛尼湖)
行咗一陣之後，已經無咩好影，咁就番轉頭行手信舖，買咗一頂『鹿帽』送比朋友，話晒鹿都係北歐嘅代言人嘛～～
(小羊羊與小鹿之相遇～)
上車後，就會由芬蘭過境挪威，芬蘭同挪威其中一截嘅交界就只被一河之隔，而個交匯嘅地方就喺條橋上面，由於之前已經上網睇過人哋嘅分享，已經知道大約位置，所以上咗車之後，我哋就不停咁留意四周圍嘅景象，哈哈～～終於比我哋見到嘞！不過可惜，架車飛咁快咁經過，無時間可以好清楚咁影晒兩邊兩個牌，再加上個牌面向挪威國境，我哋要等架車過咗個牌先可以影到。
老婆好叻咁影到個牌，仲驚大家唔知佢影乜，所以『指住』個牌話比大家知道，我哋已經由芬蘭去咗挪威嘞～～
(左邊嘅國境分界牌)
(右邊嘅國境分界牌)
去到薩米公園之後，就去咗一個展覽館睇吓拉普蘭(Lapland)文化，之後就出去個公園行吓，認識多少少有關佢哋嘅生活。
(你估我喺邊？)
其實我一早已經知道自己實會唔記得係乜嘢O黎，所以一早影定張相，咁就無走雞啦！原來佢係一個雪櫃(Guollebuvri)，估唔到北歐咁凍嘅地方都要用雪櫃……
(薩米牌 / 拉普蘭牌雪櫃)
(你又估吓我喺邊？)
我相信呢個會係客廳，因為佢夠大，而且仲有個火喺度，可以比一家大細喺度傾計，或者接待客人都可以。
(薩米牌 / 拉普蘭牌客廳)
鹿角，喺呢度應該係好普通嘅嘢，不過連埋個頭蓋就……
(鹿角曬晾中……)
好多時去旅行我都會有一個目標，就係搵當地人同佢合照，不過我相信咁多次之中，今次呢一個相信會係最地道嘅薩米人，點解？因為佢唔識講英文，再加上喺呢個旅遊區都唔識講英文，係咪有D奇怪呢？所以，我相信我嘅推測應該係正確嘅，Anyway，係唔係都好啦，就當佢係吧，咁樣我會滿足D，哈哈~~
(同薩米人合照)
之前一日去過馴鹿場，所以知道D鹿角並唔係一定好靚嘅，而呢個公園擺得出O黎比大家睇嘅，就當然係好嘢啦，坦白講，我都覺得呢D鹿角好靚，到今日，真係有少少後悔無買個鹿角番O黎做個掛衫勾……
(好靚嘅鹿角)
參觀完之後，我哋就去食飯，食完之後就出去搵個招牌『到此一遊』，方便之後寫BLOG嘛！
(用餐地方)
上咗車之後，就展開呢個10萬8千里長征……我哋會由呢間餐廳出發，跑過236KM嘅路，當中會經過5條隧道，其中一條仲有6870m咁長嘅海底隧道。
究竟有幾遠呢？睇吓下面個圖就知道。
(10萬8千里長征)
點解我會搵得番條路點行嘅？其實，我哋兩個慣咗去旅行時，坐旅遊巴嘅時間盡量唔瞓，而且一人坐一邊，見到D乜嘢新奇嘢就影低佢；之後，就可以用有關嘅資料去GOOGLE MAP搵番個地方，只要影嘅相唔好太過鬆郁懞，就可以搵得到！
當我哋架車行到半路時，個司機突然慢駛，之後仲停埋車，原來中咗『薄落』(BLOCK)，既然交通警要做嘢，咁就一定要合作啦，講緊嘅合作，就只係司機停車熄匙，跟住落車過去架警車度比人檢查行車資料，我哋既然無嘢做，咁就影吓個司機啦！
(中咗『薄落』)
(司機VS交通警)
最後平安無事繼續開車，睇o黎司機並無比呢個薄落影響心情，手車依然好爽，挪威美景繼續喺我哋嘅眼前飛馳！
(挪威風景)
由於路程比較遠，我哋又停咗一個休息站，今次依然二話不說直接過對面馬路影相，完全唔理班團友，免得一陣有個好地方影相都唔可以盡興。
相信呢度係一個比旅行車停泊，並且可以過夜嘅Camp Site，每間屋仔都好有特色，不過就唔知入面係點樣……
(好有特色嘅旅行車小屋) (已經埋咗岸嘅旅行車小屋)
個Camp Site係近海(湖？)嘅，仲有張野餐枱比人休息同食嘢，我就用佢o黎影張HEA相，懶係他條寫意咁，哈哈~~
(他他條條齊看海)
好多時我哋寫Blog也好，上Facebook分享相片也好，好多人都問我哋係咪自由行，因為我哋可以好舒服咁去咗好多地方，而且身邊唔多人，甚至無人，其實我哋通常都係跟團去玩，因為方便嘛，比咗錢就可以乜都唔洗理，有人幫自己安排好晒其他嘢，唔好咩？
而影相嘅時候，就要盡量避開d『閒雜人等』，方法有二：
1) 比人哋快一步去到想影相嘅地方
2) 採取人棄我取嘅策略，人哋影乜我就唔影，人哋影完我先去影
就好似下面張相咁，之前都有幾個團友圍住影，既然你哋要影咪等你哋影晒先，我去四周圍行吓先，一陣再影番。
(身處挪威)
呢度間手信舖好得意，有兩件貨品真係好想買，不過最後當然無買啦。
如果著咗呢一隻毛毛鞋，應該會好暖，不過喺香港又有幾何會著得到呢~~
戴呢個挪威眼鏡影相又真係幾型，只不過……當我戴咗呢個眼鏡後，就會見到成個挪威國旗喺我眼前，咁…戴O黎做乜？
所以，兩樣都無買到。
(挪威毛毛鞋) (挪威太陽眼鏡)
小休完之後，就繼續我哋嘅10萬8千里長征！沿路上，我都好想影低所經過嘅隧道名同長度，可惜，實行起o黎真係有D困難，因為我部相機個快門又唔夠架車快，所以好多個牌都影唔到，而呢一個已經係咁多個牌之中最清楚嘅一個。
(Sarnestunneen 190m)
成個路程中，我哋會經過5條隧道先到達康寧斯雲酒店，每一個隧道名我都有影到，只不過係影完睇唔到吧，可惡！不過都唔緊要啦，番到屋企再用GOOGLE搵番就得啦！以下就係我哋經過嘅隧道：
1) Skarvberg-tunnelen 2980m
2) Sortvik-tunnelen 496m
3) Nordkapp-tunnelen 6870m 最長係呢條，而且仲係海底隧道o黎o架！
之後就會經過一個叫Bornstasjon Toll Plaza嘅地方
4) Sarnestunnelen 190m
5) Honningsvag-tunnelen 4440m
一路上都係沿海行車，當我見到海邊嘅屋仔時，我都會問『究竟佢哋嘅水、電、煤、排污等等嘅工程係點做嘅呢？』，仲有，大家都唔可以無嘅上網裝置又點安裝呢？
(沿海嘅屋仔)
(沿路都有好多羊)
(沿海而行)
好多人坐長途車都會選擇瞓覺，而我哋兩個就會盡量唔瞓，目的就係想睇風景同埋影相，所以每次去旅行時，我哋都會揀個大車窗位坐，方便影相嘛~~今之10萬8千里長征唔瞓嘅收穫就係見到當地人嘅石仔塔，圖左中間細細個塔仔就係。
(北歐特產疊石仔)
唔瞓嘅另一個好處就係認識人哋國家嘅地理，雖然我無讀過地理，但係當我見到呢D層積岩時，都會想一想，究竟呢個地方之前發生過咩事呢？
(沿海嘅層積岩)
(車外溫度只有9°C)
唔記得坐咗幾耐車之後，終於到達酒店！稍事休息之後就去食飯，食飽飯之後就會有幾個鐘比大家休息，預計大約夜晚11點左右到達Nordcapp睇午夜太陽！領隊千叮萬囑我哋，一定唔可以遲，因為時間緊迫，去到北角唔係淨係睇午夜太陽，仲有其他嘢要睇，所以大家要千祈唔好遲，聽完晒吩咐之後就去食飯。
食飯時間就有精彩事發生！話說同團嘅團友都唔算係後生，可能我哋兩公婆已經係最後生，所以每一餐都希望有菜有肉有生果，但係呢幾餐都無佢哋想食嘅嘢，正當大家對今餐自助餐稍稍有期望時，結果都係失望嘅……
到差不多食飽嘅時候，突然傳來好消息！有團友捧住一碟西瓜番O黎同我哋講，『出面有好多西瓜呀！』，既然有生果食，老婆就諗住走去攞幾塊番O黎食啦，當老婆番到埋位時，我見佢只係攞咗一片西瓜，咁就當然問佢點解唔攞多少少，老婆靜雞雞同我講，話出到去嘅時候，隻碟只剩得三片西瓜，佢夾一塊，另一個團友夾一塊，留番一塊比其他人食……正當我哋講緊呢個情況時，嗰兩公婆就係咁話『正呀，終於有生果食。』，但係四周圍嘅人都唔見有西瓜食，所以我覺得係佢哋好自私咁攞晒D西瓜自己食，既然係咁，我就同佢兩公婆改名，就叫『西瓜人』啦！
食飽之後，我哋就行咗去酒店後面嘅海邊，咁啱遇見有船埋岸，原來係一班坐船遊北歐嘅外國人，唔知佢哋會唔會坐船睇午夜太陽呢？
(剛泊岸嘅遊船)
喺呢個碼頭有一個叫Nordkappmuseet，好似係叫北角博物館，上咗樓梯之後就係博物館門口，正想入去時，發覺距離閂門時間只剩30分鐘，唔值得比EUR6入去，所以喺門口到此一遊就算
(到此一遊@北角博物館)
門口仲有本紀念冊，兩舊雲都到此一遊先~~
(兩舊雲到此一遊@北角博物館)
樓梯轉彎位有張好大嘅地毯，照睇應該係講挪亞方丹。
(挪亞方丹地毯)
樓下有一間手信店，有熊又有鹿，以下劇情乃自篇自導自演，如有雷同，實屬巧合。
熊：喂！老友，呢隻鹿係我見到先O架！
我：熊大佬，你無嘢呀，佢係我香港隻寵物，我帶佢O黎睇午夜太陽O架！
鹿：佢哋係咪傻O架……(滴汗)
(真係無鬼聊……)
行完博物館門口之後，我哋就走咗上酒店後面嘅小山上，有咩睇？風景！臨出發前，我上過GOOGLE MAP睇過呢度有咩好行，其實真係無乜嘢好行，但係風景就幾靚，所以見有時間，而且路程唔太遠，咁就當然要走上去睇睇啦。
呢個位置就係我喺GOOGLE MAP 見到好靚嘅地方，所以要實地視察，究竟GOOGLE有無揸流灘先，得出嘅結果就係：GOOGLE MAP係靠得住嘅！
(充滿歐洲風情嘅康寧斯雲)
(全景)
呢個地方無旅遊書介紹，我只係上Google Map搵到間酒店，之後就用街景圖四圍咁睇，如果個景靚，又唔係行好遠嘅話，通常我哋都會去探吓險嘅，今次真係無去錯，呢個景真係好靚。
(玩具模式下嘅挪威小鎮)
終於去到集合時間，我就好快趣就上咗車，當領隊點齊人數後就開車，大家好開心好期待去睇呢個午夜太陽，但係只係行咗幾秒鐘，就比個團友叫停咗部車，原來個團友唔記得帶相機！！咁佢就9秒9咁衝番上房攞相機，幸好，佢都算快手，一個轉頭就上番車，我哋就可以繼續行程。
途中，見到呢一埋紅色屋仔，係用貨櫃搭建而成嘅，老婆話我哋個圑原本係住呢度嘅，可以近啲北角，而且應該比較有特色，但係領隊就講到呢度非常唔好住，環境又唔好，又乜又物咁，而且佢話呢度個價錢比較平，好多人都會預早去BOOK，所以一房難求，都唔知堅定流~~總之，乜都佢講晒啦……
(北角貨櫃酒店)
行到中途，見到一個咁樣嘅景，精神為之一振，唔知一陣嘅午夜太陽係點嘅呢？
(午夜太陽預奏)
去到北角之前，會經過一個收費站，聽領隊講，呢度個收費好貴，不過就唔知貴成點，而我就好好奇想知道，呢度有無人做維修呢？點解個更亭玻璃窗爛咗都絛人整番好？
(北角收費亭)
到達北角之後，領隊如常咁講解介紹呢度一番，之後就叫我哋快D入去個電影院，搵定個位等睇戲，其實我哋真係唔想睇呢套介紹片，坦白講，睇呢D片都係介紹一下挪威有幾靚，呢度嘅午夜太陽有幾壯觀，賣廣告成份極高，但係領隊講到話O黎到唔睇係一個損失，咁我哋只可以跟大隊去睇lor~~
(午夜太陽電影院)
我哋唔想睇呢套戲係有原因O架，因為我哋要寄好多Postcard，所以每一分每一秒都係好寶貴，絕對唔可以浪費，而咁樣連等帶睇，就無咗30分鐘，唉~~不過，如果真係想睇嘅話，真係唔好太遲入去，因為滿座就要等下一場，對於我哋呢D跟團嘅人，睇唔到就要搵日再O黎多次。
下面呢個招牌一定要影啊，日期同坐標都有晒，千祈唔好錯過！其實要影呢個坐標的話，應該喺個展覽館門口影，只不過我哋太趕而錯失咗……
(今年今月今日，我O黎過呢度！71°10'21"N)
由於時間緊迫，我要同老婆兵分兩路先做得晒所有嘢，所以我哋先去下一層嘅『郵局』揀Postcard，一齊揀完之後，我就留低寫Postcard同埋買郵票，而老婆就落去樓下睇吓有咩手信買。
(北角『郵政局』)
去到買郵票時，我只係諗住話比個收銀姐姐知，我有10張Postcard，全部寄香港，幾多錢，跟住就比錢，點知佢問我洗唔洗要一套唔同嘅郵票，既然妳有D咁好嘅嘢，我當然要啦，只不過，佢呢頭講完，嗰頭執郵票時就唔知邊度混亂咗，搞咗一輪之後，終於比到一堆郵票我，而且有多tim~~
當我寫好晒地址，貼好晒郵票之後，枱面竟然仲有郵票剩！我一度以為自己大頭蝦，唔知貼漏咗邊張Postcard，但係當我睇清楚之後，我並無貼漏到，咁即係個姐姐比多我啦，既然有多，咁就當係北角嘅手信啦，多謝挪威，多謝北角，多謝姐姐！
(寄Postcard時間)
快快手手搞掂疊Postcard之後，就走落樓下同老婆會合，搵個地方一齊寄咗d Postcard之後，老婆就update我呢度有咩手信買，講完之後都好似無咩嘢想買，所以都唔再逗留喺度，快步走出外面睇午夜太陽。
(寄Postcard)
寄完Postcard之後，就即刻走咗出去出面，睇吓有咩影先~~
出咗門口之後嘅右手邊，就會見到7個大餅同埋一個母子像，聽講話呢7個大餅係幾個唔同國家嘅小朋友一齊整嘅，目的係宣揚和平。
(7個大餅)
(7個大餅及母子像)
(呢個大餅仲高過我，真係好巨)
其實歐洲人真係好高大，呢個媽媽比我高，而個小朋友呢，相信過多幾年之後，都一定會高過老婆……
(母子像)
睇完影完嗰7個大餅同埋母子像之後，就去番個展覽館門口睇午夜太陽，睇吓會唔會好似之前見到嘅午夜太陽Postcard咁先~~
我曾打算set好腳架，用多重曝光嘅方法，去整一張類似嘅相，但係同老婆傾過之後，發覺應該唔係太可行，因為當日天氣未如理想，而且只為一張相而犧牲晒唔影其他相，個代價似乎太大，真係唔太值得，最後都係放棄呢個決定，打回原形，想影乜就影乜！
根據之前上網扒文，再加現場觀察所得，想影張靚少少嘅午夜太陽相，就唔好走得咁近懸崖邊條欄杆，反而要企後少少，攞埋個地球儀一齊影會比較好。
(有埋地球儀嘅午夜太陽)
(企埋欄杆影嘅午夜太陽)
影呢張相時都有少少confuse，究竟我應該用地面做水平，定係用遠方嘅水平線做水平呢？如果用地面做水平，個天就好似斜咗咁；如果用遠方嘅水平線做水平，D人咪企斜晒lor！
最後我決定用全景相去表達，用遠方嘅水平線做水平，咁就一眼睇晒成個現場環境，一定唔會怪，係咪！
(午夜太陽全景)
跟住我哋就走去個世界地球儀影相，set好腳架自拍，已經係我習以為常嘅動作，有人有背景有地球儀有午夜太陽，OK啦~~正想收機走人時，有個鬼佬走過O黎話幫我哋影相，我見佢咁有心，咁咪比咗老婆部相機佢影，影出O黎嘅效果就……
(我自己Set機嘅自拍)
(個鬼佬幫我哋影嘅相)
我真係有D頂唔順呢個鬼佬，地球儀又影唔晒，仲影埋我部相機，真係多謝晒~~
唉……算啦，反正都係數碼相，如果係菲林就……最後補多張世界地球儀就要走lu，始終都係跟團，時間上無咁自由。
(世界地球儀)
雖然，今次唔算係好完美咁睇到午夜太陽，但係都叫做見到吖，領隊話今次已經算係睇到啦，起碼都有條光見到，佢試過帶一團O黎真係睇唔到，成團人都好失望，而我哋已經比佢哋幸運好多。
第二日嘅行程就係咁樣完結，感謝主。
留言列表
