撥款已經通過咗，係一個不變嘅事實，做市民嘅仲可以點？我相信一個地方要發展嘅話，係一定要有付出，包括土地上、金錢上及人民上。
坦白講，我係讚成起高鐵嘅，不過係咪真係要動用到669億呢？我就認為可以少d就最好啦，話晒669億係一個天文數字，用我哋打工仔唔少血汗換番o黎o架！
有一日夜晚，我路經立法會附近，見到一班人開『嘉年華會』，但當時我唔知發生咩事，只係知道好嘈好多人，為避免麻煩，我都係行開d好，番到屋企睇新聞先至知道，係第一次反高鐵人士集會，看罷，我就已經知道無論點嘈都好，個撥款一定通過。當上星期第二次會議後，都正如我所講，實通過啦，之不過，我無諗過呢班反高鐵人士會咁激。
圍堵立法會、阻止議員離開、擺街封路兼扎營、衝擊警方防線、搶奪鐵馬……我唔係想一面倒話嗰班人唔啱，而係理性少少去諗下呢件事，做完咁多呢d事之後，會對徹回撥款一事有幫助嗎？
OK，你哋想要嘅係乜？坦白講，我對整件事唔係太清楚，政府嘅方案加上人民嘅反對當中嘅細節，我真係無去暸解過，但係我會堅持一樣嘢，國有國法，家有家規，喺公司都係咁，呢個係一個不變嘅定律。
當權者，只係運用緊法律賦予佢嘅權力，去做出一d決定，佢又何罪之有呢？佢有諮詢過民意，又同立法會議員傾過，喺『少數服從多數』嘅原則下做出呢個決定，我覺得無問題wor！有人話特首係慘勝，因為支持同反對嘅百分比係47%同45%，所以會為佢之後嘅施政添上唔少麻煩及阻力。
在我而言，無話慘勝唔慘勝，每一個政策嘅推出，總會有一班人喺度嘈呢樣嘈嗰樣，當中又有幾多人係真係反對個議案呢？為反對而反對嘅又有幾多呢？懷著政治動機想收買人心嘅又有幾多呢？
我更想講嘅係
1﹞民主嘅社會唔係代表出聲嗰班人就代表晒全世界人，甚至逼令當權者就範。民主，在我而言，係你有權去發言，當權者有責任去聽，而最終決策權係當權者，呢個係庄閒原則，每一個地方都係咁，自己屋企係咁，公司都係咁，唔鐘意嘅話，請去另一個家，另一間公司，繼續尋找你心入面嘅烏托邦。
2﹞當日喺立法會投票嗰班人，都係由人民去投票選出o黎，即係話大家都認同佢哋可以代表香港人去作決定，但係當佢哋以『少數服從多數』嘅原則，作出一個非『大家』嘅決定時，做乜要係門外搞事呢？難道剷平個立法會會改變到個事實嗎？
3﹞警方為維持秩序而奉召到場，好明顯，人多自不然會有混亂事件發生，佢哋嘅出現係合情合理，佢哋面對無理，甚至不必要嘅挑釁時都可以好克制，點解大家依然當佢哋好似阻住地球轉嘅人呢？你有呀媽生，d警察都有。
4﹞一班年輕人以苦行及絕食去話比人知佢哋嘅不滿以及想法，我好欣賞佢哋，因為佢哋用咗一個唔影響大家嘅大前題去表達自己；反之，有一班人製造混亂，阻塞交通，影響眾多市民生活，呢d方法我絕對唔認同，就好似大耳窿收數一樣，唔係直接搵個債仔，而係不斷騷擾債仔身邊d人而逼佢還錢，幾咁無癩！
香港人呀香港人，大家都克制d啦，有班人為爭取民主而換得一部坦克車，我唔想見到20年後換o黎嘅係比坦克車更甚嘅嘢，比d耐性啦，如果我哋呢d行為係等於民主的話，只會嚇親中央政府，更加會視民主為洪水猛獸；再極端d去講，當中央要干涉香港管治時，我哋現時所享有嘅自由，隨時都會被沒收。
聽我講啦香港人，冷靜d啦！談判，係要相方讓步先可以達成協議，否則，呢d就叫做逼令就範。
留言列表
