松此放眼看世界

今次呢個北歐之旅已經plan咗好耐，由2011年已經開始諗，究竟係咩嘢勾起呢條筋去諗呢個地方呢？事情係由一個旅遊講座而起……

有一日，大約係8-9月吧~~見到報紙一個廣告，介紹冬天嘅北歐四國，即芬蘭、挪威、瑞典同埋丹麥，再加埋一D引死人嘅行程，例如『追蹤北極光』、『探訪聖誕老人』等等，呢D咁特別嘅行程，係我哋從未諗過嘅，所以，即刻打電話留位……聽講座！

兩星期後，就去聽講座啦，新X旅行社負責人就介紹冬天嘅北歐有乜好玩，重頭戲係北極光、住玻璃頂酒店、聖誕老人村、坐破冰船、冰海暢泳……淨係聽都覺得好好玩，好刺激，即場報名仲有優惠tim~~可惜，年尾無假，而且公司年尾至年初要搬，所以去唔到。

唔緊要！攞定D資料先，plan定2012年年尾去lor~~再唔係，搵埋美國個親戚，先去西岸探佢，玩轉美國先，之後一齊上阿拉斯加睇北極光，諗到呢一步，已經好想即刻出發…… 

後來，有朋友同我哋講，第一次去北極的話， 最好揀夏天去，因為冬天嘅北歐係永夜，即係全日都見唔到太陽，對於我哋見慣太陽嘅人，會有少少難適應。咁又係……成日都黑媽媽，而且又零下20幾度，如果一個唔好彩，零下40度仲難頂……

所以即刻再搵夏天嘅北歐有咩玩，原來夏天嘅北歐有『午夜太陽』睇，仲可以上雪山，行冰川，遊峽灣，都好似唔錯吖， 最後，我哋就揀咗翠X，因為佢係去北歐5國，即係除咗原先嘅芬蘭、挪威、瑞典同埋丹麥之外，仲去埋冰島！

既然大部份資料都已經搵到，就只欠最緊要嘅嘢 -- 申請放大假！由於今次會去15日，所以要申請兩星期假，而報團就唔可以太遲，6月出發，最遲2月就要報名；感恩地，一切順利，2012年6月16日夜晚，香港國際機場見，17號零晨直飛芬蘭首都赫爾辛基！

 PS. 正式出發前，我想先講一d開茶會嘅片段。

原來翠X係去酒店開茶會o架！由於係第一次去北歐，而且會入到北極圈，所以我都請咗半日假去聽吓個茶會。話說當日，我同老婆喺朗豪坊搵緊條路上酒店時，身邊有幾個C9行過，好大聲講嘢，C9A就話C9B唔識路，C9B就話C9C行錯路，C9C又話C9A好遲到，總之就吱吱喳喳啦，而佢哋搵緊嘅目的地好似同我哋一樣…

上到去酒店，個場都幾大，原來係一次過講晒幾日唔同日期出發嘅北歐團，每檯都有點心有春卷有炒麵，不過就唔係太熱，重點唔係食嘢，而係茶會後嘅廁所時間。

老婆發現到剛才嗰班C9都喺廁所，而且同我哋同團，唔係呀fa~~

如果佢哋真係同我哋同團，o黎緊15日仲會有d咩事發生呢？其他團友又係點嘅呢？好驚呀~~