(2012年6月19日)
(康寧斯雲 > 阿爾塔 > 利維(芬蘭))
相比番尋日嘅行程，今日就顯得比較悶，就係得一個景點，去阿爾塔維京人石刻博物館，其餘時間就係食飯同轉車，之後就去芬蘭嘅利維 (Levi)。
呢一日最最最驚喜就係利維間酒店，係我去過咁多次旅行，酒店房間最正最大嘅。
由於尋晚玩得比較夜，所以今朝個Morning Call晏咗DD，就算係晏咗都好，我哋依然都係早少少起身出去行吓。尋日就上咗山睇風景，今朝就向海邊行，上GOOGLE MAP見到一個丫叉咁樣嘅嘢，都唔知係乜，既然想知係乜，最好就係行埋去睇清楚啦，不過我睇完之後都唔知係乜……
(海邊丫叉)
由個丫叉行去海邊一D都唔遠，去到海邊望番上山，都唔知道自己尋晚企邊個位影相。
(康寧斯雲海邊)
早上嘅挪威海邊真係好寧靜好舒服，如果有張櫈同檯，真係可以一邊飲嘢一邊睇書，就咁過寫意嘅一日。
(寧靜嘅挪威海邊)
之後就行番去Nordkapp Museum出面，呢度有隻大精靈同埋維京船樣嘅石櫈，到此一遊先。
(挪威大精靈) (維京船石櫈)
係時候番酒店食早餐，呢度嘅早餐可以改名為『全魚自助早餐』有好多種唔同嘅魚，又有唔同整法，生食熟食亦得，對於一D唔鐘意食魚嘅人O黎講可能係災難，不過，佢哋仲有第二D食物嘅，烚蛋煎蛋火腿麵包都有嘅，可以放心！
(全魚自助餐)
等齊團友之後就去阿爾塔維京人石刻博物館，都已經唔記得要坐幾耐車，而出面嘅氣溫只有7°C，比尋日仲凍……
(車外溫度：7°C)
沿路都係睇吓風景，親眼目睹咩叫『挪威的森林』，我絕對有理由相信，挪威係一個空氣好好嘅國家，因為佢哋嘅綠化地區真係好大。
睇見上帝所創造嘅呢個世界，自覺渺小亦覺感恩，喺好多次嘅旅行當中，我都有呢種感覺，所以就用呢首歌話比上帝知道，我喺呢度敬拜祢。
(Here I am to Worship)
https://www.youtube.com/watch?v=CoxopsRSfdU
唔記得坐咗幾耐車之後，終於到達阿爾塔維京人石刻博物館，領隊提我哋要攞遮，因為出面落緊雨，我同老婆商量咗一陣就決定唔攞遮，因為我哋要做一個測試，要試吓新買嘅Gore Tex褸同鞋係咪真係防水；其實唔攞遮都有另一個好處，就係方便影相！
(防水測試中)
由於我哋行得比較後，只係見到做講解嘅領隊對住D石頭指手劃腳，但係就聽唔到佢講乜，咁我哋就望吓D石頭有咩好睇啦，驟眼睇，就無咩特別，但係當你睇留心少少去睇塊石頭表面時，你就會見到一D凹凸痕跡，呢D就係維京人石刻，你見到嗎？
(維京人石刻)
由於D石刻實在好唔起眼，所以有好多石刻都比人加工，劃上一D橙色嘅線，等大家可以睇得清楚D。
(另一塊有石刻嘅石頭)
領隊都講解咗好多呢D圖案係咩意思，可惜我記得嘅唔多，不過就D圖案所顯示，應該都係講緊一D牧場生活吧~~
(石刻故事)
(成身都係防水嘢！)
呢度都隱約見到一D石刻痕跡，會唔會係話以前見到恐龍呢？定係有尼斯湖水怪呢？話時話，如果唔係上咗色，真係好難發現呢D石刻。
(恐龍？尼斯湖水怪？)
行完室外之後，就入番去室內展覽館睇吓，呢度擺放咗好多北歐人生活嘅用品同埋會見到嘅動物，而一定會見到嘅就係鹿角！
(恐龍？尼斯湖水怪？)
睇完石刻之後就去食飯，食飽之後就由挪威番入芬蘭，直去酒店 -- Levi Panorama Hotel，千祈唔好睇少呢間酒店，呢一間酒店旁邊係一個滑雪場，好便滑雪人士入住，酒店設施好正好新，而且房間好大，有露台，仲有乾衣機，你無睇錯，係乾衣機，當然唔係我哋一般家用嘅乾衣機啦！係可以成套滑雪衫放入去乾嘅！
(好大間房呀，而且有露台啊！)
(由露台影番入O黎，真係好大間房)
(好大部嘅乾衣機)
食飯嘅時候，好多團友都唔知道有乾衣機，當我話出比佢哋知之後，就有人話今晚可以洗晒D衫，唔洗驚乾唔切，我就即刻提醒佢，番到上房之後，先扭濕條毛巾再放入去，睇吓部機要乾幾耐，同埋有幾嘈，費事到時洗晒D衫又乾唔切，仲要成晚無覺好瞓。
喺呢間酒店住，好多嘢都好好，唯獨食物唔太得，可能我哋係跟團，只可以食自助餐，質素一般，唔知呢度D廚房做a la carte會唔會好D呢~~
食飽之後，我哋就行咗去酒店外面，雖然有少少雨，但係呢種感覺令人覺得好舒服，食飽咗，個人就好暖，天氣就涼涼哋，有少少雨打落塊面，真係好舒服啊！
(酒店外觀)
酒店旁有一個纜車站，不過無開到，相信係載人上出滑雪嘅，而旁邊呢，都有一條滑雪道，如果可以落住雪SIR落去的話，個感覺一定好正，可惜，而家係北歐嘅夏天時間，無雪。
(纜車及滑雪道)
第3日行程就此結束。
留言列表
